Ruka 12

Tqlahang Mnnangi Malu

(Mat 10:26-27)

1Ciida, yaa piya rahul knhbragan seediq ka meyah msseli betaq mqqleqah myieyux ciida we plaale rmengo tnugsaan na ka Yesu: “Qlhangi tgeda seediq Parisay ka yamu. Nii we kika nnnangi malu. 2Ga bungan ka noda we uka ka ini ptraun. Uxe uri we ga liingun ka noda we uka ka ini klai seediq. 3Kiya de rnengo namu ckceka mnkuung we qbhangun seediq ckceka ledax. Mnhweho namu birac meniq truma sapah we ggarang seediq peeyah bobo dnamux.

Iya Kiicu

(Mat 10:28-31)

4Ddangi mu, rngage maku, mtduwa phuqil heyi ma ini dehuk qmeepah ani maanu we iya kcugi. 5Ima ka asi ka kcugun namu we tgesa mu yamu. Bobo wada phuqil ma niqan pusu beyax na qmada tuxan pkdraan we kcugi. Bale ba rngage maku, kcugi ka heya. 6Uxe 2 kretan brigan ka 5 pilo peni? Kiya de uka chngiyan ani 1 ka meniq Utux Baro. 7So yamu ge ani snuunux namu we wada qhdeun smepu da. Iya kiicu. Mgkala egu ba qbheni niqan rrihan ka yamu!

Pkela Kiristo Berah Seediq

(Mat 10:32-33, 12:31-32, 10:19-20)

8Rngage maku duri, ani ima ka tmgesa ngayan mu berah seediq we ttgesa Laqi seediq berah snkgulan Utux Baro ka heya uri. 9Ani ima ka dmeqo kenan berah seediq we ida uxe tgesa Laqi seediq berah snkgulan Utux Baro ka heya uri. 10Ani ima ka tbrinah rmengo Laqi seediq we srwaun. Wano smngayan Bgihur Utux ka seediq we uxe srwaun. 11Desun namu daha sapah pssliyan ma berah dmpqlahang ma mdoi pusu beyax we iya pslhebun mphuwa su mesa cmiyuk ma maanu ka cciyuk rrengo su. 12Ado ali ciida, Bgihur Utux ka mptgesa kari rrengo namu ciida.”

Mngataq Seediq Mbleyaq

13Rmengo Yesu ka 1 pneeyah ckceka hbaro seediq: “Mptgesa, rngagi ku hiya ka mtswai mu ttg2 na maasu kenan ka qyqeya hniti rudan.” 14Rmengo ka Yesu: “Seediq su nii, ima ka pnheyu kenan mpsgao yamu uxe uri we mptg2 maasu qyqeya namu ho?” 15Kiya de rmengo hbaro seediq ka Yesu: “Qlahang bale ka yamu, lixi kana ka sqquru. Ado skuudus seediq we uxe egu dnoi.” 16Kiya de srengo na dheya ka 1 pnungalan kari: “Niqan 1 mbleyaq seediq, msngari bale ka uqun pneeyah qnpahan na. 17Lmngelung nanak lhebun na: ‘Uka ppsaun ka uqun nangal mu, mphuwa ku ba di?’ 18Kiya de rmengo dungal: ‘Hrahun mu ka repun mu ma slmeun mu rmabang knparu dungal. So maha psaun mu hiya ka kana uqun mu ma kana qyqeya mu. 19Kiya de rngagun mu ka knuudus bgihur mu: Utux mu! Egu ba uqun sneku su uuqun bsiyaq knkawas. Kiya de tbleyaq msange, uqi, mahi, qqaras!’ 20Kiya de rmengo heya ka Utux Baro: ‘Mngataq seediq! Keeman saya ngalun ka knuudus su. Kiya de pnsrmalan su we mmaha nnima di?’ 21Ani ima heya nanak ka sseku na dnoi we ini qbleyaq meniq berah Utux Baro mntena so nii.”

Iya Pslhebun

(Mat 6:25-34)

22Rmengo tnugsaan na dungal ka Yesu: “Maanu so kiya de rngage maku, iya pslhebun meekan maanu ka knuudus ta, pslhebun mpplukus maanu ka heyi ta. 23Ado knuudus we mgkala uqun, heyi we mgkala lukus. 24Lngelung bino ka tyaqung: Ini tukuy ma ini qburung uri. Uka psaan uqun ma uka repun uri. Kiya de tmabu dheya ka Utux Baro. Yamu we mgkala bale tyaqung niqan brihan! 25Ye ima namu ka mtduwa pooda pnslhbenan namu mumal pkbaro tikuh knuudus namu ho? 26Maanu so kiya de ini namu dheki qmeepah ani so nii biciq we maanu ka pslhbenun namu duma ooda dungal ho? 27Lngelung bino huwa mesa mdakil ka boxi gaga bbuyu. Ini qbqerus ma ini smalu ware uri. Kiya de rngage maku, pnlukus meniq knledax ba ani so Selomoh we ini pgkala 1 phepah nii ka pndeping na! 28Yamu nii seediq biciq ba snhiyan! Nii hini saya ka speriq bbuyu, kusun de qada psqmaun. Ani so kiya Utux Baro we biqan na malu ba pnleping. Mhuwa ka so yamu di? 29Yamu we iya pesa meekan ta maanu? Miimah ta maanu? Iya kesa pslhebun. 30Pgsaun seediq icil kana ka so nii. Kana ddooyun namu nii we mkela ka Tama namu. 31Yamu we wano qnlhangan Tama ka pgsai, kiya de umal na yamu ka so nii da. 32Rahul tgbiciq, iya kiicu. Ado mqaras mege qnlhangan yamu ka Tama namu ka kiya. 33Baruy ka dnoi namu ma sai dmayo seediq. Psramal nanak lubuy psaan pila uxe mpqnaqah ani betaq knuwan. Kiya de dnoi ma dnoi uka psteqan gaga baro ini sdlingi mpgeeguy ma ini gblingi mekan kuyi. 34Ado gaga inu ka dnoi namu we ga hiya ka lhebun namu uri.

Tnqliyan Miiyo

(Mat 24:45-51)

35Pskeruc hmabik ka hwinuk namu ma pcmagi ka camo. 36Mntena so tnqliyan tmara mpragoh tnpusu sapah meyah tmatuk rhengun pneyah nsaan na mekan pntriyan. 37Meyah ka tnpusu sapah ciida, taan na nii miiyo ka dtnqliyan na maha mbleyaq ka tnqliyan nii. Bale ba rngage maku. Tnpusu sapah we ptluungun na uqan ka dheya ma pskeruc hmabik hwinuk na ma meyah smbleyaq dheya. 38Nasi meyah ceka rabi uxe uri we sncaman ka tnpusu sapah ge, taan na nii so nii ka dtnqliyan we maha mbleyaq ka tnqliyan nii. 39Klai ba, tnsapah we nasi na klaun meeyah knuwan ka mpgeeguy we ida maha miiyo ma uxe na pkriun pkrmuxi sapah na ka mpgeeguy. 40Yamu uri we asi ka bleyaq psramal. Ado ini namu klai ka eeyah na ciida ge kika yahun Laqi seediq.”

41Rmengo ka Petros: “Bukung! Ye yami ka spaangal su kari nii ho? Uxe uri we kana seediq ho?” 42Rmengo ka Bukung: “Ima ka kesun mpqlahang mtduwa stmaan ma mkela lmngelung? Tnpusu sapah we pqlhangun na tnsapah na ma dquli na mooda sneengan maasu uuqan sbege na dheya ka mpqlahang nii ho? 43Meyah ka tnpusu sapah, taan na ida ga mchaya qmeepah ka tnqliyan we mbleyaq ka tnqliyan nii. 44Bale ba rngage maku, pqlhangun na kana dnoi na ka tnqliyan nii. 45Nasi lmngelung so nii ka tnqliyan: ‘Ida maha msgcuqi meyah ka tnpusu sapah mu’. Kiya de smebuc tnqliyan rseno ma mqedil, kiya uri we mekan, mimah ma bsukan. 46Meniq ali ini na klai lmngelung ma uxe na klaun ka ali we meyah ka tnpusu sapah na de khnekun na mseru ma pspuun na so seediq uka stmaan. 47Mkela lnglungan tnpusu sapah na ka tnqliyan ma ini psramal uxe uri we ini puyu heya qmeepah de ida maha na bale psruun ka tnqliyan nii. 48Wano so ini kela ma qmeepah so ksengun sbetun ka tnqliyan we maha biciq hari ka pnsruwan heya. So ka bniqan egu we egu ka ngalan heya. So ka pstmaan egu we egu ka pgsaun.

Pusu Ptgaanak

(Mat 10:34-36)

49Yahan mu we qqada mu bobo dxeral ka puniq. Nasi tena wada sqama we uxe nii ka sntangan mu peni? 50Niqan ka ptgaya smino ini mu dai na, tgberah ddaun mu pttuku ciida. Mtbbeyax ku bale! 51Ppsbale ku bobo dxeral ka yahan mu mesa namu lmngelung ho? Rngage maku, uxe so kiya. Pptg2 mu seediq. 52Peeyah saya we maha mtg2 ka 5 heyi 1 truma sapah. Mptg2 mtgdiyal quri 2 heyi ka 3 heyi ma mptg2 mtgdiyal quri 3 heyi ka 2 heyi:

53Mtgdiyal ka tama ma laqi,

mtgdiyal ka laqi na rseno ma tama,

mtgdiyal ka bubu ma laqi na mqedil,

mtgdiyal ka laqi na mqedil ma bubu,

mtgdiyal ka payi ma ina,

mtgdiyal ka ina ma payi.”

Psaanak Mita Ali

(Mat 16:2-3)

54Kiya de rmengo hbaro ba seediq dungal ka Yesu: “Taan namu gisu peeyah pryaxan hido ka plabu we, mprengo namu: ‘Maha mpquyux paru da’, kiya de ida bale ba niqan. 55Sbgihur peeyah toma de ‘Maha mttilux bale’: Mpkeso namu ma ida bale ba niqan so nii. 56Yamu seediq nnnangi malu, mkela namu bale psaanak qmita karac ma dxeral. Kiya de ma namu ini klai psaanak mita ka ali mknexan saya ho?”

Ppsbale Pais

(Mat 5:25-26)

57Hmuwa, ma namu ini nanak psaanak maanu ka niqan ba elu na? 58Mkleelu namu ciida ka mbbege qnnaqah seediq mosa namu mita qbsuran, psbleyaq nhari ptbale han. So su na uxe bbege qbsuran mpsgao, qbsuran mpsgao we bege su daha mpqlahang sapah kuung. Maha su daha lebun sapah kuung da. 59Rngage maku, betaq su ini qhedu pririh ka nhdean bale ani 1 pila we ida su uxe mplatac peeyah hiya.

Currently Selected:

Ruka 12: Stgdaya

Highlight

Copy