Luk 1
1
Luk ndang maktub ad namɨn Teopil
(Oo Mrk 1:1; Knk 1:1-3)
1Deg ngãibe ndangɨn hoi nyag'n ɗan nya danjt kɨgo tɔgdt. 2Deg'n non ndangɨn tag lo ngémanajg, kɨ ngékelta lo Luwah loyaɓood kɨlat lo Jeju, ad i tag'n elɨn dɔ nyagt'n oon kɨ kumd. 3Mĩ tɔ m'nder girr nyag'n non loyaɓoodt mbã dɔboit. Kɨtɔ 'nten m'oo maj kad m'ndang ta dɔdt kɨgoagoa m'adi ĩ Teopil ngemaj kɨ tɔi. 4M'ndɨ m'ɗa titbe kɨtakad i gerɨn rota dɔ nyagt tube'n deg'n non ndooin.
Malaika elta kete dɔ kooj Jãt kɨ ngeɗa deg baptem
5Kaglot'n Herod ĩn ngar kam dɔning Judet ye, ngejanyamosɨkadkari mad ndɨ nõ tɔa i Jakari, i kɨkɨɗa ku ɓut ngéjanyamosɨkadkarigt kɨ bɨra bɔwd i Abia. Nẽa i kɨkɨɗa ku ngan kɨdẽgt kɨ girrkooj Aarõ, tɔa i Elijabet. 6Ĩn tujoo ĩn deg kɨdenesew nõ Luwaht, telɨn rod go mberkɨndagt lo Bɨraɓe kɨ tag loa kɨ tee, kɨkanj ta dɔdt. 7Na oojɨn ngon al, kɨta Elijabet i kuj, ĩn tujoo ĩn deg kɨ telɨn bɨga bugum. 8Ndɔ mad Jakari ndɨ ta kɨla jamosɨkadkarit nõ Luwaht, kɨta i kaglo lo ngékɨɓe lo Abia kad ɗan kɨla'n non. 9Kɨgo nyabelɓet lo ngéjanyamosɨkadkari, yan yuk, na yuk'n non so dɔ Jakarit kad and lot kɨjaɓat lo Bɨraɓe kad la horr mbikamt kɨ kootmbĩ. 10Deg koosɨg tube ɗan tɨga, ɗa elɨn ta kɨ Luwah dɔ kàd la horr mbikamt kɨ kootmbĩ. 11Malaika lo Bɨraɓe mad tee hɔi kɨro Jakarit, ɗa kad dɨngɨr la horr mbikam kɨ kootmbĩ ko kõt. 12Lon Jakari ooa ye, kama gang man ngalang ad ɓool ɗaa tɔ. 13Malaika ela an: Jakari. Ot ɓool kɨta Luwah oo dɔ kɔ loi, ɓet nẽi Elijabet a ooj ngon adi, na a i ndah tɔa Jã. 14A i ɗa ronel dɔat kɨ kamnda; deg ngãibe tɔ a ɗan ronel dɔ koojat. 15A i de kɨbo nõ Bɨraɓet, a ãi kasɨnduu, ke kasɨ mad kɨ ngang al bat, a i kɨ Ndil Kɨkunjɗang ndɔ koojat mbã tɔgɨn. 16A tel kɨ deg ngãibe ku Israelagt kɨ ro Bɨraɓe Luwaht lod, 17a ɗa kɨlaɓer lon nõ Luwaht kɨ ndil Eli. Kɨ tɔg kɨ tit lo Eli, ngoni a tel ngarkam bɔwg kɨ ro ngandgt, a ad ngételro gotat al telɨn kɨ kam ɗob terrt lo deg kɨdenesew, a ɗago deg lo Bɨraɓe kad ɗan go rod kɨtaa.
18Jakari el Malaika an: Kɨ ɗi m'a m'gerɨn kad ta 'nten i rota a? Kɨtɔ mĩ bɨga, nẽm tɔ tel bɨga bugum.
19Malaika tura an: Mĩ Gabriel m'ɗa nõ Luwaht. Kɨtɔ ɗa kɨlaɓer loa. Luwah lam kad m'eli ta ho, kɨ m'ɔrri hoita kɨmaj 'nten. 20Oo maj ɓet a i tel mbo, a asɨ kelta al mbã ndɔt'n nyag 'nten a ɗan nya kamtã; kɨta i taa ta lom al. A tɔlɨn kɔntag dɔ kàdat.
21Deg ndɨ ngoon Jakari, ta yad kɨta nãia kɨ nãi kɔkɨ kam lot kɨjaɓat. 22Lon tee tɨga ye, asɨ kad elta al. Deg gerɨn ta kad Jakari oo nyakookamndilt kam kuj ndub Luwaht. Ĩ tɔ mbɔjd kɨ jin, na ndɨ tan mbo. 23Lon ndɔ ɗa kɨla ndub Luwah loa asɨ woi ye, Jakari aw ɓe lon. 24Go ndɔgt 'nten ye, nẽa Elijabet ndan ngon, na tee tɨga kam kujt lon al asɨ nah mi, an: 25'Nten la i maj'n Bɨraɓe ɗa sem ye, dɔ ndɔt'n oo kumtondo lom kad m'ɔrrɨn rosɔl dɔmt dan degt.
Malaika Gabriel elta Mari kete dɔ kooj Jejut
26Kam naht kɨbojidet go naht'n Elijabet ndan ngon ye, Luwah la Malaika Gabriel ɓet mad kɨ dɔning Galilet, tɔa i Najaret. 27Laa kɨ ro ngon kɨ mandɨt kɨ ger ngaw al, ĩn de mad kɨ girrkooj Dabidt kɨ tɔa i Jojep, hɔ dɔa. Tɔ ngon kɨmand'n non i Mari. 28Malaika and goat, an: Lapia. Ĩ ngemajkurr, Bɨraɓe i nat sei.
29Ta lo malaika ad kam Mari gang ngalang; ɔj ta kamɨnt, ke girr lapia loa i ɗi a? 30Malaika ela an: Ot ɓool, Mari, i ngah maj nõ Luwaht. 31Oo maj a i ndan ngon, a ooj kɨdɨngã, a i ndah tɔa Jeju. 32Ĩla i kɨbo ye, a kunɨna ngon Ngetɔitɔi, Bɨraɓe Luwah tɔ a ada pong kõɓe lo bɔwa Dabid. 33A õɓe dɔ ngé kɨ ɓet lo Jakob mbãkɨnõt, kõɓe loa dɔboia goto.
34Mari el Malaika an: Mĩ'n m'ger ngaw al ye, titbãi nya 'nten a ɗa nya?
35Malaika tura an: Ndil Kɨkunjɗang a ɗe dɔit, tɔg Luwah Ngetɔitɔi a uti kɨ Ndilɨn. Kɨtɔ 'nten ngon kɨkunjɗang'n a ooja, a kunɨna ngon Luwah. 36Oo tɔ, nooji Elijabet ndan ngon dɔ bɨgant, ĩn deg a kunɨna kuj ye, ndan ngon asɨ nah kɨbojidet. 37Kɨtɔ nya mad kɨ dum Luwah goto.
38Mari el an: Oo mĩ ber kɨdẽ lo Bɨraɓe, kɨ ɗa sem kɨgo tat loi. Malaika ɓai, na nyàa.
Mari aw oo Elijabet
39Kam ndɔt'n non Mari ɓai kanangbe aw dɔning mbalbot, ɓet mad kɨ dɔning Judet, 40and kuju lo Jakari, ɗa lapia Elijabet. 41Lon Elijabet oo dɔ lapia lo Mari ye, ngon kɨ kamat ɓa ruru. Elijabet ɗoosɨ kɨ Ndil Kɨkunjɗang. 42Ko kɨ ndɨn kɨbobe an: Ĩla ĩ ngemajkurr ku dekɨdẽgt ye, ngon kooji tɔ a i ngemajkurr. 43Titbãi m'ngan maj titbe mbã kõ Bɨraɓe lom ɗen romt a? 44Kɨtɔ oo. Lon lapia loi so mbimt ye, tentenbe ngon kɨ kammt roa nela, ad ɓa ruru. 45Ĩ ngeronel tɔ, ĩn ad kami: Nyag'n elɨn kokɨro Bɨraɓet, a ɗan nya.
Pa lo Mari
46Mari el an: Rom ndɨ ɔsɨgon Bɨraɓe. 47M'ɗa ronel kam ndilɨmt dɔ Luwaht kɨ ngekajɨm. 48Kɨtɔ oo kumtondo lo ɓer lon kɨdẽ. Oo, nẽbe kɨ nõt ngakaa deg tube a kunmɨn ngeronel. 49Kɨtɔ Luwah kɨ Ngetɔg tube ɗa sem nyag kɨbobo, tɔa i kɨkunjɗang. 50Oo kumtondo lo ngeɓoolag kɨ dɔ ngakaat kɨ ngakaa. 51Ɔj deg tɔg jin, tɨnda ĩgɨn ndɨn kɨ tagahg kɨ go lo dɔsɨrt ngarkamdt tĩ kɔ. 52Ɔrr ngékõɓeg kɔ dɔ pong kõɓegt lod, na tɔi de kɨ sɔlg kɨ dõ. 53Ad deg'n ɓo ɗad ndanɨn kɨ nyag kɨmaj, na ad ngénya awɨn jid kari. 54Ɗa kɨ ɓer lon Israel, kɨta gah dɔ kookumtondot lon, 55tit'n elɨn bɔwjg kɨdɔ Abrahamt kɨ ngakaa mbãkɨnõt.
56Mari ndɨ kɨ Elijabet asɨ nah mɨta kamla tel kɨ ɓe lon.
Kooj Jã ngeɗa deg baptem
57Lon ndɔ kooj ngon asɨ ye, Elijabet ooj ngon kɨdɨngã. 58Madɓeag kɨ noojag oon hoi maj kɨ Bɨraɓe ɗa sia, na ɗan sia ronel tɔ. 59Dɔ ndɔt kɨ kõ jijoo, ɗen kad kɨ njan gaj ngon kɨ kasɨ, ɗa kɨ'n ndahn tɔa Jakari go tɔ Bɔwat. 60Na kõa tur an: I be al; na a ndahn tɔa Jã.
61Elɨna anan: De mad kɨ tɔa i titbe ku noojgt goto.
62Mbɔjɨn bɔwa kɨ jid kad ad'd gerɨn tɔ'n ndig kad ndah. 63Jakari kɔ bar mad, ndang nya tit an: Tɔa i Jã.
Taa ya deg tube. 64Tentenbe ta Jakari tee, ndõa tut, ad elta ndubɨn Luwah. 65Ɓool ɗa madɓeag tube, hoita nyag'n non tĩ kɨ log kɨ dɔning mbalbot tube kam dɔning Judet. 66Deg tube, ĩgɨn oon hoi nyag'n non ye, gaan dɔt anan: Ngon 'nten ye, a tel ɗi a? Kɨtɔ tɔg ji Bɨraɓe ĩ nat sia.
Pa lo Jakari dɔ nyagt kɨ a ɗen
67Bɔwa Jakari ɗoosɨ kɨ Ndil Kɨkunjɗang ad ndɔ ndil an: 68Ad kɨ ndubɨn Bɨraɓe Luwah lo Israelag kɨta ɗe gen deg lon, na badɔd. 69Ɓai kɨ Ngekaj kɨ ngetɔg kɨtatɔj ku degt kɨ girrkooj Dabidt. 70Luwah elta titbe kɨta deg lon kɨjaɓat ngékelta kɨ tant, maɗi nu an: 71N'a n'aj'j ji madngétajgt kɨ ji degt tube'n ndɨ ɔsɨjɨn ta ho. 72N'a n'oo kumtondo lo Bɔwjg, n'an ga kamɨn dɔ kunkɔt lon kɨkunjɗang. 73Un kɔn kɨ yokɨnda ad Bɔwj Abraham an: 74N'a n'aj'j ji madngétajgt kad kɨ ɗa kɨla kɨ ndubaan kɨkanj ɓool. 75Kam nyaɗat kɨgo lo Luwaht kɨ kɨdenesew nõat kɨ ndɔjg tube. 76Na ĩ, ngon a kunɨn ngekelta kɨ ta Ngetɔitɔit kɨta a aw kete nõ Bɨraɓet kad i ɗago ɗobg loa. 77Nya'n a i lambera ad girrdeg loa laten: Luwah ndɨ aj deg kɨta ndɨ nyàgo majalg lod kɔ. 78Kɨtɔ õ kam Luwah loj ad oo kumtondo loj. Kaj a ɗe rojt kokɨdõ tit kɨ kunj bijalo kɨ ɓa, 79a ɔsɨ dɔ degt ngéndɨ kam ɗob lapiat.
80Ngon tɔg, ngang kam ndilɨnt. Ndɨ kam dɨlambot mbã ndɔt'n tee hɔi ku Israelagt.
Currently Selected:
Luk 1: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
