Luk 18
18
Terrta dɔ ngengawkoit kɨ ngegangta
1Jeju el terrta mad ngéndoog lon kɨ n'ndoodɨn kad elɨn ta kɨ Luwah kɨ ndɔgbe, na kɨ adɨn rod oi siw al. 2El an: Kam ɓet mad ngegangta mad ndɨt nõ, ɓool Luwah al ho, ɓool ndil de mad al ho. 3Kam ɓeat'n non tɔ, dekɨdẽ mad kɨ ngengawkoi ndɨt nõ ho. Dekɨdẽ'n non aw ro ngegangtat kɨ nja natnatbe, kɔa kɨ gangta kɨ to kɨnant kɨmad kɔlɨn. 4Na kaglo ngãibe ngegangta ndig al. Kamla got gog el kamɨnt an: 5Kɨtɔ dekɨdẽ kɨ ngengawkoi'nɗan, ĩn ɗa njuɓam ye, m'a m'gangta loa m'ada, na ɓeta ɗea kɨndɔgndɔg tamt ɔrr tɔgɨm. 6Bɨraɓe el an: Oon dɔ ta'n ngegangta kɨ gootal ndɨ el nõ. 7Luwah tɔ a gangta lo kɨmbedg lon ĩgɨn ndɨ kon kɨ dɔat, ndɔ ho kàda ho ale? A ndɨ kɔkɨ, na a ɗa sed dɔ nya geegt lod al? 8M'elsɨ a gangta lod kanangbe. Titbe kaa ne, lon Ngon de a tel ɗe ye, a ngah kadkam kam degt kɨ dɔningt ne a?
Terrta dɔ parisɨt kɨ ngetirrdɔnya
9Jeju el terrta mad kɨɗang kɨ ɔj dɔ deg madg'n ndɨ ɓan kul rod oon anan n'ĩn deg kɨdenesew, na kidɨn ndeg deg. 10El an: Deg joo awɨn kam kuj ndub Luwaht kad kɨ nelɨn ta kɨ Luwah; kɨkɨɗa i Parisɨ kɨmad i ngetirrdɔnya. 11Parisɨ'n non ɗa dõ ɗa elta kɨ ron titbe. Ĩ Luwah m'ɗai mersi kɨta mĩ m'tit ndeg deg al, mĩ ngetaanya deg kɨ lo ngetɔgt al, ke ngeɗa nya kɨgoot al al, ke ngeɗa dekɨdẽg al, ke m'tit ngetirrdɔnya'n ɗan al tɔ. 12Kam ndɔgt kɨtanãimɨta, m'ɔg rom nyasa nja joo, mad gaj kɨkɨɗa ku kɨ kɨlaht kam nyagt tube'n m'ngaa.
13Na ngetirrdɔnya taa ne, ɗa sãi, ke kuma kaa ne, ndig kun kɨ dõ dɔrãt al. Na ɗa nda kadɨn an: Luwah oo kumtondo lom. Kɨtɔ mĩ ngeɗamajal. 14Jeju el an: M'elsɨ, ngetirrdɔnya'n non aw ɓe lon kɨ ta kɨ kɔrr dɔnt, na parisɨ taa ne, ta i dɔat. Kɨtɔ dekɨɗen'n ndɨ tɔi ron kɨ dõ a ne, a sɔlɨn dɔa, na de'n ndɨ sɔl dɔn a ne, a tɔin na kɨ dõ.
Jeju njang dɔ ngan kɨɗoig
(Oo Mat 19:13-15; Mrk 10:13-16)
15Deg madg ɗen kɨ ngankɨɗoig ro Jejut kɨtakad ɔd'd kɨ jin, na lon ngéndoog loa oon nya 'nten ye kɔlɨn sed. 16Na Jeju kund kɨ ront an: I nyan ngan kɨɗoig ad ɗen romt: Ot kɔgɨnd, kɨta kõɓe lo Luwah i lo deg kɨ tit ĩgɨn non. 17Rota la m'ndɨ m'elsɨ ye, dekɨɗen'n taa kõɓe lo Luwah tit ngon kɨɗoi al a ne, asɨ kand kamt al.
Ta lo de mad kɨ ngenya'n sah kumkajir kɨ mbãkɨnõt ro Jejut
(Oo Mat 19:16-30; Mrk 10:17-31)
18Bɨradɔ kuj kawna lo Juipg ndɨje Jeju an: Ngendoo deg kɨmaj, kaa m'ɗa ɗi kad m'ngan kumkajir kɨ mbãkɨnõt a? 19Jeju ela an: Kɨtɔɗi i ndɨ kunmɨn kɨmaj a? De kɨmaj goto, na kɨɗabe dɔ ta, ad i Luwah. 20I ger mberkɨndag: A i sah ngaw ke dekɨdẽ al, a i tɔl de al. A i ɓoog al. A i manaj kɨ ngom al. Ɔsɨgon bɔwi kɨ kõi. 21Ngenya'n non el an: M'ngom go tag'n non tube lon mĩn kɨ basam nu mbã tajigla. 22Lon Jeju oo dɔ ta 'nten ye, ela an: Nya kɨɗa la nali ye, i ɗaw nyag tube kɨ jiit kɔ, ad nara ngéndog, na a i ngah nyamajg ko kɨ dõ dɔrãt. Kamla i ɗe, i ndulo gom. 23Na lon oo dɔta 'nten ye, ɗa kamkil kɨta nyamajg loa i ngãi. 24Lon Jeju ooa ndɨ ɗa kamkil ye, el an: Lo gang lam kad ngényag andɨn kam kõɓet lo Luwah. 25Ngang ngãi kad ngényamajg andɨn kam kõɓet lo Luwah, tɔi kad lukum and bulo libirt. 26Ĩgɨn oon dɔ ye, anan: Nõ asɨ ngah kaj a? 27Jeju el an: Nya kɨ dum deg, a dum Luwah al. 28Pierr el an: Oo jĩ kɨ nya nyag loj tube kɔ, na kɨ ndulo goi. 29Jeju eld an: Rota la m'ndɨ m'elsɨ ye, de'n nya kuj lon, ke nẽn, ke ngonkõ, ke ngékoojɨn, ke nganɨn kɨta kõɓe lo Luwah a ne, 30a ngah kɨɗang dɔt ngãibe kam kaglot 'nten, na kam kaglot kɨ a ɗe tɔ, a ngah kumkajir kɨ mbãkɨnõt.
Jeju elta dɔ koint kɨ ɓain lo koit ɓaitɔ
(Oo Mat 20:17-19; Mrk 10:32-34; Luk 9:22,44-45)
31Jeju ɔi ngéndoog lon kɨkɨlah gidaijoo kɨront, eld an: Oon maj. Kɨ ndɨ kɨ j'aw ɓebo Jerusalemt, nu la a tɔlɨn ta tag tube'n ngékelta kɨ ta Luwaht ndangɨn kam Maktubt dan ne dɔ Ngon de ye. 32A lana ji girrdegt kɨ dang dang, a tajɨna, a tiwɨn horr dɔat, 33a ndana kɨ ndeh, a tɔlɨna, na ndɔ kɨkõmɨta a ne, a ɓai lo koit. 34Na ngéndoog loa gerɨn girr tag 'nten al; kɨta girr tag 'nten i kɨyarɔ ko rodt; ad oon kam tag'n Jeju el nõ al.
Jeju ad mundo mad oo lo maj
(Oo Mat 20:29-34; Mrk 10:46-52)
35Lon Jeju ndɨ ɗe nderbe kɨ ɓebo Jerikot ye, mundo mad ndɨ bɔg ɗobt, ndɨ kɔ nya. 36Lon mundo'n non oo kah koosɨdeg a tɔin ye, ndɨje ta an: Ɗi ɗa nya a? 37Deg elɨna anan: Jeju kɨ Najaret't la ndɨ tɔi ye.
38Mundo un ndin kɨ dõ kon an: Jeju Ngon Dabid oo kumtondo lom. 39Deg'n ĩn kete nõat ye, ndángna kad kɨ nya tan, na ɓa ko kɨ tɔgɨn kɨ tɔi an: Ngon Dabid oo kumtondo lom.
40Jeju duba, elta kɨ ɗen sia ront; na lon ɗe roat nderbe ye, Jeju ndɨjea an: 41I ndig kɨ m'ɗa ɗi m'adi a? 42Mundo el an: Bɨraɓe kɨ m'ngaa koo lo.
43Tentenbe ngah koo lo, ndulo go Jeju, a ɔsɨgon Luwah. Deg tube'n oon nya 'nten ye ndubɨn Luwah.
Currently Selected:
Luk 18: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
