Yohane 3

Mprengo Psbgurah Mtuting ka Yesu ma Nikodemos

1Niqan ka 1 seediq Parisay. Nikodemos kesun ka ngayan na. Heya we mpdudul seediq Yudaya. 2Seediq nii we meyah mita Yesu keeman ciida, rmengo: “Mptgesa, klaun nami isu we mptgeesa pneyah su Utux Baro. Ado pnskraya qneepah su we nasi ini theyaq seediq ka Utux Baro we uka seediq mtduwa qmeepah so nii.” 3Cmiyuk ka Yesu: “Bale ba rngage su mu. Nasi ini psbgurah mtuting ka seediq we ini tduwa mita qnlhangan Utux Baro.” 4Rmengo ka Nikodemos: “Rudan ka seediq de mphuwa mesa psbgurah mtuting ho? Yaa mtduwa mnpusal mremux lbuwan bubu na ma mtuting dungal ho?” 5Cmiyuk ka Yesu: “Bale ba rngage su mu. Nasi uxe pntuting peeyah qsiya ma Bgihur Utux ka seediq we ini tduwa mremux qnlhangan Utux Baro. 6Pntuting peeyah heyi we heyi. Pntuting peeyah utux we utux. 7Iya skluwi lmngelung ka rmengo mu: ‘Asi su ka psbgurah mtuting.’ 8Bgihur we mooda sneengan na nanak sbgihur. Qbhangan su ka hrenang na, maanu so kiya we uxe su klaun pneyah inu ma maha inu. So kiya uri ka kana mntuting peeyah Bgihur Utux.” 9Smiling heya ka Nikodemos: “Mptduwa inu ka niqan so nii da?” 10Cmiyuk ka Yesu: “Mptgesa su Israel ka isu, ini su klai ka nii ho? 11Bale ba rngage su mu. Rnengo nami we kiya ka klaun nami. Pnugkela nami we kiya ka qntaan nami. Ani so kiya ini namu ngali ka pnugkela nami. 12Ini namu snhii ka rnengo mu quri bobo dxeral. Nasi ku rmengo quri baro de mphuwa namu mesa snhii da ho? 13Ado uka ka seediq mnosa baro, wano Laqi seediq pneeyah baro. 14Wada hmuwa mesa pheyu quyu tadus brenux ka Moseh, Laqi seediq uri maha pntena so nii phyegun. 15Kiya de ani ima snhii heya we maangal uka psteqan knuudus kana.”

16“Gmaalu seediq bobo dxeral ka Utux Baro, betaq na sbege ita ka 1 ba laqi na. Kiya de ani ima snhii heya we uxe kkgedang ma maangal uka psteqan knuudus. 17Ado Utux Baro ge, skgulan na bobo dxeral ka laqi na we uxe meyah psahu seediq bobo dxeral, meyah pkuudus seediq bobo dxeral. 18Seediq snhii heya we uxe ngngalun niqan qnquwan. Seediq ini snhii heya ka tena wada ngalan niqan qnquwan. Ado heya we ini snhii ngayan na 1 ba laqi Utux Baro. 19Meyah bobo dxeral ka ledax. Ado naqah qneepah daha ka seediq bobo dxeral, ini skuxul ledax. Smkuxul kuung, kiya ka wada ngalan niqan qnquwan. 20Ani ima qmeepah naqah we qnqihun daha ka ledax, ini eyah smdaling ledax, kcugun daha maha pklaun ka qneepah daha di. 21Kiya de qmeepah bale na we meyah ledax. Ado pptuura qneepah na we pnoda Utux Baro.”

Yesu ma Yohane Mptgaya Smino

22Bobo nii de mosa dxeral Yudaya ka Yesu ma tnugsaan na. Msuupu dheya hiya ka Yesu ma mooda ptgaya smino seediq. 23Yohane uri we ga ptgaya smino seediq Ainon smdaling Saleim. Ado egu qsiya ka hiya. Kiya de mosa ptgaya smino hiya ka seediq. 24Ciida we ini psai sapah kuung nana ka Yohane. 25Psseung kari quri gaya psbgurah rutiq ka duma tnugsaan Yohane ma 1 seediq Yudaya. 26Kiya de meyah mita Yohane ma rmengo: “Mptgesa, mnsuupu sunan sipo yayung Yarden hiya, kiya ka seediq pnugkela su ge, gaga ptgaya smino seediq ka saya, wada heya kana ka seediq da!” 27Rmengo ka Yohane: “Nasi uxe bnege peeyah baro we uxe maangal ani maanu ka seediq. 28Yamu nanak ka pgkela kenan. Rmnengo ku: ‘Uxe ku Kiristo ka yaku, snkgulan ku plaale smeelu elu na.’ Yamu nanak ka pgkela kenan. 29Maangal weewa pstrengun we kika riso mpsterung. Mheyu ka dadal riso ma mbahang hrenang riso de mqaras. Maanu so kiya de mttuuku ka qnaras mu da. 30Heya we ida mprana. Yaku we ida mpbiyuc.”

Pneyah Baro

31Pneyah baro we ga mgbaro kana ani maanu. Pneyah bobo dxeral we nbobo dxeral ma rnengo na uri we nbobo dxeral. Pneyah baro we ga mgbaro kana ani maanu. 32Spgkela na ka ntaan na ma qnbhangan na. Kiya de, uka ka seediq maangal pnugkela na. 33So ka maangal pnugkela na we kika pnskraya bale ba ka Utux Baro. 34Snkgulan Utux Baro we rmengo kari Utux Baro. Ado ini seung mege Bgihur Utux heya ka Utux Baro. 35Gmaalu laqi ka Tama ma wada na sbege baga na ka kana ani maanu. 36Snhii laqi ka seediq we niqan uka psteqan knuudus. So ka ini snhii laqi ka seediq we uxe mqita uka knuudus. Seang Utux Baro we meeniq ba heyi na klaali.

Currently Selected:

Yohane 3: Stgdaya

Highlight

Copy