Markos 8

Pktengi 40'00 Seediq

(Mat 15:32-39)

1Ali ciida, meyah msseli dungal ka hbaro bale seediq. Uka ani maanu uqun daha ka dheya. Mlawa tnugsaan na ka Yesu, rmengo: 2“Sgaalu mu ka hbaro ba seediq nii. Ado mk3 ali ka tnhiyan daha kenan, uka ani maanu uqun daha uri. 3Nasi mu skgulun sapah muure ka dheya de, maha mtakur elu ka dheya da. Ckceka daha we niqan ka pneyah theya na uri?” 4Cmiyuk rmengo ka tnugsaan na: “Mpeeyah inu ka pang meniq dxeral nrao pktengi pqdiyal seediq nii ho?” 5Smiling ka Yesu: “Piya ka pang namu ho?” Rmengo ka dheya: “7” mesa. 6Tleung dxeral, kesun na rmengo ka hbaro ba seediq. Ngalun na ka 7 pang ma mege qrasan. Kiya de gbingun na ma sbege na tnugsaan na. Dheya de saasu daha hbaro seediq da. 7Niqan tikuh qcurux biciq ka dheya na. Mege qrasan ka Yesu, kiya de dmurun say maasu uri ka nii mesa. 8Mnekan ma mtengi da. Pssliun daha ka nngari pang gnebin we 7 rawa. 9Ciida we 40'00 ka seediq. Wada psaun Yesu ka hbaro seediq. 10Kiya de asi psuupu tnugsaan na paapa asu mosa dxeral Dalmanouta.

Mesa Pnskraya Qneepah ka seediq Parisay

(Mat 16:1-4)

11Meyah ka seediq Parisay ma smiling Yesu. Mesa pnskraya peeyah baro ka dheya psseung Yesu. 12Pshengak peeyah ckceka lhebun na ka Yesu, kiya de rmengo: “Hmuwa, ma mesa pnskraya qneepah ka mknexal saya ho? Bale ba rngage maku, uka bale pnskraya qneepah bege mknexal saya.” 13Kiya de mlatac dheyaan ka Yesu, paapa dungal asu mosa sipo.

Tgeda seediq Parisay ma DHrodes

(Mat 16:5-12)

14Cmhungi madis pang ka tnugsaan ma uka ani maanu uqun wano 1 ba pang we bobo asu hiya. 15Pdkaran rmengo Yesu ka dheya: “Qlahang ka yamu, Tgkeela, qlhangi ka tgeda pllabu pang seediq Parisay ma tgeda pllabu pang Hrodes.” 16Gisu mpprengo: Ado ini ta adis pang. 17Klaun Yesu de rngagan na: “Hmuwa, ma namu gaga mpprengo ini adis pang ho? Ini namu klai nana peni? Ini namu tgkela lmngelung na? Ma mkere lhebun namu na ho? 18Niqan ka doriq namu, ma namu ini qita? Niqan ka birac namu, ma namu ini qbahang peni? Cmhungi namu di ho? 19Gnebin mu ka 5 pang wada saasu 50'00 seediq ciida, pnsseli namu ka gnebin pang ge piya ka stenge rawa ho?” Rmengo ka dheya: “12”. 20“Wada ku gmebing 7 pang saasu mu 40'00 seediq ciida, pnsseli namu ka gnebin pang ge piya ka stenge rawa ho?” Rmengo ka dheya: “7”. 21Rmengo dheya ka Yesu: “Ini namu kela lmngelung na ho?”

Pkmalu Mbudu Seediq

22Meyah Betsaida ka dheya, niqan seediq madis 1 mbudu doriq, mesa Yesu ttelung na mbudu. 23Dooyan na baga ka mbudu doriq, desun na nganguc alang. Kiya de ptruqan na ka doriq na, psaun na ka baga na, smiling heya: “Ga su qmita maanu ho?” 24Mtutuy tunux na, qmita ma rmengo: “Qmita ku seediq, mntena so qhuni gaga mkkesa.” 25Bobo na de, Yesu we psaan na doriq na dungal ka baga na. Kmbeyax mita ka heya de wada malu da. Ani maanu leexan ba qnita. 26Skgulan na mosa sapah ka Yesu, rngagan na: “Ani alang nii iya sai mremux.”

Petros we Mkela Kiristo ka Yesu

(Mat 16:13-20. Ruk 9:18-21)

27Mlatac mosa lualang quri Pilipi Kaisareia ka Yesu ma tnugsaan na. Meeniq elu ciida, smiling tnugsaan na ka Yesu: “Ima kesun ku daha ka dseediq ho?” 28Cmiyuk rmengo ka dheya: “Yohane mptgaya smino. Rmengo duma we Eliyah. Duma dungal we 1 mpgeela kari cbeyo.” 29Smiling dheya ka Yesu: “Ima kesun namu ka yaku ho?” Cmiyuk rmengo ka Petros: “Isu we Kiristo.” 30Kiya de pdkaran na rmengo: “Iya bale rrngaani ani ima ka yaku.”

Rmengo Kari Pgeela Ooda Mpqraqil ma Mpkuudus ka Yesu

(Mat 16:21-28. Ruk 9:22-27)

31Peeyah ciida, prading tmgesa dheya ka Yesu, rmengo: “Laqi seediq we ida asi ka mooda egu ba mqraqil. Sqada rdrudan mpqlahang, dpusu msapuh ma dmptpatis. Kiya de phqilun daha, bobo mk3 ali de mpkuudus dungal.” 32Pgkela kari nii ka Yesu. Petros ge tlusun na ssiyo ka Yesu ma kseengun na. 33Mspgeriq qmita tnugsaan na ka Yesu, mseang rmengo Petros: “Satang, brinah osa bukuy mu! Ado ini su lnglungi ooda Utux Baro, wano quri seediq ka lnglungun su.” 34Kiya de splawa na ka hbaro ba seediq ma tnugsaan na, rngagan na: “Nasi niqan ka seediq kmsnegul kenan, asi ka malix heya. Paani ka jyujika na snegul kenan. 35Kmpkuudus knuudus na ka seediq we pgdangun na ka knuudus na. Ado yaku ma malu kari ka shuqil na ka seediq we bale ba mpkuudus. 36Nasi na ngalun kana ka bobo dxeral ka seediq, wada sprireh knuudus na de, maanu rrihun na ho? 37Maanu ka ngngalun su spririh knuudus su ho? 38Meniq ckceka naqah ba mmhemuc msuupu mknexal saya, ani ima sqsiqa na ka yaku ma kari tnugesa mu we, Laqi Seediq meniq knledax Tama na msuupu kana snkgulan baro meyah ciida de, sqaun na ka heya uri.”

Currently Selected:

Markos 8: Stgdaya

Highlight

Copy