Mark 16

Jeju ɓai lo koit

(Oo Mat 28:1-8; Luk 24:1-12; Jã 20:1-10)

1Lon ndɔ taakò tɔi woi ye, Mari kɨ Magdala, Mari kɨ kõ Jak kɨ Salome ndugon nyag kɨ kootmbĩ kad'n ndomɨn nĩn Jeju. 2Ndɔ kɨdasabang lo ndɔ kɨ kõ tanãimɨta, kɨsĩ ritit, dekɨdẽg'n non tee awɨn dɔɓadt lon kàd ndɨ ɓan. 3Ndɨjen na ta anan: Nõ a ndubɨr mbal'n utɨn ne dɔɓad adj a? 4Na lon dekɨdẽg unɨn kumd kɨ dõ ye, oon kad mbal kɨbobe'n non i kɨ ndubɨr kete woi. 5Andɨn ɓe nint, oon ngon kɨ basa mad ndɨ ber ko jikõt, kub kɨ roat nda ngũng. Ad kam dekɨdẽg gang man. 6Na basan'n non eld an: Ot kadɨn kamsɨ gang man. Ĩla i ɗa i sahn Jeju kɨ Najaret'n hã gana dɔ kagdosɨt a ne; ɓai lo koit, oon lon lanat, goto nẽbe. 7Awɨn tajigla elɨn ngéndoog loa kɨ Pierr ho: Jeju ndɨ aw dɔning Galilet kete nõsɨt, nu la a oonat ye, tit'n elsɨn.

8Dekɨdẽg teen ɓenint, kɨ ngɔd, sun lui, kɨta ɓool tɔld sɔkɨr, ad rod ndad yatɨt, asɨ kelɨn ta kɨ deg'n ndɔdɨnd dɔ ɗobt al.

Jeju tee hɔi kɨ ro Mari kɨ Magdalat

(Oo Mat 28:9-10; Jã 20:11-18)

9Go nyagt'n non ye, ndɔt kɨdasabang, kɨsĩ ritit lon Jeju ɓain lo koit ye, tee hɔi kɨ ro Mari kɨ Magdala kan Jeju ɔrr ndilg kɨyerr tanãimɨta kamat kɔ kete nõ. 10Maɗi aw, ɔrr hoita ye ngéndoog lo Jeju. Na ngéndoog loa ɗan kamkil ngãi ho, non ho. 11Na lon oon Mari eld an: Jeju ndɨ kɨ dɔn dõ, m'ooa kɨ kum, ngéndoog loa taan tan eld nõ al.

Jeju tee hɔi kɨ ro ngéndoogt lon joo

(Oo Luk 24:13-35)

12Go nyagt 'nten, ngéndoog lo Jeju joo a ndian dɔ ɗobt ndɨ awɨn kɨ kam ndɔɔt. Jeju un ro kɨ tadang teen hɔi kɨ rodt. 13Ngendoog kɨjoo'n non tel a elɨn ngéndoo madg, na taan ta lod al.

Jeju tee hɔi kɨ ro ngéndoogt lon kɨkɨlah gidaikɨɗa

(Oo Mat 28:16-20; Luk 24:36-49; Jã 20:19-23; Knk 1:6-8)

14Goot gog ɓaitɔ, Jeju tee hɔi kɨ ro ngombangkɨlagt kɨkɨlah gidaikɨɗa lon ndɨn ne ta nyasat. Kɔl sed an: I taa'n hoita ɓaim lo koit al ho, i adɨn kamsɨ kongkong tɔ ho, kɨta i ndigɨn koo dɔ ta lo deg'n oomɨn kɨ kumd lo ɓaim lo koit al. 15Kamla Jeju eld an: Awɨn kɨ dɔningt kɨ log tube, i lan mber Hoita kɨmaj adɨn deg tube oon. 16De'n taa ta lom a ne, i ɗana baptem, de'n non a ngah kaj. Na de'n taa ta lom al a ne, takɨgang i dɔat. 17Na nyag 'nten la, deg kɨ ngétaata lom a ɔjɨn ne tɔg Luwah kɨ tɨga wakɨsɨ ye, kam tɔmt a tuɓan ndil kɨmajalg, a elɨn ta kɨ taɓe kɨ dang dang. 18A hɔn lig kɨ jid, na lig a dond al bat, a ãin man nya mad kɨ tɔl de, na a tɔld al bat, a ndan jid dɔ ngérotogt, ad ngahn lapia kɨ kɔrr njereng.

Jeju aw dõ dɔrãt gog

(Oo Luk 24:50-53; Knk 1:9-11)

19Goot'n Bɨraɓe elta'n non ye, unɨn na kɨ kam dɔrãt, ad ndɨ dɔ jikõ Luwaht. 20Ngéndoog lo Jeju aw lan mber Hoita kɨmaj kɨ log tube; Bɨraɓe ɗa kɨla nat sed, ad'd tɔg, ad ɗan ne nyakɔjg kɨ yaya son go tat'n ngéndoog lan mbera, ad i ta kɨ rota.

Currently Selected:

Mark 16: MlL

Highlight

Copy