Ruka 10

Skgulan Yesu ka 72 Seediq

1Bobo na nii de Bukung we phyegun na ka 72 heyi uri ma sdhaun na posa smkagul knkingal alang ma knkingal dxeral ssaun na. 2Kiya de rmengo dheya: “Egu bale ka qbrungun, ini ba khbaro ka mpqeepah. Maanu so kiya de druni ka Bukung mpqlahang qbrungun so maha nhari smkagul mpqeepah na meyah qmburung qbrungan na. 3Osa ka yamu! Smkagul ku yamu we mntena wawa miric rudu mremux ckceka huling bbuyu. 4Iya adis psaan pila. Iya adis lubuy. Iya adis ramil. Mkleelu namu ciida we iya prengo seediq uri. 5Mremux namu ani inu sapah, pllai rmengo: ‘Tai so meniq sapah nii ka msbleyaq.’ 6Nasi ga meeniq hiya ka seediq mangal msbleyaq we ida meeniq sapah hiya ka msbleyaq pnesa namu. Nasi uka we maha nnamu da. 7Meeniq namu sapah nii, mekan ma mimah namu bnege daha. Ado mndungus biqan snadu ka qmneepah na. Iya thedil peeyah sapah nii ma mosa sapah kiya. 8Mremux namu ani alang inu, nasi psteme yamu ka seediq, maanu ka bnege daha we kiya ka ekan. 9Pkmalu ka mnarux ga meeniq hiya. Rngagi ka dheya: ‘Nii smdaling yamu ka qnlhangan Utux Baro da.’ 10Mremux namu ani alang inu, nasi ini psteme yamu ka seediq, osa elu daha, rngagi: 11‘Ani qbulic alang namu ka nii sqapah papak nami we asi nami ka sresun berah namu. Ani so kiya, nii smdaling ka qnlhangan Utux Baro we klai.’ 12Rngage maku, ali psgeegan ciida, maha mslokah pntnaun alang nii ka ndaan Sedom!”

Mseang Alang Ini Kmpriyux

(Mat 11:20-24)

13Qorajin, smtali su bale! Betsaida, smtali su bale! Ado kana paru beyax qneepah wada mu sqeepah yamu, nasi mu daun meepah Turos ma Cidon de, naka peeyah cbeyo mlukus lukus mbasi, tleung ckceka qbulic kmpriyux lnglungan da. 14Ali psgeegan ciida, maha mslokah pntnaun yamu ka Turos ma Cidon! 15Kaparnaom,

wada su mgkala baro ka isu.

Nexal de ptingun betaq tuxan mnkuung.

16Rmengo tnugsaan na dungal ka Yesu: “Mbahang yamu ka seediq we kika mbahang kenan. Qmada yamu ka seediq we kika qmada kenan. Qmada kenan ka seediq we kika qmada smnkagul kenan.”

Meyah Ka 72 Seediq

17Tqqaras ba meyah ka 72 seediq ma rmengo: “Bukung! Ado ngayan su we ani dbgihur naqah ida thei menan.” 18Rmengo dheya ka Yesu: “Ntaan mu mntena so wilaq mtuting peeyah karac baro ka Satang. 19Wada mu sbege yamu ka pusu beyax qqtemaq namu quyu ma pkurun ma uxe namu baka ka kana beyax pais. Uxe mpqluqah yamu ka ani maanu. 20Ani so kiya, iya sa gaga thei yamu ka duutux we mqaras namu da. Ga spatis karac baro ka ngayan namu kiya ka qqarasi.”

Mqaras ka Yesu

(Mat 11:25-27, 13:16-17)

21Ciida, Meniq ckceka Bgihur Utux ka Yesu de mqaras ma rmengo: “Tama, Bukung karac ma dxeral. Mqaras ku sunan. Ado wada su sgleing seediq niqan tunux ma mkela lmngelung ka so nii, so laqi rabu de sptuura su da. Tama, kiya. Ado lnglungan su we bale ba so nii. 22Kana ani maanu we ida spstama na kenan ka Tama mu. Wano Tama, uka ani ima ka mkela ima ka Laqi. Wano Laqi ma seediq kmptraun Laqi, uka ani ima ka mkela ima ka Tama.”

23Mspgeriq heyi na ka Yesu, snleesan na rmengo ka tnugsaan na: “Doriq so qmita ntaan namu we kiya ka mbleyaq. 24Rngage maku, mqmita bale qnita namu ka hbaro ba mpgeela kari ma dqbsuran paru cbeyo, ini daha qtai. Kmqbahang bale qnbhangan namu ka dheya we, ini daha bhangi.”

Pnungalan Kari Malu Seediq Samareia

25Kiya we meyah ka 1 mptgaya ma pseung Yesu rmengo: “Mptgesa, asi ku ka hmuwa kika mptduwa ku maangal uka psteqan knuudus ho?” 26Rmengo heya ka Yesu: “Maanu ka ga spatis gaya pndakar? Huwa mesa ka snepu su ho?” 27Cmiyuk rmengo ka heya: “Asi su ka speeyah kana lhebun, kana lnglungan, kana knkela gmaalu Bukung, Utux Baro su. Asi ka gmaalu su ssiyo pntena gmalu su sunan uri.” 28Rmengo ka Yesu: “Bale ba cniyuk su. Dai qmeepah ka nii, kiya de mpkuudus su.” 29Kiya de kmpgkeela knkela na nanak ka heya de rmengo Yesu: “Ima ka kesun ssiyo mu ho?”

30Cmiyuk rmengo ka Yesu: “Niqan 1 seediq peeyah Yerusalem mosa Yerixo ma sterung mpgeeguy. Sgliqan daha mangal ka lukus na ma psrui daha ma huwa daha phqili. Kiya de htiyan daha qmada de wada da. 31Pkelu ciida, moda elu hiya ka 1 msapuh, taan na ka seediq nii de sooda na thngali wada hmrinas da. 32Dungal, niqan 1 seediq Lewiy moda hiya, taan na ka seediq nii de sooda na thngali wada hmrinas uri da. 33Wano 1 seediq Samareia mkleelu moda hiya, taan na de sgaalu na bale. 34Mosa berah na hrigan na abura ma sino ka luqah na ma plbuwan na hiya. Kiya de spaapa na tnbugan na ma desun na sapah tqiyan ma qnlhangan na. 35So kusun de mangal 2 hbangan ging pila sbege na tnsapah tqiyan ma rmengo: ‘Qlhangi ka heya. Hmrinas ka wada su sliqan we prihun misu meyah ku dungal.’ 36Lngelung ka isu, 3 seediq nii we tgiinu ka ma siyo seediq snterung mpgeeguy nii ho?” 37Rmengo ka heya: “Gmnaalu heya.” Rmengo ka Yesu: “Osa mchaya ka isu uri.”

Mosa Mita Marta ma Maria ka Yesu

38Mkleelu mkkesa ciida ka dheya, mosa mremux 1 alang ka Yesu. Niqan 1 mqedil, ngayan na we Marta. Smterung ma desun na sapah na ka dheya. 39Niqan 1 mtswai na Maria. Maria we tleung berah papak Yesu ma mbahang kari tnugesa na. 40Marta we mrrudu lhebun na kneegu pntbyaxan na, kiya de meyah berah Yesu ma rmengo: “Bukung! Wano yaku ka psmriqun ppmiyak mtswai mu we uka ba lnglungan su ho? Skguli ppeyah dmayo yaku ka heya.” 41Cmiyuk rmengo heya ka Bukung: “Marta! Marta! Egu ba ka slhbenun su ma mgedang su da. 42Maanu so kiya, wano 1 ba ka ini tduwa pgdangun. Wada gmao tgmalu mbleyaq ka Maria duma nii we kiya ka ini tduwa glekun.”

Currently Selected:

Ruka 10: Stgdaya

Highlight

Copy