JÃ 6

Jeju ad nyasa deg dub mi

1Gog go nyag 'nten Jeju ɓai aw gid bahbo Galilet ko mad, ad i bahbo kɨ a kunɨna Tiberiad. 2Bahbo koosɨdeg ndulon goa kɨ n'oon nyakɔj kɨ yan hã ɗa yootɨn mõig. 3Jeju al dɔ mbalt, na ndɨ dɔt ber nat kɨ ngéndoog lon. 4Na kaglo ɗa nah lo Juipg'n a kunɨna Pakɨ ye i nderbe. 5Lon Jeju un kumɨn kɨ dõ taa, oo bahbo koosɨdeg ndɨ ɗen kɨ ront ad ndɨje ta Pilip an: Pilip lokɨɗah ja kɨ ndugo nyasat kɨ asɨ kad jad deg tube'n ɗan ɗan kad san a? 6Jeju ndɨje ta Pilip titbe kad n'oon ta ga loa ta ko, kɨta ger nya'n ĩ kɨɓe a ɗa nõ ɓet. 7Pilip tura an: Ke neni j'aw kɨ nar dub kaa ne, a asɨ kad dekɨɗen kudt ngah ngon gaj nyasa sĩ sa al. 8Ngendoo loa mad kɨ tɔa i Andre kɨ ngonkõ Simõ Pierr ela an: 9Basa mad i ne, kɨ kuɓɨr bɨna mi ho kɨ ngan kanj joo jint; na i tẽbe kɨta koosɨdeg kɨ kasɨ be. 10Taa Jeju el ngéndoog lon an: Adɨn deg ye ndɨn ber dɔ mut kɨmbool kɨ ɓa tukɨtukɨ'n non, deg ndɨn ber, kɔr dekɨdɨngãg koon i dub mi. 11Jeju ɔi kuɓɨr bɨna'n non kɨ jint, ɗa mersi Luwah, kamla luɓo koosɨdeg'n ndin ber nõ. Luɓod kanj titbe tɔ, ad'd kɨ asɨ tɔl ɓo dekɨɗen. 12Lon san ad ndenɨn woi ye, Jeju eld an: I kawɨn bud kuɓɨr bɨna ye kɨ nat lo kɨɗa, kad tuj al. 13Kawɨn ndeg kuɓɨr bɨna kɨmi kɨkanj kɨjoo kɨ nat, ad ɗoosɨ jàng kɨlah gidaijoo. 14Lon deg oon nyakɔj kɨ yan Jeju ɗa ye, elɨn anan: Kɨ ger jeje de'n ɗan i ngekelta kɨ ta Luwaht kan elɨn ta ɗea dɔningt ka la ɗan. 15Jeju oo takad deg a sahn kɨ'n ndanɨn ngart kɨ lo ngetɔgt ye, tel al gog dɔ mbalt aw ndɨt kɨ kɨɗanbe.

Jeju ndia dɔ mant

16Lokɨsɔle, ngéndoog loa awɨn ta bahbot. 17Ɓain kam toot mad kɨ'n gangɨn bahbo kɨ Kapernawm. Lo diw til woi, na Jeju ɗisɨ dɔ mbalt ngad al ɓaitɔ. 18Taa nel kɨbo la kɨ tɔgɨn ad man ɔsɨ pɨkapɨka 19Ngéndoog nelɨn too teen ɓul bahbot asɨ kilometɨr mi, lon oon Jeju a ndia dɔ bahbot a ɗe nderbe kɨ dɔ toot ye, ɓoolɨn, 20na Jeju eld an ot ɓoolɨn: I mĩ. 21Ngéndoog loa ndigɨn kuna kam toot, na tentenbe too tee takumkaat kɨ Kapernawmt.

Bahbo koosɨg sahn Jeju

22Loti got bahbo koosɨg'n nain gid baht ko mad ye oon kad too i kɨɗabe la tag nõbe ye, na gerɨn kad Jeju ɓai toot'n non nat kɨ ngéndoog lon al, na ngéndoog loa dɔd la awɨn ye. 23Na too madg ɗen ko Tiberiadt nderbe kɨ kad lot'n Bɨraɓe ɗat ɗa mersi Luwah kɨta bɨna'n deg san. 24Lon bahbo koosɨg oon Jeju, kɨ ngéndoog loa nõbe al ye, ĩn kɨɓeg kɨ dɔd andɨn kam toogt'n non, na awɨn Kapernawmt sahn go Jeju.

Jeju i nyasa'n a ad kumkajir

25Lon ngahna gid bahbot ye, elɨna anan: Ngendoo deg, ɗɨngãt hã i ɗe nẽbe a?

26Jeju turd an: Rota rota la m'ndɨ m'elsɨ ye, i ɗa i sahmɨn kɨta koon oon nyakɔjg kɨ yaya'n m'ɗa nõ al, na kɨta bɨna'n i san ndensɨ. 27Ot ɗan kɨla kɨta nyasa kɨ a ndum, na i ɗan kɨla kɨta nyasa kɨ a tokɨnõt na a ad kumkajir kɨ mbãkɨnõt, nyasa'n non Ngon de la a adsɨ ye, kɨta ĩla Luwah kɨ bɔw ja kɨrra tɔgɨn roat ye. 28Taa deg ndɨjena anan: Ɗi ka kɨ ɗa kad kɨ tɔlɨn kon kɨlag'n Luwah ndig a? 29Jeju turd an: Kɨla'n Luwah ge ko rosɨt la ten: Kɨ adɨn kamsɨ ngona'n laa kɨ rosɨt. 30Tel elɨna anan: Nyakɔj kɨ ɗi kɨ ya hã a i ɗa ad j'oo kad jadɨn kamj a? Ɗi i ndɨ i ɗa? 31Kaajg san nyasa kɨ tɔa i maan kam dɨlalot tit'n ndangɨn kam maktubt anan: Ad'd nyasa kɨ ɗe ko dõ dɔrãt. 32Jeju turd an: M'elsɨ kɨ tɨga wakɨsɨ i rota. Moij hã adsɨ nyasa kɨ ɗisɨ ko dɔrãt al, na i Bɔwm la adsɨ nyasa kɨ jeje kɨ ɗisɨ ko dɔrãt ye. 33Kɨtɔ nyasa'n Luwah ad, i nyasa kɨ ɗisɨ ko dɔrãt, na ad kumkajir deg kɨ dɔningt. 34Kɨtɔ 'nten elɨna anan: Bɨraɓe adj nyasa'n non kɨndɔgndɔg. 35Jeju eld an: Mĩ la mĩ nyasa kɨ ngekad kumkajir deg. De'n ndɨ ɗe romt ɓo a õa gog al bat, na de'n ndɨ adɨm kamɨn tɔ a ne, kɨnda a õa gog al bat tɔ. 36Na m'elsɨ, ke oomɨn kaa ne, admɨn kamsɨ al. 37Deg tube'n Bɔwm lad jimt a ɗen romt, na de'n ndɨ ɗe romt a ne, m'a m'laa kɔ al. 38Kɨtɔ m'ɗisɨ ko dɔrãt kad m'ɗa ndig lom al, na kad m'ɗa ndig lo ngelam tã. 39'Nten la i ndig lo Ngelam, kad kɨkɨɗa ku ĩgɨtɨn adɨmd tee jimt so al, na kɨ m'ada ɓai lo koit ndɔt kɨdɔboit. 40Titbe la i ndig lo Bɔwm ye, kɨ deg tube'n oon Ngon, na adɨna kamd ye, a ngahn kumkajir kɨ mbãkɨnõt, na m'a m'ad'd ɓain lo koit ndɔ kɨ dɔboit. 41Kɨtajigt, Juipg nyurɨn kɨta kelɨn Jeju el an: Mĩ nyasa kɨ ɗisɨ ko dɔrãt nõ. 42Elɨn tɔ anan i Jeju ngon Jojep'n hã kɨ ger bɔwa kɨ kõa ye ale? Titbãi hã tajigla ndɨ el an: M'ɗisɨ ko dɔrãt a? 43Jeju turd an: Ot nyurɨn ta kɨnasɨt. 44De kɨ asɨ ɗe romt kɨ dɔn goto, na ĩla Bɔwm kɨ ngelam laa kɨ romt tã, na mĩ m'a m'ada ɓai lo koit ndɔ kɨ dɔboit. 45Ngékelta kɨ ta Luwaht ndangɨn anan: Deg tube a ĩn ngéndoo nya ro Luwaht, dekɨɗen nel mbin kɨ ro Bɔwt, na taa nyandoo loa a ne, ndɨ ɗe romt. 46De mad kɨ oo Bɔw kɨ kumɨn be goto, na ĩn hã ɓai ko ro Luwaht kɨɗabe la oo Bɔw kɨ kumɨn ye. 47M'tɔ tamt wakɨsɨ kɨ tɨga m'an de'n adɨm kamɨn a ne, ngah kumkajir kɨ mbãkɨnõt. 48Mĩ nyasa kɨ kad kumkajir. 49Kaasɨg san nyasa kɨ tɔa i man, kam dɨlalot, be kaa ne oin. 50Nyasa kɨ ɗisɨ ko kɨ dɔrãt ye, de'n a sa a ne, a oi al. 51Mĩ la mĩ nyasa kumkajir kɨ ɗisɨ ko dɔrãt ye. Ĩla de mad sa nyasa'n non a ne, a ndɨ kɨ dɔn dõ mbãkɨnõt, na nyasa'n m'a mad deg i dãrom'n m'a mad deg kɨ dɔningt kad ngahn ne kumkajir. 52Kɨtɔ ta'n el ten la Juipg majɨn ne ta kɨnadt ngãi anan: Titbãi hã de'n ɗan a adj dãron kad kɨ sa a? 53Jeju eld an: M'elsɨ kɨ tɨga wakɨsɨ, i rota, ĩla i san dãro Ngon de, na ãin mosa al tɔ a ne, kumkajir goto kamsɨt. 54De'n sa dãrom, na ãi mosɨm tɔ a ne, ngah kumkajir kɨ mbãkɨnõt, na m'a m'ada ɓai lo koit ndɔ kɨ dɔboit. 55Kɨtɔ dãrom i nyasa kɨ jeje, na mosɨm i nyakãi kɨ jeje tɔ. 56De'n sa dãrom, na ãi mosɨm tɔ a ne, ndɨ kɨ kammt, na mĩ m'ndɨ kɨ kamat ho. 57Tit'n Bɔwm kɨ ngelam i kumkajir, na m'ndɨ kɨ dɔm dõ kɨtakula ye, titbe tɔ la de'n sa dãrom a ne, a ndɨ kɨ dɔn dõ kɨtakulɨm ho ye. 58'Nten i nyasa kɨ ɗisɨ ko dɔrãt i tit nyasa'n kaasɨg san, na oin al, de'n sanya 'nten a ne, a ndi kɨ kumkajir kɨ mbãkɨnõt. 59Jeju eltag 'nten lon ɗa ndoon deg kam kuj kawnat lo Juipg kam ɓebot kɨ Kapernawm.

Tag kɨ ad de kumkajir

60Lon oon dɔ ta 'nten ye, ngéndoog loa ngãibe anan: ta ɗi kɨngang titbe a? Nõ asɨ nel mbin koon dɔ a? 61Jeju ger kamɨnt kad ngéndoog lon ndɨ nyurɨn dɔ tat lon ad eld an: Ta'n m'el ye, gasɨ gigt e? 62Na ĩla oon Ngon de tel aw gog dõ lon ndɨt kete dɔrãt ye, ka a anan ɗi? 63I Ndil Luwah la ndɨ ad kumkajir ye, na dãro asɨ ɗa nya mad al. Tag'n m'elsɨ i Ndil, na i kumkajir ho. 64Na deg madg kusɨt adɨn kamd al, lo mbagɨrat nu, Jeju elta titbe kɨta ger ĩgɨn adɨn kamd al, kɨ de'n ɓet a laa ji madngétaagt. 65El tɔ an: Kɨtɔ 'nten la m'elsɨn m'an: De kɨ asɨ ɗe romt goto, na de'n Luwah ada ta ɗob tã. 66Dɔ ndɔt'n non, ngéndoog loa ngãibe tɔrrɨn rod kɨ gog, na nyan ta ndulo goa. 67Taa Jeju el ngéndoog lon kɨkɨlah gidaijoo an: Na ĩng ye, i ndigɨn kaw al nyasɨ e? 68Simõ Pierr tura an: Bɨraɓe kaa j'aw ɗa a? Ĩ la i ndɨ kɨ tag kɨ kad deg kumkajir kɨ mbãkɨnõt ye. 69Na jadi kamj kɨta kɨ ger kad ĩ la ĩ Krist, kɨjaɓat lo Luwah. 70Jeju turd an: Ĩn kɨkɨlah gidaijoo, i mĩ hã m'kɔtsɨ ale? Na kɨkɨɗa kusɨt i ngon ngekɨla lo Sitan. 71Elta ɔjɨn dɔ Judas ngon Simõ, de kɨ Iskariot't. Kɨtɔ ĩla a la Jeju ji madngétaagt, na i kɨkɨɗa ku ngendoogt loa kɨkɨlah gidaijoo.

Currently Selected:

JÃ 6: MlL

Highlight

Copy