Smnlean 4
4
Qayin ma Hebel
1Seediq kiya we msuupu mtaqi Eba mqedil na de, mchedil ka Eba, tmlaqi Qayin. Rmengo ka heya: “Smtama ku Utux Tmninun, nii ku dmoi 1 laqi rseno.” 2Heya dungal we tmlaqi Hebel mtswai rseno Qayin. Hebel nii we tmabu miric, Qayin we mqeepah dxeral. 3Bobo na hiya yaa piya, Qayin we mangal pnhgalang knpahan na, ssapuh na mege Utux Tmninun. 4Hebel we gmao mangal tgplaale mtuting baus miric ma mtbeno ssapuh na mege uri. Utux Tmninun we smparu mita Hebel ma snapuh na. 5Ini na sprui mita ka Qayin ma snapuh na. Kiya de mseang riyung ka Qayin, mbengux ka dqeras na. 6Rmengo Qayin ka Utux Tmninun: “Ma su lux mseang? Ma lux mbengux dqeras su? 7Netun malu ka noda su we uxe mptutuy ka tunux su peni? Netun qnuuqu ka noda su de, ga meniq berah rhengun su ka qnquwan noda. Heya we mpdoi sunan, isu we asi su ka qlhangan.”
8Qayin we gaga mpprengo swai na kesun Hebel. Daha heyi nii meniq ckceka qnpahan ciida, beebu swai na rseno Hebel ka Qayin, wada na phqilun ka heya da. 9Rmengo Qayin ka Utux Tmninun: “Gaga inu swai su rseno Hebel?” Rmengo ka heya: “Ini ku kela! Ma ku so ba mpqlahang swai mu ka yaku da?” 10Rmengo ka Utux Tmninun: “Wada su hmuwa? Hrenang dara swai su ga smdaring mlawa kenan peeyah dxeral truma. 11Saya maangal su sniyus peeyah dxeral nii. Gisu rmaguh quwaq na ka dxeral, maangal dara swai su rseno peeyah baga su. 12Isu we meepah su dxeral we, uka beyax na mquri sunan ka heya. Maha su mtnooda bobo dxeral.” 13Rmengo Utux Tmninun ka Qayin: “Mchedil riyung ka pnkdira su, hmrinas pphelun mu. 14Tai, saya we lmiwaq su yaku peeyah dxeral nii, uxe ku mpqita dqeras su. Mptnooda ku bobo dxeral, mita yaku ka seediq we mphuqil kenan.” 15Rmengo heya ka Utux Tmninun: “So kiya de, ani ima phuqil Qayin de, maha msn7 cmiyuk ka ngngalun na.” Kiya de Utux Tmninun we pniqan na pnskraya ka Qayin, so uxe mita heya ka seediq de mphuqil heya. 16Kiya de mlatac peeyah berah Utux Tmninun ka Qayin, mosa meniq dxeral Nod quri nklaan hido Eden.
Lqlaqi Qayin
17Msuupu mtaqi mqedil na ka Qayin, kiya de mchedil ka mqedil na de tmlaqi Xanok. Smalu 1 alang ka Qayin, saangal na ngayan laqi na, Xanok kesun na tmngayan. 18Xanok we tmlaqi Irad, Irad we tmlaqi Mexuyael. Mexuyael we tmlaqi Metusael, Metusael we tmlaqi Lemek. 19Rmurul 2 mqedil ka Lemek: 1 we Adah, 1 we Cilah. 20Adah we tmlaqi Yabal. Yabal we pusu rudan tnbugan meniq kobu ka heya. 21Mtswai Adah we Yubal kesun ngayan na. Heya we pusu rudan mtubu ma mpuwaw ka heya. 22Tmlaqi Tubal Qayin dungal ka Cilah. Heya we pusu rudan mpsmalu qyqeya xiluy ma limuk. Naamah we mtswai na mqedil Tubal Qayin. 23Rmengo 2 mqedil na ka Lemek:
“Adah ma Cilah, qbahang kari mu.
Dmqedil Lemek, qbhangi bale kari mu:
Pluqah kenan ka rudan we, wada mu phqilun ka heya da.
Pluqah kenan ka laqi we, wada mu phqilun da.
24Nasi phuqil Qayin we, maha mn7 ka cniyuk na.
Netun phuqil Lemek we, maha mpn77 ka cniyuk na.”
Set ma Enos
25Msuupu mqedil na mtaqi dungal ka Adam de, tmlaqi 1 laqi rseno, Set kesun daha tmngayan. Rmengo: “Utux Baro we wada mege 1 laqi kenan spririh na Hebel. Ado wada phqilun Qayin da.” 26Tmlaqi 1 laqi rseno ka Set uri, Enos kesun na tmngayan. Peeyah ciida ka seediq we prading dmurun ngayan Utux Tmninun.
Currently Selected:
Smnlean 4: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
