Luk 2

Kooj Jeju

(Oo Mat 1:18-25; Mik 5:1-2; Eja 9:5)

1Kam ndɔgt'n non mber tee kokɨro Sejar Ogust't, kɨ ndahn tɔ deg ngéndɨ dɔningt tube kam maktub dakɔr degt. 2Ndah tɔ deg kam maktub dakɔr degt kɨ dasabang 'nten i kam kaglot'n Kirinius i ngekõɓe dɔ dɔning Sirit. 3Deg tube awɨn kad kɨ ndahn tɔd maktub dakɔr degt, dekɨɗen aw ɓe koojɨnt. 4Jojep kaa, ɓai ɓe Najaret't kɨ dɔning Galilet, aw ɓe lo Dabid ho, ɓe nõ tɔa i Betlehem, kam dɔning Judet, kɨta Jojep i de kɨ girrkooj Dabidt. 5Aw kɨtakad'n ndah tɔn kam maktub dakɔr degt nat kɨ Mari'n hɔ dɔa, ndan ngon kama tɔg. 6Lon ĩn nu ye, ndɔ Mari asɨ kad ooj ngon, 7la ooj ngonderɨn, ɓira kɨ kub, laa kam sund sanya mangt, kɨta lo ndɨd goto kam kuj ɓi mbahgt.

Ta lo ngékulbatg kɨ malaikag

8Ngéngombatg ndɨn dɔningt kɨ nderbe kɨ kad lot'n non, ton tɨga kam gawgt, to ngomɨn ɓut batg lod ndɔ. 9Oon Malaika lo Bɨraɓe tee hɔi kɨ rodt. Kunj Bɨraɓe kɨ ɗangereng ɔsɨ gug dɔd, ɓool tɔld sɔkɨr. 10Na Malaika eld an: Ot ɓoolɨn, oon. M'ɗe kɨ hoita kɨmaj, kɨ ronel m'adsɨ, kɨ a ad deg ngãibe ronel ho. 11Ɓone, kam ɓet lo Dabid, dekɨdẽ ooj ngekaj adsɨ, ĩ la i Krist kɨ Bɨraɓe ye. 12Nyakɔj mad kad i gerɨn ne la ten: A i ngahn ngon kɨ kasɨ mad kɨ ɓir kɨ kub, kɨ to kam sund sanya mangt mad.

13Tentenbe koosɨ Malaikag kɨ dɔrãt dõ teen hɔi nat kɨ Malaika'n non, ɗa ndubɨn Luwah anan: 14Kɔsɨgon kɨ dɔ Luwaht kam logt kɨ dõ. Kam kɨsokɨber kɨ dɔ dɔningt ku degt ngeɗa nyag'n nelɨna.

Ngéngombatg awɨn Betlehemt

15Lon Malaikag nyand, na tel awɨn dõ dɔrãt gog ye, ngéngombatg elɨn na anan: Ad kɨ j'awɨn Betlehemt kad j'oo nyan ɗa nya nõ, ĩn Bɨraɓe ad kɨ ger.

16Taa ne, awɨn kanangbe, ngahn Mari kɨ Jojep kɨ ngon kɨ kasɨ'n non to kam sund sanya mangt, 17lon oona woi ye, ɔrrɨn hoita'n elɨnd dan ne dɔ ngon kɨ kasɨ'n non. 18Deg tube'n oon dɔ ye, ta yad dɔ nyagt'n ngéngombatg elɨnd. 19Na Mari ngom nyag 'nten kamɨnt, ga kamɨn dɔt. 20Ngéngombatg tel awɨn gog, a ɔsɨngon Luwah, a ndubɨna kɨta nyag tube'n oon dɔ kɨ ĩgɨn oon kɨ kumd tit'n elɨnd ne nõ.

Ndahn tɔ Jeju

21Lon ndɔ jijoo asɨ woi kad jana gaj ye, ndahn tɔa Jeju ad i tɔ kɨ Malaika ooj kete lon kõa ndana al ɓaitɔ.

Jojep kɨ Mari awɨn kɨ Jeju kam kuj ndub Luwaht

22Lon ndɔ asɨ kad telɨn ngon kɨ kart kɨgo mberkɨndat lo Moij ye, Jojep kɨ Mari awɨn sia ɓebot kɨ Jerusalem kɨ'n dana Bɨraɓe. 23Ndangɨn titbe kam tat lo Bɨraɓe ke ngonderr kɨdɨngã kɨɗen kɨ tee kam kõnt dasa a ne, a kunɨna nya kɨ ndah kɔtko kɨɗa kɨta Bɨraɓe. 24Awɨn kɨtakad lan kadkari kɨjakɔ, ad i derrngɔt joo, ke derrkul joo, kɨgo tat'n elɨn kam tat lo Bɨraɓe. 25De mad ndɨ ɓebo Jerusalemt, tɔa i Simeõ. De'n non i de kɨdenesew, nyaɗaa i kɨgo lo Luwaht, ndɨ ngoo ngeɗa kɨ girrdeg kɨ Israel keɗengẽ; Ndil Kɨkunjɗang i dɔat ho. 26Ndil Luwah ɔja ada ger kad a oi al, mbã kad a oo Krist'n i Bɨraɓe loa kamtã la a oi ye. 27Ndil Kɨkunjɗang ɔsa ad and kam kunj ndub Luwaht. Lon ngékooj Jeju ɗen sia kam kuj ndub Luwaht kɨ n'ɗan nyabelɓe kɨgo mberkɨndat ye, 28Simeõ taa ngon kɨ jint, ndub Luwah an: 29Tajigla, ad ɓer loi aw kɨ kam kɨsokɨber kɨgo tat loi, 30kɨta kum oo kaj loi, 31kɨ i ɗago woi, nõ girrdegt tube, 32ad i kunj kɨ unj dɔ girrdegt kɨ dang dang, i nyakɔsɨgon lo deg loi Israel tɔ.

Simeõ elta kɨ ta Luwaht dan dɔ Jeju

33Ta'n Simeõ el dɔ Jejut ya bɔwa kɨ kõa biw. 34Simeõ njang dɔd; el kõa Mari an: Luwah kɔt ngon'n ɗan kad i ngekad deg ngãibe son, kɨ i ngekad deg ngãibe ɓain dõ dan Israelgt. A i nyakɔj lo Luwah, na deg a ndoorɨna. 35Luwah kɔta kɨtakad i ngekɨja tagah kɨ ngarkam degt ngãibe kɨ tɨga ho. Na ĩ, Mari, kamkil a ɔsɨ roi mbut tit ninga be.

Ngekelta kɨ ta Luwaht An

36Dekɨdẽ mad ngekelta kɨ ta Luwaht ndɨ nõ ho, tɔa i An ngon Panuel, kɨ girrkooj Ajert, tel bɨga bugum. Ndɨ nat kɨ ngawɨn ɓal tanãimɨta go ɓa mandat. 37Kamla i buwa, asɨ ɓal dɔjijoo gidaisɔɔ. An'n non nya kuj ndub Luwah al bat, ndɨ ɗa kɨla ndub Luwah ndɔ ho kada ho, ndɨ ɔg ron nyasa, na ndɨ elta kɨ Luwah, 38ĩ kaa ɗe dɔkàdt kɨ kɨɗa'n non, a ndub Luwah, a elta lo ngon'n non mbi degt tube, ĩgɨn ndɨ ngoon kad Luwah aj ɓebo Jerusalem.

Tel awɨn gog ɓe lod Najaret

39Lon tɔlɨn kon nyag tube kɨgo Mberkɨndat lo Bɨraɓe ye, Jojep kɨ Mari telɨn kɨ dɔning Galilet gog awɨn ɓe lod Najaret. 40Ngon asɨ kɨ dõ, ɗoosɨ kɨ terr, majkurr lo Luwah i dɔat.

Jeju i kam kuj ndub Luwaht lon ɓala i kɨlah gidaijoo

41Ɓal kɨɗen kaa bɔwa kɨ kõa a awɨn ɓebo Jerusalemt kɨ ndɔ ɗa nah Pakɨ. 42Lon ɓal Jeju i kɨlah gidaijoo ye, awɨn Jerusalemt kɨgo nyabelɓet lo Juipg kɨta ɗa nah Pakɨ. 43Lon ndɔg tɨgan woi, ad ngékooj Jeju ndɨ telɨn gog kɨ ɓe ye, ngond Jeju nãi gog kam ɓebot kɨ Jerusalem. Na bɔwa kɨ kõa gerɨn al. 44Oon anan i kɨna ɓut degt lod, ad sahna ndɔ kɨɗa ro noojdgt. 45Lon ngahna al ye, tel awɨn ɓebo Jerusalemt gog, a sahna. 46Lon ɗan ndɔ mɨta woi ye, ngahna kam kuj ndub Luwaht ndɨ ber dan ngéndoo degt, ndɨ oo dɔ ta lod, ndɨ ndɨjed tag ho. 47Deg tube'n oon dɔ ta loa ye, ta yad dɔ goosɨt loa, kɨ tag'n ndɨ turd. 48Lon bɔwa kɨ kõa oona ye, ta yad biw ad kõa ela an: Ngonɨm, kɨtɔɗi i ɗan sej titbe a? Oo, bɔwi kɨ mĩ kɨ sahi kɨ kamkil.

49Eld an: Kɨtɔɗi a i sahmɨn ne a? I gerɨn maj kad m'oo go nyag lo Bɔwm ale?

50Na ngékoojag gerɨn girr ta'n eld nõ al. 51Kamla ɓai so godt, aw Najaret, a tel ron go tat lod. Kõa tɔ ngom nyag 'nten tube ngarkamɨnt. 52Na Jeju tɔg, terr loa to kɨ tɨga ad nel Luwah ho, nel deg ho.

Currently Selected:

Luk 2: MlL

Highlight

Copy