JÃ 7

Ngankõ Jeju adɨna kamd al

(Oo Jã 5:44; Jã 15:18-19; Mat 1:16)

1Go nyagt 'nten Jeju a lago log kam dɔning Galilet, ndig lago log kɨ kam dɔning Judet al kɨta Juipg sahn ɗob tɔla. 2Nah lo Juipg ad i nah kujkam i nderbe. 3Ngankõag elɨna anan: I ɓai nẽbe aw dɔning Judet kad ngéndoog loi oon kɨlag'n i ndɨ i ɗa. 4Kɨtɔ de'n ndig kad deg gernɨn a ne, a ɗa nyag kɨ tɨga wakɨsɨ: Tit'n i ɗan nyag kɨ yaya 'nten ye, ɔj roi kɨ tɨga, ad deg kɨ dɔningt ne oon. 5Kɨtɔ ke ngankõa kaa ne, adɨna kamd al. 6Jeju eld an: Kaglo lom asɨ al ɓaitɔ, na ĩn taa ne, kaglo losɨ asɨ kɨndɔgndɔg be. 7Deg kɨ dɔningt ne asɨ kɔsɨsɨn ta al, na mĩ taa ndɨ ɔsɨmɨn ta, kɨta m'ndɨ manaj dɔ kɨlaɗadt kɨmajal. 8I ndɨ awɨn lo ɗa naht, na mĩ m'ndɨ m'aw al ɓaitɔ, kɨta kaglo lom asɨ al. 9Lon Jeju eld ta 'nten ye, ndɨ kɨ dɔning Galilet.

Jeju aw lo ɗa naht kam ɓebot kɨ Jerusalem

10Na lon ngankõ Jeju awɨn lo ɗa naht woi, kamla ĩ kɨɓe aw godt ho ye. Na ɔj ron kɨ tɨga al, na i gid tilt. 11Juipg sahna lo ɗa naht anan: I ɗa a? 12Nyur ngutngut ɓai ku koosɨdegt kɨ dɔ Jejut; kɨmadg anan i de kɨmaj, kɨmadg tɔ anan: Be al, na ndɨ ũ koosɨdeg mut ta kũ. 13Titbe kaa de mad kɨ ire kamɨn elɨn ta loa kɨtɨga wakɨsɨ goto, kɨta deg ngãi ɓoolɨn Juipg. 14Lon ten ngawden nah kujkamt ye, Jeju aw kam kuj ndub Luwaht, ɗa ndoo deg. 15Taa ya Juipg ad anan: De'n ndɨn ndoo mberkɨnda lo Juipg nja kɨɗa al ye, titbãi hã ɗa ɔrrj girr mberkɨndag a? 16Jeju turd an: Nyandoo kɨ m'ndɨ m'ndoo deg ye, i lom al, na i lo Luwah kɨ Ngelam. 17Ĩla de mad ndig ɗa kɨgo ndigt lo Luwah a ne, a ger ke nyandoo lom'n m'ndɨ m'ndoo deg i kokɨro Luwaht, a ke m'ndɨ m'un kɨdɔm la m'el. 18De'n un ta el kɨ dɔn a ne, ndɨ sah kɔsɨgon kɨ kɔsɨ dɔn; na de'n ndig kad ngelan ngah kɔsɨgon a ne, i de kɨro, nya mad kɨdenesew al goto roat. 19Moij adsɨ Mberkɨnda ale? Na de kɨɗa kusɨt kɨ tel ron go Mberkɨndat goto. Kɨtɔɗi i ndɨ sahn ne ɗob tɔlɨm a? 20Deg koosɨg turɨna anan: Ndil kɨmajal i kamit; nõ sah ɗob tɔli a? 21Jeju turd an: Kɨla kɨ kɨɗa'n m'ɗa, la taa ndɨ yasɨ tube ye. 22Gaj kɨja i kokɨro Moij al, na i kokɨro bɨra bɔwgt tã, na Moij ndasɨ mber kad i jan gaj ngan kɨdɨngãg kɨta 'nten la i ndɨ i jan ne gaj ngan kɨdɨngãg ke kɨ ndɔ taakò ye. 23Ĩla i jan gaj de kɨ ndɔ taakò kɨtakad tɔi dɔ Mberkɨnda lo Moij al a ne, kɨtɔɗi i ndɨ ɗan ne wong dɔmt, kɨtakad kɨ mad de lapia kɨtaagbe kɨ ndɔ taakò a? 24Ot gangɨn ta kɨgo koo takum det, na i gangɨn ta kɨgoɗobat, ad i ta kɨgang kɨdenesew.

Jeju i Krist

25Deg madg ku ngendɨ ɓebo Jerusalemt elɨn anan: Ĩn ndɨn i de'n sahn ɗob tɔla ye ale? 26Oon ndɨ elta kɨ kam kɨmisɨmisɨ kɨ tɨga wakɨsɨ, na elɨna ta mad al. Rota ngékõɓeg loj gerɨn kad i Krist wan? 27Na jĩ kɨger lon de'n ndɨn teet, na lon Krist a ɗe a ne, de kɨ a ger koo lon a teet goto. 28Lon Jeju ndɨ ndoo deg kam kuj ndub Luwaht ye, ko kɨ ndɨn kɨbo an: I germɨn na i gerɨn ko lon m'teet ye ho? M'ɗe kɨ dɔm al, na Ngelam i ngerota; i gerɨna al. 29Mĩ m'gera, kɨta m'tee ko roat, ĩla lam ye.

30Kɨtɔ 'nten sahn ne ɗob hɔa, na de kɨ nda jin dɔat goto, kɨta dɔkàd loa asɨ al ɓaitɔ. 31Na deg ngãibe ku koosɨgt adɨn kamd Jeju anan: Lon Krist a ɗe a ne, a ɗa nyakɔjg kɨ yaya tɔi ĩgɨn de'n ɗan ɗa yo?

Parisɨg lan ngéɗɔɔg kad hɔn Jeju

32Parisɨg oon dɔ kosɨdeg ndɨ nyurɨn ta nyag'n non kɨ dɔ Jejut; ad ngéjanyamosɨkadkari kɨbog, kɨ Parisɨg lan ngéɗɔɔg kad hɔna. 33Kɨtɔ 'nten Jeju elɨn an: Nãi kaglo tẽbe kad m'ndɨ nat sesɨ ɓaitɔ, kamla m'a m'aw ro ngelamt ye. 34A i sahmɨn na a i ngahmɨn al, kɨta lon m'ndɨt ye, asɨn kawt al. 35Kɨtɔ 'nten Juipg elɨn na kɨ nadt anan: De'n ndɨn a aw ɗa hã j'a kɨ ngah al a? Ke a aw ro juipgt kɨ tĩn na ku Grekgt, kɨ'n ndoo Grekg e? 36Girr ta 'nten ye i ɗi el an: A i sahmɨn, na a i ngahmɨn al; lon mĩt, a asɨn kawt al a?

Ta dɔ man kumkajirt

37Ndɔ kɨ dɔboit, ad i ndɔ ɗa nah kujkam i ndɔ kɨbo. Jeju ɓai ɗa dõ, ko kɨ ndɨn kɨbo an: Ĩla kɨnda õ de mad a ne kɨ ɗe romt kɨ ãi. 38De'n ndɨ adɨm kamɨn a ne, ko kamat la bahg, kɨ man kumkajir a nunt ye tit'n ta kɨ kam Maktubt elɨn. 39Jeju elta 'nten dan dɔ Ndil Kɨkunjɗang'n ngékada kamd a ngahn; kɨta ad Ndil al ɓaitɔ, kɨta Jeju aw dõ ta kɔsɨgon al ɓaitɔ ho.

Koosɨdeg gangɨn na joo dɔ tat lo Jeju

40Kɨtɔ 'nten deg madg ngãibe ku koosɨgt'n oon dɔ ta 'nten elɨn anan: rota, de'n ɗan i ngekelta kɨ ta Luwaht kaa nõ. 41Kɨmadg anan: De'n non i Krist. Krist a ɗe ko dɔning Galilet e? 42Ta kɨ kam Maktubt an Krist a tee ko kam ngaka Dabidt kɨ ɓe Betlehem tɔ, ad i ngon ɓe kɨ Dabid ndɨt maɗi ye ale? 43Kɨtɔ 'nten deg koosɨg gangɨn na joo dɔ tat loa. 44Kɨmadg kudt ndigɨn hɔa, na de kɨ nda jin dɔat goto.

Ngékõɓeg lo Juipg mbetɨn kad kamd ta lo Jeju

45Ngéɗɔɔg tel ɗen ro ngejanyamosɨkadkari kɨbogt, kɨ Parɨsg. Ĩn tɔ elɨnd anan: Kɨtɔɗi i ɗen sia al a? 46Ngéɗɔɔg turɨn anan: J'oo de kɨ ngekelta kɨ titbe nja kɨɗa al? 47Parisɨg turɨn anan: Mbã ĩn tɔ i son mut e? 48Kɨmadg ndin nõ ku ngekõɓegt ke ku Parisɨgt ĩgɨn adɨna kamd a? 49Na deg koosɨg'n ndɨn, ngékada kamd'n gerɨn mberkɨnda al ye, ndɔl i dɔdt. 50Nikodem, ĩn aw ro Jejut ndɔ maɗi i kɨkɨɗa kudt ye, eld an: 51Mberkɨnda loj ndɨ gangta dɔ det kete kanj koo ta kɨ taat, kanj ger nya'n ndɨ ɗa a? 52Turɨna anan: Ĩ tɔ i de kɨ dɔning Galilet e? I ndio kam Maktub oo, ngekelta kɨta Luwaht kɨ ɗe ko dɔning Galilet goto. 53Nõbe dekɨɗen, un ɗob kɨɓe lon.

Currently Selected:

JÃ 7: MlL

Highlight

Copy