Yohane 4

Yesu ma Mqedil Samareia

1Mkela ka Yesu, seediq Parisay we mnbahang mgkala Yohane hbaro ka ngalan na tnugsaan ma ptgaya smino ka heya. 2(Bale ba we uxe Yesu ka ptgaya smino, tnugsaan na ka ptgaya smino.) 3Kiya de mlatac Yudaya ka heya ma mquri Galil dungal. 4Ida asi ka mooda Samareia. 5Maanu so kiya de dehuk Suxar kesun 1 alang Samareia. Smdaling dxeral Yakobu bnege na laqi na Yosehu. 6Ga hiya ka hghugan qsiya Yakobu. Ado mqraqil mkkesa ka Yesu ma tleung ssiyo hghugan qsiya hiya da. Ciida we yaa ba ceka naali.

7Meyah bubul qsiya ka 1 mqedil Samareia. Rmengo heya ka Yesu: “Pmahi ku qsiya su.” 8(Ciida, wada maruy uqun alang ka tnugsaan na). 9Rmengo heya ka mqedil Samareia: “Seediq su Yudaya ka isu, ma su mesa qsiya quri yaku mqedil seediq Samareia?” Ado ini pggaluk ka seediq Yudaya ma seediq Samareia. 10Cmiyuk heya ka Yesu: “Nasi su klaun ka huwe Utux Baro ma klaun su ima ka ga rmengo isu ‘Pmahi ku qsiya’ de naka su ga mesa heya, heya uri naka tena mnege qsiya mnuudus sunan ka heya da.” 11Rmengo ka mqedil: “Uka qyqeya su bubul qsiya ma rebuq bale ka bubul uri. Ngalun su peeyah inu ka qsiya mnuudus ho? 12Rudan nami Yakobu we sbege na yami ka bubul nii. Heya ma laqi na ma tnabu na we ida mnimah qsiya bubul nii uri. Isu ma heya ge paru ka isu peni?” 13Cmiyuk ka Yesu: “Mimah qsiya nii ka seediq we mphqeni dungal. 14Nasi mimah qsiya bnege mu ka seediq we uxe mphqeni ani betaq knuwan. Qsiya bbege mu we maha hmeru qsiya ckceka na ma mpheru betaq uka psteqan knuudus.” 15Rmengo ka mqedil: “Braho misu bale, biqi ku hiya ka qsiya nii. So ku uxe qhqeni ma uxe ku meeyah theya ba bubul qsiya dungal.”

16Rmengo ka Yesu: “Sai Mlawa ka rseno su ma desi hini uri.” 17Cmiyuk Yesu ka mqedil: “Uka ka rseno mu.” Rmengo ka Yesu: “Uka ka rseno su mesa su we bale ba. 18Ado nniqan su 5 rseno ka isu duma ga su thiqan saya we uxe rseno su. Bale ba ka kari su.” 19Rmengo heya ka mqedil: “Qtaan misu ka isu we mpgeela su kari. 20Rudan miyan we tnhmuku Utux Baro dgiyaq hini. Kiya de rmengo namu ka yamu, asi ka mosa Yerusalem thmuku Utux Baro.” 21Rmengo heya ka Yesu: “Snhii kenan! Mpdehuk ka ali, thmuku namu Tama we uxe meeniq dgiyaq hini ma uxe Yerusalem uri. 22Ini namu klai ka gaga namu thmkuwan. Klaun nami ka gaga nami thmkuwan. Yamu we ini namu klai ka ga namu thmkuwan. Ado mpeeyah seediq Yudaya ka ppkuudus. 23Mpdehuk ka ali, kiya ka saya da. Bale ba thmuku Tama we asi ka mooda utux lhebun ma bale ba thmuku Heya. Ado asi ka seediq so nii ka thmuku Heya. 24Utux ka Utux Baro, so kiya de thmuku Heya we asi ka mooda utux lhebun ma bale ba thmuku Heya.” 25Rmengo heya ka mqedil: “Klaun mu ka Misaya, kiya ka kesun Kiristo. Meyah ka heya. Meyah ka heya du meyah rmengo kana ani maanu.” 26Rmengo heya ka Yesu: “Yaku ka kiya, kiya ka gaga mpprengo isu!”

27Dehuk ciida ka tnugsaan na. Mpprengo daha mqedil ka Yesu we sklwiun daha. Kiya de uka seediq rmengo “Maanu ka pgsaun su?” Uxe uri we rmengo: “Hmuwa, ma su rmengo heya?” 28Mqedil we htiyan na hiya ka smiyan psaan na qsiya ma mosa alang paru ma rmengo seediq: 29“Eyah mita! Wada na ssneeru kenan ka kana ani maanu qneepah mu ka 1 seediq. Uxe yaa Kiristo ka seediq nii ho?” 30Mlatac peeyah paru alang ka kana seediq ma meyah Yesu hiya.

31Ciida na hiya, dmudul Yesu ka tnugsaan na: “Mptgesa, uqi han.” 32Rmengo dheya ka Yesu: “Niqan ka uuqun mu ini namu klai.” 33Mpprengo ka tnugsaan na: “Niqan ka bnege uqun heya ho?” 34Rmengo dheya ka Yesu: “Uqun mu kesun we kika qqeepah mu lnglungan smnkagul kenan ma qqhedu mu qpahun na. 35Uxe namu rmnengo so nii peni: ‘Meyah 4 idas ka qbrungan.’ Rngage maku, mquri qnpahan qmita gaga. Gaga mhada pnhmaan di, baka qbrungan da! 36Mpqburung na we wada mangal snadu ma psseli pnugheyi betaq uka psteqan knuudus. Kiya de ppsuupu mqaras ka mprehak ma mpqburung. 37‘Rmehak ka seediq gaga ma, mpqburung ka seediq nii.’ Bale ba ka kari nii. 38Wada maku skgulan mosa qmburung uxe namu bnqerus. Wada mbqerus ka dheya, yamu ka ga tbleyaq bnqerus qnpahan daha.”

39Wada snhii Yesu ka hbaro seediq Samareia meeniq alang hiya. Ado wada so nii pgkela ka mqedil kiya: “Wada ku na ssneeru ka ani maanu qneepah mu.” Kiya de alang nii we hbaro ba seediq Samareia snhii Yesu. 40Maanu so kiya de meyah mita Yesu ka dseediq Samareia, mesa heya msuupu meeniq hiya. Kiya de mk2 ali ka nniqan na hiya. 41Ado mbahang kari Yesu ma krinah hbaro ka seediq snhii. 42Rmengo mqedil nii ka dheya: “Gisu miyan snhii ka saya we uxe mnoda rnengo su ka kiya di. Wada miyan taan bale ma klaun bale seediq nii we kika bale ba mpkuudus qnlangan.”

Pklmeun Yesu ka Laqi Bukung

43Bobo mk2 ali de mlatac peeyah dxeral hiya ka Yesu ma mosa Galil. 44Ado pgkela heya nanak ka Yesu, rmengo: “Ini sprui meniq alang na nanak ka mpgeela kari.” 45Maanu so kiya de mosa Galil ka Yesu de smbleyaq smterung heya ka seediq Galil. Ado mnosa psmiyan Yerusalem ka dheya ma qntaan daha ka kana qneepah Yesu psmiyan ciida.

46Mosa alang Gana ga Galil dungal ka Yesu. Alang hiya we kiya ka pnryuxan na sino qsiya. Ga mnarux Kaparnaom hiya ka laqi qbsuran paru. 47Wada mbahang peeyah Yudaya dehuk Galil ka Yesu de meyah mita Heya. Meyah mesa heya pkmalu laqi na. Ado ga so mphuqil ka laqi na da. 48Rmengo heya ka Yesu: “Nasi namu ini qita pnskraya qneepah ma sklwiun ba qneepah we uxe namu mpsnheyi.” 49Rmengo heya ka qbsuran: “Braho misu bale. Ini qhuqil berah na ciida ka laqi mu han we nita han ho?” 50Rmengo heya ka Yesu: “Osa sapah da. Mpkuudus ka laqi su!” Seediq nii we snhii kari Yesu, kiya de mosa sapah da. 51Pida ba mkleelu ciida nina we meyah smterung heya ka tnqliyan na, rmengo wada muudus ka laqi na. 52Smiling, sknuwan ka wada malu. Rmengo heya ka dheya: “Bobo ceka naali 1 toke wada uka ka kntlexan na da.” 53Kiya de klaun na ciida we kiya ka rmnengo heya ka Yesu: “Maha muudus ka laqi su.” Kiya de heya ma kana tnsapah na snhii kana da. 54Bobo mneyah Galil peeyah Yudaya ka Yesu we nii ka tg2 ndaan na pnskraya qneepah.

Currently Selected:

Yohane 4: Stgdaya

Highlight

Copy