Yohane 14

Elu ma Knuudus ma Bale ba ka Yesu

1“Iya slhebun ka lhebun namu. Snhii namu Utux Baro we snhii yaku uri. 2Sapah gaga niqan Tama mu we egu ba saan meeniq. Nasi uka we naka ku wada mnama rmengo yamu da. Ado maha ku psramal nniqun namu ka yaku. 3Nasi ku mnhedu psramal nniqun namu de meeyah ku dungal ma maadis yamu mosa hiya. Meeniq ku hiya ka yaku we maha namu meeniq hiya ka yamu uri. 4Mmaha ku inu ka yaku we klaun namu ka elu kiya.” 5Rmengo ka Tomas: “Bukung! Ini nami klai mmaha su inu. Huwa nami kesun mkela ka elu kiya ho?” 6Cmiyuk rmengo heya ka Yesu: “Yaku we elu, bale ba ma knuudus. Nasi ini ooda yaku, uka ka seediq mtduwa mosa Tama hiya. 7Tena namu mkela yaku dwe naka namu klaun ka Tama mu uri. Peeyah saya, mpkela namu heya. Kiya de wada namu mita heya da.”

8Rmengo heya ka Pilipos: “Bukung! Pqtai nami ka Tama, kiya de mttuku nami da.” 9Rmengo heya ka Yesu: “Pilipos, so nii qmbsyaqan ka tnheyaq ta, ini su kela yaku nina ho? Mita namu yaku we kiya ka qmnita namu Tama uri. Ma namu betaq rmengo: ‘Pqtai nami ka Tama’ na ho? 10Meeniq ku ckceka Tama, meeniq ckceka mu ka Tama uri we ini su snhii na ho? Kari wada mu srengo yamu we uxe pneyah yaku, pneeyah Tama gaga ckceka mu ka nisu qmeepah qpahun na. 11Snhii yaku ka yamu. Meeniq ku ckceka Tama ma meeniq ckceka mu ka Tama uri. Ani namu so ini snhii we ado so qneepah mu ma snhii yaku. 12Bale ba rngage maku, snhii yaku ka seediq we qpahun na ka nii mu pqpahan uri. Kiya de mpgkala nii knparu ka qpahun daha. Ado maha ku Tama mu hiya. 13Pooda namu ngayan mu mesa ani maanu we ida mu ptkuun. So kiya de spooda na laqi maangal knledax ka Tama. 14Mooda namu ngayan mu mesa ani maanu we ida mu ptkuun.

Sntangan Mege Bgihur Utux

15Nasi namu gmaalu yaku we ndwaun namu muyu ka kari pnosa mu. 16Kiya de mpesa ku Tama ma mbege 1 mdayo yamu ma mptheyaq yamu ani betaq knuwan. 17Heya we Bgihur Utux bale ba. Kiya ka ini daha psteme maangal ka seediq bobo dxeral. Ado ini daha qtai ma ini daha klai uri. Mkela namu heya ka yamu, ado mtheyaq yamu klaali ka heya ma meeniq ckceka namu ka heya uri. 18Uxe maku laxun so laqi qrinuc. Ida ku meeyah yamu hini. 19Ini qbsiyaq de uxe mqita yaku ka seediq bobo dxeral. Mpqita namu yaku ka yamu. Ado muudus ku ka yaku ma mpkuudus namu ka yamu uri. 20Betaq ali ciida, maha namu klaun gaga ku meeniq ckceka Tama ka yaku, gaga namu meeniq ckceka mu ka yamu ma meeniq ku yamu ka yaku uri. 21Ga dmoi pnosa mu kari ma mnduwa ba muyu ka seediq we kiya ka gmaalu yaku. Gmaalu yaku ka seediq we sgaalu Tama mu uri ma mpgaalu ku heya ka yaku uri. Kiya de mptqita ku heya.” 22Rmengo heya ka Yehudah (Uxe Yehudah seediq Iskariot): “Bukung! Hmuwa, ma su mptqita yami ma ini su ptqita seediq bobo dxeral ho?” 23Cmiyuk heya ka Yesu: “Gmaalu yaku ka ani ima we mpnduwa ba muyu kari mu. Kiya de mpgaalu heya ka Tama mu. Kiya ma maha ta hiya ma mpsuupu heya meeniq hiya. 24Ini gaalu yaku ka seediq we uxe nduwa muyu kari mu. Kari nii namu qbhangan we uxe nnaku, nTama smnkagul yaku.”

25Ida ku mtheyaq yamu ciida han we tena ku rmnengo yamu ka so noda nii. 26Ani so kiya, Mdayo na we, kiya ka Bgihur Utux mooda ngayan mu skgulan Tama. Heya we ttgesa na yamu ka kana ani maanu ma psbgrnahun namu na plngelung kana kari rnengo mu yamu. 27Mhiti ku mpsbale lhebun yamu. Bbege mu yamu ka mpsbale lhebun mu. Bbege mu yamu we ini pntena bnege seediq bobo dxeral. Iya pslhebun ka lhebun namu ma iya kiicu. 28Mnbahang namu rmnengo ku yamu, mosa ku ma ida ku meyah yamu hini dungal ka yaku. Nasi namu gmaalu yaku we naka namu qrasun ka maha ku Tama hiya. Ado mgkala yaku knparu ka Tama han. 29Ini eyah ka ooda so nii na we wada ku knama rmengo yamu. Kiya ka mpsnheyi namu dehuk ka so nii ciida. 30Uxe ku mprengo egu yamu dungal, ado gisu ka qbsuran mpqlahang bobo dxeral nii. Heya we uka ba beyax na pklgelu kenan. 31Qneepah mu nii we kiya ka pnuyu mu pnosa kari Tama mu. Kiya de so maha klaun seediq bobo dxeral ka gmaalu ku Tama. Tutuy! Nita da!

Currently Selected:

Yohane 14: Stgdaya

Highlight

Copy