Ruka 15

Pnungalan Kari Miric Mnugedang

(Mat 18:12-14)

1Dseediq maangal pila nqbsuran ma seediq niqan qnquwan noda we meyah smdaling Yesu qqbahang daha kari. 2Smnetur rmengo ka seediq Parisay ma dmptpatis: “Seediq nii we psteme seediq niqan qnquwan noda ma spuwan na mekan uri.”

3Maanu so kiya de Yesu we rmengo pnungalan kari: 4“Ani ima ckceka namu ge, nasi na pgdangun ka 1 miric rudu ckceka 1'00 tnbugan na we ima ka ini hiti malix 99 miric rudu tadus brenux hiya ma ini osa migin 1 miric rudu na wada mgedang betaq na slayan ho? 5Slayan na de qrasun na posa ahing na ma meyah sapah. 6Pssliun na mlawa ka dadal na ma ssiyo na ma rmengo dheya: ‘Wada mu slayan ka miric mu rudu mnugedang da! Suupu kenan mqaras!’ 7Rngage maku, 1 seediq niqan qnquwan noda wada priyux lnglungan we mntena so nii uri mpqaras heya ka meniq baro. Mgkala 99 heyi malu seediq ini priyux lnglungan paru ba qrasun baro.

Pnungalan Kari Pila Mgedang

8Uxe uri we ani ima mqedil, nasi na pgdangun ka 1 kretan pila ckceka 10 dnoi na we ima ka ini pcamo, ini skesik sapah ma Sbleqan na ba migin betaq na slayan ho? 9Slayan na de pssliun na mlawa ka dadal na ma ssiyo na rengo dheya: ‘Wada mu slayan ka pila pnugedang mu da. Suupu kenan mqaras!’ 10Rngage maku, 1 seediq niqan qnquwan noda wada priyux lnglungan we mntena so nii uri mpqaras heya ka meniq berah snkgulan Utux Baro.”

Pnungalan Kari Laqi Mnugedang

11Rmengo dungal ka Yesu: “1 seediq we 2 laqi na. 12Rmengo tama na ka mtswai: ‘Tama, biqi ku hiya ka nnaku ckceka dnoi su.’ Kiya de tama na we pssugun na dheya ka dnoi na. 13Bobo yaa piya ali tgswai we pssliun na ka kana dnoi na ma mosa theya ka tgswai nii. Meniq hiya we sooda na ani maanu naqah ndaan smeeliq dnoi na. 14Bobo na wada sliqan ka kana dnoi na de smterung paru ba krayan dungal ka dxeral hiya, kiya ka qrinuc bale. 15Maanu so kiya de mosa tnsapil 1 seediq tndxeral hiya ma psaun na qnpahan ma ptbugan na babuy ka heya nii da. 16Mkmekan ba rehaq beluh uuqun babuy ka heya. Uka ka seediq mege ani maanu puqun heya. 17Tgkeela ka lmngelung na heya duma rmengo: ‘Niqan hbaro ka tnqliyan snduwan tama mu, mssngari bale ka uuqun daha uri. Yaku we maku lux tguure betaq mphuqil hini di? 18Mptutuy ku ma maha ku tama mu hiya. Maha ku rmengo heya: Tama, wada ku pqnnaqah quri Utux Baro ma quri sunan uri. 19Peeyah saya, yaku we ini ku pnuglengu kesun laqi su da. Ngali ku so 1 tnqliyan snduwan su!’ 20Kiya de mtutuy ka heya ma mosa tama na hiya. Ida kiya theya nana we mita heya ka tama na duma sgaalu na bale, tmalang ma saan na tmmaku ma tmunguh hiya. 21Rmengo ka laqi: ‘Tama, wada ku smqnnaqah quri Utux Baro ma quri sunan uri. Peeyah saya, yaku we ini ku mnuglengu kesun laqi su da.’ 22Kiya de rmengo dtnqliyan na ka tama: ‘Adis nhari ka mrtaso lukus rila ma plkusi heya ma pqecul baga na ma pkrmili ka papak na. 23Desi ka mtbeno ba wawa dapa ma phuqil. Uqe ta ma qrase ta. 24Ado laqi mu nii we kiya ka wada muudus peeyah hnqilan da. Mnugedang han ma nii slayan da.’ Kiya de mqaras ka dheya.

25Ciida, ga qnpahan ka qbsuran laqi na. Meyah ma smdaling sapah de qbhangan na ka hrenang tubu ma keeki. 26Splawa na ka 1 tnqliyan ma smiling hmuwa ka so nii. 27Rmengo ka tnqliyan na: ‘Ga meyah ka mtswai su di, ado ini huwa ma ini knarux ka heya, wada phqilun smipaq mtbeno wawa dapa ka tama su.’ 28Kiya de mseang bale ka qbsuran laqi nii ma ini sruwa mremux sapah. Mosa lmabu rmengo heya ka tama na. 29Cmiyuk rmengo tama na ka heya: ‘Qtai! Qneepah ku yaa piya knkawas ka yaku ma ini ku ba tbrinah nkari su. Kiya de ini saku biqi ani 1 wawa miric ppsuupu mu mqaras dangi mu. 30Kiya de mnsuupu mqedil kbrexun wada smerus mekan dnoi su ka laqi su nii we meyah ka heya de sphuqil su mtbeno wawa dapa ka heya.’ 31Rmengo heya ka tama na: ‘Laqi, msuupu su kenan klaali ka isu ma kana nnaku we ida nnisu. 32Kiya de mtswai su nii we wada mnuudus peeyah hnqilan ma slayan peeyah mnugedang. Kiya de niqan ba mndungus qrasan.’”

Currently Selected:

Ruka 15: Stgdaya

Highlight

Copy