Ruka 14

Seediq Mnarux Niqan Qsiya

1Ali sngayan mosa mekan hnpure sapah 1 mdudul seediq Parisay ka Yesu we kmuuruy ba heya ka dheya. 2Kiya de tai, ga meeniq berah na ka 1 seediq mnarux mllabu niqan qsiya. 3Rmengo dmptgaya ma seediq Parisay ka Yesu: “Ali sngayan we ye tduwa pkmalu mnarux ho?” 4Mgmelux ka dheya. Kiya de Yesu we pklmeun na ka seediq nii ma psaun na da. 5Kiya de rmengo dheya: “Ima ka ckceka namu ge, mtuting hghugan qsiya ka laqi na uxe uri we dapa namu ma ini asi bbili baro heya ani ali sngayan ho?” 6Uka daha klaan cmiyuk ka kari nii.

Tmgesa Smbleyaq Seediq ma Tnpusu Sapah

7Taan Yesu ka seediq pnlawa mekan we gmao tluungan prparu. Kiya de spaangal na kari rmengo ka dheya: 8“Splawa su daha mosa mekan rayi we iya tleung tluungan prparu. Nhuwa niqan ka seediq pnlawa na mgkala sunan knparu. 9Kiya de mnlawa yamu we meeyah rmengo sunan: ‘Hdqani heya ka tluungan nii!’ So kiya de maha su tqsiqa tleung tgbiciq tluungan da. 10Splawa su daha we osa ma tleung tgbiciq tluungan. So kiya de meeyah ka mnlawa sunan mprengo: ‘Dangi, osa tluungan tgparu.’ Ciida we maha su spruun mita kana seediq msuupu tleung mekan hiya. 11Ado smparu heya nanak ka seediq we sbciqun. Smbiciq heya nanak ka seediq we spruun.” 12Rngagan na uri ka seediq mnlawa heya: “Pure su ceka naali uxe uri we gbiyan, iya plaani ka dangi su ma mtswai su rseno ma lutuc su ma mbleyaq seediq ssiyo su. So daha cciyuk mlawa sunan de maha su maangal ccyukun. 13Kiya de pure su hnpure uqun mqaras we plaani ka seediq qrinuc, mrikic, mpika ma mbudu. So kiya de maha su sblequn ka isu! 14Ado uka ani maanu cciyuk daha sunan ka dheya. Muudus peeyah hnqilan ka seediq msderux ooda ciida we maangal su cnyukan ka isu.”

Pnungalan Kari Paru Pntriyan

(Mat 22:1-10)

15Mbahang kari so nii ka 1 msuupu hiya tleung uqan de rmengo Yesu: “Mbleyaq ka mekan hnpure meeniq qnlhangan Utux Baro.” 16Rmengo heya ka Yesu: “Pure paru ba hnpure ka 1 seediq ma hbaro ka pnlawa na. 17Dehuk ka mekan ciida we skgulan na mosa rmengo seediq pnlawa na ka tnqliyan na: ‘Aguh da! Mhedu psramal kana ani maanu.’ 18Asi pntena rmengo uxe meeyah ka dheya. Rmengo ka tgplaale na: ‘Mnari ku dxeral ma asi mu ka saan qmita, srwai ku hiya, ani su ba rabang.’ 19Rmengo ka 1 dungal: ‘Mnari ku 10 dapa pddhaun mu ma saun mu psseung, srwai ku hiya, ani su ba rabang.’ 20Rmengo ka 1 dungal: ‘Hani ku mnangal mqedil. So kiya de ini ku tduwa mosa.’ 21Meyah ka tnqliyan na de ssneru na tnpusu sapah na ka so nii. Mseang ka tnpusu sapah duma rmengo tnqliyan na: ‘Osa nhari elu paru ma elu biciq, adis hini ka qrinuc, mrikic, mbudu ma mpika.’ 22Rmengo ka tnqliyan: ‘Bukung, wada mu daun meepah ka dnurun su ma gaga msngari ka tluungan nana.’ 23Kiya de rmengo tnqliyan na ka tnpusu sapah: ‘Osa paru elu alang ma elu ga qlangan, pskyexi peeyah hini ka seediq, kstenge daha tleung sapah mu.’ 24Rngage maku, pnlawa mu plaale we ani 1 seediq uxe meekan hnpure mu.”

Gnrihan Mptnugsaan

(Mat 10:37-38)

25Msuupu Yesu mosa ka hbaro bale seediq. Kiya de mspgeriq rmengo dheya ka Yesu: 26“Nasi meyah kenan ka ani ima ma gmalu kenan pgkala gnaalu tama bubu na, mqedil na, lqlaqi na, mtswai na rseno, mtswai na mqedil ma betaq knuudus na nanak we ini tduwa ma tnugsaan mu. 27Ani ima ini phean jyujika na nanak snegul kenan we ini tduwa mtnugsaan mu. 28Ima namu ka mksmalu sapah paru ma ini plaale tleung smepu pila ddooyun ma ye mpttuku ssmalu na ho? 29Kiya de wano smpusu nanak ma ini dehuk qmhedu de mphulis heya ka kana seediq mnita na, mprengo: 30‘Prading smalu ka seediq nii ma ini dehuk qmhedu.’ 31Uxe uri we mosa mccebu icil qbsuran paru ka 1 qbsuran paru we ima ka ini plaale tleung lmngelung, yaa mtduwa ka maadis ta 1 mang supi smterung 2 mang supi mmeyah mccebu dheya ho? 32Nasi ini tduwa ge, ida kiya ga theya ka pais nana we naka smkagul skgulun na ma smiling elu psbale. 33Maanu so kiya de ani ima ckceka namu ka ini alix kana dnoi na we ini tduwa mtnugsaan mu.”

Timu ini Stimu

(Mat 5:13. Mrk 9:50)

34“Malu ka timu. Nasi wada uka ka knrmenan na de huwa kesun pkremun dungal ho? 35Ani dooyun meniq neepah ma gtuwan meniq qtiyan we ini ba pnlengu kana. Wano qqada ngnganguc. So ka niqan birac mbahang we kiya ka qbahang!”

Currently Selected:

Ruka 14: Stgdaya

Highlight

Copy