Luk 19

Ta lo Jeju kɨ Jaka

1Jeju and kam ɓebo Jerikot tɔit kɨ njan dõ. 2De mad ndɨ nõ, tɔa i Jaka; i bɨradɔ ngétirrdɔnyag, i ngenya tɔ. 3De'n non a sah kɨ n'oo Jeju, ke i nõ a? Na asɨ al kɨta i de kɨ gɔj, na deg koosɨg ĩn nõ. 4Taa ne, ãi kete, al dõ kag mbaiɓoodt mad kad kɨ n'oo Jeju, a tɔi kɨ ɗob'n non. 5Lon Jeju tee lot'n non ye, oo lo kɨ dõ ela an: Jaka i ɗa kanangbe i ɗisɨ. Kari na m'a m'ndɨ ɓe loi ɓone. 6Jaka ɗa kɨ dõt, hɔ Jeju kɨ ront. 7Deg tube'n oon nya 'nten ye, nyurɨn ta anan: Aw hɔ lo ro det kɨ ngeɗamajal. 8Na Jaka ɗa nõ Bɨraɓet el an: Bɨraɓe oo m'a mad gaj nyamajg lom ngéndog; ĩla m'taa nya ɗi lo de mad kɨ lo goolt a ne, m'a m'tel m'ada kɨɗang dɔt nja sɔɔ. 9Jeju ela an: Ɓone kaj and kam kujt'n ɗan, kɨta de'n ɗan i ngon Abraham ho. 10Kɨtɔ Ngon de ɗe kɨ'n sah nya kɨ nãi kɨ n'aja tɔ.

Terrta dɔ nar lɔrt

(Oo Mat 25:14-30)

11Kamla lon deg ndɨ oon dɔ nyag 'nten ɓaitɔ ye, Jeju eld terrta mad dɔt, kɨta ĩn nderbe kɨ ɓebo Jerusalem, na deg oon anan kõɓe lo Luwah a tee hɔi tentenbe. 12Kɨtɔ 'nten el an: De mad kɨ ngon ngeɓe aw mbah dɔ ɓet mad kɨ sãi kad kɨ ndana ngart, na kɨ n'tel. 13Kun ɓerg lon kɨlah kɨ ront ad'd nar lɔr kɨɗa kɨɗa, na eld an: I ɗan ne gat mbã m'tel. 14Na deg lo ngon ngeɓe'n non ndigɨna al, ad lan kɨla goat anan: Kɨ ndig kad õɓe dɔjt al. 15Na lon ndana ngart woi ye, tel ɗe gog, el kad kunɨn ɓerg'n non ĩgɨn ad'd nar, ad kɨ n'oo nya kɨ ngahn dɔt lo ɗa gat't. 16Kɨdasa ɗe nõat el an: Bɨraɓe nar lɔr loi tee nar lɔr kɨlah dɔt. 17Ngea ela an: Mersi, ĩ ɓer kɨmaj; kɨta i ngeɗanya kɨro dɔ nyat kɨ tẽbe, m'a m'adi õɓe dɔ ɓet kɨlah. 18Kɨ ngekõjoo ɗe ela an: Nar lɔr loi tee nar lɔr mi dɔt. 19Ngea ela an: Ĩ tɔ õɓe dɔ ɓet mi. 20Kɨmad ɗe an: Bɨraɓe, oo gursɨ lɔr loi, m'ndom kɨ ta kub, m'yaro yuk. 21M'ɓool kɨta ĩ de kɨ ngang ngãi i ndɨ un nya kɨ i nda al, i ndɨ i ja nya kɨ i dub al. 22Ngea tura an: Kɨ ta kɨ tait la m'a m'gangɨn ta dɔit ye, ĩ ɓer kɨmajal. I ger mĩ kɨ ngang ngãi, m'a m'un nya kɨ m'nda al, m'am ja nya kɨ m'duw al. 23Kɨtɔɗi awɨn kɨ nar lom dam nart al a? Kɨtɔkad lon m'tel m'ɗe a ne, m'taa kɨ mana dɔt al a? 24Kamla ngea el deg'n ɗan lot'n non, an: I taan nar lɔr'n non jiat, adɨn de'n ndɨ kɨ nar kɨlah. 25Deg'n non elɨna anan: Bɨraɓe de'n non ndɨ kɨ nar lɔr kɨlah ale? 26Ngeɓerg el an: M'ndɨ m'elsɨ dekɨɗen kɨ ndɨ kɨ nya a ne, a adɨna dɔt, na de kɨ nya loa goto a ne, mbã nyan ndɨn a taan jiat kɔ. 27Na madngétamg'n non, ĩn ndigɨn kad m'õɓe dɔdt al ye, i ɗen sed i tɔlɨnd nẽbe nõmt.

Deg ɗan ronel dɔ kand Jeju ɓebɔ Jerusalemt

(Oo Mat 21:1-11; Mrk 11:1-11; Jã 12:12-19)

28Jeju elta 'nten kamla a ndia nõ degt kad kɨ n'aw ɓebo Jerusalemt. 29Lon tee nderbe kɨ ɓet kɨ Betpaje, kɨ ɓe Betani kad mbalbot kɨ a kunɨna Mbalbo kag olibgt ye, Jeju la ngéndoog lon joo, 30an: Awɨn kam ngon ɓet'n ɗa nõsɨt nõ. Lon a andɨn kam ɓet a ne, a i ngahn ngon korro kɨ dɔ, ĩn de ɓai dɔat nja kɨɗa al ɓaitɔ. I tutɨn na i ɗen sia. 31Na ĩla de mad ndɨjesɨ an: Kɨtɔɗi i ɗa i tutɨn na ne a ne; a i elɨna titbe: Bɨraɓe gea. 32Ngéndoog'n Jeju lad ye awɨn, ngahn korro tit'n elɨn nõ. 33Ɗa tutɨn korro ɓaitɔ la ngéag elɨnd anan: I kɨtɔɗi i ɗa i tutɨn ne ngon korro a? 34Turɨn anan Bɨraɓe gea. 35Ɔrrɨn ngon korro ɗen ne ro Jejut, ũn kubg lod dɔat, adɨn Jeju ndɨdɔt. 36Lon ndɨ aw ye, deg najɨn kubg dɔ ɗobt. 37Lon ɗe nderbe kɨ ɓebo Jerusalem, ad i lon ɗob ɗisɨt kɨ ber dɔ mbalbo ɓirgt ye, koosɨ ngéndoog loa tube, mbã girr ɗa ronel a ndubɨn Luwah kɨ ndid kɨbo kɨta kɨlag kɨ yaya'n Jeju ɗa ad oon nõ, 38anan: Ngemajkurr la i Ngar kɨ ngeɗe kam tɔ Bɨraɓet ye. Lapia kɨ kam dɔrãt dõ, kɔsɨgon kɨ dɔ Luwaht kam lot kɨ tɔi tɔi kɨ dõ.

39Parisɨ madg ku degt elɨn Jeju anan: Ngendoo deg i ndáng ngéndoog loi.

40Jeju tur an: M'elsɨ ke ĩgɨn non nyan tad kaa ne mbalg a kon.

Ta õ kam Jeju ad nõ kɨta tuj kɨ a tee dɔ ɓebo Jerusalemt

41Lon Jeju ɗe tee nderbe kɨ ɓebo Jerusalem ye, la kumɨn dɔ ɓet, kamla ɔrr kɨ nõt an: 42Maj kad gerɨn nyag'n sumba kad ngendɨt ɗan kad lapia ton tit. Na tajigla ĩn kɨyarɔ kumsɨt. 43Kɨtɔ ndɔg a ɓa son sei lon madngétaig a urrɨn ɓe gugɨn ne dɔi, a utɨn kɨ kamt a ngomɨn dɔi kɨbɔg lo kɨ ɗen, 44a ɔsɨ lain, dɔningt kɨ deg kɨ kamit be, a nyan mbal mad dɔ mbalt mad kamit al. A ɗan titbe kɨta i ger dɔ nah'n Luwah ɗe geni tit al.

Jeju aw kam kuj ndub Luwaht

(Oo Mat 21:10-16; Mrk 11:15-18; Jã 2:13-17)

45Jeju and kam kuj ndub Luwaht, mbagɨr tuɓa ĩgɨn ndɨ ɗawɨn nya, kɨ ĩgɨn ndɨ ndugon nya tit. 46El an: Ndangɨn kam Maktubt anan: Kuj lom i kuj ndub Luwah. Na i telɨna bulo to ɓogg kɨ ngékumɗob. 47Ndɨ ndoo deg kam kuj ndub Luwaht kɨndɔbagbe. Na ngéjanyamosɨkadkari kɨ kɨbog, kɨ ngéndang Maktubg lo Juipg sahn kɨ'n tɔlɨna kɔ, 48na ngahn ɗob ɗa al kɨta deg tube ndɨ ngoona keɗengẽ kad n'oon dɔ ta loa.

Currently Selected:

Luk 19: MlL

Highlight

Copy