ಯೋಹಾನೆ 17
17
ಯೇಸು ತನ ಶಿಷ್ಯೆರೆಗ್ ಪ್ರಾರ್ಥನೆ ಮಲ್ಪುನು
1ಯೇಸು ಈ ಪಾತೆರೊಲೆನ್ ಪಂಡಿ ಬೊಕ್ಕ ಬಾನದಂಚಿ ಕಣ್ಣ್ ಲಕ್ಕಾದ್ ತೂದು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಸಮಯ ಬೈದ್‌ಂಡ್, ನಿನ ಮಗನ್ ಮೈಮೆ ಪಡೆಪಾಲ, ಅಪಗ ನಿನ ಮಗೆ ನಿನನ್ ಮೈಮೆ ಪಡೆಪಾವೆರೆ ಆಪುಂಡು. 2ಈ ಆಯಗ್ ಏರೇರೆನ್ ಕೊರ್ತನಾ ಅಕ್ಲೆಗ್ ಮಾತೆರೆಗ್ಲಾ ನಿತ್ಯಜೀವೊನು ಕೊರೊಡು ಅಂದ್‌ದ್ ಆಯಗ್ ಮಾತ ನರಮಾನಿಲೆ ಮಿತ್ತ್ ಅಧಿಕಾರ ಕೊರ್ತ ಅತ್ತಾ? 3ಒರಿಯೇ ನಿಜ ದೇವೆರ್ ಆದುಪ್ಪು ನಿನನ್ಲಾ ಈ ಕಡಪುಡ್ದಿ ಯೇಸು ಕ್ರಿಸ್ತನ್ಲಾ ತೆರಿಯೊನುನವೇ ನಿತ್ಯಜೀವ. 4ಈ ಕೊರ್ತಿನ ಕೆಲಸೊನು ಯಾನ್ ಮಲ್ತ್‌ದ್ ಮುಗಿತೆ, ನಿನನ್ ಭೂಲೋಕೊಡು ಮೈಮೆ ಪಡೆಪಾಯೆ. 5ಅಮ್ಮೆರೇ, ಈ ಎನನ್ ಮೈಮೆ ಪಡೆಪಾಲ ಲೋಕ ಉಂಡಾಪಿನೆಕ್ಕ್ ದುಂಬು ನಿನ ಕೈತಲ್ ಎಂಕಿತ್ತಿ ಮೈಮೆಡ್ದೇ ಎನನ್ ಇತ್ತೆ ಮೈಮೆ ಪಡೆಪಾಲ.
6“ಲೋಕದ ಉಲಯಿಡ್ದ್ ಈ ಎಂಕ್ ಕೊರಿ ನರಮಾನಿಲೆಗ್ ನಿನ ಪುದರ್‌ನ್ ತೆರಿಪಾಯೆ. ಮೊಕುಲು ನಿನ್ನಾಕುಲು ಆದಿತ್ತೆರ್ಡಲಾ ಈ ಮೊಕ್ಲೆನ್ ಎಂಕ್ ಕೊರಿಯ. ಬೊಕ್ಕ ಮೊಕುಲು ನಿನ ಪಾತೆರೊನು ಕೈಕೊಂದು ನಡತ್ತ್‌ದೆರ್‌ 7ಈ ಎಂಕ್ ಕೊರಿನವು ಮಾತಲಾ ನಿನಡ್ದೇ ಬೈದಿನವು ಅಂದ್‌ದ್ ಇತ್ತೆ ಮೊಕುಲು ತೆರಿಯೊಂದೆರ್. 8ಎಂಚಂದ್ಂಡ ಈ ಎಂಕ್ ಕೊರಿ ಪಾತೆರೊಲೆನ್ ಯಾನ್ ಮೊಕ್ಲೆಗ್ ಕೊರ್ತೆ. ಮೊಕುಲು ಆ ಪಾತೆರೊಲೆನ್ ಕೈಕೊಂದು, ಯಾನ್ ನಿನ ಕೈತಲ್‌ಡ್ದ್ ಬೈದಿನಾಯೆ ಅಂದ್‌ದ್ ನಿಜಾದ್ ತೆರಿಯೊಂದು, ಈಯೇ ಎನನ್ ಕಡಪುಡ್ದು ಕೊರ್ತಿನಾಯೆ ಅಂದ್‌ದ್ ನಂಬುದೆರ್.
9“ಯಾನ್ ಮೊಕ್ಲೆಗಾದ್ ಕೇನೊನುವೆ. ಲೋಕೊಗಾದ್ ಪ್ರಾರ್ಥನೆ ಮಲ್ಪಂದೆ, ಈ ಎಂಕ್ ಕೊರ್ತಿನ ಜನೊಕುಲೆಗಾದ್ ಪ್ರಾರ್ಥನೆ ಮಲ್ಪುವೆ, ದಾಯೆಗ್ ಪಂಡ ಮೊಕುಲು ನಿನ್ನಕುಲಾದುಲ್ಲೆರ್. 10ಎನ್ನವು ಮಾತಲಾ ನಿನ್ನವೇ, ನಿನ್ನವು ಮಾತಲಾ ಎನ್ನವು. ಬೊಕ್ಕ ಮೊಕ್ಲೆಡ್ದ್ ಎಂಕ್ ಮೈಮೆ ಉಂಡಾತ್ಂಡ್. 11ನನ ಯಾನ್ ಲೋಕೊಡು ಉಪ್ಪುಜಿ, ಆಂಡ ಮೊಕುಲು ಲೋಕೊಡು ಉಪ್ಪುನಾಕುಲು, ಯಾನ್ ನಿನ ಕೈತಲ್‌ಗ್ ಬರ್ಪೆ. ಪರಿಶುದ್ಧ ಅಮ್ಮೆರೇ, ಎಂಕುಲು ಒಂಜಾದ್ ಇತ್ತಿಲೆಕ್ಕ ಮೊಕುಲುಲಾ ಒಂಜಾದುಪ್ಪೊಡು ಅಂದ್‌ದ್ #17:11 ಕೆಲವು ಮೂಲ ಬರವುಲೆಡ್ ಇಂಚ ಬರೆದುಂಡು, “ಈ ಎಂಕ್ ಕೊರ್ತಿನಾಕುಲೆನ್ ನಿನ ಪುದರ್‌ಡ್ ಕಾತೊನ್ಲ.” ಈ ಎಂಕ್ ಕೊರಿ ನಿನ ಪುದರ್‌ಡ್ ಮೊಕ್ಲೆನ್ ಕಾತೊನ್ಲ. 12ಯಾನ್ ಮೊಕ್ಲೆಡೊಪ್ಪ ಉಪ್ಪುನಗ, ಈ ಎಂಕ್ ಕೊರ್ತಿನ ನಿನ ಪುದರ್‌ಡ್ ಮೊಕ್ಲೆನ್ ಕಾತೊಂಡೆ. #17:12 ಕೆಲವು ಮೂಲ ಬರವುಲೆಡ್ ಇಂಚ ಬರೆದುಂಡು, “ಈ ಎಂಕ್ ಕೊರ್ತಿನಾಕುಲೆನ್ ನಿನ ಪುದರ್‌ಡ್ ಕಾತೊನ್ಲ.” ಶಾಸ್ತ್ರದ ಪಾತೆರ ನಡಪುಲೆಕ್ಕ ನಾಶನೊಗು ಗುರಿ ಆಯಿ ಮಗೆನೇ ಅತ್ತಂದೆ ಮೊಕ್ಲೆಡ್ ಬೇತೆ ಏರ್ಲಾ ನಾಶ ಆತಿಜೆರ್. 13ಆಂಡ ಇತ್ತೆ ನಿನ್ನಡೆ ಬರ್ಪಿನಾಯೆ ಆದುಲ್ಲೆ, ಅವೆಡ್ದಾವರ ಮೊಕ್ಲೆಡ್ ಎನ ಸಂತೋಷ ಪರಿಪೂರ್ಣ ಆಪಿಲೆಕ್ಕ ಈ ಪಾತೆರೊಲೆನ್ ಲೋಕೊಡು ಇತ್ತ್‌ದ್ ಪನೊಂದುಲ್ಲೆ. 14ಯಾನ್ ನಿನ ಪಾತೆರೊನು ಅಕ್ಲೆಗ್ ತೆರಿಪಾದೆ, ಯಾನ್ ಲೋಕದಾಯೆ ಅತ್ತಂದೆ ಉಪ್ಪುಲೆಕ್ಕ ಮೊಕುಲುಲಾ ಲೋಕದಕುಲತ್ತ್, ಅಂಚಾದ್ ಲೋಕ ಮೊಕ್ಲೆನ್ ಪಗೆ ಮಲ್ಪುಂಡು. 15ಮೊಕ್ಲೆನ್ ಲೋಕೊಡ್ದು ದೆತ್ತೊಂದು ಪೋವೊಡಂದ್‌ದ್ ಯಾನ್ ಕೇನುಜಿ, ಸೈತಾನ ಕೈಡ್ದ್ ತಪ್ಪಾಲ ಅಂದ್‌ದ್ ನಟ್ಟೊಂದುಲ್ಲೆ. 16ಯಾನ್ ಲೋಕದಾಯೆ ಆದುಪ್ಪಂದಿಲೆಕ್ಕನೇ ಮೊಕುಲುಲಾ ಲೋಕದಕುಲತ್ತ್, 17ನಿನ ಸತ್ಯೊಡು ಅಕ್ಲೆನ್ ಪರಿಶುದ್ಧ ಮಲ್ಪುಲ. ನಿನ ಪಾತೆರ ಸತ್ಯದವು. 18ಈ ಎನನ್ ಲೋಕೊಗು ಕಡಪುಡ್ದು ಕೊರಿಲೆಕ್ಕನೇ ಯಾನ್ಲಾ ಮೊಕ್ಲೆನ್ ಲೋಕೊಗು ಕಡಪುಡ್ದು ಕೊರಿಯೆ. 19ಮೊಕುಲು ನಿಜಾದ್‌ಲಾ ಸತ್ಯೊಡು ಪರಿಶುದ್ಧೆರ್ ಆತಿನಕುಲಾದುಪ್ಪೊಡು ಅಂದ್‌ದ್ ಮೊಕ್ಲೆಗಾದ್ ಯಾನ್ ಎನನ್ ಪರಿಶುದ್ಧ ಮಲ್ತೊನ್ವೆ.
20“ಆಂಡ ಮೊಕ್ಲೆಗಾದ್ ಮಾತ್ರ ಅತ್ತಂದೆ, ಮೊಕ್ಲೆನ ಬೋಧನೆನ್ ಕೇಂಡ್ದ್ ಎನನ್ ನಂಬುನಾಕುಲೆಗಾದ್‌ಲಾ ನಟ್ಟೊಂದುಲ್ಲೆ. 21ಅಮ್ಮೆರೇ, ಮಾತೆರ್ಲಾ ಒಂಜಾದುಪ್ಪೊಡು ಅಂದ್‌ದ್ ಈ ಎನನ್ ಕಡಪುಡ್ದು ಕೊರ್ತ ಅಂದ್‌ದ್ ಲೋಕದಾಕುಲು ನಂಬುನೆಕ್ಕಾದ್, ಈ ಎನಡ್ ಯಾನ್ ನಿನಡ್ ಉಪ್ಪುಲೆಕ್ಕ ಅಕುಲುಲಾ ನಮಡ್ ಒಂಜಾದುಪ್ಪೊಡು ಅಂದ್‌ದ್‌ಲಾ ಯಾನ್ ನಟ್ಟೊನ್ವೆ. 22ಎಂಕುಲು ಒಂಜಾದುಪ್ಪುಲೆಕ್ಕ ಅಕುಲುಲಾ ಒಂಜಾದುಪ್ಪೊಡು ಅಂದ್‌ದ್, ಈ ಎಂಕ್ ಕೊರ್ತಿ ಮೈಮೆನ್ ಯಾನ್ ಅಕ್ಲೆಗ್ ಕೊರ್ತೆ. 23ಯಾನ್ ಅಕ್ಲೆಡಲಾ ಈ ಎನಡಲಾ ಉಪ್ಪುನಗ, ಅಕ್ಲೆನ ಸಮ್ಮಂಧಲಾ ತೋಜಿದ್ ಬರ್ಪಿನೆಡ್ದ್, ಈ ಎನನ್ ಕಡಪುಡ್ದು ಕೊರ್ತ ಪಂಡ್ದ್‌ಲಾ ಈ ಎನನ್ ಪ್ರೀತಿ ಮಲ್ತಿಲೆಕ್ಕ ಅಕ್ಲೆನ್ಲಾ ಈ ಪ್ರೀತಿ ಮಲ್ತ್‌ದ ಪಂಡ್ದ್‌ಲಾ ಲೋಕೊಗು ತೆರಿದ್ ಬರ್ಪುಂಡು.
24“ಅಮ್ಮೆರೇ, ಈ ಏರೆನ್ ಎಂಕ್ ಕೊರ್ತನಾ ಅಕುಲು ಯಾನ್ ಉಪ್ಪು ಜಾಗ್‌ಡ್ ಎನ ಒಟ್ಟುಗು ಇತ್ತೊಂದು, ಲೋಕ ಉಂಡಾಪಿನೆಡ್ದ್ ದುಂಬೇ ಈ ಎನನ್ ಪ್ರೀತಿ ಮಲ್ತ್‌ದ್ ಎಂಕ್ ಕೊರಿ ಮೈಮೆನ್ ಅಕುಲು ತೂವೊಡು ಅಂದ್‌ದ್ ಬಯಕುವೆ. 25ನೀತಿದ ಅಮ್ಮೆರೇ, ಲೋಕ ಆಂಡಲಾ ನಿನನ್ ತೆರಿಯಿಜಿ. ಆಂಡ ಯಾನ್ ನಿನನ್ ತೆರಿದೆ, ಬೊಕ್ಕ ಎನ ಶಿಷ್ಯೆರ್‌ಲು, ಈಯೇ ಎನನ್ ಕಡಪುಡ್ದ ಅಂದ್‌ದ್ ತೆರಿಯೊಂದೆರ್. 26ಯಾನ್ ಅಕ್ಲೆಗ್ ನಿನ ಪುದರ್‌ನ್ ತೆರಿಪಾದೆ ನನಲಾ ತೆರಿಪಾವೆ. ದಾಯೆಗಂದ್ಂಡ ಈ ಎನ ಮಿತ್ತ್ ದೀತಿ ಪ್ರೀತಿ ಅಕ್ಲೆಡ ಉಪ್ಪೊಡಂದ್‌ದ್ ಯಾನ್ಲಾ ಅಕ್ಲೆಡ ಉಪ್ಪೊಡಂದ್‌ದ್ ಪ್ರಾರ್ಥನೆ ಮಲ್ಪುವೆ.”
Currently Selected:
ಯೋಹಾನೆ 17: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
