ಯೋಹಾನೆ 13
13
ಯೇಸು ಶಿಷ್ಯೆರೆನ ಕಾರ್ ದೆಕ್ಕಿನವು
1ಪಸ್ಕ ಪರ್ಬೊಡ್ದು ದುಂಬು, ಯೇಸು ತಾನ್ ಈ ಲೋಕೊನು ಬುಡ್ದು, ಅಮ್ಮೆ ಕೈತಲ್‌ ಪೋಪಿ ಕಾಲ ಬತ್ತ್ಂಡ್ ಅಂದ್‌ದ್ ತೆರಿಯೊಂದು, ಲೋಕೊಡುಪ್ಪು ತನ್ನಾಕುಲೆನ್ ಪ್ರೀತಿ ಮಲ್ತ್‌ದ್, ಕಡೆ ಮುಟ್ಟಲಾ ಅಕ್ಲೆನ್ ಪ್ರೀತಿ ಮಲ್ತೊಂದೇ ಬತ್ತೆ.
2ಯೇಸು ಬೊಕ್ಕ ಆಯನ ಶಿಷ್ಯೆರ್ ರಾತ್ರೆದ ವಣಸ್‌ಗ್ ಕುಲ್ಲೊಂದಿತ್ತೆರ್. ಆತ್‌ನೆಟ್ಟ ಸೈತಾನೆ, ಸೀಮೋನನ ಮಗೆ ಆಯಿ ಇಸ್ಕಾರಿಯೋತೆ ಯೂದನ ಮನಸ್‌ಡ್ ಯೇಸುನು ಪತ್ತ್‌ದ್ ಕೊರೊಡು ಇನ್ಪಿ ಆಲೋಚನೆನ್ ಪುಟ್ಟಾಯೆ. 3ಅಮ್ಮೆ ತನ ಕೈಟ್ ಮಾತೆನ್ಲಾ ಕೊರ್ತೆ ಅಂದ್‌ದ್ ತಾನ್ ದೇವೆರೆ ಕಡೆಡ್ದ್ ಬೈದಿನಾಯೆ ಆದ್ ದೇವೆರೆ ಕೈತಲ್‌ ಪೋಪೆ ಪಂಡ್ದ್‌ಲಾ ಯೇಸು ತೆರಿಯೊಂದು 4ವಣಸ್‌ನ್ ಬುಡ್ದು, ತಾನ್ ಪೊದೆತೊಂದಿತ್ತಿ ಕುಂಟುನು ದೆತ್ತ್‌ದ್ ದೀದ್ ಬೈರಾಸ್‌ನ್ ದೆತ್ತೊಂದು ಸೊಂಟೊಗು ಕಟ್ಟೊಂಡೆ. 5ಬೊಕ್ಕ ಬಾಜನೊಡು ನೀರ್ ಪಾಡೊಂದು ಶಿಷ್ಯೆರೆನ ಕಾರ್ ದೆಕ್ಕೊಂದು, ಸೊಂಟೊಗು ಕಟ್ಟೊಂದಿ ಬೈರಾಸ್‌ಡ್ ಒಚ್ಚೆರೆ ಸುರು ಮಲ್ತೆ. 6ಇಂಚ ಸೀಮೋನು ಪೇತ್ರ ಕೈತಲ್‌ ಬನ್ನಗ, ಆಯೆ ಯೇಸುಗು, “ಕರ್ತವಾ, ಈ ಎನ ಕಾರ್ ದೆಕ್ಕುವನಾ?” ಅಂದ್‌ದ್ ಪಂಡೆ.
7ಐಕ್ ಯೇಸು, “ಯಾನ್ ಇತ್ತೆ ಮಲ್ಪುನವು ನಿಕ್ಕ್ ತೆರಿಯಂದ್, ಆಂಡ ದುಂಬಗ್ ನಿಕ್ಕ್ ತೆರಿಯು,” ಪಂಡೆ.
8ಅಪಗ ಪೇತ್ರೆ, “ಈ ಎನ ಕಾರ್ ಏಪೊಗ್ಲಾ ದೆಕ್ಕೆರೆ ಬಲ್ಲಿ.” ಅಂದ್‌ದ್ ಪಂಡಿನೆಕ್ಕ್ ಯೇಸು, “ಯಾನ್ ನಿನನ್ ದೆಕ್ಕಿಜೆಡ ಎನ ಒಟ್ಟುಗು ನಿಕ್ಕ್ ಪಾಲ್ ಉಪ್ಪಂದ್,” ಪಂಡೆ.
9ಅಪಗ ಸೀಮೋನೆ ಪೇತ್ರೆ, “ಕರ್ತವಾ, ಎನ ಕಾರ್ ಮಾತ್ರ ಅತ್ತಂದೆ, ಕೈ ಬೊಕ್ಕ ತರೆನ್ಲಾ ದೆಕ್ಕ್‌ಲ,” ಪಂಡೆ.
10ಯೇಸು ಆಯಗ್, “ಮೀದುಪ್ಪುನಾಯನ ಕಾರ್ ದೆಕ್ಕೊಡು ಅತ್ತಂದೆ, ಬೇತೆ ದಾಲಾ ದೆಕ್ಕೊಡು ಅಂದ್‌ದ್ ಇಜ್ಜಿ, ಆಯನ ಮೆಯಿ ಮಾತ ಶುದ್ಧ ಆದುಂಡು, ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್.” ಪಂಡೆ. 11ಯೇಸು ತನನ್ ಒಚ್ಚಿದ್ ಕೊರ್ಪಿನಾಯೆ ಇಂಚಿತ್ತಿನಾಯೆನೇ ಅಂದ್‌ದ್ ತೆರಿದಿತ್ತಿನೆಡ್ದ್, “ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್,” ಪಂಡೆ.
12ಆಯೆ ಅಕ್ಲೆನ ಕಾರ್ ದೆಕ್ಕಿ ಬೊಕ್ಕ, ತನ ಪೊದೆಪುನು ಪೊದ್ಯೊಂದು, ಕುಡ ವಣಸ್‌ಗ್ ಕುಲ್ಲುದು ಅಕ್ಲೆಡ, “ಯಾನ್ ನಿಕ್ಲೆಗ್ ಮಲ್ತಿನವು ಎಂಚಿನವು ಅಂದ್‌ದ್ ತೆರಿಂಡಾ?” 13“ನಿಕುಲು ಎನನ್ ಗುರು ಪಂಡ್ದ್‌ಲಾ ಕರ್ತವಾ ಪಂಡ್ದ್‌ಲಾ ಲೆಪ್ಪುವರ್,” ನಿಕುಲು ಲೆಪ್ಪುನವು ಸರಿ, ದಾಯೆಗಂದ್ಂಡ ಯಾನ್ ಅಂಚಿತ್ತಿನಾಯೆನೇ. 14ಕರ್ತವೆಲಾ ಗುರುಲಾ ಆಯಿ ಯಾನ್, ನಿಕ್ಲೆನ ಕಾರ್ ದೆಕ್ಕಿನೆಡ್ದ್, ನಿಕುಲುಲಾ ಒರಿಯಗ್ ಒರಿ ಕಾರ್ ದೆಕ್ಕುನ ಹಂಗ್‌ದಾಕುಲಾದುಲ್ಲರ್. 15ಯಾನ್ ನಿಕ್ಲೆಗ್ ಮಲ್ತ್ ತೊಜಾಯಿಲೆಕ್ಕ, ನಿಕುಲುಲಾ ಮಲ್ಪೊಡಂದ್‌ದ್ ನಿಕ್ಲೆಗ್ ಮಾದ್ರಿನ್ ತೋಜಾದೆ. 16ನಿಕ್ಲೆಗ್ ನಿಜಾದ್ ಪನ್ಪೆ, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್. ಕಡಪುಡ್ದು ಕೊರಿನಾಯೆ ಕಡಪುಡ್ಡಿನಾಯಡ್ದ್ ಮಲ್ಲಾಯೆ ಅತ್ತ್. 17ನಿಕುಲು ಉಂದೆನ್ ತೆರಿಯೊಂದು ನೆತ್ತಲೆಕ್ಕ ಮಲ್ತರ್ಡ ನಿಕುಲು ಭಾಗ್ಯವಂತೆರ್.
18“ಯಾನ್ ನಿಕ್ಲೆನ ಸಂಗತಿಡ್ ಈ ಪಾತೆರ ಪನ್ಪಿನಿ ಅತ್ತ್. ಅಜತ್ ದೆತ್ತೊಂಡಿನಾಕುಲೆನ್ ಯಾನ್ ತೆರಿದೆ. ಆಂಡ, ‘ಎನ್ನೊಟ್ಟುಗು ವಣಸ್ ಮಲ್ಪುನಾಯೆನೇ ಎಂಕ್ ಅಡ್ಡ ಕಾರ್ ದೀತೆ.’ ಪನ್ಪಿ ಶಾಸ್ತ್ರೊಡು ಬರೆತಿ ಪಾತೆರ ನಡಪುಡೊಡು. 19ಅವು ನಡಪುನಗ ‘ಯಾನೇ ಆಯೆ,’ ಅಂದ್‌ದ್ ನಿಕುಲು ನಂಬುಲೆಕ್ಕ ಅವು ನಡಪುಡುನೆಡ್ದ್ ದುಂಬು, ಅವೆನ್ ಇತ್ತೆ ನಿಕ್ಲೆಗ್ ಪನ್ಪೆ. 20ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ಕಡಪುಡಿನಾಯನ್ ಸೇರಾವೊನುನಾಯೆ ಎನನ್ ಸೇರಾವೊಂಡಿಲೆಕ್ಕ ಆಂಡ್. ಎನನ್ ಸೇರಾವೊಂಡೆಡ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ ಆಂಡ್.”
ಯೂದೆ ಯೇಸುನು ಪತ್ತ್ ಕೊರ್ಪಿನೆನ್ ತೆರಿಪಾವುನವು
(ಮತ್ತಾಯೆ 26:20-25; ಮಾರ್ಕೆ 14:17-21; ಲೂಕೆ 22:21-23)
21ಉಂದೆನ್ ಪಂಡಿ ಬೊಕ್ಕ ಯೇಸು ಆತ್ಮೊಡು ಬೆಂಗ್‌ದ್, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಸ್ಪಷ್ಟಾದ್ ಪಂಡೆ.
22ಉಂಬೆ ಏರೆನ ಸಂಗತಿಡ್ ಈ ಪಾತೆರೊನು ಪನೊಂದುಲ್ಲೆ, ಅಂದ್‌ದ್ ಶಿಷ್ಯೆರ್ ಅನುಮಾನೊಡು, ಒರಿಯನ್ ಒರಿ ತೂಪಿನಕುಲಾಯೆರ್. 23ಶಿಷ್ಯೆರೆಡ್ ಒರಿ ಯೇಸುನ ಪ್ರೀತಿದ ಶಿಷ್ಯೆ, ಯೇಸುನ ತಿಗಲೆದ ಕೈತಲ್‌ ಒರಗ್ದಿತ್ತೆ. 24ಆಯಗ್ ಸೀಮೋನು ಪೇತ್ರೆ ಸನ್ನೆ ಮಲ್ತ್‌ದ್, “ಏರೆನ ಸಂಗತಿಡ್ ಪಾತೆರಿಯೆ,” ಅಂದ್‌ದ್ ಯೇಸುಡ ಕೇನಿಯೆರೆ ಪಂಡೆ.
25ಐಕ್ ಆ ಶಿಷ್ಯೆ ಯೇಸುನ ತಿಗಲೆದಂಚಿ ಬಗ್ಗ್‌ದ್, “ಕರ್ತವಾ, ಆಯೆ ಏರ್?” ಅಂದ್‌ದ್ ಕೇಂಡೆ. 26ಐಕ್ ಯೇಸು, “ಯಾನ್ ಈ ರೊಟ್ಟಿ ತುಂಡುನು ಮುರ್ಕಾದ್ ಏರೆಗ್ ಕೊರ್ಪೆನಾ ಆಯೆನೇ,” ಅಂದ್‌ದ್ ಆ ರೊಟ್ಟಿ ತುಂಡುನು ಮುರ್ಕಾದ್, ಸೀಮೋನು ಮಗೆ ಆಯಿ ಇಸ್ಕಾರಿಯೋತೆ ಯೂದಗ್ ಕೊರಿಯೆ. 27ಆಯೆ ಅವೆನ್ ದೆತ್ತೊಂಡಿ ಕೂಡ್ಲೆ ಸೈತಾನೆ ಆಯನ ಉಲಯಿ ಪೊಗ್ಗಿಯೆ. ಅಪಗ ಯೇಸು ಆಯಗ್, “ಈ ಮಲ್ಪೊಡಾಯಿನೆನ್ ಬೇಗ ಮಲ್ಪುಲ!” ಅಂದ್‌ದ್ ಪಂಡೆ. 28ಯೇಸು ಆಯಗ್ ಉಂದೆನ್ ದಾಯೆಗಾದ್ ಪಂಡೆ ಪಂಡ್ದ್, ವಣಸ್‌ಗ್ ಕುಲ್ಲುದಿನಾಕುಲೆಗ್ ಏರೆಗ್ಲಾ ಗೊತ್ತಾಯಿಜಿ. 29ಅಕ್ಲೆಡ್ ಕೆಲೆವೆರ್ ಪಣವುದ ಚೀರವು ಯೂದಡ ಇತ್ತಿನೆಡ್ದ್, ಪರ್ಬೊಗಾದ್ ಅಕ್ಲೆಗ್ ಬೋಡಾಯಿನೆನ್ ದೆತ್ತೊನ್ಲ ಅಂದ್‌ದ್ ಬಡವೆರೆಗ್ ದಾದಾಂಡಲಾ ಕೊರೊಡು ಪಂಡ್ದ್‌ಲಾ ಯೇಸು ಆಯಗ್ ಪನೊಂದುಲ್ಲೆ ಅಂದ್‌ದ್ ಎನ್ನಿಯೆರ್.
30ಆಯೆ ಆ ರೊಟ್ಟಿ ತುಂಡುನು ದೆತ್ತೊಂದು, ಕೂಡ್ಲೇ ಪಿದಯಿ ಪೋಯೆ. ಅಪಗ ರಾತ್ರೆ ಆದಿತ್ತ್ಂಡ್.
ಪೊಸ ಅಪ್ಪಣೆ
31ಆಯೆ ಪಿದಯಿ ಪೋಯಿ ಬೊಕ್ಕ ಯೇಸು, “ಇತ್ತೆ ನರಮಾನಿ ಮಗೆ ಮೈಮೆನ್ ಪಡೆಯೊಂಡೆ, ಬೊಕ್ಕ ದೇವೆರ್‌ಲಾ ಆಯಡ್ದ್ ಮೈಮೆ ಪಡೆತೆ. 32ಆಯಡ್ದ್ ದೇವೆರೆಗ್ ಮೈಮೆ ಆಯಿನೆಡ್ದ್, ತನಡ್ದ್ ದೇವೆರ್ ಆಯನ್ ಮೈಮೆ ಪಡೆಪಾದ್ ಕೂಡ್ಲೆ ಮೈಮೆ ಪಡೆಪಾವೆ. 33ಎನ ಜೋಕುಲೇ, ನನ ಒಂತೆ ಸಮಯ ಮಾತ್ರ ನಿಕ್ಲೆಡೊಪ್ಪ ಉಲ್ಲೆ. ನಿಕುಲು ಎನನ್ ನಾಡುವರ್, ಆಂಡ ಯಾನ್ ಪೋಪಿನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಅಂದ್‌ದ್ ಯೆಹೂದ್ಯೆರೆಗ್ ಪಂಡಿಲೆಕ್ಕ ಇತ್ತೆ ನಿಕ್ಲೆಗ್ಲಾ ಪನ್ಪೆ. 34ಯಾನ್ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆನ್ ಕೊರ್ಪೆ. ಅವು ದಾದ ಪಂಡ ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ಪುಲೆ; ಯಾನ್ ನಿಕ್ಲೆನ್ ಪ್ರೀತಿ ಮಲ್ತಿಲೆಕ್ಕ ನಿಕುಲುಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ. 35ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ತರ್ಡ, ಮಾತೆರ್ಲಾ ನಿಕ್ಲೆನ್ ಎನ ಶಿಷ್ಯೆರ್ ಅಂದ್‌ದ್ ತೆರಿಯೊನ್ವೆರ್,” ಪಂಡೆ.
ಪೇತ್ರೆ ಅರೆಂಜುನ ಸಂಗತಿನ್ ತೆರಿಪಾಯಿನವು
(ಮತ್ತಾಯೆ 26:31-35; ಮಾರ್ಕೆ 14:27-31; ಲೂಕೆ 22:31-34)
36ಸೀಮೋನು ಪೇತ್ರೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪ?” ಅಂದ್‌ದ್ ಕೇಂಡಿನೆಕ್ಕ್ ಯೇಸು, “ಯಾನ್ ಪೋಪಿನಡೆಗ್, ಇತ್ತೆ ಬರಯ. ಆಂಡ ಬೊಕ್ಕ ಎನ ಬೆರಿಯೆ ಬರುವ.” ಪಂಡೆ. 37ಪೇತ್ರೆ ಆಯಗ್, “ಕರ್ತವಾ ಯಾನ್ ದಾಯೆ ಇತ್ತೆ ನಿನ ಬೆರಿಯೆ ಬರಯೆ? ನಿಕ್ಕಾದ್ ಎನ ಪ್ರಾಣೊನ್ಲಾ ಕೊರುವೆ,” ಅಂದ್‌ದ್ ಪನ್ನಗ
38ಯೇಸು, “ಎಂಕಾದ್ ಪ್ರಾಣ ಕೊರ್ಪನಾ? ನಿಕ್ಕ್ ನಿಜಾದ್ ಪನ್ಪೆ, ಈ ಎನ ಸಂಗತಿಡ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.
Currently Selected:
ಯೋಹಾನೆ 13: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
