JÃ 8

Ta lo dekɨdẽ kɨ ngeɗa ngaw

(Oo Rom 7:3; Mat 5:28-32; 1 Kor 6:9)

1Jeju aw dɔ mbalbo ɓirgt. 2Kɨsĩ ritit tel ɗe and kam kuj ndub Luwaht gog, na deg tube ɗen roat. Jeju ndɨ ber ndɨ ndood. 3Ngéndang maktub kɨ Parisɨg ɗen kɨ dekɨdẽ mad'n hɔna kɨ ngaw ndana dan degt. 4Kamla elɨn Jeju anan: Ngendoodeg, dekɨdẽ'n ndɨn hɔna kɨ ngaw. 5Moij ndaj mber kam mberkɨndat lon kad kɨ tɨla dekɨdẽ kɨ titbe kɨ mbal; na ĩ ye, ta loi i ɗi? 6Elɨn ta 'nten ndɨ nána ne kɨtakad'n ngahn ne lo kun dɔa. Na Jeju ned kɨber, ndɨ ndang nyamad kɨ ngon jin dɔningt. 7Na lon ndɨ ndɨjena ta kɨ dɔtdɔt ye, sɨra ron kɨ dõ na eld an: De'n ɗa majal nja kɨɗa al kusɨt a ne kɨ laa kɨ mbal dasa. 8Tel ned kɨber ndang nya dɔning kɨ ngon jin gog ɓaitɔ. 9Lon oon dɔ ta 'nten ye, deg'n non telɨn kɨɗa, kɨɗa, mba girra dɔ kɨbogt mbã teen dɔ degt kɨ dɔdug, na nyan Jeju kɨ kɨɗabe, kɨ dekɨdẽ'n non kɨ lot'n ndanat dan degt. 10Kamla Jeju sɨra ron kɨ dõ, ela an: Ngékundɔi ĩn ɗa a? De kɨ hɔi kɨ ta goto a? 11Dekɨdẽ tur an: Goto Bɨraɓe. Jeju ela an: Mĩ tɔ m'hɔi kɨta al aw, na ot ɗa majal gog ta.

Jeju i kunj kɨta deg kɨ dɔningt

(Oo Jã 1:4-5,9-12; Jã 5:36-37; Jã 12:46-50)

12Jeju tel eld ta an: Mĩ la mĩ kunj kɨta deg kɨ dɔningt ne ye. De'n ndɨ ndulo gom a ne, a ndia kam tilt al bat, na a ngah kunj kumkajir. 13Kɨtɔ 'nten Parisɨg elɨna anan: I ndɨ i manaj dɔ roit, najkɨma loi i rota al. 14Jeju turd an: Ke m'ndɨ manaj dɔ romt kaa ne, najkɨma lom i rota. Kɨtɔ m'ger lon m'teet kɨ lon m'ndɨ m'awt tɔ, na i gerɨn lon m'teet al ke lon m'ndɨ m'awt. 15I ndɨ i gangɨn ta kɨgo tagahdet, na mĩ m'ndɨ m'gangta dɔ det mad al. 16Ke m'ndɨ m'gangta kaa ne, takɨgang lom i rota kɨta mĩ kɨ kɨɗam al; na Bɔwɨn lam i nat sem. 17Ndangɨn kam mberkɨndat losɨ an: Najkɨma lo deg joo i rota. 18Mĩ m'ndɨ m'manaj dɔ romt, na Bɔwm ĩn hã lam ndɨ mamnaj ho. 19Kɨtɔ 'nten ndɨjena anan: Bɔwi i ɗa a. Jeju tur an: I germɨn mĩ ke Bɔwm al. Ni i germɨn a ne i gerɨn Bɔwm ho. 20Jeju eltag'n non lon ndɨ ndoon deg kam kuj ndub Luwaht, lot'n sund nar ndɨt. Na de kɨ hɔa goto kɨta dɔkàd loa asɨ al ɓaitɔ.

Jeju elta kawɨn dõ ro Bɔwɨnt

21Jeju eld tɔ an: M'ndɨ m'aw na a i sahmɨn na a oin kam majalt losɨ; lon m'ndɨ m'awt asɨn teet al. 22Kɨtɔ ta non Juipg elɨn ne anan: A tɔl ron e? Kɨtɔ el an lon m'ndɨ m'awt asɨn teet al; 23Jeju eld an: Ĩn kɨ ber, mĩ kɨ dõ: Ĩn kɨ dɔningt'n ɗan, na mĩ kɨ dɔningt al. 24I kɨta 'nten la m'elsɨn m'an a oin kam majalgt losɨ. 25Ndɨjena anan: Ĩ nõ a? Jeju eld an: Mĩ dagɨron non m'elsɨ lo yaɓoodat nu. 26M'aw kɨ tag ngãibe kad m'el dɔsɨt, kɨ tag ngãibe kad m'gang dɔsɨt tɔ, na ngelam i ngerota; nyag'n m'oo taat koon la m'ndɨ m'el deg kɨ dɔningt ne ye. 27Juipg oon kad i ta lo Bɔw hã el al. 28Kɨtɔ 'nten Jeju eldɨn an: Lon a i gan ngon de dõ, kamla a i gerɨn kɔi kɔi kad mĩ la i mĩ ye, na m'ndɨ m'ɗa nya mad kɨ dɔm al, na m'ndɨ m'elta tit'n Bɔwm ndoomɨn. 29Ngelam i nat sem, nyam kɨ kɨɗam al, kɨta m'ndɨ m'ɗa nyag kɨ nela kɨndɔgndɔg. 30Lon ɗa eltag'n non ɓaitɔ ye, deg ngãibe taan ta loa.

Ta kɨ rota ɗe kokɨro Luwaht

31Kamla Jeju el Juipg ĩgɨn adɨna kamd an: Ĩla i ndɨn kɨ kamtat lom a ne, ĩn ngéndoog lom kɨrota, 32a i gerɨn rota, rota tɔ a taa nyasɨ dõ. 33Turɨna anan: Jĩ ngaka Abraham, kɨ ɗa ɓer lo de mad nja kɨɗa al; titbãi i ndɨ el an: A taa nyasɨn dõ a? 34Jeju turd an: Rota, rota la m'ndɨ m'elsɨ ye, dekɨɗen'n hɔ ɗa majal a ne, i ɓer lo majal. 35Ɓer a ndɨ kɨ kam kujt lo ngen mbãkɨnõt al, ngon la a ndit mbãkɨnõt ye. 36Titbe tɔ la, ĩla Ngon a ta nyasɨ dõ a ne, a i ndɨn kɨ ta nyandõ kɨ jeje. 37M'ger ĩn ngaka Abraham, na i ndɨ sahn ɗob tɔlɨm, kɨta ta lom ngah lo kamsɨt al. 38M'elta nya'n m'oo ro Bɔwmt; na ĩn i ndɨ ɗan nya'n oon dɔ kokɨro Bɔwsɨt. 39Turɨna anan: Bɔwj i Abraham; Jeju eld an: Neni ĩn ngan Abraham a ne, a i ɗan kɨlag lo Abraham. 40Na tajigla i ndɨ sahn ɗob tɔlɨm, kɨta m'elsɨ rota'n m'ndoo ko ro Luwaht. Abraham ɗa beal. 41I ndɨ ɗan kɨlag lo Bɔwsɨ.

Elɨna anan: Jĩ ngang kɨ oojɨnj kɨgo ɗa ngawt kɨ sah dekɨdẽt kɨ nõbe al, na j'aw kɨ Bɔwj kɨɗabe, ad i Luwah. 42Jeju eld an: Neni Luwah i bɔwsɨ a ne, ni a i tarmɨn kɨta m'tee ko kam Luwaht la m'ɗe ye. 43Kɨtɔɗi i gerɨn ne girr takelɨm al a? Kɨtɔ asɨ koon dɔ ta lom al. 44I ndɨn kɨ bɔwsɨ ad i Sɨtan i go ndigt losɨ kad i ɗan kɨgo nyurkõgt lo bɔwsɨ. I ngetɔl deg lo yaɓoodat nu, ɗa do rotat al. Lon ndɨ el takɨbal a ne, ndɨ un kɨ dɔn, kɨta i ngetakɨbal. 45Na mĩ m'ndɨ m'el rota, na admɨn kamsɨ al. 46Nõ kusɨt la asɨ hɔm kɨta dɔ majalt a? Ĩ la m'ndɨ m'el rota a ne kɨtɔɗi admɨn ne kamsɨ al a? 47De'n i lo Luwah a ne, ndɨ oo dɔ ta lo Luwah. Na ĩn taa ne, i oon dɔ ta lom al, kɨta ĩn lo Luwah al.

Jeju i kɨbo tɔi Abraham

(Oo Heb 12:3; Jã 10:26-33; 1 Kor 1:17)

48Juipg turɨna anan: J'el got hã j'an ĩ de kɨ Samarit, na ndil kɨmajal i kamit ale? 49Jeju tur an: Ndil kɨmajal goto kammt, na m'ndɨ m'ɔsɨgon Bɔw ta kɔsɨ, na ĩn i ndɨ ɔsɨn gonɨm al. 50Mĩ m'ndɨ sah kad tɔm mĩ kɨbe ko al, ngesaha ndɨ nõ ndɨ gangta tɔ. 51Rota rota la m'ndɨ m'elsɨ ye, ĩla de mad ngomgo ta lom a ne, a oo koi kɨ njakɨɗa al bat. 52Juipg elɨna anan: Tajigla kɨ ger jeje ndil kɨmajal i kamit. Abraham oi, ngékelta kɨ ta Luwaht kaa oin; na i ndɨ el an: Ĩla de mad ngomgo ta lom a ne a oo koi kɨ nja kɨɗa al bat. 53Ad ĩ kɨbo tɔi Abraham kɨ Bɔwj'n oi yo? Ngékelta kɨ Luwaht kaa oin. Ĩ ye ĩ nyai nõ a? 54Jeju turd an: Ĩla mĩ kɨɓe m'ndɨ mad tɔm ko a ne, tɔ ko lom i nya kɨ kari. Bɔw la ndɨ ad tɔm ko ye. Bɔwɨn i ndɨ kunɨna Luwah losɨ. 55I gerɨna al, na mĩ m'gera maj. Ĩla m'an m'gera maj al a ne, m'a mĩ ngetakɨbal titsɨ, na m'gera maj, m'ndɨ m'ngom go ta loa tɔ. 56Bɔwsɨ Abraham ɓakul koo ndɔ ɗe'm, na ooa, ɗa ronel tɔ. 57Juipg elɨna anan: I ɗa ɓal dɔmi al ɓaitɔ ye la oo Abraham yo. 58Jeju turd an: Rota rota la m'ndɨ m'elsɨ ye, lon oojɨn Abraham al ɓaitɔ mĩ nõ. 59Kɨtɔ 'nten ɔin mbalg kɨ'n tɨlana ne, na Jeju yaron, tee kam kuj ndub Luwaht kɔ.

Currently Selected:

JÃ 8: MlL

Highlight

Copy