Ruka 13

Ini Priyux Lnglungan de Mhuqil

1Ciida duma seediq we meyah rmengo Yesu quri dara seediq Galil we pgmaxun na ckceka snapuh ka noda Pilatos. 2Rmengo ka Yesu: “Ye namu mesa seediq Galil nii we rmabang qnnaqah na so duma seediq Galil, kiya ka wada moda so nii mqraqil peni? 3Rngage maku, uxe so kiya! Nasi namu ini priyux lnglungan de maha so kiya mpkuuka namu kana! 4Cuuxal mtakur ka paga Siloax ma wada mepux phuqil 18 heyi. Ye namu mesa seediq nii we rmabang qnquwan daha ka seediq meniq Yerusalem? 5Rngage maku, uxe so kiya. Nasi namu ini priyux lnglungan de maha so kiya mpkuuka namu kana!”

Qhuni Nunuh Ini Gheyi

6Kiya de rmengo pnungalan kari ka Yesu: “Niqan 1 qhuni nunuh gaga na phmaun qnpahan na lipas. Meyah berah qhuni ma migin heyi nunuh ma ini na slai. 7Kiya de rngagan na ka mpqeepah qnpahan hiya: ‘Tai, 3 knkawas ka nyahan mu berah qhuni nunuh nii migin heyi ma ini mu slai. Seqic di! Hmuwa, so uxe mpsqeya dxeral hini?’ 8Cmiyuk rmengo heya ka mpqeepah dxeral: ‘Bukung! Laxi hiya knkawas nii han. Trai ku heya kriun mu ka ddxeral ssiyo na ma psaun mu quti. 9Nasi mghei knkawas we malu. Nasi ini pgheyi de ani su sqetun.’”

Pklmeun Yesu ka Mqedil Mbuko

10Ali sngayan, tmgesa seediq meniq sapah pssliyan ka Yesu. 11Niqan 1 mqedil gaga sdooyun bgihur naqah. 18 knkawas ka mbukung knrnexan na ma ini ksderux ka hwinuk na. 12Mita heya ka Yesu de splawa na ma rngagan na: “Mqedil, wada malu knrnexan su da!” 13Kiya de psaan na 2 baga ma asi ksderux ka hwinuk na ma tmdahu Utux Baro. 14Ado wada pkmalu mnarux ali sngayan ka Yesu de mseang bale ka mpqlahang sapah pssliyan ma rngagan na ka hbaro seediq: “Meepah ta ka 6 ali. 6 ali nii we tduwa ta meyah psapuh. Ini tduwa ka ali sngayan.” 15Rmengo ka Bukung: “Seediq nnnangi malu! Txtaxa namu meniq ali sngayan we ini namu lhelah negul dapa ma dapa roba, ddulun namu mosa piimah qsiya peni? 16Mqedil nii we lqlaqi mslutuc Abraham ma bnkean Satang 18 knkawas. Ini ta tduwa lhlahun bnkean na ani ali sngayan ho?” 17Rmengo so nii ka Yesu de asi na psqai ka tnbrinah heya. Ado qneepah so nii kana knledax noda de mqaras kana ka knhbaro seediq.

Pnungalan Kari Rehak Sama Karic

(Mat 13:31-33. Mrk 4:30-32)

18Rmengo ka Yesu: “Mntena so maanu ka qnlhangan Utux Baro ho? Mangal ku maanu pntnaun mu ho? 19Mntena so 1 demux rehak sama karic. Ngalun seediq ma srehak na qnpahan. Mdakil ma mqhuni. Kiya de yahan tmrudu qbheni ka cida na.”

20Rmengo dungal ka Yesu: “Pntnaun mu maanu ka qnlhangan Utux Baro! 21Mntena so tgeda. Kiya de ngalun 1 mqedil ma psaun na ckceka 3 kbegax nemu mugi betaq na pllbuun ka kana tgeda.”

Dgehing Rhengun

(Mat 7:13-14, 21-23)

22Mquri Yerusalem ka Yesu ma moda tmgesa seediq kana lualang paru ma kana lualang biciq ndaan na. 23Smiling heya ka 1 seediq: “Bukung, uxe mpkhbaro ka pkdusun ho?” Kiya de rmengo hbaro seediq ka Yesu: 24“Kmbeyax mteme rhengun dgehing ka yamu. Rngage maku, bobo na hbaro ka mkmremux hiya ma uxe mptduwa. 25Mtutuy meluk rhengun ka tnpusu sapah de mheyu namu nganguc ma tmatuk rhengun, mprengo namu: ‘Bukung, rwhaani nami!’ Mpuso nii ka cniyuk na yamu: ‘Ini ku kela yamu ma pneeyah namu inu we ini ku kela.’ 26Ciida, mprengo namu so nii: ‘Mnsuupu ta mekan ma mimah berah su ma tmnugesa su seediq meniq elu nami uri.’ 27Mprengo ka heya: ‘Rngage maku, Inu ka pnyahan namu we ini mu klai. Yamu nii kana mpqeepah naqah we latac peeyah kenan!’ 28Mpqita namu gaga meniq qnlhangan Utux Baro ka Abraham, Yijxaq, Yakobu ma kana mpgeela kari. Yamu we sqada namu na nganguc ma mptngedux namu lmingis ma pgqeric rupun namu meeniq hiya. 29Mptleung mekan uqan qnlhangan Utux Baro hiya mpeeyah pryaxan hido ma nklaan hido, mpeeyah quri toma ma quri baro ka seediq. 30Kiya de tai, tnhiti we mpgeela, ga mpgeela we mpthiti.”

Slingis Yesu ka Yerusalem

(Mat 23:37-39)

31Ida ciida, meyah rmengo Yesu ka duma seediq Parisay: “Platac peeyah hini, ado kmphuqil sunan ka Hrodes.” 32Rmengo ka Yesu: “Sai rmengo ka rqebux nii: ‘Tai! Ali saya ma kusun we pqdriqun mu ka bgihur naqah ma pklmeun mu ka mnarux. Mk3 ali de qhdeun mu ka qpahun mu da.’ 33Ani so kiya, ali saya, kusun ma mkaxa ge ida ku asi ka mosa tgberah mu. Ado ini tduwa mhuqil nganguc Yerusalem ka mpgeela kari. 34Ah, Yerusalem! Yerusalem! Ini su setuq phuqil dmpgeela kari ma mcebu su btunux kana wada skgulan sunan! Yaa ku mnpiya ka kmpsseli lqlaqi su mntena so bubu rodux mubung wawa toma palic na. Ani so kiya we ini namu sruwa. 35Tai! Maha nlaxan ka sapah namu. Rngage maku: Peeyah saya, uxe namu mqita kenan. Asi ka betaq namu rmengo sa: ‘Pnooda ngayan Bukung meyah we kiya ka sbliqun!’”

Currently Selected:

Ruka 13: Stgdaya

Highlight

Copy