Yohane 5

Pkmalu Mnarux ssiyo Langu Betjata

1Bobo na nii de dehuk ka smseman seediq Yudaya. Yesu de mosa Yerusalem.

2Ga Yerusalem hiya ka Rhengun Miric ma ssiyo na hiya we niqan 1 langu, ssiyo na we niqan 5 eruc ssagan bebe. Kari Hiburu we Betjata. 3Ga mksaro hiya ka hbaro ba seediq mnarux. Mbudu, mrikic ma ini klgelu heyi. 4Ado mncugil mosa langu ma lmgelu qsiya hiya ka 1 snkgulan Bukung peeyah baro. Bobo slgelu ka qsiya de ani ima ka plaale mosa hiya we pklmeun ka ani nii knkana mnarux na. 5Ga hiya ka 38 knkawas knrnexan na ka 1 seediq. 6Yesu we taan na ga mksaro hiya ka heya, klaun na bsiyaq ka knrnexan na. Kiya de rmengo heya: “Kmkmalu su ho?” 7Cmiyuk rmengo heya ka seediq mnarux: “Slgelu ka qsiya ciida we uka ka seediq posa kenan langu hiya. Gisu ku mosa ciida we tena wada plaale kenan mosa hiya ka taxa seediq.” 8Rmengo heya ka Yesu: “Tutuy, aangal tqiyan su ma kkesa!” 9Asi kmalu ka seediq nii ma maangal tnqiyan na ma mkkesa da.

Ali sngayan ka ciida. 10Maanu so kiya de rmengo seediq wada pklmeun ka seediq Yudaya: “Ali sngayan ka saya. Maangal su tqiyan we ini su puyu gaya.” 11Kiya de cyukan na rmengo: “Seediq pnkmalu kenan we rmnengo kenan: ‘Aangal tqiyan su ma kkesa!’” 12Slingan daha ka heya: “Ima ka rmnengo isu: ‘Aangal tqiyan su ma kkesa’ ho?” 13Kiya de seediq wada pklmeun we yaa ima ka pnkmalu heya we ini na klai. Ado hbaro ba seediq ga hiya ma wada asi tgkiwax peeyah hiya ka Yesu. 14Bobo na hiya de slayan daha slayan daha Yesu meniq Sapah Thmkuwan ka Yesu ma rmengo heya: “Tai, wada su malu da. So uxe mpkrinah naqah ka noda su we iya qqeepah naqah ooda da.” 15Mosa ka seediq nii de mosa rmengo seediq Yudaya, Yesu ka wada pkmalu heya. 16So kiya de ado qmeepah nii ali sngayan ka Yesu we kika tmraqil heya ka seediq Yudaya. 17Cmiyuk dheya ka Yesu: “Qmeepah betaq saya ka Tama mu we mpqeepah ku ka yaku uri.” 18Nii ka pusu na spkrinah kmphuqil heya ka seediq Yudaya. Ado uxe wano smneeliq ali sngayan. Wada na kesun Tama na ka Utux Baro ma sptena na Utux Baro ka heya nanak.

Pusu Beyax Laqi Mrtaso

19Cmiyuk rmengo dheya ka Yesu: “Bale ba rngage maku. Ini tduwa qmeepah ani maanu peeyah heya nanak ka Laqi. Wano qntaan na peeyah Tama we kiya ka qpahun na. Ado qnpahan Tama we ida maha qmeepah so nii ka Laqi uri. 20Gmaalu Laqi ka Tama. Spqita na heya kana ka ani maanu qneepah na. Mgkala qneepah nii dungal knparu ka ppqita na heya, kiya de mpsskluwi namu. 21Wada huwa mesa pkuudus seediq wada mhuqil ma mege knuudus dheya ka Tama, mpntena so nii ka Laqi uri we kmpooda lnglungan na nanak mege kuudus seediq. 22Ini psgao seediq ani ima ka Tama. Wada na sbege Laqi kana ka ooda ppsgao seediq. 23Kiya de so ssparu daha laqi ka kana seediq, mntena so smparu Tama. Ini sparu laqi ka seediq we ririh ini sparu tama smnkagul laqi.

24Bale ba rngage maku. So ka mbahang kari mu ma snhii smnkagul kenan we maha maangal uka psteqan knuudus, uxe ngalun niqan qnuuqu noda. Kiya we wada peeyah hnqilan ma mremux kndesan da. 25Bale ba rngage maku. Gisu ka ali ma nii dehuk saya da. Mpqbahang hrenang Utux Baro ka seediq wada mhuqil. Seediq mbahang na we kiya ka mpkuudus. 26Ado hmuwa mesa niqan knuudus nanak ka Tama we maha mntena so nii uri sbege na laqi na niqan knuudus na nanak. 27Dungal we biqan na pusu beyax ppsgao, ado Laqi seediq ka heya. 28Iya sklui ka ooda so nii. Ado gisu ka ali. Ciida so ka ga meeniq habung we maha mbahang hrenang na kana. 29Kiya uri we mplatac peeyah hiya: So ka qmneepah malu we mpkuudus peeyah hnqilan ma maangal knuudus. So ka qmneepah naqah we muudus peeyah hnqilan de maha niqan qnnaqah.

30Ini ku tduwa qmeepah ani maanu peeyah yaku nanak. Wada ku hmuwa mesa mbahang we maha so kiya ka pnsgao. Ini psaanak ka ppsgao mu. Ado ini mu pgsai ka lnglungan mu nanak, wano lnglungan smnkagul kenan ka pgsaun mu.

Pgkela Yesu

31Nasi yaku nanak ka spgkela mu we uxe bale ba ka pnugkela mu. 32Niqan 1 dungal ka pgkela yaku. Bale ba ka pnugkela na we klaun mu. 33Wada namu skgulan berah Yohane ka seediq, quri bale ba ka spgkeela heya. 34Bale ba, uxe pneeyah seediq ka nangal mu pnugkela. Kiya de so nii ka rnengo mu we ppkuudus yamu. 35Camo sqama pledax ka Yohane, yamu we qmqaras namu tnnais ledax na ka yamu. 36Kiya de nii kenan ka mgkala pnugkela Yohane: Kiya ka nii mu qpahun qqhedu mu qmeepah bnege Tama. Smkagul kenan ka Tama kiya ka pgkela yaku ka Tama. 37Smnkagul kenan ka Tama we yaku ka spgkeela na. Uxe namu qnbhangan ka hrenang na ma uxe namu ntaan ka hnyegan na uri. 38Kiya de ini eeniq lhebun namu ka kari na. Ado ini namu snhii ka snkgulan na. 39Slluhe namu Patis Mrtaso, ado ga ckceka hiya ka uka psteqan knuudus. Patis Mrtaso nii we yaku ka gaga na spgkeela. 40Kiya de ini namu pkmeyah maangal knuudus kenan.

41Ini ku aangal tndahu peeyah seediq. 42Kiya we uka lhebun namu gnaalu Utux Baro we klaun maku. 43Mooda ku ngayan Tama mu meyah ma ini ku namu psteme. Nasi mooda ngayan na nanak meyah ka duma seediq we ida namu psteme heya. 44Ptndahu namu knledax namu ma ini namu gimi ka kledax pneyah 1 ba Utux Baro, mphuwa namu mesa snhii yaku ho? 45Iya kesa maha ku rmengo qnquwan namu berah Tama mu ka yamu. Niqan 1 ka mprengo qnquwan namu. Kiya ka Moseh nii namu sntangan. 46Nasi namu snhii Moseh we mpsnheyi namu kenan. Ado mnatis yaku ka heya. 47Nasi namu ini snhii patis na, mphuwa namu mesa snhii kari mu da ho?”

Currently Selected:

Yohane 5: Stgdaya

Highlight

Copy