JÃ 5

Jeju yoot de kɨ ngerokoinjɔr

(Oo Jã 7:19-24; Jã 9:1-17)

1Go nyagt'n non, Juipg awɨn ɓebo Jerusalemt kɨ n'ɗan nah lod mad. Jeju awt ho. 2Kam ɓebo Jerusalemt, nderbe kɨ tabit batgt, mankaar mad kɨ tɔa i Betesda kɨ ta hebre to tit; kuj girr gang mi ɗan tit nõ. 3Girr kujgt'n non, ngémõig ngãi be ton tit, ta mankaart: Mundog, mootg, kɨ ngérokoinjɔrg to ngoon yee man. 4Kɨtɔ malaika lo Bɨraɓe mad, kaglo mad a ɗisɨ, and kam mankaart, bur mana. Ngemõi'n a ud kam mant'n non dasa go yeeat a ne, a yoot; ke neni ĩn mõi kɨ titbãi. 5Ku ngémõigt'n ton ta mankaart nõ ye, de mad kɨ mõi ɗaa ɓal dɔmɨta gidaijijoo tot nõ. 6Lon Jeju ooa to ber kɨ kɔtɨn, na ger kad mõi ɗaa kaglo ngãibe ye, ndɨjea an: I ndig kad i yoot e? 7Ngemõi tura an: Bɨraɓe, de lom kɨ kad un lam kam mankaart lon man yeen goto na lon m'ndɨ m'ag ɓaitɔ a ne, de mad and nõmt.

8Jeju ela an: I ɓai dõ un nyatoi, na i ɓaning. 9Kɨtajigt, de'n non yoot, ad ɓai dõ un nyaton, na ɓaning. Na tit kan hã nya'n non ɗa nya kɨ ndɔ taakò ye, 10kɨbog lo Juipg elɨn de'n Jeju yoota anan: Ndɔ 'nten i ndɔ taakò, i goɗobat al kad un nyatoi. 11De'n non turd an: De'n yootɨm nõ la elɨm an: Un nyatoi, na i ɓaning.

12Deg'n non ndɨjena anan: De'n eli an: Un nyatoi na i ɓaning ye, i nõ a?

13Na de'n yoot ye, ger de'n yootɨn nõ al, kɨta Jeju tee kɔ ku degt'n ɗan lot'n non. 14Ndɔ madt, Jeju ndɔda kam kuj ndub Luwaht, na ela an: Oo dɔ maj. Tajigla ĩ kɨ yoot, ot ɗa majal gog ta, na ɓeta kõ kɨ tɔi ĩn ɗai ye, tel ɗai gog tɔ. 15De'n non aw el kɨbog lo Juipg kad i Jeju la yootɨn ye. 16Kɨtɔ 'nten, kɨbog lo Juipg awɨn ne kɨ ta kɨ Jeju, kɨta yoot de'n non kɨ ndɔɔ taakò. 17Na Jeju turd an: Bɔwm ndɨ ɗa kɨla mbã tajigla, mĩ kaa m'ndɨ m'ɗa kɨla ho. 18Lon Juipg oon dɔ ta 'nten ye, kɨbog lod sahn ɗob tɔla, i kɨta tɔin tɔi dɔ ndɔɔ taakò hã kɨɗabe al, na i kɨta kel'n ndɨ el an: Luwah i Bɔw koojɨn, ho oo ron asɨ na derɨr kɨ Luwah.

Tɔg Ngon Luwah

19Jeju tee tan eldɨn ta 'nten an: M'elsɨ kɨ tɨga wakɨsɨ i rota. Ngon asɨ ɗa nya mad kɨ dɔn al. Na a ɗa nya'n oo Bɔwɨn lo ɗat tã, nyag tube'n Bɔw ndɨ ɗa ye, Ngon kaa ne, ɗa titbe ho. 20Kɨtɔ Bɔw tar ngon, ad ɔja nyag tube'n ndɨ ɗa; a ɔja kɨlag kɨbobo'n oo nõ, kad ɗa. Na ta a yasɨ biw. 21Tit'n Bɔw ndɨ ad ngékoig ɓain lo koit, na ad'd kumkajir ye, titbe tɔ ho la Ngon ndɨ adɨn kumkajir ĩgɨn hã ndig kad'd ho ye. 22Bɔw ndɨ gangta dɔ det mad al, na la takɨgang tube ji Ngont. 23Kɨtɔkad deg tube ɔsɨngon Ngon, tit'n ndɨ ɔsɨn ne gon Bɔw ye be. Bɔw la, la Ngon ye, de'n ndɨ ɔsɨgon Ngon al a ne, ndɨ ɔsɨgon Bɔw kɨ Ngelaa al tɔ. 24M'ndɨ m'elsɨ kɨ tɨga wakɨsɨ, rota, de'n ndɨ oo dɔ ta lom, na ndɨ adkamɨn ngelam a ne, ngah kumkajir kɨ mbãkɨnõt; a gangɨn ta dɔat al, na tee ta koit kɨ kumkajirt. 25M'elsɨ kɨ tɨga wakɨsɨ i rota, dɔ kàd a ɗe nõ, na tajigla ɗe woi, ngékoig a oon dɔ ndɨ Ngon Luwah, na ĩgɨn oon dɔ ndia ye, a ɓain ndɨn kɨ dɔd dõ. 26Tit kan Bɔw ĩn kɨ tɔg kad deg kumkajir ye, titbe tɔ la ad ngonɨn tɔg kad deg kumkajir ho ye, 27na ad ngonɨn tɔg gangta dɔ degt kɨta i ngon de. 28Adɨn nyag 'nten yasɨ al, kɨta kaglo ndɨ ɗe nõ, lon ngékoig'n dubɨnd a oon dɔ ndia, 29a teen kam dɔɓadgt, ĩgɨn ɗan maj a ɓain lo koit kɨta kumkajir, na ĩgɨn ɗan majal ye, a ɓain lo koit kad gangɨn ta dɔdt.

Deg man naj kɨmaj dɔ Jejut

30Jeju el tɔ an: Mĩ m'asɨ ɗa nya mad kɨ dɔm al, m'ndɨ m'gangta kɨgo tat'n m'oo dɔ ta Bɔwt, na ta kɨ m'gang i goɗobat, kɨta m'ndɨ m'ɗa kɨgo ndigt lom al, na kɨgo ndigt lo ngelam tã. 31Ĩla m'ndɨ m'manaj dɔ romt mĩ kɨɓe a ne, titbãi deg a gerɨn kad ta lom i rota a? 32Na de mad i nõ, ndɨ manaj dɔmt, na m'ger manaj loa kɨ ma dɔmt i rota. 33Na ĩn, i lan deg ro Jãt, na Jã manaj dɔ rotat. 34Na mĩ taa ne, m'sah kad de tã mam naj al, na m'ndɨ m'elta titbe kad i ngahn ne kaj. 35Jã i tit horr dɔg kɨ unj njoinjoi, na i ndigɨn ɗa ronel dɔ kunjat kaglot kɨ sĩbe. 36Na mĩ taa, m'ndɨ kɨ naj kɨ mã kɨbo tɔi lo Jã'n mã dɔmt kɨta kɨlag'n m'ɗa, Bɔwm la adɨm tɔg kad m'ɗadɨn ye, kad deg gerɨn kad i Bɔw la lam ye. 37Bɔw, ĩn hã lam, mamnaj tɔ, i ĩn oon dɔ ndia nja kɨɗa al ho, oon takuma nja kɨɗa al ho. 38I ngomɨn tag loa kamsɨt al, kɨta adɨn kamsɨ ngona'n la nõ al. 39I ndɨ oon tag kɨndang lo Luwah kɨta oo anan a i ngahn kumkajir kɨ mbãkɨnõt kamt. Na i rotag kɨ ndang lo Luwah'n non la ndɨ mamɨn naj ye. 40Be kaa ne, i ndigɨn ɗe romt kad i ngahn kumkajir kɨ jeje al. 41M'ndɨ m'sah kɔsɨgon kokɨro degt al. 42Na m'gersɨ, tar Luwah goto kamsɨt. 43M'ɗe kam tɔ Bɔwmt, na i hɔmɨn kɨ rosɨt al, na ĩla de mad kɨɗang ɗe kam tɔnt kɨ kɔsɨdɔn a ne, a i hɔna kɨ rosɨt, 44Titbãi a asɨn kad kamsɨ Luwah ĩgɨn i ndɨ ndigɨn ngah kɔsɨgon kokɨro degt, na i sahn kɔsɨgon kɨ ɓai kokɨro Luwaht kɨɗabe al a? 45Ot gaan kan, mĩ m'a m'lata dɔsɨt nõ Bɔwmt. Na i Moij ĩn i ndan kamsɨ dɔat nõ la a la ta dɔsɨt ye, 46Ni adɨn kamsɨ Moij jeje a ne, ni a admɨn kamsɨ ho, kɨta Moij ndangta kam maktubt dan dɔm. 47Na tit kan i taan tag kɨ ndang lo Moij al ye, titbe ho la, i taan tag lom al ho ye.

Currently Selected:

JÃ 5: MlL

Highlight

Copy