Markos 7

Mpprengo Kari Rdrudan Cbeyo

(Mat 15:1-20)

1Msuupu meyah msseli Yesu hiya ka seediq Parisay ma duma dmptpatis pneyah Yerusalem. 2Qtaan daha ka duma tnugsaan Yesu, dmoi mrutiq baga mekan ido, kiya ka baga ini trmai. 3Ado seediq Parisay ma kana seediq Yudaya we pyugun daha bale ka gaya rdrudan cbeyo, nasi ini bleyaq trima baga we ini ekan. 4Nasi ini daha snagi ka pneyah brigan ini daha uqi. Egu bale ka gaya rdrudan pyugun daha. Kiya ka so smino mahan, rusuq, uqan snmalu limuk ma qlapo. 5Smiling Yesu ka seediq Parisay ma dmptpatis: “Hmuwa, ma ini puyu gaya hniti rudan cbeyo ka tnugsaan su, dmoi rkeruk baga mekan ido ho?” 6Rmengo dheya ka Yesu: “Malu bale kari pnugeela Isaya rnengo na yamu seediq nii nnnangi malu. Mntena so pnatis Patis:

‘Dmoi quwaq smparu yaku ka seediq nii.

Lhebun daha we smtheya kenan.

7Dheya ge ngalan daha stgesa seediq ka gaya seediq,

Ani thmuku kenan we mgqiya uri.’

8Malix namu gaya Utux Baro, muyu namu kari hniti seediq.” 9Rmengo dungal ka Yesu: “Ado ppuyu namu hniti kari rdrudan namu, betaq namu qmada gaya Utux Baro. 10Rmnengo ka Moseh: ‘Sprui ka tama ma bubu su,’ rmengo dungal: ‘Rmengo naqah kari tama ma bubu ka seediq we ida phqilun.’ 11So nii ka kari namu: Nasi rmengo tama ma bubu na ka seediq: ‘Kana so bbege mu isu we, wada ngalun kurubang da’ (Kurubang nii we bbege ka elu kari na). 12Nasi so kiya de ani nanak ini danga tama ma bubu we srwaun namu ka heya. 13So kiya ka spooda namu Mslutuc kari pnltudan namu gaya cbeyo ma lixan namu ka kari Utux Baro. Mntena so nii, egu bale ka noda namu so nii na.”

14Mlawa hbaro ba seediq, rmengo dheya ka Yesu: “Kana namu qbahang kari mu, klai ba lmngelung uri. 15Peeyah nganguc mremux ckceka seediq we ini pqnaqah seediq. Peeyah ruwan seediq we kiya ka pqnaqah seediq. 16Niqan birac qqbahang ka seediq we bleyaq mbahang!” 17Mlatac hbaro seediq ka Yesu, mosa mremux sapah. Smiling pnungalan kari heya ka tnugsaan na. 18Rmengo ka Yesu: “Ani yamu, ini namu kela uri ho? Ini namu klai ka kana pneyah nganguc mremux truma we ini tduwa pqnaqah seediq? 19Ado ini teme lhebun seediq ka kiya, wada mteme nanak nbuyas ma mtuting qtiyan duri.” (So nii kari Yesu ge, wada na sbrahun kana ka uqun da.) 20Rmengo dungal ka heya: “Peeyah ruwan seediq we kika pqnaqah seediq. 21Ado peeyah ruwan ma pneyah lhebun seediq we niqan lmlamu naqah lnglungan, mkmhemuc msuupu, mgeeguy, pphuqil seediq. 22Mkmhemuc Msuupu, sqquru lnglungan, naqah qneepah, qqberiq, smkuxul truma, qqnriqu, ssngayan, ppsparu, ini baka knkela. 23Kana naqah nii we pneeyah ruwan mlatac kana, kiya ka pqnaqah seediq.”

Snhiyan Mqedil Pniki

(Mat 15:21-28)

24Mtutuy peeyah hiya ka Yesu ma mosa quri dxeral Turos. Mremux 1 sapah, ini knpgkeela ani ima. Kiya de ini tduwa tgleing seediq. 25Kiya de niqan ka 1 mqedil, laqi na biciq mqedil we ga sdooyun bgihur naqah ka heyi na. Mnbahang noda Yesu ma, kika meyah tmbqelic berah papak na. 26Mqedil nii we seediq Hellenis ma seediq Pniki alang Suria. Mesa Yesu ka heya ppqduriq na bgihur naqah peeyah laqi na mqedil. 27Rmengo heya ka Yesu: “Pllai pktengi qdiyal ka laqi. Ngalun ta ka pang laqi ma sqada peekan huling we ini tduwa.” 28Cmiyuk rmengo ka mqedil: “Bukung! Ani so kiya, ida mekan nemu pntuting laqi ka huling ga meniq toma uqan uri!” 29Rmengo heya ka Yesu: “Spooda kari su so nii, tduwa su mosa da. Wada mlatac peeyah laqi su mqedil ka bgihur naqah da.” 30Mosa sapah ka mqedil de mita laqi na ga mtaqi qlapo, tena wada mlatac ka bgihur naqah da.

Pkmalu Seediq Mngangah ma Mrbuni

31Mlatac peeyah dxeral Turos dungal ka Yesu, moda Cidon ma meyah rcilung Galil dxeral Dekapolis. 32Niqan ka seediq we desun daha berah Yesu ka 1 seediq mrbuni ma mkere hema. Mesa baga na tmelung heyi seediq nii. 33Maadis heya nanak mlatac hbaro ba seediq ka Yesu. Psaan na tluding baga ka birac na ma mturuq rmicuh hema na. 34Pshengak mita karac, rmengo heya: “Ibata!” Kiya de dungus na we “Ptraguh da!” 35Asi ptraguh ka birac na ma mtlhelah hema na uri ma leexan ba rnengo kari ka heya da. 36Iya rengo ani ima, pdkaran na rmengo ka ddheya. Rnahun pdakar Yesu we kika krinah ba gmarang rmengo ka dheya. 37Mskluwi bale ka kana seediq ma rmengo: “Malu kana qneepah na! Ani mrbuni uri we pqbhangun na, ani mngangah we prngagun na!”

Currently Selected:

Markos 7: Stgdaya

Highlight

Copy