Ruka 9

Smkaqul 12 Tnugsaan ka Yesu

(Mat 10:5-15. Mrk 6:7-13)

1Splawa na psseli ka 12 tnugsaan na ka Yesu de biqan na beyax ma pusu beyax ppqduriq daha bgihur naqah ma ppkmalu daha mnarux. 2Kiya uri we skgulan na ka dheya mosa gmarang kari qnlhangan Utux Baro ma ppkmalu mnarux. 3Rngagan na ka dheya: “Mkleelu namu ciida we iya adis hukuc ma lubuy, iya adis uqun ma pila. Dungal iya adis 2 lukus pstrmaun. 4Mremux namu ani inu sapah we asi eniq hiya, kndalax peeyah hiya ka mosa namu dungal. 5Ani inu ini psteme yamu we mlatac namu peeyah alang hiya ciida we htii plhelah ka qbulic dxeral gaga papak namu. Kiya ka ppgkela qnquwan daha.” 6Kiya de mosa ka dheya moda lualang gmarang malu kari ma pkmalu mnarux ani inu.

Mgedang Lnglungan Na ka Hrodes

(Mat 14:1-12. Mrk 6:14-29)

7Hrodes mpdudul we qbhangan na ka ndaan Yesu nii de mgedang lnglungan na. Ado rmengo ka seediq: “Wada pkdusun peeyah hnqilan ka Yohane.” 8Duma na rmengo: “Nii meyah mtqita ka Eliyah.” Duma na we: “Nii muudus ka 1 mpgeela kari cbeyo.” 9Rmengo ka Hrodes: “Wada paqun ka Yohane da. Kiya de so nii mu qbhangan ka seediq nii we ima ho?” So kiya de mqmita ka heya.

Pktengi 50'00 Seediq

(Mat 14:13-21. Mrk 6:30-44. Yoh 6:1-13)

10Meyah ka snkgulan na ma ssneeru daha Yesu ka kana qneepah daha. Yesu de desun na gnruus tgkiwax alang Betsaida ka dheya. 11Mkela so nii ka hbaro seediq de smnegul heya. Kiya we mqaras smterung dheya ka Yesu ma rngagan na quri qnlhangan Utux Baro ma pklmeun na ka mnarux seediq.

12Mpgeqi ka hido de meyah rmengo heya ka 12 tnugsaan na: “Braho su skguli ka hbaro seediq oosa daha mkrabi migin uqun lualang biciq ma ssiyo alang mtqiri hini. Ado dxeral nrao ka nii ta niqan hini.” 13Rmengo ka Yesu: “Biqi uqun ka dheya.” Rmengo ka tnugsaan na: “Wano 5 pang ma 2 qcurux ka nii menan. Nasi ini oosa maruy uqun qqdiyal so hbaro seediq de uxe mptuku.” 14Yaa 50'00 ka rseno. Rmengo tnugsaan na ka Yesu: “Sai s50 heyi knkingal ptqpuruh ptleung ka dheya.” 15Wada mnduwa mchaya ptleung kana seediq ka tnugsaan. 16Maangal 5 pang ma 2 qcurux mita karac baro mqaras ka Yesu. Kiya de gbingun na ka pang ma sbege na tnugsaan na pssugun daha kana seediq. 17Mekan ka dheya, kiya de mtengi mekan kana da. Pssliun daha ka mnsngari gnebin we stenge 12 rawa.

Petros we Klaun na Kiristo ka Yesu

(Mat 16:13-19. Mrk 8:27-29)

18Wano Yesu nanak ka dmurun ciida, gaga msuupu heya meniq hiya ka tnugsaan na uri. Smiling dheya ka Yesu: “Ima kesun ku daha ka dseediq ho?” 19Cmiyuk rmengo ka dheya: “Duma seediq we ‘Yohane mptgaya smino’ mesa. Duma seediq we ‘Eliyah’ mesa. Duma seediq dungal we ‘Nii muudus dungal ka 1 mpgeela kari cbeyo’ mesa.” 20Kiya de smiling ka Yesu: “Ima kesun ku namu ka yaku ho?” Cmiyuk rmengo ka Petros: “Isu we Kiristo pnheyu Utux Baro.”

Kari Pgeela Ppqraqil ma Mpkuudus ka Yesu

(Mat 16:20-28. Mrk 8:30-9:1)

21Mdakar bale rmengo dheya ka Yesu, iya rrngaani ani ima ka noda nii. 22Rmengo dungal: “Laqi seediq we ida asi ka mooda egu ba mqraqil. Sqada rdrudan mpqlahang, dpusu msapuh ma dmptpatis. Kiya de phqilun daha, bobo mk3 ali de mpkuudus dungal.”

23Kiya de rngagan dheya dungal ka Yesu: “Nasi niqan ka seediq kmsnegul kenan, asi ka malix heya. Paani klaali ka jyujika na snegul kenan. 24Kmpkuudus knuudus na ka seediq we pgdangun na ka knuudus na. Ado yaku ka shuqil na ka seediq we bale ba mpkuudus. 25Nasi na ngalun kana ka bobo dxeral ka seediq, wada uka ka heya nanak ma, wada su spririh ka isu nanak. Maanu ka rrihun na ho? 26Ani ima sqsiqa na ka yaku ma kari tnugesa mu we, meeniq theyaq knledax Tama na msuupu kana snkgulan baro meyah ciida de, Laqi seediq ge, sqaun na ka heya uri. 27Bale ba rngage maku, duma seediq nii mheyu hini, ini namu qhuqil na we mqita namu qnlhangan Utux Baro.”

Kmpriyux Hnyegan ka Yesu

(Mat 17:1-8. Mrk 9:2-8)

28Bobo rmengo kari nii yaa mk8 de Yesu we desun na ka Petros, Yohane, Yakobu ma mosa dmurun dgiyaq. 29Dmurun ciida ka Yesu, dqeras na we wada kmpriyux ma tqwilaq knbhege ka lukus na da. 30Asi tai nii mpprengo 2 seediq, Moseh ma Eliyah, ka Yesu. 31Mtqita ckceka knledax ka dheya ma mprengo mphuqil ka Yesu. Kiya ka ddaun na mpptuku qpahun na meniq Yerusalem. 32Kiya de mslleung ka Petros ma msuupu heya, wada so miiyo de taan daha ka knledax Yesu ma 2 seediq mtheyaq mheyu heya. 33Mpswaye Yesu ciida ka 2 seediq nii de rmengo Yesu ka Petros: “Mptgesa, meeniq ta hini ka ita we malu ba! Smlei miyan 3 behing. 1 we nnisu, 1 we nMoseh, 1 we nuEliyah.” Kiya de yaa maanu ka gaga na srengo we ini na klai. 34Rmengo kari so nii ciida, meyah mubung dheya ka 1 plabu. Kiya de miicu mremux ckceka plabu ka dheya. 35Niqan ka hrenang peeyah ckceka plabu, rmengo: “Nii we laqi gneegan mu. Qbahang heya!” 36Uka ka kari de wano Yesu nanak ka taan daha hiya da. Kiya de mgmelux ka tnugsaan na ma ini daha rrngaani ani ima ali ciida ka ntaan daha.

Pklmeun ka Laqi Ga Sdooyan Utux Naqah

(Mat 17:14-18. Mrk 9:14-27)

37So kusun peeyah dgiyaq ka dheya, meyah smterung Yesu ka hbaro bale seediq. 381 ckceka daha we mlawa rmengo: “Mptgesa, braho su. Qtai ku hiya ka laqi mu. Wano ba heya ka laqi mu. 39Ga qrapun utux de asi plawa ka heya, pkeeki heya uri ma betaq msruba. Pqluqah bale heya ma ini bale latac heya. 40Mneeyah ku mesa tnugsaan su so daha lwaqun ka utux. Ini tgkeela ka dheya.” 41Cmiyuk rmengo ka Yesu: “Ah, uka snhiyan ma naqah ba ka mknexal nii wa! Mpbetaq ku knuwan knremun yamu meniq ku hini ho? Desi hini ka laqi su!” 42Meyah ka heya ciida, Tnugsebuc na ma pklekil heya ka bgihur naqah. Kiya de kseengun Yesu ka bgihur naqah ma pklmeun na ka laqi ma sbege na tama na. 43Mklui bale beyax Utux Baro ka kana seediq.

Mn2 Kari Pgeela Mphuqil Ka Yesu

(Mat 17:22-23. Mrk 9:30-32)

Kiya de mskluwi kana qneepah na ka kana seediq ciida we rngagan na ka tnugsaan na:

44“Yamu we pniqi birac namu ka kari nii. Ado Laqi seediq we bbege daha baga seediq.” 45Ini daha klai lmngelung ka kari na nii. Ga sgleing ka rrengo na. So uxe daha kklaun lmngelung. Dheya we miicu ssiling heya quri kari nii uri.

Ima ka Rmabang Paru?

(Mat 18:1-5. Mrk 9:33-37)

46Mtgdiyal kari ima ta ka rmabang paru ckceka daha ka tnugsaan na. 47Klaun Yesu ka ga daha lnglungun lhebun, kiya de madis 1 laqi biciq ma phyegun na ssiyo na, 48rmengo dheya: “Ani ima ado ngayan mu smbleyaq laqi nii we kika smbleyaq kenan. Ani ima smbleyaq kenan we smbleyaq smnkagul kenan uri. Tgbiciq ckceka namu we heya we rmabang paru.”

Ini Hetur de Kiya ka Dmayo Yamu

(Mrk 9:38-40)

49Rmengo ka Yohane: “Mptgesa, ntaan miyan ka seediq pooda ngayan su pqduriq bgihur naqah. Kiya de hteran nami. Ado ini theyaq snegul yami ka heya.” 50Rmengo ka Yesu: “Iya hterani. Ado ini hetur yamu we kiya ka gaga dmayo yamu.”

Ini Psteme Yesu ka Seediq Samareia

51Mpdehuk ka ali ngngalun baro ka Yesu, mpsquri ku Yerusalem mesa ka heya. 52Kiya de pglaun na posa ka snkgulan na. Dehuk 1 alang dxeral Samareia ka dheya ma ppsramal daha Yesu. 53Ini psteme heya ka seediq hiya, ado ka mquri Yerusalem ka dqeras na. 54Mita so nii ka Yakobu ma Yohane tnugsaan na de rmengo: “Bukung! Mpsruwa su yami pskagul puniq baro pqhedu psqama dheya, mntena so noda Eliyah ho?” 55Mspgeriq heyi ka Yesu ma mseang rmengo 2 tnugsaan na. 56Kiya de mquri lualang icil ka dheya.

Niqan Pnsrmalan ka Smnegul Yesu

(Mat 8:19-22)

57Mkleelu mkkesa ka dheya we rmengo Yesu ka 1 seediq: “Ani su mosa ani inu, ida ku mpsnegul sunan.” 58Rmengo ka Yesu: “Rqebux we niqan beling. Qbheni we niqan rudu. Kiya de ani tpnuwan ka Laqi seediq we uka bale.” 59Rngagan na ka 1 seediq dungal: “Snegul kenan!” Rmengo ka seediq kiya: “Bukung! Posa ku preus tama mu han.” 60Rmengo heya ka Yesu: “Sai preus dseediq mhuqil ka dseediq daha wada mhuqil. Isu we saani gmarang ka kari qnlhangan Utux Baro.” 61Rmengo ka 1 seediq dungal: “Bukung! Mpsnegul ku sunan. Kiya de psai ku pswaye dseediq sapah mu han.” 62Rmengo heya ka Yesu: “Dmoi parih ma mquri bukuy mita we ini mnuglengu mremux qnlhangan Utux Baro.”

Currently Selected:

Ruka 9: Stgdaya

Highlight

Copy