ಯೋಹಾನೆ 11

ಲಾಜರನ ಮರಣ

1ಬೇಥಾನ್ಯ ಊರುಡು ಲಾಜರೆ ಪನ್ಪಿನಾಯೆ ಸೀಕ್‌ಡಿತ್ತೆ. ಅವು ಮಾರ್ಥ ಬೊಕ್ಕ ಮರಿಯ ಪನ್ಪಿ ಮೆಗ್ದಿಪಲಿ ಇತ್ತಿನ ಊರು. 2ಈ ಮರಿಯ, ಕರ್ತವನ ಪಾದೊಗು ಕಮ್ಮೆನದ ಎಣ್ಣೆನ್ ಪೂಜಿದ್ ತರೆಕುಜಲ್‌ಡ್ ಒಚ್ಚಿದಿನಾಲ್. ಆಲೆನ ಮೆಗ್ಯೆ ಲಾಜರೆ ಸೀಕ್‌ಡಿತ್ತೆ. 3ಇಂಚ ಉಪ್ಪುನಗ ಸಹೋದ್ರಿಲು, “ಕರ್ತವಾ, ನಿನ ಪ್ರೀತಿದ ಸ್ನೇಹಿತೆ ಸೀಕ್‌ಡುಲ್ಲೆ,” ಪಂಡ್ದ್ ಯೇಸುಗು ಪಂಡ್ ಕಡಪುಡಿಯೆರ್.

4ಯೇಸು ಉಂದೆನ್ ಕೇಂಡ್ದ್, “ಈ ಸೀಕ್ ಸೈಯೆರೆಂದ್ ಬೈದಿನವು ಅತ್ತ್, ಉಂದೆಡ್ದ್ ದೇವೆರೆ ಮಗಕ್ ಮೈಮೆ ಉಂಡಾಪಿಲೆಕ್ಕ, ದೇವೆರೆ ಮೈಮೆಗಾದ್ ಬೈದಿನವು,” ಅಂದ್‌ದ್ ಪಂಡೆ.

5ಮಾರ್ಥಡಲಾ ಆಲೆನ ಮೆಗ್ದಿಡಲಾ ಬೊಕ್ಕ ಲಾಜರಡಲಾ ಯೇಸುಗು ಬಾರಿ ಪ್ರೀತಿ ಇತ್ತ್ಂಡ್. 6ಆಂಡಲಾ ಲಾಜರೆ ಸೀಕ್‌ಡ್ ಉಲ್ಲೆ ಪನ್ಪಿನೆನ್ ಆಯೆ ತೆರಿ ಬೊಕ್ಕ ರಡ್ಡ್ ದಿನ, ಇತ್ತಿನ ಜಾಗ್‌ಡೇ ಉಂತಿಯೆ 7ಐಡ್ದ್ ಬೊಕ್ಕ ತನ ಶಿಷ್ಯೆರೆಗ್, “ಪಿರ ಯೂದಾಯೊಗು ಪೋಯಿ,” ಪಂಡೆ.

8ಶಿಷ್ಯೆರ್, “ಓ ಗುರೂ, ಯೆಹೂದ್ಯೆರ್ ನಿನನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಇತ್ತೆರ್, ಪಿರ ಅಡೆಗೇ ಪೋಪನಾ?” ಪಂಡ್ದ್ ಕೇಂಡೆರ್.

9ಐಕ್ ಯೇಸು, “ಪಗೆಲ್‌ಗ್ ನನಲಾ ಪದ್ರಾಡ್ ಗಂಟೆ ಉಂಡತ್ತಾ, ಒರಿ ಪಗೆಲ್ಡ್ ತಿರ್ಗಿಯೆಡ ಈ ಲೋಕದ ಬೊಲ್ಪು ತೋಜುನೆಡ್ದ್ ಆಯೆ ದಂಟಯೆ. 10ಆಂಡ ರಾತ್ರೆಡ್ ನಡಪುನಾಯೆ ಬೊಲ್ಪು ದಾಂತಿನೆಡ್ದ್ ದಂಟುವೆ,” ಅಂದ್‌ದ್ ಉತ್ತರ ಕೊರಿಯೆ. 11ಈ ಪಾತೆರ ಪಂಡಿ ಬೊಕ್ಕ ಅಕ್ಲೆಗ್, “ನಮ ಸ್ನೇಹಿತೆ ಲಾಜರೆ ನಿದ್ರೆ ಮಲ್ತೊಂದುಲ್ಲೆ; ಯಾನ್ ಆಯನ್ ನಿದ್ರೆಡ್ದ್ ಲಕ್ಕಾಯೆರೆಗಾದ್ ಪೋವೊಂದುಲ್ಲೆ,” ಪಂಡೆ.

12ಐಕ್ ಶಿಷ್ಯೆರ್, “ಕರ್ತವಾ, ಆಯೆ ನಿದ್ರೆ ಮಲ್ತೊಂದಿತ್ತೆಡ ಸೌಖ್ಯ ಆಪೆ,” ಅಂದ್‌ದ್ ಪಂಡೆರ್.

13ಯೇಸು ಲಾಜರನ ಮರಣದ ಸಂಗತಿಡ್ ತೆರಿಪಾದ್ ಪಂಡ್ದಿತ್ತೆ; ಆಂಡ ಅಕುಲು ಆಯೆ ನಿದ್ರೆದ ಬಚ್ಚೆಲ್‌ದ ಸಂಗತಿಡ್ ಪನ್ಪೆ ಅಂದ್‌ದ್ ಎನ್ನಿಯೆರ್. 14ಅಪಗ ಯೇಸು ಅಕ್ಲೆಗ್ ಬುಡ್ಪಾದ್ ಪಂಡೆ, “ಲಾಜರೆ ಸೈತ್ ಪೋತೆ, 15ಯಾನ್ ಅಲ್ಪ ದಾಂತಿನೆಡ್ದ್ ನಿಕ್ಲೆ ಪರವಾದ್ ಸಂತೋಷ ಮಲ್ಪುವೆ, ದಾಯೆ ಪಂಡ ಆಯಡ್ದ್ ನಿಕುಲು ನಂಬಿಯೆರೆ ಒಂಜಿ ಸಾದಿ ಆಂಡ್, ಬಲೆ ಆಯ ಕೈತಲ್‌ ಪೋಯಿ,” ಅಂದ್‌ದ್ ಪಂಡೆ.

16ಅಪಗ ದಿದುಮೆ ಪನ್ಪಿ ತೋಮೆ, ಬಾಕಿದ ಶಿಷ್ಯೆರೆಡ, “ನಮಲಾ ಪೋಯಿ ಆಯಡೊಪ್ಪ ಸೈಕ,” ಪಂಡೆ.

ಯೇಸು ಪುನರುತ್ಥಾನಲಾ ಜೀವಲಾ ಆದುಲ್ಲೆ

17ಯೇಸು ಬತ್ತಿತ್ತಿನಪಗ, ಲಾಜರನ್ ಸಮಾಧಿಡ್ ದೀದ್ ನಾಲ್ ದಿನ ಆದಿತ್ತ್ಂಡ್ ಅಂದ್‌ದ್ ಆಯಗ್ ತೆರಿದ್ ಬತ್ತ್ಂಡ್. 18ಬೇಥಾನ್ಯ ಯೆರೂಸಲೇಮುಗು ಕೈತಲಿತ್ತ್‌ಂಡ್, ಅಲ್ತ್‌ಡ್ದ್ ಅಡೆಗ್ ಸುಮಾರ್ ಮೂಜಿ ಕಿಲೊಮೀಟರ್ ದೂರ ಇತ್ತ್ಂಡ್. 19ಅಂಚಾಯಿನೆಡ್ದ್ ಯೆಹೂದ್ಯೆರೆಡ್ ಮಸ್ತ್ ಜನ ಮಾರ್ಥ ಬೊಕ್ಕ ಮರಿಯಗ್ ಅಕ್ಲೆನ ಮೆಗ್ಯನ ಮರಣದ ಸಂಗತಿಡ್ ಸಮಜೈಸಿಯೆರೆ ಬತ್ತ್‌ದಿತ್ತೆರ್.

20ಇಂಚ ಉಪ್ಪುನಗ, ಯೇಸು ಬರ್ಪೆ ಇನ್ಪಿ ಸಂಗತಿನ್ ಕೇಂಡ್ದ್, ಮಾರ್ಥ ಆಯನ್ ಎದುಕೊನಿಯೆರೆ ಪೋಯಲ್, ಆಂಡ ಮರಿಯ ಇಲ್ಲಡೇ ಕುಲ್ಲೊಂದಿತ್ತಲ್. 21ಬೊಕ್ಕ ಮಾರ್ಥ ಯೇಸುಗು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ. 22ಆಂಡಲಾ ದೇವೆರೆಡ ಎಂಚಿನ ಕೇನ್ವನಾ, ಅವೆನ್ ದೇವೆರ್ ನಿಕ್ಕ್ ಕೊರ್ಪೆ ಇನ್ಪಿನೆನ್ ತೆರಿದೆ,” ಪಂಡಲ್.

23ಯೇಸು ಆಲೆಡ, “ನಿನ ಮೆಗ್ಯೆ ಲಕ್ಕ್‌ದ್ ಜೀವ ಆದ್ ಬರ್ಪೆ,” ಅಂದ್‌ದ್ ಪಂಡೆ.

24ಮಾರ್ಥ ಆಯಡ, “ಸೈತಿನಾಕುಲು ಕಡೆ ದಿನೊಟು ಪುನರುತ್ಥಾನ ಆನಗ, ಆಯೆಲಾ ಲಕ್ಕ್‌ದ್ ಬರುವೆ, ಇನ್ಪಿನೆನ್ ತೆರಿದುಲ್ಲೆ,” ಅಂದ್‌ದ್ ಪಂಡಲ್. 25ಯೇಸು ಆಲೆಡ, “ಯಾನೇ ಸೈತಿನಾಕುಲೆಡ್ದ್ ಕುಡ ಲಕ್ಕುನಾಯೆಲಾ ಜೀವಲಾ ಆದುಲ್ಲೆ, ಎನನ್ ನಂಬುನಾಯೆ ಸೈತೆಡಲಾ ಬದುಕುವೆ. 26ಬೊಕ್ಕ ಏರ್ಲಾ ಜೀವೊಡುಪ್ಪುನಗ ಎನನ್ ನಂಬಿನಾಯೆ, ಏಪೊಗ್ಲಾ ಸೈಯಯೆ, ಉಂದೆನ್ ಈ ನಂಬುವನಾ?” ಅಂದ್‌ದ್ ಕೇಂಡೆ.

27ಐಕ್ ಆಲ್ ಆಯಡ, “ಅಂದ್ ಕರ್ತವಾ, ಲೋಕೊಗು ಬರೊಡಾಯಿ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಈಯೇ, ಅಂದ್‌ದ್ ನಂಬುದೆ.” ಪಂಡಲ್.

ಯೇಸು ಕಣ್ಣೀರ್ ಜಪುಡಾಯಿನವು

28ಉಂದೆನ್ ಪಂಡ್ದ್ ಆಲ್ ಪೋದು ತನ ಮೆಗ್ದಿ ಮರಿಯನ್ ಗುಟ್ಟುಡು ಲೆತ್ತ್‌ದ್, “ಗುರು ಬೈದೆ, ನಿನನ್ ಲೆತ್ತೊಂದುಲ್ಲೆ,” ಅಂದಲ್. 29ಮರಿಯ ಉಂದೆನ್ ಕೇಂಡಿಲೆಕ್ಕನೇ ಲಕ್ಕ್‌ದ್ ಆಯ ಕೈತಲ್‌ ಪೋಯಲ್. 30ಯೇಸು ನನಲಾ ಊರುದ ಉಲಯಿ ಬತ್ತ್‌ತ್ತಿಜೆ, ಮಾರ್ಥಗ್ ತಿಕ್ಕಿನ ಜಾಗ್‌ಡೇ ಇತ್ತೆ. 31ಮರಿಯಡೊಪ್ಪ ಇತ್ತ್‌ದ್ ಆಲೆನ್ ಇಲ್ಲಡ್ ಸಮಾಧಾನ ಮಲ್ತೊಂದಿತ್ತಿನ ಯೆಹೂದ್ಯೆರ್, ಆಲ್ ಒರನೆ ಲಕ್ಕ್‌ದ್ ಪೋಯಿನೆನ್ ತೂದು, ಆಲ್ ಬುಲಿಪೆರೆ ಸಮಾಧಿಗ್ ಪೋಯಲ್ ಅಂದ್‌ದ್ ಎನ್ನ್‌ದ್ ಆಲೆನ ಬೆರಿಯೆ ಪೋಯೆರ್.

32ಮರಿಯ ಯೇಸು ಇತ್ತಿನಡೆಗ್ ಬತ್ತ್‌ದ್ ಆಯನ್ ತೂದು ಆಯ ಕಾರ್‌ಗ್ ಅಡ್ಡಬೂರ್ದು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ,” ಪಂಡಲ್.

33ಆಲ್ ಅರ್ಪಿನೆನ್ಲಾ ಬೊಕ್ಕ ಆಲೆಡೊಪ್ಪ ಬೈದಿನ ಯೆಹೂದ್ಯೆರ್ ಬುಲ್ಪುನೆನ್ಲಾ ಯೇಸು ತೂದು, ಮನಸ್ ಕರಗ್‌ದ್, 34“ಆಯನ್ ಓಲು ದೀತರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ಕರ್ತವಾ, ಬತ್ತ್‌ದ್ ತೂಲ.” ಪಂಡೆರ್.

35ಯೇಸು ಕಣ್ಣೀರ್ ದೆತ್ತೆ. 36ಯೆಹೂದ್ಯೆರ್ ತೂದು, “ಆಹಾ, ಉಂಬೆ ಲಾಜರ ಮಿತ್ತ್ ಏತೋ ಪ್ರೀತಿ ದೀದಿತ್ತೆ,” ಅಂದ್‌ದ್ ಪಂಡೆರ್.

37ಅಕ್ಲೆಡ್ ಕೆಲೆವೆರ್, “ಇಂಬೆ ಕುರುಡಗ್ ಕಣ್ಣ್ ಕೊರಿನಾಯೆ ಅತ್ತಾ? ಈ ಲಾಜರೆ ಸೈಯಂದಿಲೆಕ್ಕ ಮಲ್ಪೆರೆ ಆತ್ವಂದಾ?” ಪಂಡೆರ್.

ಯೇಸು ಸೈತ್‌ದಿತ್ತಿ ಲಾಜರನ್ ಬದುಕಾಯಿನವು

38ಯೇಸು ಕುಡ ಮನಸ್‌ಡ್ ಕರಗೊಂದು ಸಮಾಧಿದ ಕೈತಲ್‌ ಬತ್ತೆ. ಅವು ಒಂಜಿ ಮಾಟೆ ಆದಿತ್ತ್ಂಡ್ ಐತ ಬಾಯಿಗ್ ಒಂಜಿ ಮಲ್ಲ ಕಲ್ಲ್ ದೀದ್ ಮುಚ್ಚಿದಿತ್ತೆರ್. 39ಯೇಸು, “ಆ ಕಲ್ಲ್‌ನ್ ದೆಪ್ಪುಲೆ,” ಪನ್ನಗ, ಸೈತ್ ಪೋಯಿನಾಯನ ಪಲ್ದಿ ಮಾರ್ಥ, “ಕರ್ತವಾ, ಆಯೆ ಸೈತ್‌ದ್ ನಾಲ್ ದಿನ ಆಂಡ್, ಇತ್ತೆ ನಾತ ಬರು,” ಪಂಡಲ್.

40ಯೇಸು ಆಲೆಗ್, “ಈ ನಂಬಿಯಡ ದೇವೆರೆ ಮೈಮೆನ್ ತೂವ ಅಂದ್‌ದ್ ನಿಕ್ಕ್ ಪಂತಿಜೆನಾ?” ಅಂದ್‌ದ್ ಉತ್ತರ ಕೊರಿಯೆ. 41ಅಪಗ ಕಲ್ಲ್‌ನ್ ದೆತ್ತ್‌ದ್ ಪಾಡಿಯೆರ್, ಬೊಕ್ಕ ಯೇಸು ಮಿತ್ತ್ ತೂದು, “ಅಮ್ಮೆರೇ, ಈ ಎನ ಪ್ರಾರ್ಥನೆನ್ ಕೇಂಡಿನೆಕ್ಕಾದ್ ನಿನನ್ ಪುಗರುವೆ. 42ಈ ಏಪಲಾ ಎನ ಪ್ರಾರ್ಥನೆನ್ ಕೇನ್ವ ಪನ್ಪಿನವು ಎಂಕ್ ತೆರಿದೇ ಉಂಡು; ಆಂಡಲಾ ಈಯೇ ಎನನ್ ಕಡಪುಡ್ದು ಕೊರ್ತ ಪನ್ಪಿ ಸಂಗತಿನ್ ಸುತ್ತಲಾ ಉಂತುದಿ ಜನೊಕುಲು ನಂಬೊಡು ಅಂದ್‌ದ್ ಅಕ್ಲೆಗ್ ಬೋಡಾದ್ ಈ ಪಾತೆರೊನು ಪನ್ಪೆ,” ಪಂಡೆ. 43ಅವೆನ್ ಪಂಡಿ ಬೊಕ್ಕ ಮಲ್ಲ ಸ್ವರೊಟ್ಟು, “ಲಾಜರ, ಪಿದಯಿ ಬಲ!” ಪಂಡೆ 44ಸೈತ್ ಪೋತಿನಾಯೆ ಪಿದಯಿ ಬತ್ತೆ. ಆಯನ ಕೈಕಾರ್ ಕುಂಟುಡು ಕಟ್ಟ್‌ದಿತ್ತ್‌ಂಡ್, ಆಯನ ಮೋನೆ ಕುಂಟುಡು ಸುತ್ತುದಿತ್ತ್‌ಂಡ್. ಯೇಸು ಅಕ್ಲೆಡ, “ಅವೆನ್ ಗಿರ್ಪುಲೆ, ಆಯೆ ಪೋವಡ್,” ಪಂಡೆ.

ಯೇಸುನು ಕೆರಿಯೆರೆ ಉಪಾಯ ಮಲ್ಪುನವು

(ಮತ್ತಾಯೆ 26:1-5; ಮಾರ್ಕೆ 14:1,2; ಲೂಕೆ 22:1,2)

45ಮರಿಯನಡೆ ಬತ್ತಿತ್ತಿ ಯೆಹೂದ್ಯೆರ್ ಯೇಸು ಮಲ್ತಿ ಕಾರ್ಯೊನು ತೂಯಿನೆಟ್ಟ್ ಮಸ್ತ್ ಜನ ಆಯನ್ ನಂಬಿಯೆರ್. 46ಆಂಡ ಕೆಲೆವೆರ್ ಪರಿಸಾಯೆರೆ ಕೈತಲ್‌ ಪೋದು ಯೇಸು ಮಲ್ತಿನೆನ್ ಅಕ್ಲೆಗ್ ತೆರಿಪಾಯೆರ್. 47ಅಪಗ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಹಿರಿಸಭೆನ್ ಸೇರಾದ್, “ನಮ ದಾದ ಮಲ್ಪೊಲಿ? ಇಂಬೆ ಮಸ್ತ್ ಕಾರ್ನಿಕೊಲೆನ್ ಮಲ್ಪುವೆ ಅತ್ತಾ? 48ನಮ ಉಂಬ್ಯನ್ ಇಂಚೆನೆ ಬುಡುಂಡ ಮಾತೆರ್ಲಾ ಆಯನ ಮಿತ್ತ್ ನಂಬಿಕೆ ದೀವೆರ್; ಬೊಕ್ಕ ರೋಮಾಯೆರ್ ಬತ್ತ್‌ದ್ ನಮಡ್ದ್ ಜಾಗ್‌ನ್ಲಾ ಜನೊಕುಲೆನ್ಲಾ ದೆತ್ತೊಂಬೆರ್,” ಪಂಡೆರ್.

49ಆಂಡ ಅಕ್ಲೆಡ್ ಕಾಯಫೆ ಪನ್ಪಿನಾಯೆ ಆ ವರ್ಸೊಗು ನೇಮಕಾತಿ ಪ್ರಧಾನಯಾಜಕೆ ಆದಿತ್ತ್‌ದ್, “ನಿಕ್ಲೆಗ್ ದಾಲಾ ತೆರಿಯಂದ್; 50ಮಾತ ದೇಶದ ಜನೊಕುಲು ನಾಶ ಆಪಿನೆಡ್ದ್, ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ನಿಕುಲು ಆಲೋಚನೆ ಮಲ್ಪುಜರ್?” ಪಂಡೆ. 51-52ಆಯೆ ತನ ಸ್ವಂತ ಆಲೋಚನೆಡ್ ಉಂದೆನ್ ಪಂಡಿಜೆ, ಆಂಡ ಆಯೆ ಆ ವರ್ಸದ ಪ್ರಧಾನಯಾಜಕೆ ಆದಿತ್ತ್‌ದ್ ದೇವೆರೆ ಸಹಾಯೊಡ್ದು ಯೇಸು ಯೆಹೂದ್ಯೆರೆ ಜನಾಂಗೊಗು ಬೋಡಾದ್ ಪ್ರಾಣ ಕೊರಿಯೆರೆ ಉಲ್ಲೆ ಅಂದ್‌ದ್ ಪಂಡೆ. ಯೇಸು ಆ ಜನಾಂಗೊಗು ಮಾತ್ರ ಅತ್ತಂದೆ ಚಲ್ಲಾಪಿಲ್ಲಿ ಆದ್ ಪೋಯಿ ದೇವೆರೆ ಜೋಕುಲೆನ್ ಕೂಡಾವುನೆಕ್ಕ್‌ಲಾ ಸೈಯೊಡಂದ್‌ದ್ ಪ್ರವಾದನೆ ಪಂಡೆ.

53ಆ ದಿನೊಡ್ದಿಂಚಿ ಆಯನ್ ಕೆರಿಯೆರೆ ಆಲೋಚನೆ ಮಲ್ತೊಂದಿತ್ತೆರ್. 54ಇಂಚ ಉಪ್ಪುನಗ ಯೇಸು ಯೆಹೂದ್ಯೆರೆ ಮದ್ಯೊಡು ತೋಜುಲೆಕ್ಕ ತಿರ್ಗಂದೆ ಗುಡ್ಡೆದ ಕೈತಲ್‌ಡ್ ಇತ್ತಿ ಎಫ್ರಾಯಿಮ್ ಇನ್ಪಿ ಊರುಗು ಪೋದು ಶಿಷ್ಯೆರೆಡೊಪ್ಪ ಇತ್ತೆ.

55ಅಪಗ ಯೆಹೂದ್ಯೆರೆ ಪಸ್ಕ ಪರ್ಬ ಕೈತಲ್‌ ಇತ್ತಿನೆಡ್ದ್, ಮಸ್ತ್ ಜನೊಕುಲು ತನ್ಕುಲೆನ್ ಶುದ್ಧ ಮಲ್ತೊನಿಯೆರೆ ಬೋಡಾದ್, ಪರ್ಬೊಡ್ದು ದುಂಬತ್ತ, ಹಳ್ಳಿಡ್ದ್ ಯೆರೂಸಲೇಮುಗು ಬತ್ತೆರ್. 56ಅಕುಲು ಯೇಸುನು ನಾಡೊಂದು ದೇವಾಲಯೊಡು ಉಂತೊಂದು, “ನಿಕುಲು ದಾನೆ ಎನ್ನುವರ್, ಆಯೆ ಪರ್ಬೊಗು ಬರಂದೆ ಉಪ್ಪೆನಾ?” ನಿಕ್ಲೆಗ್ ಎಂಚ ತೋಜುಂಡು ಅಂದ್‌ದ್ ಒರಿಯಡ್ದೊರಿ ಪಾತೆರೊಂದು ಇತ್ತೆರ್. 57ಆಂಡ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತೊಡಂದ್‌ದ್ ಆಲೋಚನೆ ಮಲ್ತ್‌ದ್, ಆಯೆ ಉಪ್ಪುನ ಜಾಗ್ ಏರೆಗಾಂಡಲಾ ತೆರಿದಿತ್ತ್‌ಂಡ, ಅವೆನ್ ತನ್ಕ್‌ಲೆಗ್ ತೆರಿಪಾವೊಡು ಅಂದ್‌ದ್ ಅಪ್ಪಣೆ ಕೊರ್ದಿತ್ತೆರ್.

Currently Selected:

ಯೋಹಾನೆ 11: ತುಳು

Highlight

Copy