Luk Takɨdɔt
Takɨdɔt
De'n ndang maktub 'nten i Luk ĩ tɔ la ndang maktub kɨlag lo ngombangkɨlag ye. Kam maktubt loa kɨdasa ye, Luk elta ngétaata lo Krist ĩgɨn ĩn Juipg al, na a elɨn ta grek. Luk ɔrrd girr tag kɨ ngang ngang kɨ nyabelɓeg lo Juipg'n gerɨn al kad gerɨn. Titbe la elɨn ĩgɨn ĩn Juipg al kɨ kam dɔningt kɨtaagbe ho kɨ kaglo tube kad gerɨn Jeju i Ngekajd.
Hoita kɨmaj'n Luk ndang ye, asɨ gang lo mɨta. Na maktub lo Luk ndɨ ɔj'j hoita lo Jeju lon ɓain dɔning Galilet mbã teen ɓebo Jerusalemt (Luk 9:51—19:28). Kam hoitat 'nten, elta kɨ ɔj dɔ kaw Jejut mbã tee Jerusalemt lon a oit. Luk ndang nyag'n ɗan nya na Matie, Mark kɨ Jã elɨn ta dɔt al. I titbe la Luk elta dɔ tat lo Mart kɨ Mari (Luk 10:38-42) ta lo de kɨmaj kɨ Samarit (Luk 10:29-37) ho elta lo Bɔw ngon'n ngona nãi, na tel ngah ngonɨn gog (Luk 15:11-32).
Ngendang maktub daj nya'n ndaa tot kɨtaj kam nyandoot lo Jeju ho kam ndiat kɨ dɔa dõ ho. Luk ger kad deg tube ĩn kɨ nuj kɔ kɨkanj Jeju. Nya 'nten la Luwah lan kɨ Jeju Krist kad aj deg'n taan ta loa. Jeju ɗe kɨta ngéɗamajalg, ngan kɨ dug, ngéndog ngémõig kɨ mbahg tɔ.
Ngétaata lo Krist'n Luk ndang maktub ad'd nõ, Maj a ne, ndɨn kɨ nyamajg ngãi kam jidt. Nya 'nten la Luk ɔrrɨnd hoi nyandoo lo Jeju kɨ dɔ nyamajgt'n de asɨ ngah kam jint Luk 12:16-21; Luk 16:1-20. Luk el ngéndoog lo Jeju kad unɨn rod kɨ nyamajg lod adɨn Luwah ho, kɨ ɗan ne kɨ deg ho tɔ.
Ngéndoog lo Jeju ĩn dɔ ɗobt nat sia, ndigɨn kad ji ndɨd mbel kɨ kij, gerɨn kad kam Luwah ndaa kɨ deg tube ho, Luwah tar deg tube ho tɔ. Go dɔning'n romag õnɓe dɔt ye, deg ndɨ elɨn anan: Ngar Sejar i bɨradɔ. Na ngékadkamd Krist ndɨ elɨn anan: Jeju Krist la i Bɨraɓe ye, kɨta Luwah ada ɓai lo koit, na ada tɔg dɔ nyagt tube. Kam maktubt'n Luk ndang ye, Luk kun Jeju Bɨraɓe nja ngãi tɔi ndeg maktubg'n elɨn ta dɔ Hoitat kɨmaj.
Hoita kɨmaj lo Jeju Krist'n Luk ndang mbagɨrɨn Jerusalemt, na tɔltan Jerusalemt tɔ (Luk 1:1—2:52). Jeju ɓai lo koit da ron kɨ kumkajir ad ngéndoog loa oona, ad ɗan ronel ngãi. Lon Jeju mbagɨr ɗa kɨla lo Bɔwɨn ye, ɓakot kɨ Ndil Kɨkunjɗang (Luk 3:1—4:44). Na ngéndoog taa ne, a taan Ndil Kɨkunjɗang ho (Luk 24:49). Tit Jeju a asɨn kelta kɨ Bɔw kɨ dõ dɔrãt ho, ɔsɨn pa ndubɨn ne Luwah kɨta kamkẽ loa tɔ.
Currently Selected:
Luk Takɨdɔt: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.