Salm 35
35
Urnaí in Aghaidh an Namhad
1 [Salm le] Dáiví.
1 Tagair mo chúis, a Thiarna, in aghaidh mo naimhde:
cuir cath ar a mbíonn ag troid liom.
2Gabh chugat do sciath agus do lúireach,
agus éirigh do mo chúnamh.
3Beartaigh an ga agus [an tsleá]
in aghaidh lucht mo thóraíochta.
Abair le mʼanam, a Thiarna:
“Is mise do shlánú.”
4Go dtugtar náire agus tarcaisne ar an dream
atá ar tí mo mharaithe.
Go gcuirtear ar gcúl faoi náire
lucht beartaithe oilc i mʼaghaidh.
5Go gcuire aingeal an Tiarna an ruaig orthu
amhail cáith roimh an ngaoth;
6go raibh a slí go sleamhain dúdhorcha
agus aingeal Dé ar a dtí.
7Leathadar a líon dom gan chúis:
rinneadar uaigh dom gan ábhar.
8Go dtaga orthu díothú gan choinne;
go gceaptar iad féin
sa líon a chuir siad i bhfolach romham.
Go dtite siad sa chlais.
9Déanfaidh mʼanam-sa lúcháir sa Tiarna:
déanfaidh mé gairdeas ina shlánú.
10Déarfaidh mé ó mo chroí go hiomlán:
“Cé is cosúil leat, a Thiarna,
an té a tharrthaíonn an truán ón tréan-fhear,
an duine dealbh ón tíoránach?”
11Éiríonn finnéithe bréige i mʼéadan
do mo cheistiú ach mé aineolach.
12Díolann siad an t‑olc in aghaidh na maithe liom:
tá mʼanam go brónach.
13Nuair a bhíodar-san breoite chuir mé sac-éadach orm;
chiapas mʼanam le troscadh.
Bhínn ag guí ó mo chroí orthu mar a ghuífinn
14ar dheartháir liom nó cara;
mar dhuine a bheadh ag caoineadh a mháthar,
bhí mé crom le cumha.
15Ach anois, ó tá mé san fhaopach
cruinníonn siad faoi áthas.
Tagann siad gan a fhios orm, do mo bhualadh,
ʼs iad ag tromaíocht gan scíth orm.
16Bíonn siad ag magadh fúm gan stad gan staonadh,
is a bhfiacla ag díoscán i mʼaghaidh.
17Cá fhad a bheidh tú ag amharc orthu, a Thiarna?
Tar agus fóir orm!
Déan mʼanam a fhuascailt óna n‑ionsaithe;
mʼanam ó na leoin.
18Tabharfaidh mé buíochas duit sa mhórdháil;
molfaidh mé thú sa slua.
19An dream atá ina naimhde gan chúis dom,
nár dhéana siad gairdeas umam.
Agus an dream a thugann fuath dom gan fáth,
nár chaocha siad a súile orm.
20Is fuath leo muintir shuaimhneach na tíre:
cumann siad cealg ina n‑aghaidh.
21Deir siad, agus a mbéal ar leathadh acu:
“Há, há! Nach bhfacamar féin é!”
22Chonaic tusa é, a Thiarna; ná bí i do thost;
ná bí i bhfad uaim, a Thiarna!
23Múscail! agus brostaigh chun mo chosanta
a Dhia liom; a Thiarna bí liom.
24Tabhair breith orm de réir do chirt, a Thiarna;
ná maídís a mbua orm, a Dhia.
25Ná smaoinidís ina gcroí: “Tá buaite againn!”
Ná habraidís: “Shlogamar siar é!”
26An dream lenarb áil mo dhochar,
go raibh náire is míchlú orthu!
Go gclúdaítear le heasonóir is le haithis
lucht maíte i mʼéadan.
27Bíodh gliondar agus gairdeas ar lucht mo pháirte,
agus abraidís gan sos:
“Moladh leis an Tiarna lenarb áil
sonas a sheirbhísigh!”
28Agus foilseoidh mo theanga dʼfhíréantacht
agus do mholadh ar feadh an lae.
Currently Selected:
Salm 35: ABN2012
Highlight
Share
Copy
Want to have your highlights saved across all your devices? Sign up or sign in
© An Sagart 2012 Úsáidtear le cead. Used by permission.
