Ruka 11

Tnugesa Dmurun Ka Yesu

(Mat 6:9-13, 7:7-11)

1Meniq 1 nniqan hiya dmurun ka Yesu, mnhedu ciida de rmengo heya ka 1 tnugsaan na: “Bukung! Pntena so Yohane tmnugesa tnugsaan na tgsai miyan ddurun ka yami uri.” 2Rmengo ka Yesu: “Dmurun namu ciida we keso nii:

Tama nami gaga baro,

Tai so spruun kana seediq ka mrtaso ngayan su.

Tai so meyah ka tnlangan su.

3Braho su uqun nami we biqi nami hiya klaali.

4Srwai nami haya ka qnquwan nami.

Ado smruwa nami seediq pnkusa daha menan uri.

Iya nami pstrngaani pnsengan.”

5Rmengo dungal ka Yesu: “Ckceka namu ima ka niqan dadal na ceka rabi ma meyah rmengo: ‘Dangi, kbrexe ta 3 pang su. 6Ado nii mtnooda hini ka 1 dangi mu ma uka ani maanu ka qqdiyal mu heya.’ 7Kiya de cmiyuk rmengo peeyah truma ka heya: ‘Iya sqeya kenan. Ga leban ka rhengun duma nii msuupu kenan qlapo hini ka lqlaqi mu uri da. Uka mu klaan mtutuy mege ani maanu sunan.’ 8Rngage maku, ani yaa dadal na we ini tutuy ma ini bege ani maanu heya. Kiya de ado asi so geluq mesa de mtutuy ma mege ani maanu kmngalun na. 9Kiya de rngage maku. Pgsai, kiya de biqun namu na. Gimi, kiya de mpsdiyal namu. Ttuki rhengun, kiya de rraguh namu na. 10Ado mesa ka ani ima we maangal. Migin we mpsdiyal. Tmatuk rhengun we rraguh namu na rhengun. 11Dtama ga ckceka namu, ima namu ka nii mesa qcurux ka laqi we biqun namu quyu ka heya peni? 12Uxe uri we nasi mesa balung we biqun namu psirak peni? 13Ani namu so naqah ba seediq, mkela namu maangal malu qyqeya uri sbege namu lqlaqi. Maanu so kiya de mphuwa ka Tama namu gaga baro da ho? Bgihur Utux we maha na sbege ba seediq gaga mesa Heya ho?”

Yesu ma Beerjebul

(Mat 12:22-30. Mrk 3:20-27)

14Yesu we wada pqduriq bgihur naqah mngangah. Mlatac ka bgihur naqah de rmengo ka seediq mrbuni da. Kiya de mskluwi bale ka hbaro ba seediq. 15Ckceka daha de rmengo so nii: “Spooda Beerjebul Qbsuran Paru Bgihur Naqah pqduriq bgihur naqah mngangah ka heya.” 16Duma uri we meyah psseung Yesu ma mesa pnskraya qneepah pneeyah karac baro. 17Yesu we klaun na ka lnglungun daha ma rmengo dheya: “Mtgdiyal dheya nanak ka 1 qnlhangan we asi ktadus. Mtgdiyal dheya nanak ka 1 sapah we maha mtakur. 18Nasi mtgdiyal nanak ka Satang, mphuwa mesa mpheyu ka qnlhangan na da ho? Ado pnooda ku Beerjebul pqduriq dbgihur naqah ka yaku mesa namu. 19Nasi mu pnooda Beerjebul pqduriq dbgihur naqah ka yaku de pnooda ima pqduriq dbgihur naqah ka lqlaqi namu ho? So kiya de dheya ka mpgkeela malu namu ma qnquwan namu. 20Nasi mu spooda beyax Utux Baro ka spqduriq mu dbgihur naqah, kiya de mpdehuk yamu ka qnlhangan Utux Baro. 21Mttuku pnlkusan na mccebu ma qmlahang sapah na nanak ka mbeyax seediq we uxe mphuwa ka kana dnoi na. 22Kiya de niqan 1 mgkala beyax na meyah cmebu heya ma wada mbeyax, glekun na ka kana qyqeya mccebu stmaan na ma pssugun na ka gneeluk na. 23Ini psuupu kenan we kika tbrinah kenan. Ini psuupu kenan psseli we kika nii pkrehak.”

Meyah ka Utux Naqah

(Mat 12:43-45)

24“Bobo wada mlatac peeyah seediq ka bgihur naqah de mtqiri migin dxeral uka qsiya yahan na msange. Ini sdiyal de rmengo: ‘Mosa ku brinah sapah pnyahan mu dungal.’ 25Mosa de taan na ga sksikan ma ga snterung. 26Kiya de mosa ka heya ma desun na ka 7 dungal bgihur naqah mgkala heya qnnaqah ma mremux meeniq hiya. So kiya de seediq nii ge, pntnaun so plaale we mgkala ba qnnaqah ka mghiti da.”

Bale ba Mbleyaq

27Rmengo kari so nii ciida ka Yesu we paru ba quwaq na rmengo peeyah ckceka hbaro seediq ka 1 mqedil: “Mbleyaq ba ka lbuwan pnttingan su ma dmanga nunuh nnuhan su.” 28Rmengo ka heya: “Un, mgkala mbleyaq ka mbahang kari Utux Baro ma mnduwa ba muyu ka seediq.”

Mesa Pnskraya Qneepah

(Mat 12:38-42)

29Dmudul mkueyux hbaro ba seediq ciida, prading rmengo ka Yesu: “Naqah bale ka mknexal saya. Mesa pnskraya qneepah ka dheya. Wano pnskraya qneepah Yonah we uka pnskraya qneepah pqtaun dheya. 30Wada huwa mesa pnskraya quri seediq Nineweh ka Yonah. Mntena so nii uri mmaha pnskraya quri seediq mknexal saya ka Laqi seediq uri. 31Ali psgeegan ciida, mptutuy pneyah toma ka qbsuran paru mqedil we meyah mptaanak qnnaqah mknexal seediq saya. Ado pneeyah rebuq ba dxeral qqbahang na kari knkela lmngelung Selomoh. Tai, nii hini saya ka 1 seediq mgkala Selomoh knparu! 32Ali psgeegan ciida, mptutuy ka seediq Nineweh ma mptaanak qnnaqah mknexal saya. Ado dheya we wada priyux lnglungan peeyah mnbahang gnrangan kari Yonah. Tai, nii hini saya ka 1 seediq mgkala Yonah knparu!”

Ledax Heyi ka Doriq

(Mat 5:15, 6:22-23)

33“Mncamo ka seediq de uka ka posa beling skuwan toma kulu ngaba. Ida psaun bobo pcmagan, qqtaun seediq meyah mremux hiya ka ledax. 34Camo heyi we doriq. Maanu so kiya de nasi lmedax ka doriq su we mpttuku ledax ka kana heyi su. Nasi mnkuung ka doriq su we mnkuung bale ka kana heyi. 35Maanu so kiya de so uxe maha mnkuung ka ledax ckceka sunan we qlahang. 36So kiya de nasi mttuku ledax ka kana heyi su ma uka ani biciq mnkuung we maha mttuku lmedax ka kana heyi su, mntena so pncamo lmedax pledax sunan.”

Kseengun Ka seediq Parisay ma Dmptgaya

(Mat 23:1-36. Mrk 12:38-40)

37Gaga rmengo ciida ka Yesu na we meyah mlawa theyaq mekan dheya ka 1 Parisay. Kiya de mremux mtheyaq mekan dheya. 38Ini plaale trima baga mmekan ka Yesu we qmita ka Parisay de mskluwi bale. 39Rmengo heya ka Bukung: “Yamu seediq Parisay saya we snagan namu bale ka nganguc pngerah ma rusuq. Kiya de truma namu we ga stenge sqquru mangal ma naqah. 40Seediq mngataq! Snmalu nganguc we uxe mnhedu snmalu truma uri peni? 41Wano sbege namu seediq ka truma pngerah ma rusuq namu. So kiya de maha bgurah kana ka so yamu di.

42Yamu seediq Parisay we smtali namu bale! Ado Mege namu 1 tnugmxalan speriq prhuping ma speriq pskenux ma sama. Kiya de ini namu dai ka msderux ooda ma gmaalu Utux Baro. Bale ba we naka namu ida qpahun ka nii ma asi namu ka daun qmeepah ka so nii uri. 43Yamu seediq Parisay we smtali namu bale! Ado skxelun namu ka pusu malu tluungun sapah pssliyan ma pthmuku seediq meniq elu paru. 44Smtali namu bale! Ado mntena namu so habung ini truura. Mooda bobo hiya mkkesa ka seediq we ini kela.”

45Rmengo Yesu ka 1 mptgaya: “Mptgesa, rmengo su so nii we ga su ptsiiyah yami uri di.” 46Cmiyuk rmengo ka Yesu: “Yamu mptgaya we smtali namu bale uri! Ado spaapa namu seediq ka napa mqriqu ppaan ma yamu de ani 1 tluding baga ini namu klgelu pslokah ppaun nii. 47Smtali namu bale! Ado smlean namu ka habung dmpgeela kari. Bale ba rudan namu ka wada phuqil dheya. 48So kiya de qneepah rudan namu we yamu ka mpgkeela na ma smruwa namu uri. Ado wada daha phqilun ka dmpgeela kari ma yamu ka smalu habung daha. 49Maanu so kiya de rmengo knkela kari ka Utux Baro: ‘Skgulun mu dheya hiya ka mpgeela kari ma snkgulan. Phqilun daha ka duma ma trqilun daha ka duma.’ 50So kiya de aapa mknexal saya ka dara mpgeela kari pnsdraan peeyah snlmean bobo dxeral. 51Kiya de peeyah dara Hebel ma betaq dara Jekaryah wada phqilun cenga spuhan ma Sapah Thmkuwan. Bale ba rngage maku, kana nii we ida pgsaun aapa seediq mknexal saya kana ka nii. 52Yamu dmptgaya we smtali namu bale! Ado wada namu glekun ka raguh knkela. Ini namu teme hiya ka yamu, kiya we hteran namu ka seediq mpteme hiya uri.”

53Mlatac peeyah hiya ka Yesu, seediq Parisay ma dmptpatis we tmheri smiling heya so maha rmengo egu kari ka heya. 54Klaun daha migin kari qmerac heya.

Currently Selected:

Ruka 11: Stgdaya

Highlight

Copy