JÃ 10

Terrta dɔ ngéngombatgt

1Rota rota la m'ndɨ m'elsɨ ye: De'n ndɨ and kɨnga batgt kɨ tabit al, na ndɨ and kɨ ta ɗob kɨɗang a ne, i ngéɓoog, kɨ ngekumɗob tɔ. 2Na de'n ndɨ and kɨ tabit a ne, i ngéngombatg. 3Ngengom tabit ndɨ tee ada; batg oon dɔ ndia, ndɨ kun bat lon kɨɗen kɨ tɔa. Ndɨ ɔrrd ta ɗob kɨtɨga. 4Lon tee kɨ kɨlong kɨtɨga tube woi ye, so nõdt, batg a ndulon goa kɨta gerɨn dɔ ndia. 5A ndulon go de kɨ mbah al, na kãi la a ãina kɨta gerɨn ndi de kɨ mbah al.

6Jeju eld terrta 'nten, na gerɨn girr ta'n eld nõ al.

Jeju i Ngengombatg kɨmaj

(Oo Jã 14:6; Eja 40:11; 1 Pie 2:24-25)

7Jeju tel eld an: Rota rota la m'ndɨ m'elsɨ ye, mĩ la mĩ tabit batg ye. 8Tubeg'n hã ɗen nõmt ĩn ngéɓoog kɨ ngékumɗob tɔ. Na batg oon dɔ ta lod al. 9Mĩ la mĩ tabit ye, ĩla de mad and kɨtakulɨm a ne, a aj, a and ho, a tee ho, na a ngah lo kulɨn. 10Ngeɓoog a ɗe kɨndang al, na mba ɓoog, kɨ ja kɔ kɨ nuj kɔ tã, na m'ɗe kɨtakad batg ngahn kumkajir, kɨ ngahn kumkajir kɨ to mbuj tɔ. 11Mĩ ngéngombatg kɨmaj; ngéngombatg kɨmaj ndɨ ad ron kɨta batg.

12Na ngeɗakɨla kɨ lo nart, kɨ i ngéngombatg al, kɨ batg ĩn loa al ye, ĩla oo bisɨkolo a ɗe a ne, tĩ nya batg na ãi, ad bisɨkolo ɗe urr dɔdt hɔd, na tɨnda tĩnd tɔ. 13Ngeɗakɨla kɨlo nart a ãi, kɨta i ngeɗakɨla nar ad ta õ kama kɨta batg al. 14Mĩ ngengombatg kɨmaj. M'ger kɨ lomg, kɨ lomg tɔ germɨn. 15Tit'n Bɔw germɨn, mĩ tɔ m'ger Bɔw ho m'ndɨ mad rom kɨta batg tɔ. 16M'aw kɨ bat madg nõ tɔ sumba kad m'ɗe sed, a nelɨn mbid kɨdɔ tat lom, a ĩn ɓut kɨɗa, ngengomd a i kɨɗa tɔ. 17M'ndɨ mad rom kad m'tel m'ta, kɨta 'nten la Bɔw ndɨ tarmɨn ye. 18De mad kɨ asɨ tɔlɨm goto, na mĩ kɨɓe la m'ndɨ mad rom kɨ kamndig ye. M'asɨ kad mad, m'asɨ kad m'tel m'ta gog tɔ. Ĩla i nya'n Bɔw elɨm kad m'ɗa ye.

19Lon Jeju elta ye, kɔ Juipg so gonat al. 20Kɨmadg ngãibe kudt anan: Aw kɨ ndil kɨmajal, kur dɔa oi kɨtɔɗi i ndɨ oon ne dɔ ta loa a?

21Kɨmadg anan: Tag'n non i takel de kɨ ngekaw kɨ ndil kɨmajalg e? Ndil kɨmajal asɨ tee kum mundog e?

Juipg ndigɨn ta lo Jeju al

(Oo Jã 5:26-27; Jã 20:28-29; Rom 8:35-39)

22I dɔnah kult, i kaglo ɗa nah kɨtaa i nah nda kuj ndub kɔtkokɨɗa kad Luwah kam ɓebo Jerusalemt. 23Jeju a ndia kam kuj ndub Luwaht girr dawt lo Salomõ. 24Juipg lan na gugɨn dɔa, elɨna anan: Mbã ɗɨngãt a ad kɨ nyata kam kɨɗa sekɨre a? Ĩla ĩ Krist a ne el i ɔrrj nat ad j'oo.

25Jeju turd an: M'elsɨ woi, na admɨn kamsɨ al. Kɨlag'n m'ndɨ m'ɗa kam tɔ Bɔwmt la ndɨ mamɨn naj ye. 26Na admɨn kamsɨ al kɨta ĩn ku batg lom al. 27Batg lom ndɨ oon dɔ ndim, m'gerd, ndɨ ndulon gom tɔ. 28M'ndɨ m'ad'd kumkajir kɨ mbãkɨnõt, a nujɨn kɔ kɨ nja kɨɗa al bat, de kɨ asɨ tad jimt goto. 29Bɔwm'n adɨmd i kɨbo tɔid tube, de kɨ asɨ tad ji Bɔwt goto. 30Mĩ kɨ Bɔw jĩ kɨɗa.

31Kɨtɔ 'nten Juipg tel ɔin ne mbalg kɨ n'tɨlana ne. 32Jeju turd an: M'ɔjsɨ kɨlag ngãibe kɨmaj kokɨro Bɔwt, na kɨla ɗi kudt la hã i ndɨ tɨlamɨn ne kɨ mbal a? 33Juipg turɨna anan: Kɨtɔ kɨla mad kɨmaj hã kɨ ndɨ kɨ tɨlain al, na kɨta i ndɨ elta kɨmal dɔ Luwaht; kɨta ĩ kɨ de i ndɨ tel roi Luwaht; 34Jeju turd an: Ndangɨn kam mberkɨndat losɨ; m'el m'an ĩn luwahg ale? 35Kɨ gerɨn maj ta'n ndangɨn kam maktubt kɨkunjɗang ye a to lo tont mbãkɨnõt. Kɨtɔ Luwah elta kɨ ngékelta kɨ tant maɗi an: Ĩn luwahg. 36Kɨtɔɗi i ndɨ elɨn anan m'ndɨ m'elta kɨmal dɔ Luwaht lon m'el m'an mĩ Ngon Luwah? Mĩ taa ne, Luwah kɔtɨm, ndam kɔtko kɨɗa ho lam dɔningt tɔ ho. 37Ĩla m'ndɨ m'ɗa kɨlag lo Bɔw al a ne, ot kadmɨn kamsɨ. 38Na ĩla m'ndɨ ɗa kɨlag loa a ne, ke admɨn kamsɨ al kaa ne, adɨn kamsɨ kɨlag'n non, kɨtakad i gerɨn kɔikɔi tɔ, Bɔw ndɨ kammt, mĩ tɔ m'ndɨ kam Bɔwt.

39Kɨtɔ 'nten sahna kɨ n'hɔna, na tee jidt kɔ.

40Jeju tel aw gog gid bah Jurdẽt, lot'n Jã ɗa ɗaa deg baptemt dasa. Jeju ndɨt nu. 41Deg ngãibe ɗen roat anan: Jã ɗa nyakɔj kɨ ya mad al, na nyag tube'n Jã el dan dɔ de'n ɗan ye i rota. 42Deg ngãibe taan ta loa lot'n non.

Currently Selected:

JÃ 10: MlL

Highlight

Copy