ಯೋಹಾನೆ 12

ಬೇಥಾನ್ಯೊಡು ಯೇಸುಗು ತೈಲಾಭಿಷೇಕ ಮಲ್ಪುನವು

(ಮತ್ತಾಯೆ 26:6-13; ಮಾರ್ಕೆ 14:3-9)

1ಪಸ್ಕ ಪರ್ಬೊಗು ನನಲಾ ಆಜಿ ದಿನ ಉಪ್ಪುನಗ ಯೇಸು ಬೇಥಾನ್ಯೊಗು ಬತ್ತೆ. ಸೈತಿನಾಕುಲೆಡ್ದ್ ಲಕ್ಕ್‌ದ್ ಬತ್ತಿ ಲಾಜರೆ ಅವುಲು ಇತ್ತೆ. 2ಯೇಸುಗು ರಾತ್ರೆದ ವಣಸ್ ತಯಾರ್ ಮಲ್ತೆರ್, ಮಾರ್ಥ ಬಲಸೊಂದಿತ್ತಲ್. ಲಾಜರೆಲಾ ಆಯನ ಒಟ್ಟುಗು ವಣಸ್‌ಗ್ ಕುಲ್ದಿನಾಕುಲೆಡ್ ಒರಿ ಆದಿತ್ತೆ. 3ಅಪಗ ಮರಿಯ ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆನ್ ಸಾಧಾರಣ ಒಂಜಿ ಸೇರ್ ದಾತ್ ಕನತ್‌ದ್ ಯೇಸುನ ಕಾರ್‌ಗ್ ಪೂಜಿದ್ ಬೊಕ್ಕ ತನ ತರೆ ಕುಜಲ್‌ಡ್ದ್ ಆಯನ ಕಾರ್‌ಲೆನ್ ಒಚ್ಚಿಯಲ್. ಆ ಎಣ್ಣೆದ ಕಮ್ಮೆನ ಇಲ್ಲ್ ನಿಲಿಕೆ ದಿಂಜಿಂಡ್. 4ಅಪಗ ಆಯ ಶಿಷ್ಯೆರೆಡ್ ಒರಿ ಆದಿತ್ತಿ ಯೇಸುನು ಪತ್ತ್‌ದ್ ಕೊರಿಯೆರೆ ಆಲೋಚನೆ ಮಲ್ತೊಂದಿತ್ತಿ ಇಸ್ಕಾರಿಯೋತೆ ಯೂದೆ, 5“ಈ ಎಣ್ಣೆನ್ #12:5 ಒಂಜಿ ಕಾಸ್ ಪನ್ನಗ ಒಂಜಿ ದಿನತ ಸಂಬಳಮುನ್ನೂದು ಬೊಳ್ಳಿದ ಪಾವೊಲಿಗ್ ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಪಂಡೆ. 6ಆಯೆ ಬಡವೆರೆ ಚಿಂತೆಡ್ ಉಂದೆನ್ ಪಂಡಿಜೆ; ಆಯೆ ಕಲ್ವೆ ಆದಿತ್ತ್‌ದ್, ತನ ಕೈಟಿತ್ತಿ ಪಣವುದ ಚೀರವುಡು ಪಾಡ್ದಿನೆನ್ ಕಂಡೊನುನ ಅಭ್ಯಾಸ ಇತ್ತಿನೆಡ್ದೇ ಇಂಚ ಪಂಡೆ.

7ಅಪಗ ಯೇಸು, “ಆಲೆನ್ ಬುಡ್ಲೆ; ಎನನ್ ಕೌಂಪು ದಿನೊಕಾದ್ ಉಂದೆನ್ ದೀವೊಂಡಲ್. 8ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ ಪಂಡೆ.”

ಲಾಜರನ್ ಕೆರಿಯೆರೆ ಉಪಾಯ ಮಲ್ಪುನವು

9ಯೆಹೂದ್ಯೆರೆ ಜನೊಕುಲೆ ಮಲ್ಲ ಗುಂಪು ಆಯೆ ಅಲ್ಪ ಉಲ್ಲೆ ಅಂದ್‌ದ್ ತೆರಿದ್ ಯೇಸುನು ತೂಯೆರೆ ಮಾತ್ರತ್ತಂದೆ ಸೈತ್‌ದ್ ಜೀವ ಆದ್ ಲಕ್ಕ್‌ದಿನ ಲಾಜರ್‌ನ್ಲಾ ತೂವೊಡು ಅಂದ್‌ದ್ ಬತ್ತೆರ್. 10ಆಂಡ ಪ್ರಧಾನಯಾಜಕೆರ್ ಲಾಜರ್‌ನ್ಲಾ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್. 11ದಾಯೆಗಂದ್ಂಡ ಆಯನ ದಿಸೆಡ್ದ್ ಮಸ್ತ್ ಜನ ಯೆಹೂದ್ಯೆರ್ ಅಕ್ಲೆನ್ ಬುಡ್ದು, ಯೇಸುನು ನಂಬುನಾಕುಲು ಆಯೆರ್.

ಯೆರೂಸಲೇಮುಗು ಯೇಸುನ ಅರಸು ಮರ್ಜಿದ ಪ್ರವೇಶ

(ಮತ್ತಾಯೆ 21:1-11; ಮಾರ್ಕೆ 11:1-11; ಲೂಕೆ 19:28-40)

12ಮನದಾನಿ ಪಸ್ಕ ಪರ್ಬದ ಜಾತ್ರೆಗ್ ಬೈದಿನ ಜನೊಕುಲೆ ಗುಂಪು ಯೇಸು ಯೆರೂಸಲೇಮುಗು ಬರ್ಪೆ ಅಂದ್‌ದ್ ತೆರಿದ್, 13ಈಚಿಲ್‌ದ ಗೆಲ್ಲ್‌ಲೆನ್ ಪತ್ತೊಂದು ಆಯನ್ ಎದುಕೊನಿಯೆರೆ ಪಿದಯಿ ಬತ್ತ್‌ದ್, “ಹೊಸನ್ನಾ! ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ, ಇಸ್ರಾಯೇಲ್‌ದ ಅರಸುಗು ಆಶೀರ್ವಾದ,” ಬೊಬ್ಬೆ ಪಾಡಿಯೆರ್.

14ಬೊಕ್ಕ ಯೇಸು ಅಲ್ಪ ಇತ್ತಿನ ಕತ್ತೆದ ಕಿನ್ನಿನ್ ತರ್ಪಾದ್ ಐತ ಮಿತ್ತ್ ಕುಲ್ಲಿಯೆ, ಉಂದೆಡ್ದ್ ಶಾಸ್ತ್ರೊಡು ಬರೆತಿನಂಚನೆ ಆಂಡ್.

15“ಚೀಯೋನು ಮಗಲೇ, ಪೋಡ್ಯಡ; ಇಂದಾ, ನಿನ ಅರಸು ಕತ್ತೆದ ಕಿನ್ನಿದ ಮಿತ್ತ್ ಕುಲ್ಲೊಂದು ಬರುವೆ,” ಇನ್ಪಿ ಶಾಸ್ತ್ರದ ಪಾತೆರದಂಚೆನೇ ಮಾತ ನಡತ್ಂಡ್.

16ಉಂದು ಆಯ ಶಿಷ್ಯೆರೆಗ್ ದುಂಬು ಗೊತ್ತಿಜ್ಜಾಂಡ್. ಆಂಡ ಯೇಸು ಮೈಮೆದ ಪಟ್ಟೊಗು ಸೇರಿ ಬೊಕ್ಕ, ಉಂದು ಆಯ ವಿಷಯೊಡೇ ಬರೆದಿತ್ತ್‌ಂಡ್ ಪಂಡ್ದ್‌ಲಾ ಎಂಕುಲು ಉಂದೆನ್ ಮಾತ ಆಯಗ್ ಮಲ್ತ ಪಂಡ್ದ್‌ಲಾ ನೆನೆಪುಗು ಬತ್ತ್ಂಡ್.

17ಉಂದತ್ತಂದೆ ಯೇಸು ಲಾಜರ್‌ನ ಸಮಾಧಿದ ಉಲಯಿಡ್ದ್ ಲೆತ್ತ್‌ದ್, ಜೀವ ಕೊರಿನ ಗಳಿಗೆಡ್, ಆಯಡೊಪ್ಪ ಇತ್ತಿನ ಜನೊಕುಲು ಈ ವಿಷಯೊಡು ಸಾಕ್ಷಿ ಕೊರೊಂದಿತ್ತೆರ್. 18ಆಯೆ ಈ ಕಾರ್ನಿಕೊಲೆನ್ ಮಲ್ತ್‌ದೆ ಅಂದ್‌ದ್ ಕೇಂಡಿನೆಡ್ದ್ ಜನೊಕುಲು ಆಯನ್ ಎದುಕೊನಿಯೆರೆ ಪೋದಿತ್ತೆರ್, 19ಇಂಚ ಉಪ್ಪುನಗ ಪರಿಸಾಯೆರ್, “ನಮ ತಂತ್ರೊಲು ದಾಲಾ ನಡತಿಜಿ, ತೂಲೆ; ಲೋಕ ಮಾತ ಆಯ ಬೆರಿಯೆ ಪೋಂಡತ್ತಾ!” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.

ಕೆಲವು ಗ್ರೀಕೆರ್ ಯೇಸುನು ತೂಯಿನವು

20ಉಂದತ್ತಂದೆ ದೇವೆರೆನ್ ಆರಾಧನೆ ಮಲ್ಪೊಡಂದ್ ಪರ್ಬೊಗು ಬೈದಿನೆಟ್ಟ್ ಕೆಲೆವೆರ್ ಗ್ರೀಕೆರ್ ಇತ್ತೆರ್. 21ಮೊಕುಲು ಆಯಡ, ಗಲಿಲಾಯೊಡುಪ್ಪುನ ಬೆತ್ಸಾಯಿದ ಪನ್ಪಿ ಊರುದ ಫಿಲಿಪ್ಪನ ಕೈತಲ್‌ ಬತ್ತ್‌ದ್, “ಅಯ್ಯಾ, ಎಂಕ್ಲೆಗ್ ಯೇಸುನು ತೂವೊಡು,” ಅಂದ್‌ದ್ ನಟ್ಟೊಂಡೆರ್.

22ಫಿಲಿಪ್ಪೆ ಬತ್ತ್‌ದ್ ಅಂದ್ರೇಯಗ್ ಪಂಡೆ. ಅಂದ್ರೆಯೆಲಾ ಫಿಲಿಪ್ಪೆಲಾ ಇರ್ವೆರ್‌ಲಾ ಯೇಸುಗು ಪಂಡೆರ್. 23ಅಪಗ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ನರಮಾನಿ ಮಗಕ್ಕ್ ತನ ಮೈಮೆದ ಸ್ಥಾನೊನು ದೆತ್ತೊನುನ ಗಳಿಗೆ ಬೈದ್‌ಂಡ್.” 24ನಿಕ್ಲೆಗ್ ನಿಜಾದ್ ಪನ್ಪೆ, ಗೋದಿದ ಬಿತ್ತ್ ಭೂಮಿಗ್ ಬೂರ್ದು ಸೈತ್‌ಜಿಡ, ಅಂಚೆನೇ ಒರಿಯುಂಡು, ಸೈತ್ಂಡ ಮಸ್ತ್ ಫಲ ಕೊರ್ಪುಂಡು. 25ತನ ಪ್ರಾಣೊನು ಪ್ರೀತಿ ಮಲ್ತಿನಾಯೆ ಅವೆನ್ ಕಳೆವೊನುವೆ. ಈ ಲೋಕೊಡು ತನ ಪ್ರಾಣೊನು ಪಗೆ ಮಲ್ಪುನಾಯೆ ಅವೆನ್ ನಿತ್ಯಜೀವೊಗು ಒರಿಪಾವೊನ್ವೆ. 26ಏರಾಂಡಲಾ ಎನ ಸೇವೆ ಮಲ್ಪುನಾಂಡ, ಎನ ಬೆರಿಯೆ ಬರಡ್; ಬೊಕ್ಕ ಯಾನ್ ಓಲು ಉಪ್ಪುವೆನಾ ಅವುಲು ಎನ ಸೇವಕೆಲಾ ಉಪ್ಪುವೆ. ಏರಾಂಡಲಾ ಎನ ಸೇವೆ ಮಲ್ಪುನಾಂಡ ಎನ ಅಮ್ಮೆ ಆಯಗ್ ಸನ್ಮಾನ ಮಲ್ಪುವೆ.

ಯೇಸು ಬೊಲ್ಪುದ ಸಂಗತಿನ್ ತೆರಿಪಾವುನವು

27“ಇತ್ತೆ ಎನ ಪ್ರಾಣ ಸಂಕಟೊಡು ಉಂಡು, ‘ಅಮ್ಮೆರೇ, ಈ ಸ್ಥಿತಿಡ್ದ್ ಎನನ್ ಬುಡ್ಪಾಲ, ಪಂಡ್ದ್ ಯಾನ್ ಪನೊಡಾ?’ ಅತ್ತ್, ಉಂದೆಕ್ಕಾದ್ ಈ ಗಳಿಗೆಗ್ ಬತ್ತೆ. 28ಅಮ್ಮೆರೇ, ನಿನ ಪುದರ್‌ಗ್ ಮೈಮೆ ತೋಜಾಲ!”

ಅಪಗ, “ಮೈಮೆ ತೋಜಾದೆ, ಕುಡ ಮೈಮೆ ತೋಜಾವೆ.” ಪಂಡ್ದ್ ಬಾನೊಡ್ದು ಒಂಜಿ ಸ್ವರ ಕೇಂಡ್.

29ಅವುಲು ಉಂತೊದಿತ್ತಿ ಜನೊಕುಲು ಅವೆನ್ ಕೇಂಡ್ದ್, ತೆಡಿಲ್ ಬತ್ತ್ಂಡ್ ಪಂಡೆರ್, ನನ ಕೆಲೆವೆರ್, “ದೂತೆ ಆಯಡ ಪಾತೆರಿಯೆ!” ಪಂಡೆರ್.

30ಆಂಡ ಯೇಸು ಅಕ್ಲೆಗ್, “ಈ ಸ್ವರ ಎಂಕಾದ್ ಬೈದಿಜಿ; ನಿಕ್ಲೆಗಾದ್ ಬೈದ್‌ಂಡ್. 31ಇತ್ತೆ ಈ ಲೋಕೊಗು ನ್ಯಾಯತೀರ್ಪು ಆಪುಂಡು; ಇತ್ತೆ ಈ ಲೋಕದ ಅಧಿಪತಿ ಸೈತಾನನ್ ಪಿದಯಿ ಪಾಡುಂಡು. 32ಆಂಡ ಎನನ್ ಭೂಮಿಡ್ದ್ ಮಿತ್ತ್ ಏರಾನಗ, ಮಾತೆರೆನ್ಲಾ ಎನ ಕೈತಡೆ ಒಯಿತೊನುವೆ,” ಅಂದ್‌ದ್‌ ಪಂಡೆ. 33ಈ ಪಾತೆರೊಡು ತಾನ್ ಇಂಚಿತ್ತಿ ಮರಣೊನು ಸೈಯರೆ ಉಲ್ಲೆ ಪಂಡ್ದ್ ಕಾರಣ ಕೊರಿಯೆ.

34ಐಕ್ ಆ ಜನೊಕುಲೆನ ಗುಂಪು, “ಕ್ರಿಸ್ತೆ ಏಪೊಗ್ಲಾ ಉಪ್ಪುನಾಯೆ ಅಂದ್‌ದ್ ನ್ಯಾಯಕಟ್ಟ್‌ಡ್ ಕೇಂಡ್ದ. ಅಂಚಾಂಡ ‘ನರಮಾನಿ ಮಗೆ ಮಿತ್ತ್ ಏರಾವೊನೊಡು,’ ಅಂದ್‌ದ್ ಈ ದಾಯೆ ಪನ್ಪ? ಆ ನರಮಾನಿ ಮಗೆ ಏರ್?” ಅಂದ್‌ದ್ ಕೇಂಡೆರ್.

35ಯೇಸು ಅಕ್ಲೆಗ್, “ನನ ಒಂತೆ ಸಮಯನೇ ಬೊಲ್ಪು ನಿಕ್ಲೆಡ್ ಉಪ್ಪುಂಡು, ಕತ್ತಲೆ ನಿಕ್ಲೆನ್ ಸುತ್ತು ಪಾಡೊಡ್ದು ದುಂಬೇ ಬೊಲ್ಪುದ ಸಾದಿಡ್ ನಡಪುಲೆ. ಕತ್ತಲೆದ ಸಾದಿಡ್ ನಡಪುನಾಯಗ್ ತಾನ್ ಒಡೆಗ್ ಪೋಪೆ ಅಂದ್‌ದ್ ಗೊತ್ತಾಪುಜಿ. 36ಬೊಲ್ಪು ನಿಕ್ಲೆ ಕೈತಲ್‌ ಉಪ್ಪುನಗನೇ ಬೊಲ್ಪುನು ನಂಬುಲೆ; ನಂಬುಂಡ ನಿಕುಲು ಬೊಲ್ಪುದ ಜೋಕುಲು ಆದುಪ್ಪುವರ್,” ಅಂದ್‌ದ್ ಪಂಡೆ. ಉಂದೆನ್ ಪಂಡಿ ಬೊಕ್ಕ ಯೇಸು ಅಕ್ಲೆನ್ ಬುಡ್ದು ಪೋದು ದೆಂಗ್‌ದ್ ಕುಲ್ಲಿಯೆ.

ಯೆಹೂದ್ಯೆರೆ ಅಪನಂಬಿಕೆ

37ಯೇಸು ಕಾರ್ನಿಕೊಲೆನ್ ಅಕ್ಲೆ ಎದುರು ಮಲ್ತ್ಂಡಲಾ ಜನೊಕುಲು ಆಯನ್ ನಂಬಂದೆ ಪೋಯೆರ್.

38ಉಂದೆಡ್ದ್ ಪ್ರವಾದಿ ಆಯಿ ಯೆಶಾಯೆ ಪಂಡಿನ ಪಾತೆರ ನಡತ್ಂಡ್; ಅವು ದಾನೆ ಪಂಡ,

“ಕರ್ತವಾ, ಎಂಕ್ಲೆನ ಬೋಧನೆನ್ ಏರ್ ನಂಬಿಯೆರ್? ಕರ್ತವಾ, ನಿನ ಪುಗೆಲ್‌ದ ಬಲ ಏರೆಗ್ ತೋಜಿದ್ ಬತ್ತ್ಂಡ್?” ಪನ್ಪಿನವು.

39ಅಕುಲು ನಂಬಂದೆ ಪೋಯಿನೆಕ್ಕ್, ಯೆಶಾಯೆ ತನ ಬೊಕ್ಕೊಂಜಿ ಪಾತೆರೊಡು ಕಾರಣ ಕೊರ್ತೆ, ಅವು ದಾನೆಂದ್ಂಡ,

40“ಅಕುಲು ಕಣ್ಣ್‌ಡ್ ತೂವಂದೆ,

ಉಡಲ್‌ಡ್ ತೆರಿಯಂದೆ,

ಅಕುಲು ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ,

ದೇವೆರ್ ಅಕ್ಲೆನ ಕಣ್ಣ್‌ಲೆನ್ ಮಂದ ಮಲ್ತ್‌ದ್,

ಅಕ್ಲೆನ ಉಡಲ್‌ನ್ ಕಲ್ಲ್ ಮಲ್ತೆ.” ಪನ್ಪಿನವೇ.

41ಯೇಸುನ ಮೈಮೆನ್ ತೂದು ಆಯನ ಸುದ್ಧಿನ್ ಪಾತೆರ್‌ನಗ ಯೆಶಾಯೆ ಈ ಪಾತೆರೊನು ಪಂಡೆ.

42ಅಂಚಾಂಡಲಾ ಮುಖ್ಯ ಅಧಿಕಾರಿಲೆಡ್ ಮಸ್ತ್ ಜನ ಆಯನ್ ನಂಬಿಯೆರ್. ಆಂಡ ತನ್ಕುಲೆನ್ ಸಭೆಡ್ದ್ ಪಿದಯಿ ಪಾಡೆರ್ ಪಂಡ್ದ್ ಪರಿಸಾಯೆರೆಗ್ ಪೋಡಿದ್, ಅವೆನ್ ಜನೊಕುಲೆ ದುಂಬು ಪಂಡೊನುಜೆರ್. 43ದಾಯೆ ಪಂಡ, ದೇವೆರೆಡ್ದ್ ತಿಕ್ಕು ಮಾನೊಡ್ಡು, ಜನೊಕುಲೆಡ್ದ್ ಬರ್ಪಿ ಮಾನನೇ ಅಕುಲು ಪ್ರೀತಿ ಮಲ್ತೆರ್.

ಯೇಸುನ ಪಾತೆರೊಲು ತೀರ್ಪು ಕೊರ್ಪುಂಡು

44ಯೇಸು ಗಟ್ಟಿಡ್ ಇಂಚ ಪಂಡೆ, “ಎನನ್ ನಂಬುನಾಯೆ, ಎನನೇ ನಂಬಿನಾಯೆ ಅತ್ತ್, ಆಂಡ ಎನನ್ ಕಡಪುಡ್ದು ಕೊರ್ತಿನಾಯನ್ ನಂಬುನಾಯೆ ಆದುಲ್ಲೆ. 45ಬೊಕ್ಕ ಎನನ್ ತೂಪಿನಾಯೆ, ಎನನ್ ಕಡಪುಡ್ದು ಕೊರಿನಾಯನ್ ತೂಪಿನಾಯೆ ಆದುಲ್ಲೆ. 46ಎನನ್ ನಂಬುನ ಒರಿಯಾಂಡಲಾ ಕತ್ತಲೆಡ್ ಉಪ್ಪೆರೆ ಬಲ್ಲಿ ಪಂಡ್ದ್ ಯಾನ್ ಲೋಕೊಗು ಬೊಲ್ಪಾದ್ ಬೈದೆ. 47ಏರಾಂಡಲಾ ಎನ ಪಾತೆರೊಲೆನ್ ಕೇಂಡ್ದ್, ಐಕ್ ತಕ್ಕ ನಡಪಂದೆ ಪೋಂಡ, ಯಾನ್ ಅಕ್ಲೆಗ್ ತೀರ್ಪು ಮಲ್ಪುಜಿ. ಲೋಕೊಗು ತೀರ್ಪು ಮಲ್ಪೆರೆ ಯಾನ್ ಬೈದಿಜಿ, ಆಂಡ ಲೋಕೊನು ಒರಿಪಾವೆರೆ ಯಾನ್ ಬೈದೆ. 48ಎನನ್ ತಿರಸ್ಕಾರ ಮಲ್ಪುನಾಯೆ, ಎನ ಪಾತೆರೊಲೆನ್ ತರಕೊನಂದೆ ಉಪ್ಪುನಾಯಗ್, ತೀರ್ಪು ಮಲ್ಪುನವು ಒಂಜಿ ಉಂಡು. ಅವು ಯಾನ್ ಪಂತಿ ಪಾತೆರನೇ, ಅವ್ವೇ ಕಡೆತ ದಿನೊಟು ಆಯಗ್ ತೀರ್ಪು ಮಲ್ಪುಂಡು. 49ದಾಯೆ ಪಂಡ ಎನ್ನಾತೆಗ್ ಎನ ಅಧಿಕಾರೊಡು ಪಾತೆರ್‌ದಿಜಿ; ಎನನ್ ಕಡಪುಡ್ದು ಕೊರ್ತಿನ ಅಮ್ಮೆ, ಈ ಇಂಚಿಂಚಿನೆನ್ ಪನೊಡು, ಬೊಕ್ಕ ಇಂಚಿಂಚ ಪಾತೆರೊಡು ಪನೊಡು ಪಂಡ್ದ್ ಎಂಕ್ ಅಪ್ಪಣೆ ಕೊರ್ತೆ. 50ಆಯೆ ಕೊರ್ತಿ ಅಪ್ಪಣೆ ನಿತ್ಯಜೀವದವು ಆದುಂಡಂದ್‌ದ್ ಯಾನ್ ತೆರಿದೆ. ಅಂಚಾಯಿನೆಡ್ದ್ ಯಾನ್ ಪಾತೆರುನ ಮಾತೆನ್ಲಾ ಅಮ್ಮೆ ಎಂಕ್ ಪಂಡಿಲೆಕ್ಕನೇ ಪಾತೆರ್‌ವೆ.”

Currently Selected:

ಯೋಹಾನೆ 12: ತುಳು

Highlight

Copy