Markos 9

1Rmengo dheya dungal ka Yesu: “Bale ba rngage maku, duma seediq nii mheyu hini, ini namu huqil na we mqita namu qnlhangan Utux Baro maadis beyax meyah.”

Kmpriyux Hnyegan ka Yesu

(Mat 17:1-13. Ruk 9:28-36)

2Wada hmrinas mk6 ali, madis wano Petros, Yakobu ma Yohane ka Yesu. Mosa nanak paru dgiyaq. Kmpriyux hnyegan na berah daha ka Yesu. 3Tqwilaq ba ka lukus na ani kana knbhege. Mricuh lukus bobo dxeral we ini dehuk pkbhege so nii. 4Niqan Moseh ma Eliyah ptruura pqita dheyaan ma, mpprengo daha Yesu. 5Rmengo Yesu ka Petros: “Mptgesa, malu ba ka meniq ta hini! Smlei miyan 3 behing. 1 we nnisu, 1 we nMoseh, 1 we nuEliyah.” 6Ini kela mprengo ta maanu mesa ka Petros, ado ani kana kniicu daha. 7Truura meyah ka 1 plabu mubung dheya, niqan hrenang peeyah ckceka plabu, rmengo: “Nii we laqi sgaalu mu. Qbahang heya!” 8Asi qita ssiyo daha ka dheya, wano Yesu nanak ka gaga theyaq dheya, ini daha tai ka ani ima da.

9Peeyah dgiyaq meyah ciida, mdakar rmengo dheya ka Yesu: “Berah muudus peeyah hnqilan ka Laqi seediq we iya rngagi ani ima ka ntaan namu.” 10Psaun daha bale lhebun daha ka kari nii, mpprengo: “Maanu dungus na ka ‘muudus peeyah hnqilan’ ho?” 11Smiling Yesu ka dheya: “Ma rmengo so nii ka dmptpatis: ‘Asi ka plaale meyah ka Eliyah’ ho?” 12Rmengo ka Yesu: “Ida asi ka plaale meyah ka Eliyah ma meyah pstutuy ani maanu. Uxe so nii ka tniyu na Laqi seediq ka Patis nii, mmaha smterung egu mqraqil, mooda pqsiqa seediq peni? 13Ani so kiya rngage maku, tena mneyah ka Eliyah da, mhmetan daha ka heya, mntena ba gaga spatis ckceka Patis hiya ka quri heya.”

Pkmalu Laqi ga Sdooyan Utux Naqah

(Mat 17:14-21. Ruk 9:37-43)

14Dehuk tnugsaan Yesu hiya ka dheya, mita nii mtlibu ssiyo tnugsaan na ka hbaro ba seediq. Ida ga hiya ka dmptpatis gisu pkeekan kari dheya. 15Mita Yesu ka kana hbaro seediq de asi skluwi bale duma tmalang mosa mnais heya. 16Smiling dheya ka Yesu: “Maanu ka ga namu sptgdiyal kari dheya ho?” 17Cmiyuk ka 1 ckceka hbaro seediq: “Mptgesa, madis ku laqi mu nii sdooyun bgihur pkngangah heya. 18Ani meniq ani inu qmerac heya ka bgihur kiya. Ptkurun na, kiya de msruba, qnqetic rupun na ma mkere kana ka heyi na. Splawa mu ka tnugsaan su pqduriq bgihur kiya ma ini tgkeela ka dheya.” 19Cmiyuk rmengo ka Yesu: “Ah, uka snhiyan ka mknexal nii wa! Mpbetaq ku knuwan msuupu yamu ho? Mpbetaq ku knuwan knremun yamu ho? Adis yaku hini ka heya!” 20Desun daha Yesu hiya ka laqi. Mita Yesu ka bgihur naqah de asi na pkkili ka laqi. Mtakur ma msbbarux dxeral msruba ka quwaq na. 21Smiling tama laqi ga ka Yesu: “Peeyah sknuwan ka so nii heyi na ho?” Cmiyuk ka tama laqi: “Ida pneyah rabu. 22Bgihur kiya we mneegu na qmada ckceka puniq ma ckceka qsiya ka heya, stangun na phuqil. Nasi su mtduwa mooda, ani su ba rabang glaani nami, dyagi nami ba!” 23Rmengo heya ka Yesu: “‘Nasi su snhii?’ Snhii ka seediq we ani maanu ida na tgklaan.” 24Asi kparu quwaq na mdiras ka tama laqi: “Snhii ku. Dyagi ku hiya ka ini ku snhii!” 25Qmita hbaro ba seediq tmalang msseli ka Yesu de, kseengun na ka bgihur naqah: “Isu nii bgihur pkrbuni ma pkngangah. Posa ku kari, latac peeyah heya, iya bale teme da!” 26Mdiras mlawa ka bgihur, htiyan na pklekil bale ka laqi de mlatac nganguc da. Mntena so mhuqil seediq ka laqi nii. Kiya de tgbaro rmengo duma ka seediq: “Mhuqil da!” 27Dmoi baga na ka Yesu, pstoyun pstutuy, mtutuy ka heya da. 28Mremux sapah ka Yesu, gmuruus smiling heya ka tnugsaan na: “Hmuwa, ma miyan ini tgkela pqduriq bgihur kiya ho?” 29Rmengo ka Yesu: “Asi ka spooda dmurun, bgihur naqah so nii ge, uka klaan pqduriq.”

Mn2 Rmengo Kari Pgeela Mphuqil Ma Mpkuudus ka Yesu

(Mat 17:22-23. Ruk 9:43-45)

30Peeyah heya ka dheya, moda Galil. Ini kmsruwa pkela ani ima seediq ka Yesu. 31Ado gaga tmgesa tnugsaan na, so nii: “Maha sbege baga seediq ka Laqi seediq, phqilun daha ka heya. Wada phqilun ka heya, bobo mk3 ali de mpkuudus ka heya.” 32Ini daha klai ka kari nii, miicu smiling heya uri.

Ima ka Paru?

(Mat 18:1-5. Ruk 9:46-48)

33Meyah Kaparnaom ka dheya. Meniq sapah truma ka dheya. Smiling tnugsaan na ka Yesu: “Gaga namu mqqeerun maanu mkleelu ho?” 34Mgmelux ka tnugsaan. Ado mkleelu ciida ka dheya we gaga mkeekan kari, ima ka rmabang paru na ka dheya. 35Tleung ka Yesu, splawa na ka 12 heyi tnugsaan na. Rngagan na: “Ima ka maha paru ge, asi ka meniq bukuy seediq ma mtnqliyan kana namu.” 36Kiya de madis 1 laqi biciq ka Yesu. Phyegun na ckceka daha ma mexun na ka heya dungal. Rmengo dheya, 37“Ani ima ado ngayan mu smbleyaq psteme so nii laqi biciq we kika smbleyaq yaku. Ani ima smbleyaq psteme yaku we, uxe yaku ka gaga daha sbleyaq psteme. Gisu smbleyaq psteme smnkagul kenan ka heya.”

Ini Hetur we Kika Dmayo Ita

(Ruk 9:49-50)

38Rmengo Yesu ka Yohane: “Mptgesa, ntaan miyan ka seediq pooda ngayan su pqduriq bgihur naqah. Kiya de hteran nami. Ado ini snegul yami ka heya.” 39Rmengo heya ka Yesu: “Iya hterani. Ado uka ka seediq pooda ngayan mu qmeepah paru qneepah ma, asi lux smngayan kenan dungal. 40Ini hetur ita ka seediq we kiya ka dmayo ita. 41Ani ima piimah 1 mahan qsiya yamu, nii ge ado nKiristo ka yamu. Bale ba rngage maku, seediq nii ge ida maangal snadu na.”

Hmetur Pnsrdilan Qnquwan Noda

(Mat 18:6-9. Ruk 17:1-2)

42“Ani ima ka pktakur 1 so nii tgbiciq snhii kenan we nuuqu malu seegul nduyung na ka paru ba glangan ma sqada rcilung ka heya. 43Nasi pktakur sunan ka icil baga su, slapi hiya. 44Ani nanak 1 baga su mremux knuudus, Nuqu malu niqan 2 baga su mremux ini qsetuq puniq tuxan pkdraun hiya. 45Nasi pktakur sunan ka icil papak su, slapi hiya. 46Mpika papak su mrremux knuudus, Nuqu malu daha papak su sqada su daha tuxan pkdraun we, kenu ka malu? 47Nasi pktakur sunan ka icil doriq su, pkaangal ka kiya. 1 ba doriq su mremux qnlhangan Utux Baro ma, malu daha doriq su sqada su daha tuxan pkdraan we, kenu ka malu? 48Hiya we ini qhuqil ka kuyi, ini kpahung ka puniq. 49Qmasun puniq kana ka seediq. 50Malu ka timu. Nasi uka knremun na ka timu, huwa kesun pkremun dungal ho? Pniqi timu ckceka namu, so maha namu mpkmalu.”

Currently Selected:

Markos 9: Stgdaya

Highlight

Copy