Luk 20

Kɨbog lo Juipg ndɨjen Jeju ta dɔ tɔgat

1Ndɔ mad kam ndɔgt'n non, lon Jeju ndɨ ndoo deg kam kuj ndub Luwaht, na ndɨ la mber hoita kɨmaj ye, ngéjanyamosɨkadkari kɨbog, kɨ ngéndang maktubg sed kɨbog lo Juipg ɓain kɨ dɔat. 2Elɨna anan: Elj. Kɨ tɔg kɨ ɗa i ndɨ ɗan nyag'n non a? Ke i nõ adi tɔg 'nten a? 3Jeju turd an: Mĩ tɔ m'a m'ndɨjesɨ ta mad. 4Baptem lo Jã ye, i ko kɨ dõ dɔrãt e? Ke i kokɨro degt a? 5Na ɔjɨn na ta kudt be anan: Ĩla kɨ j'an i ko kɨ dõ dɔrãt a ne, a el an: Kɨtɔɗi adɨna ne kamsɨ al a? 6Na ĩla kɨ j'an i kokɨro degt a ne; deg tube a tɨlajɨn kɨ mbal; kɨta deg gerɨn ɓet Jã i ngekelta kɨ ta Luwaht. 7Taa ne turɨn Jeju anan: Kɨ ger ko lon teet al. 8Na Jeju eld an: Mĩ tɔ m'a m'elsɨ kɨ tɔg kɨ ɗi m'ndɨ m'ɗan nyag'n non al.

Terrta dɔ ndɔɔ nduut kɨ deg'n ɗan kɨlat

(Oo Mat 21:33-46; Mrk 12:1-12)

9Kamla mbagɨr kel terrta 'nten deg, an: De mad hɔ ndɔɔ nduu, la ji deg madgt kɨ ndɔɔn, na aw mbah dɔningt mad ad kaga tɔi. 10Lon dɔ nah ja kand nduu asɨ woi ye, la ɓer mad ro ngéndɔɔgt'n non kad ta gaj nyandɔɔ lon. Na ngéndɔɔg ndan ɓer'n non mbukɨ mbukɨ kamla tel lana kɨgog jia kari. 11Tel la ɓer mad kɨ rodt gog, ĩ tɔ a kɨ ndana mbukɨ mbukɨ lan rosɔl dɔat, na lana kɨ gog jia kari. 12Tel la ɓer kɨ ngekõmɨta, ĩ tɔ a kɨ adɨna doo, na tuɓana. 13Bɨraɓe kɨ ngendɔɔ el an: Kam m'ɗa ɗi? M'am m'la ngonɨm kɨ ngetar lom; maja lon oona a ne, a ɓoolɨn ndila. 14Na lon ngéndɔɔg oon ngon'n non ndɨ ɗe kɨ dɔdt ye, ɔjɨn na ta kɨnadt anan: Ĩn ɗan la i ngekõnduba ye, ad kɨ tɔlɨna kɨtakad nyanduba loa tel loj. 15Taa ne, ɔrrɨna kɨ tɨga gid ndɔɔt tɔlɨna. Bɨraɓe kɨ ngendɔɔ ye, ɗi a ɗa sed a? 16A ɗe nuj ngéndɔɔg'n non kɔ, na la ndɔɔ nduu ji degt kɨɗang. Lon deg oon dɔ ta 'nten ye anan: Be al. 17Na Jeju nɔld mbet't an: Girr ta 'nten kɨ ndang kam maktubt lo Luwah i ɗi a?

Mbal'n ngéɗakuj mbetɨna,

nõ la tel bɨradɔ kuj kɨ dõ ye.

18Dekɨɗen'n a so dõ mbalt'n non a ne, a tet ɗelɗel, na dekɨɗen'n mbal'n non a so dɔat a ne, a rigɨja.

Deg madg ndɨjen Jeju ta dɔ ba lambot

(Oo Mat 22:15-22; Mrk 12:13-17)

19Ngéndang maktubg kɨ ngéjanyamosɨkadkari kɨbog gerɨn ɓet Jeju el terrta 'nten dan dɔd; kɨta 'nten sahn kɨ'n hɔna, na ɓoolɨn deg. 20Ndan kumd go Jeju tɔ, na lan ngéndalo ĩgɨn ɗan rod tit deg kɨdenesew be, kad kɨ'n ɓana kɨ gum ta kɨ taat kad kɨ'n lana ji ngekõɓet'n aw kɨ tɔg ho õɓe dɔ dɔningt ho. 21Deg'n non ndɨjena anan: Ngendooj kɨ ger i ndɨ elta kɨ dene, i ndɨ ndoo deg goɗobat tɔ, i ndɨ ɔrr de dene al, na i ndɨ ndoo deg ɗob lo Luwah kɨgo rotat. 22I goɗobat rojt kad jad lambo Sejar a? Ke i goɗobat al.

23Jeju ger ndo kɨɓa lod ɓet, ad eld an: 24Admɨn gursɨ kɨɗa m'oo, ndil dɔ de, kɨ ta kɨndang dɔt 'nten ye, i lo nõ a?

Elɨna anan: I lo Sejar.

25Kamla Jeju eld an: Nya'n i lo Sejar taa adɨn Sejar, na nya'n i lo Luwah a ne, adɨn Luwah. 26Deg'n ɗa oon dɔ ta loa ye, de kɨ asɨ hɔa kɨ ta mad goto, ta kɨtur loa yad ngãi, ad ndɨn god mbo.

Sadukig ndɨjen Jeju ta dɔ ɓai ngékoigt

(Oo Mat 22:23-33; Mrk 12:18-27; 1 Kor 15)

27Kɨmadg ku Sadukigt ɗen ro Jejut. Ĩgɨn non majɨn ta ɓai ngékoig ndɨjena anan: 28Ngendoodeg, Moij ndang ta 'nten kam Maktubt adj, an: Ĩla ngonkõ de mad oi, na nya nẽn kɨkanj ngon a ne, kɨ ngonkõa taa nẽa, ndan koh ngonkõ. 29Tag maɗi ngankõnag tanãimɨta ĩn nõ; kɨdasa taa dekɨdẽ, na oi kanj ngon. 30Kɨ ngekõ joo taa dekɨdẽ'n non tɔ, na oi kanj ngon. 31Kɨ ngekõmɨta tɔ taa, titbe tɔ la tube tanãimɨta taan dekɨdẽ'n non, na oin kɨkanj ngang. 32Godt gog dekɨdẽ ɗe oi ho. 33Ndɔ ɓai ngékoit ye, a i nẽ nõ kudt a? Kɨtɔ ĩn tanãimɨta la taana nẽdt ye. 34Jeju eld an: Deg kɨ kaglot'n ɗan ndɨ taan na. 35Na ĩgɨn oond ad asɨn ta ɓai ku ngékoigt tee koht kɨ nu ye, a taan na al. 36Asɨn koi gog al tɔ kɨta a asɨn na kɨ malaikag. Ĩn ngan Luwah tɔ tit kan ĩn ne deg kɨ ngeɓai lo koit. 37Na ta dɔ ɓai deg lo koit ye, Moij ɔj ta 'nten kam Maktubt ad deg oon maj, dɔtat lo dungarr kɨ horr i kamt lon kunɨn Bɨraɓe, Luwah lo Abraham, kɨ Luwah lo Isaak, kɨ Luwah lo Jakob tɔ. 38Luwah i Luwah lo ngékoig al, na i Luwah lo ngékumkajɨrg kɨta deg tube ndɨn kɨ kumkajir nõ Luwaht. 39Kɨmadg ku ngéndoo deg maktubt turɨn anan: Ngendoo deg el maj.

40Kɨtɔ 'nten iren kamd kad ndɨjena ta dɔ nyat mad gog al ta.

Jeju ndɨje deg ta dɔ ngon Dabidt

(Oo Mat 22:41-46; Mrk 12:35-37)

41Jeju eld an: Titbãi deg ndɨ anan Krist i ngon Dabid a?

42Dabid kɨdɔn el kam maktub pagt an: Bɨraɓe el Bɨraɓe lom an: I ndɨ ko jikõmt, 43mbã kad m'tel madngétaig komber nda njait. 44Jeju el an: Dabid kuna Bɨraɓe. Ye titbãi i ngona a?

Jeju el deg kad oon go rod maj dɔ ngéndang Maktubt

(Oo Mat 23:1-33; Mrk 12:38-40)

45Lon deg tube ndɨ oon dɔ ta loa ɓaitɔ ye, Jeju el ngéndoog lon an: 46Oon go rosɨ maj kɨ ngéndoo maktubg, ngéla kubjig kɨ ngal, kɨ ngendɨg kad deg ɗand lapia kam sukɨgt tɔ, ĩn ngesah lo ndɨ kɨdasa kam kuj kawnat lo Juipg kɨ lo ndɨ de kɨbog lo mburr namt, 47ĩn ngétaa nyag lo ngéngawkoig, ĩn ngékelta ngãi, kad deg oond kad nĩn ngékelta kɨ Luwah, na i ndokum. Ĩgɨn non, takɨgang kɨ Luwah a gang dɔdt a i kɨkootɓool ngãi kɨ tɔi.

Currently Selected:

Luk 20: MlL

Highlight

Copy