JÃ 9

Jeju ad mundo oo lo

(Oo Jã 8:12; Paag 1:2-4)

1Jeju ndɨ tɔi, oo de mad kɨ i mundo kɨ teen kam kont. 2Ngéndoog loa ndɨjena anan: Ngendoodeg nõ ɗa majal, ad oojɨn ne de'n ndɨn kɨ mundo, i ĩ ke ngékoojag a? 3Jeju turd an: De'n ndɨn hã ɗa majal al, ke ngékoojag, na i mundo kɨtakad Luwah ɔjɨn tɔg kɨla lon ko kamat ad deg oon.

4Lon kàd ɗa dõ ɓaitɔ ye, maj kad m'ɗa kɨlag lo ngelam, lo kɨ diw ndɨ ɗe, na de a asɨ ɗa kɨlat al. 5Lon mĩ dɔningt ɓaitɔ ye, mĩ kunj kɨta deg kɨ dɔningt. 6Lon elta 'nten ye, tiw horr tan dɔningt, lɔi'n bɔrr, kamla ɔrr bɔr'n non kum mundot ye, 7ela an: Aw, i tugo kumi kam mant kɨtaa i Siloe: Girr tɔ Siloe i titbe: Ĩ kɨ la ta la. Mundo aw tugo kumɨn kam mant, na lon tel a ne, oo lo ar nyang. 8Madɓeag kɨ ĩgɨn hã oona maɗi i ngekɔnya ye anan: Ĩ kan ndɨ ber ndɨ kɔnya ye al a? 9Kɨmadg anan: I roa kɨ roa. Kɨmadg tɔ anan: Ãã i de kɨ taa ta ta. Na ĩ kɨɓe el an i mĩ. 10Kɨtɔ 'nten elɨna anan: Titbãi teen ne kumi a? 11Tur an: De kan a kunɨna Jeju nõ la, lɔi bɔrr, ɔrr kummt, na elɨm an: Aw Siloet i tugo kumi. Taa ne, m'aw Siloet, m'tugo kumm, na m'oo lo. 12Dea ye i ɗa a? Tur an: M'ger al.

Parisɨg nderɨn girr ta lo mundon oo lo

(Oo Jã 10:37-38; Eja 6:9-10; Luk 6:22-23)

13Ɗen kɨ mundo kan ngah koo lo nõ ro Parisɨgt. 14Ndɔ'n Jeju lɔi bɔrr kum det'n non ad kuma tee ye, i ndɔ taakò. 15Kɨtɔ 'nten Parisɨg ndɨjena ne titbãi ngahn koo lo. Mundo eld an: Ɔrr bɔrr kummt, m'tugo a ne m'oo lo. 16Dɔ tat'n non kɨmadg ku Parisɨgt anan: De'n non i de kɨ ɓai kokɨro Luwaht al. Kɨtɔ ngom ndɔ taakò al, na kɨmadg anan: Titbãi de kɨ ngeɗamajal asɨ ɗa nyakɔjg kɨ yaya tit'n non a? Kɨtɔ 'nten la gangɨn ne na joo ye. 17Kamla tel ndɨjen mundo anan: Ĩ ye, ta loi i ɗi dɔat tit kan ten kumi ye a? Turd an: I ngekelta kɨ ta Luwaht. 18Titbe kaa ne, Juipg adɨn kamd kad i mundo kɨ maɗi ngah koo lo al, ad kunɨn ngékooja ɓaitɔ. 19Ndɨjend anan: De'n ɗan i ngonsɨ kan oojɨna kɨ mundo yo. Titbãi ndɨ oo lo tajigla a? 20Ngékoojag turɨnd anan: Jĩ kɨ ger kɔikɔi i ngonj, j'ooja kɨ mundo tɔ, 21na titbãi ndɨ oo lo tajigla taa, kɨ ger al. I ndɨjen kɨɓe kɨ dɔa, i de kɨ tɔg gang, asɨ kelta dɔnt. 22Ngékooj mundo elɨn tag'n non kɨta ɓoolɨn; Juipg ndan tad nat kete woi, ĩla de mad elta kɨtɨga wakɨsɨ an: Jeju i Krist a ne, kɨ'n tuɓana kɔ kam kuj kawnat lod. 23Kɨtɔ 'nten ngékoojag anan: I de kɨ tɔg gang i ndɨjena ta ĩ kɨɓe oon. 24Parisɨg tel kunɨn de'n i mundo maɗi kɨrodt gog ɓaitɔ, elɨna anan: ad kɔsɨgon Luwah. Jĩ kɨ ger de'n non i ngeɗamajal. 25Turd an: Ke i ngeɗamajal kaa ne, m'ger al; nya kɨɗa la m'ger ye, mĩ mundo, na tajigla m'oo lo. 26Elɨna anan: Ɗa ɗi sei? Titbãi teen kumi a? 27Turd an: M'elsɨ woi, na oon dɔ al; kɨtɔɗi i ndig koon ne dɔ gog tɔ a? I ndigɨn tel ngéndoog loa ho a? 28Tajɨna ho ho anan: Ĩ la i ngendoo lo de'n non ye, jĩ taa ne, jĩ ngéndoog lo Moij. 29Kɨ ger Luwah elta kɨ Moij, na de'n non taa, kɨ ger lon teet al. 30De'n non turd an: Ĩnten i nya kɨya kad i gerɨn lon de'n non teet, ĩ tɔ tee kumm. 31Kɨ ger Luwah a oo dɔ kɔ lo ngéɗamajalg al; na de'n nyaɗaa i kɨgo lo Luwaht, na ndɨ ɗago ndigt loa tɔ a ne, ĩla Luwah ndɨ oo dɔ kɔ loa tɔ ye. 32Lo mba girr duniat nu de kɨ oo kad de tee kum de'n i mundo kɨ teen kam kõnt goto. 33Ĩla de'n non i kokɨro Luwaht al a ne, asɨ ɗa nya mad kɨ ya titbe al. 34Turɨna anan: Oojɨn kɨtaagbe kam majalgt, ye la i ndɨ i ndooj yo? Tuɓana kɔ.

Mundo kɨgo Ndilt

(Oo Luk 10:21; Jã 10:2-5; 1 Pie 2:6)

35Jeju oo hoi mundo'n tuɓana kɔ. Lon ndɔda ye, ela an: I ad kami Ngon de a? 36De'n non tur an: Bɨraɓe i nõ kad m'ada kam a? 37Jeju ela an: Ooa de'n ɗa eli ta nõ i ĩ. 38De'n non tur an: Bɨraɓe mad kamm, na ɔsɨ dɔn ber nõat. 39Kamla Jeju el an: Kɨtɔ takɨgang la m'ɗen dɔningt ye, kad ĩgɨn oon lo al a ne, kɨ oon lo, kad ĩgɨn ndɨ oon lo tɔ a ne, kɨ telɨn mundo 40Parisɨg madg'n ĩn nat sia ye, oon dɔ ta 'nten, elɨna anan: Jĩ ye, jĩ mundog tɔ ho? 41Jeju turd an: Neni ĩn mundog a ne, majalg losɨ goto, na tajigla i ndɨ anan I ndɨ oon lo, kɨta 'nten majal losɨ ton lo tont.

Currently Selected:

JÃ 9: MlL

Highlight

Copy