ಯೋಹಾನೆ 19

1ಐಡ್ದ್ ಬೊಕ್ಕ ಪಿಲಾತೆ ಯೇಸುನು ಲೆತ್ತೊಂದು ಪೋದು ಚಾಟಿಡ್ ಹಾಕಾಯೆ. 2ಸಿಪಾಯಿಲು ಮುಳ್ಳುದ ಕಿರೀಟ ಮುಡೆದ್ ಆಯನ ತರೆತ ಮಿತ್ತ್ ದೀದ್ ಕೆಂಪು ಒಲ್ಲಿನ್ ಪೊದಿಪಾದ್ 3ಆಯ ಕೈತಲ್‌ ಬತ್ತ್‌ದ್, “ಯೆಹೂದ್ಯೆರೆ ಅರಸೋ ನಿಕ್ಕ್ ವಂದನೆ!” ಅಂದ್‌ದ್ ಆಯ ಕೆಪ್ಪೆಗ್ ಹಾಕಿಯೆರ್.

4ಐಡ್ದ್ ಬೊಕ್ಕ ಪಿಲಾತೆ ಕುಡ ಪಿದಾಯಿ ಬತ್ತ್‌ದ್ ಯೆಹೂದ್ಯೆರೆಗ್, “ಎಂಕ್ ಆಯಡ ವಾ ಅಪರಾಧಲಾ ತೋಜುಜಿ ಅಂದ್‌ದ್ ನಿಕ್ಲೆಗ್ ತೆರಿಯುಲೆಕ್ಕ ಆಯನ್ ನಿಕ್ಲೆ ಕೈತಲ್ ಪಿದಯಿ ಕನಪೆ, ತೂಲೆ!” ಅಂದ್‌ದ್ ಪಂಡೆ. 5ಅಪಗ ಯೇಸು ಮುಳ್ಳುದ ಕಿರೀಟೊನ್ಲಾ ಕೆಂಪು ಒಲ್ಲಿನ್ ತುತ್ತೊಂದು ಪಿದಯಿ ಬತ್ತೆ. ಪಿಲಾತೆ ಅಕ್ಲೆಡ, “ಇಂದಾ, ಈ ನರಮಾನಿ!” ಪಂಡೆ

6ಪ್ರಧಾನಯಾಜಕೆರ್‌ಲಾ ಸಿಪಾಯಿಲುಲಾ ಆಯನ್ ತೂದು, “ಕ್ರುಸ್ಸುಗು ಪಾಡ್ಪಾಲ ಕ್ರುಸ್ಸುಗು ಪಾಡ್ಪಾಲ!” ಅಂದ್‌ದ್ ಅರಬಾಯಿ ದೀಯೆರ್. ಪಿಲಾತೆ ಅಕ್ಲೆಡ, “ಬೋಡಾಂಡ ನಿಕುಲೇ ಆಯನ್ ದೆತ್ತೊಂದು ಪೋದು ಕ್ರುಸ್ಸುಗು ಪಾಡ್ಲೆ, ಎಂಕ್ ಆಯಡ ವಾ ಅಪರಾಧಲಾ ತೋಜುಜಿ,” ಪಂಡೆ

7ಯೆಹೂದ್ಯೆರ್ ಆಯಡ, “ಎಂಕ್ಲೆಗ್ ಒಂಜಿ ನ್ಯಾಯಕಟ್ಟ್ ಉಂಡು. ಆ ಕ್ರಮತ್ತ ಪ್ರಕಾರ ಉಂಬೆ ಸೈಯೊಡಾಯಿನಾಯೆ, ದಾಯೆಗಂದ್ಂಡ ಆಯೆ ತನನ್ ತಾನೇ ದೇವೆರೆ ಮಗೆ ಮಲ್ತೊಂದೆ,” ಅಂದ್‌ದ್ ಉತ್ತರ ಕೊರಿಯೆರ್.

8ಪಿಲಾತೆ ಈ ಪಾತೆರೊನು ಕೇಂಡ್ದ್ ಬೊಕ್ಕಲಾತ್ ಪೋಡಿದ್ 9ಪಿರ ಅರಮನೆತ್ತ ಉಲಯಿ ಪೋದು, “ಈ ಒಲ್ತುಡ್ದು ಬೈದಿನಾಯೆ,” ಅಂದ್‌ದ್ ಯೇಸುಡ ಕೇಂಡೆ. ಐಕ್ ಯೇಸು ಆಯಗ್ ಉತ್ತರ ಕೊರ್ಜೆ. 10ಐಕ್ ಪಿಲಾತೆ, “ಈ ಎನಡ ಪಾತೆರುಜನಾ? ನಿನನ್ ಬುಡ್ಪಾವುನ ಅಧಿಕಾರಲಾ ನಿನನ್ ಕ್ರುಸ್ಸುಗು ಪಾಡಾವುನ ಅಧಿಕಾರಲಾ ಎಂಕ್ ಉಂಡು ಪನ್ಪಿನವು ನಿಕ್ಕ್ ಗೊತ್ತಿಜ್ಜಾ?” ಅಂದ್‌ದ್ ಆಯಡ ಕೇಂಡೆ.

11ಐಕ್ ಯೇಸು, “ಮಿತ್ತ್‌ಡ್ದ್ ನಿಕ್ಕ್ ಅಧಿಕಾರ ಕೊರಿಜಾಂಡ ಎನ ಮಿತ್ತ್ ನಿಕ್ಕ್ ವಾ ಅಧಿಕಾರಲಾ ಇತ್ತ್‌ದ್ವಂದ್. ಅವೆಡ್ದಾವರ ಎನನ್ ನಿಕ್ಕ್ ಒಪ್ಪಿಸಾದಿನಾಯಗ್ ಹೆಚ್ಚ್ ಪಾಪ ಉಂಡು,” ಅಂದ್‌ದ್ ಪಂಡೆ.

12ಈ ಪಾತೆರದ ದಿಸೆಡ್ದ್ ಪಿಲಾತೆ ಆಯನ್ ಬುಡ್ಪಾವೆರೆ ಪೇಚಾಡಿಯೆ, ಆಂಡ ಯೆಹೂದ್ಯೆರ್, “ಈ ಉಂಬ್ಯನ್ ಬುಡ್ಪಾಯಡ ಈ ಚಕ್ರವರ್ತಿನ ಸ್ನೇಹಿತೆ ಅತ್ತ್, ತನನ್ ಅರಸು ಮಲ್ತೊನುನಾಯೆ ಚಕ್ರವರ್ತಿಗ್ ವಿರೋಧಿ,” ಅಂದ್‌ದ್ ಬೊಬ್ಬೆ ಪಾಡಿಯೆರ್.

13ಈ ಪಾತೆರೊಲೆನ್ ಪಿಲಾತೆ ಕೇಂಡ್ದ್ ಯೇಸುನು ಪಿದಯಿ ಲೆಪ್ಡಾದ್, ಇಬ್ರಿಯ ಪಾತೆರೊಡು ಗಬ್ಬಥಾ ಪನ್ಪಿ ಕಲ್ಲ್‌ದಕಟ್ಟೆದ ಜಾಗ್‌ಗ್ ಪೋದು ನ್ಯಾಯಾಸನದ ಮಿತ್ತ್ ಕುಲ್ಲೊಂಡೆ. 14ಪಸ್ಕ ಪರ್ಬದ ತಯಾರ್ ಮಲ್ಪುನ ದಿನತಾನಿ ಹೆಚ್ಚ್‌ಕಡಿಮೆ #19:14 ಆಜನೆ ಗಂಟೆ ಮಧ್ಯಾಹ್ನ ಆದಿತ್ತ್ಂಡ್. ಪಿಲಾತೆ ಯೆಹೂದ್ಯೆರೆಡ, “ತೂಲೆ ನಿಕ್ಲೆನ ಅರಸು!” ಪಂಡೆ.

15ಐಕ್ ಅಕುಲು, “ಆಯನ್ ಕೆರ್ಪಾಲ, ಕೆರ್ಪಾಲ, ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಅರಬಾಯಿ ದೀಯೆರ್. ಪಿಲಾತೆ, “ನಿಕ್ಲೆ ಅರಸುನು ಕ್ರುಸ್ಸುಗು ಪಾಡಾವೊಡಾ?” ಅಂದ್‌ದ್ ಪಂಡಿನೆಕ್ಕ್ ಪ್ರಧಾನಯಾಜಕೆರ್, “ಕೈಸರೆ ಅತ್ತಂದೆ ಎಂಕ್ಲೆಗ್ ಬೇತೆ ಅರಸು ಇಜ್ಜೆ,” ಅಂದ್‌ದ್ ಉತ್ತರ ಕೊರಿಯೆರ್.

16ಅಪಗ ಆಯೆ ಯೇಸುನು ಕ್ರುಸ್ಸುಗು ಪಾಡಾವರೆ ಅಕ್ಲೆನ ವಶೊಕ್ಕು ಕೊರಿಯೆ.

ಯೇಸುನು ಕ್ರುಸ್ಸುಗು ಪಾಡ್ಪಾವುನವುಲಾ ಕೌಂಪುನವುಲಾ

(ಮತ್ತಾಯೆ 27:32-44; ಮಾರ್ಕೆ 15:21-32; ಲೂಕೆ 23:26-43)

ಅಕುಲು ಯೇಸುನು ಲೆತ್ತೊಂದು ಪೋಯೆರ್. 17ಯೇಸು ತನ ಕ್ರುಸ್ಸುನು ತಾನೇ ತುಂಬೊಂದು, ಕಪಾಲ ಪನ್ಪಿ ಜಾಗ್‌ಗ್ ಪೋಯೆ. ನೆಕ್ಕ್ ಇಬ್ರಿಯ ಭಾಷೆಡ್ “ಗೊಲ್ಗೊಥಾ” ಅಂದ್‌ದ್ ಪುದರ್. 18ಅಲ್ಪ ಆಯನ್ಲಾ ಆಯ ಒಟ್ಟುಗು ಬೇತೆ ಇರ್ವೆರೆನ್ಲಾ ಕ್ರುಸ್ಸುಗು ಪಾಡಿಯೆರ್. ಅಕ್ಲೆಡ್ ಒರಿಯನ್ ಅಂಚಿ ಬೊಕ್ಕೊರಿಯನ್ ಇಂಚಿ ಪಾಡ್ದ್ ನಡುಟು ಯೇಸುನು ದೀಯೆರ್. 19ಉಂದತ್ತಂದೆ ಪಿಲಾತೆ, “ನಜರೇತ್‌ದ ಯೇಸು ಯೆಹೂದ್ಯೆರೆ ಅರಸು,” ಪನ್ಪಿ ಒಂಜಿ ಮೇಲ್ಬರವುನು ಬರೆದ್ ಯೇಸುನ ಕ್ರುಸ್ಸುದ ಮಿತ್ತ್ ಪತ್ತಾಯೆ. 20ಅಕುಲು ಯೇಸುನು ಕ್ರುಸ್ಸುಗು ಪಾಡಿನ ಜಾಗ್ ಪಟ್ಟಣಗ್ ಕೈತಲ್‌ ಇತ್ತಿನೆಡ್ದ್, ಯೆಹೂದ್ಯೆರೆಡ್ ಮಸ್ತ್ ಜನ ಕ್ರುಸ್ಸುದ ಮಿತ್ತ್ ಪತ್ತಾದಿನ ಮೇಲ್ಬರವುನು ಓದಿಯೆರ್. ಅವು ಇಬ್ರಿಯ ಲಾತೀನ್ ಬೊಕ್ಕ ಗ್ರೀಕ್ ಭಾಷೆಡ್ ಬರೆದಿತ್ತ್‌ಂಡ್. 21ಅಂಚಾದುಪ್ಪುನಗ ಯೆಹೂದ್ಯೆರೆ ಪ್ರಧಾನಯಾಜಕೆರ್ ಪಿಲಾತಡ, “‘ಯೆಹೂದ್ಯೆರೆ ಅರಸು,’ ಅಂದ್‌ದ್ ಬರೆಯಂದೆ, ‘ಯಾನ್ ಯೆಹೂದ್ಯೆರೆ ಅರಸು ಅಂದ್‌ದ್ ಪನ್ತಿನಾಯೆ,’ ಅಂದ್‌ದ್ ಬರೆಯೊಡು,” ಪಂಡೆರ್.

22ಐಕ್ ಪಿಲಾತೆ, “ಯಾನ್ ಬರೆತಿನ ಬರೆದಾಂಡ್.” ಅಂದ್‌ದ್ ಪಂಡೆ.

23ಸಿಪಾಯಿಲು ಯೇಸುನು ಕ್ರುಸ್ಸುಗು ಪಾಡಿ ಬೊಕ್ಕ ಅಕುಲು ಯೇಸುನ ಪೊದೆಪುನು ದೆತ್ತೊಂದು ನಾಲ್ ಪಾಲ್ ಮಲ್ತೊಂದು ಒರಿ ಒರಿ ಸಿಪಾಯಿಗ್ ಒಂಜೊಂಜಿ ಪಾಲ್‌ದಲೆಕ್ಕ ಪಾಲ್ ಮಲ್ತೊಂಡೆರ್. ಯೇಸುನ ಉಲಯಿದ ಉದ್ಧ ಅಂಗಿನ್ಲಾ ದೆತ್ತೊಂಡೆರ್. ಆಂಡ ಆ ಅಂಗಿಗ್ ಪೊಲಿಗೆ ಇತ್ತ್‌ಜಿ. ಅವು ಮಿತ್ತ್‌ಡ್ದ್ ತಿರ್ತ್ ಮುಟ್ಟ ನೆಯಿತಿನವು ಆದಿತ್ತ್ಂಡ್, 24ಅವೆನ್ ತೂದು ಅಕುಲು, “ನಮ ಉಂದೆನ್ ಪರ್ಪೆರೆ ಬಲ್ಲಿ, ಚೀಟ್ ಪಾಡ್ದ್ ಏರೆಗ್ ಬರ್ಪುಂಡಾ ತೂಕ.” ಅಂದ್‌ದ್ ಪಾತೆರೊಂಡೆರ್. ಉಂದೆಡ್ದ್

“ಎನ ಕುಂಟುಲೆನ್ ತನ್ಕುಲೆಡ್ ಪಾಲ್ ಮಲ್ತೊಂಡೆರ್.

ಎನ ಅಂಗಿಗಾದ್ ಚೀಟ್ ಪಾಡಿಯೆರ್.”

ಪನ್ಪಿ ಶಾಸ್ತ್ರದ ಪಾತೆರ ನಡತ್ಂಡ್.

ಸಿಪಾಯಿಲು ಉಂದೆನ್ ಮಾತ ಮಲ್ತೆರ್.

25ಯೇಸುನ ಕ್ರುಸ್ಸುದ ಕೈತಲ್‌ ಆಯ ಅಪ್ಪೆ, ಅಪ್ಪೆನ ಮೆಗ್ದಿ, ಕ್ಲೋಪನ ಬೊಡೆದಿ ಆಯಿ ಮರಿಯ, ಮಗ್ದಲದ ಮರಿಯಲಾ ಉಂತುದಿತ್ತೆರ್. 26ಯೇಸು ತನ ಅಪ್ಪೆನ್ಲಾ ಕೈತಲ್‌ಡ್ ಉಂತುದಿತ್ತಿ ಪ್ರೀತಿದ ಶಿಷ್ಯನ್ಲಾ ತೂದು, ಅಪ್ಪೆಗ್, “ಅಮ್ಮಾ, ತೂಲ ನಿನ ಮಗೆ!” ಪಂಡೆ.

27ಐಡ್ದ್ ಬೊಕ್ಕ ಆ ಶಿಷ್ಯಡ, “ಇಂದಾ ನಿನ ಅಪ್ಪೆ!” ಪಂಡೆ. ಆ ಗಳಿಗೆಡ್ದ್ ಆ ಶಿಷ್ಯೆ ಆಲೆನ್ ತನ ಇಲ್ಲಡೇ ತಾಂಕಿಯೆ.

ಯೇಸುನ ಮರಣ

(ಮತ್ತಾಯೆ 27:45-56; ಮಾರ್ಕೆ 15:33-41; ಲೂಕೆ 23:44-49)

28ಉಂದು ಆಯಿ ಬೊಕ್ಕ ಯೇಸು ಇತ್ತೆ ಮಾತ ಮುಗಿಂಡ್ ಪಂಡ್ದ್ ತೆರಿದ್, ಶಾಸ್ತ್ರದ ಪಾತೆರ ನಡಪುಲೆಕ್ಕ, “ಎಂಕ್ ಬಾಜೆಲ್ ಆಪುಂಡು,” ಪಂಡ್ದ್ ಯೇಸು ಪಂಡೆ.

29ಅಲ್ಪ ಪುಳಿರಸ ದಿಂಜಿದಿ ಕಡ್ಯ ದೀದ್ ಇತ್ತ್ಂಡ್. ಅಕುಲು ಸ್ಪಂಜಿನ್ ಪುಳಿರಸೊಟು ಮುರ್ಕಾದ್, ಅವೆನ್ ಹಿಸ್ಸೋಪ್ ಗಿಡತ ಕೋಲುಗು ತಿಕ್ಕಾದ್, ಯೇಸುನ ಬಾಯಿಗ್ ಮುಟ್ಟಾಯೆರ್. 30ಯೇಸು ಆ ಪುಳಿರಸೊನು ದೆತ್ತೊಂಡಿ ಬೊಕ್ಕ “ತೀರ್‌ಂಡ್” ಅಂದ್‌ದ್ ತರೆನ್ ತಗ್ಗಾದ್ ತನ ಪ್ರಾಣನೊನು ದೇವೆರೆಗ್ ಒಪ್ಪಿಸಾದ್ ಕೊರಿಯೆ.

ಯೇಸುನ ಅಲ್ಲೆನ್ ನೋಂಪುನವು

31ಆ ಪೊರ್ತು ತಯಾರ್ ಮಲ್ಪುನ ದಿನ ಆದುಪ್ಪುನೆಡ್ದ್ ಯೆಹೂದ್ಯೆರ್, ಸಬ್ಬತ್‌ದಿನೊಕುಲೆಡ್ ಸೈತಿ ಪುಣೊಕುಲು ಕ್ರುಸ್ಸುದ ಮಿತ್ತ್ ಉಪ್ಪೆರೆ ಬಲ್ಲಿ ಅಂದ್‌ದ್ ಪಿಲಾತಡ, ಅಕ್ಲೆ ಕಾರ್‌ಲೆನ್ ಪೊಲ್ತುದು ಅಕ್ಲೆನ್ ಕ್ರುಸ್ಸುಡ್ದು ದೆತ್ತ್‌ದ್ ಪಾಡೊಡು ಅಂದ್‌ದ್ ಕೇಂಡೊಂಡೆರ್. ದಾಯೆ ಪಂಡ ಆ ಸಬ್ಬತ್‌ದಿನ ಬಾರಿ ವಿಶೇಷದ ದಿನ. 32ಅವೆಡ್ದಾವರ ಸಿಪಾಯಿಲು ಬತ್ತ್‌ದ್ ಸುರುತ್ತಾಯನ ಕಾರ್‌ಲೆನ್ಲಾ ಯೇಸು ಒಟ್ಟುಗು ಕ್ರುಸ್ಸುಗು ಪಾಡ್ಪಾವೊಂದಿನ ಬೊಕ್ಕೊರಿಯನ ಕಾರ್‌ಲೆನ್ಲಾ ಪೊಲ್ತೆರ್. 33ಆಂಡ ಯೇಸುನ ಕೈತಲ್‌ ಬನ್ನಗ ಯೇಸು ಅಪಗನೆ ಸೈತ್‌ದಿತ್ತಿನೆನ್ ಅಕುಲು ತೂದು ಆಯ ಕಾರ್‌ಲೆನ್ ಪೊಲ್ತ್‌ಜೆರ್. 34ಆಂಡಲಾ ಸಿಪಾಯಿಲೆಡ್ ಒರಿ ಬರ್ಚಿಡ್ ಆಯ ಅಲ್ಲೆಗ್ ನೋಂತೆ, ನೋಂತಿ ಕೂಡ್ಲೆ ನೆತ್ತೆರ್‌‌ಲಾ ನೀರ್‌ಲಾ ಜತ್ತ್ಂಡ್. 35ಅವೆನ್ ತೂಯಿನಾಯನೇ ಸಾಕ್ಷಿ ಪನ್ತೆ. ಆಯ ಸಾಕ್ಷಿ ಸತ್ಯದವೇ ತಾನ್ ಪನ್ಪಿನವು ಸತ್ಯದವು ಅಂದ್‌ದ್ ಆಯೆ ತೆರಿದೆ. ನಿಕುಲುಲಾ ಉಂದೆನ್ ನಂಬೊಡು ಅಂದ್‌ದ್ ಪನ್ತೆ. 36ದಾಯೆ ಪಂಡ, “ಆಯನ ಒಂಜಿ ಎಲುಲಾ ಪೊಲ್ಪೆರೆ ಬಲ್ಲಿ” ಅಂದ್‌ದ್ ಶಾಸ್ತ್ರೊಡು ಬರೆಯಿಲೆಕ್ಕ ಉಂದು ಮಾತ ನಡತ್ಂಡ್. 37ಬೊಕ್ಕ “ಅಕುಲು ತನ್ಕುಲು ಬೆತ್ತ್‌ದಿನಾಯನ್ ದಿಟ್ಟಿದ್ ತೂಪೆರ್” ಅಂದ್‌ದ್ ಶಾಸ್ತ್ರೊಡು ಬೊಕ್ಕೊಂಜಿ ಪಾತೆರ ಪಂಡ್‌ದುಂಡು.

ಯೇಸುನ ಸಮಾಧಿ

(ಮತ್ತಾಯೆ 27:57-61; ಮಾರ್ಕೆ 15:42-47; ಲೂಕೆ 23:50-56)

38ಉಂದು ಆಯಿ ಬೊಕ್ಕ ಯೆಹೂದ್ಯೆರೆ ಪೋಡಿಗೆಡ್ ಗುಟ್ಟುಡು ಯೇಸುನ ಶಿಷ್ಯೆ ಆದಿತ್ತಿ ಅರಿಮಥಾಯದ ಯೋಸೇಫು, ಯೇಸುನ ಪುಣೊನು ದೆತ್ತೊಂದು ಪೋವೆರೆ ಅಪ್ಪಣೆ ಕೊರೊಡು ಅಂದ್‌ದ್ ಪಿಲಾತಡ ನಟ್ಟೊಂಡೆ. ಪಿಲಾತೆ ಬುಡ್ದು ಕೊರಿ ಬೊಕ್ಕ ಆಯೆ ಬತ್ತ್‌ದ್, ಯೇಸುನ ಪುಣೊನು ದೆತ್ತೊಂದು ಪೋಯೆ. 39ಉಂದತ್ತಂದೆ ಸುರುಟ್ಟು ಒಂಜಿ ಸರಿ ರಾತ್ರೆದ ಪೊರ್ತುಡು ಯೇಸು ಕೈತಲ್‌ ಬತ್ತಿತ್ತಿ ನಿಕೋದೇಮುಲಾ ನೂದು ಸೇರ್ ದಾತ್ ರಕ್ತಬೋಳ ಬೊಕ್ಕ ಅಗರ್ ಕಲತಿನ ಚೂರ್ಣೊನು ದೆತ್ತೊಂದು ಅಡೆಗ್ ಬತ್ತೆ. 40ಅಕುಲು ಯೇಸುನ ಪುಣೊನು ದೆತ್ತೊಂದು ಯೆಹೂದ್ಯೆರೆಡ್ ಕೌಂಪುನ ಕ್ರಮತ್ತ ಪ್ರಕಾರ ಐಕ್ ಕಮ್ಮೆನದ ಎಣ್ಣೆನ್ ಪೂಜಿದ್ ನಾರ್‌ಮಡಿತ ಕುಂಟುಡು ಸುತ್ತಿಯೆರ್. 41ಯೇಸುನು ಕ್ರುಸ್ಸುಗು ಪಾಡ್ದಿತ್ತಿ ಜಾಗ್‌ಡ್ ಒಂಜಿ ತೋಟ ಇತ್ತ್ಂಡ್. ಆ ತೋಟೊಡು ಒಂಜಿ ಪೊಸ ಸಮಾಧಿ ಇತ್ತ್ಂಡ್. ಐಟ್ಟ್ ಈತ್‌ನೆಟ್ಟ ಏರೆನ್ಲಾ ದೀದಿತ್ತ್‌ಜೆರ್. 42ಆ ದಿನ ಯೆಹೂದ್ಯೆರೆ ತಯಾರ್ ಮಲ್ಪುನ ದಿನ ಆದಿತ್ತಿನೆಡ್ದ್ ಆ ಸಮಾಧಿ ಕೈತಲೆ ಇತ್ತಿನೆಡ್ದ್ ಯೇಸುನು ಅವುಲೇ ದೀಯೆರ್.

Currently Selected:

ಯೋಹಾನೆ 19: ತುಳು

Highlight

Copy