JÃ 11

Lajar oi

(Oo Luk 10:38-42; Jã 5:21,26-27; Mrk 5:35-43)

1Mõi ɗa de mad'n tɔa i Lajar; ɓe loa i Betanit, i ɓe lo Maɗi kɨ Ngonkõa Mart. 2I Mari'n wur Bɨraɓe kɨ yib kɨ kootmbĩ, na bɔrr njaa kɨ bisɨdɔn nõ la mõi ɗa ngonkõa Lajar ye. 3Kɨtɔ 'nten ngankõa kɨdẽg kɨjoo'n non la elɨn Jeju anan: Bɨraɓe, de kan i tara ye i mõi.

4Lon Jeju oo dɔ ta 'nten ye el an: Mõi 'nten a tee koi al, na i kɨtakad tɔ Luwah ngahn kɔsɨgon, kad Ngon Luwah ngah kɔsɨgon kɨta kulaa.

5Jeju tar Mart kɨ ngonkõa kɨdẽ, kɨ Lajar. 6Lon oo hoi mõi kɨ ɗa Lajar ye, ɗa ndɔ joo dɔt kɨ lot'n non. 7Kamla el ngéndoog lon: Ad kɨ tel j'awɨn dɔning Judet gog.

8Ngéndoog loa elɨna anan: Ngendoo deg, ɗa ndɔ ngãi al ɓaitɔ la Juipg sahn tɨlai kɨ mbal ye la i ndig tel gog yo?

9Jeju tur an: dɔ kàd i kɨlah gidaijoo kam ndɔt kɨɗa ale? Ĩla de a ndia kàda a ne, a ga njan gigt al kɨta a oo kunj kɨ dɔningt'n ɗen. 10Na ĩla de ndia ndɔɔ a ne, a ga njan gigt kɨta kunj goto kamat. 11Jeju eltag 'nten kamla eld an: Namj Lajar to ɓi na m'a m'aw m'ndoola dɔ ɓit. 12Ngéndoog loa elɨna anan: Bɨraɓe ĩla to ɓi a ne, a yoot.

13Jeju elta koi Lajar, na ngéndoog loa oon anan ndɨ elta taakò kɨ lo ɓit. 14Kɨtɔ 'nten Jeju eld kɨ tɨga wakɨsɨ an: Lajar oi; 15na m'ɗa ronel kɨtatɔsɨ dɔ goto'n m'goto nu kad adɨn ne kamsɨ; be kaa ne ad kɨ j'awɨn roat.

16Dɔ tat 'nten Tomas, ĩn a kunɨna Dydim, ad i ndɨngã ye, el ngendoo namɨng an: Ad kɨ j'awɨn tɔ ho kad j'oi nat kɨ Bɨraɓe.

Jeju i ngeɓai kɨ deg lo koit

17Lon Jeju ɗe ye, ngah Lajar ɗa ndɔsɔɔ kam ɓadt woi. 18Ɓe Betani taa, ɗa kad ɓebo Jerusalemt nderbe, asɨ kilometɨr mɨta. 19Juipg ngãibe ɗen kete ro Mart't kɨ Mari kad kɨ'n ton sed dɔ ndubat lo ngon kõnd. 20Lon Mart oo hoi Jeju a ɗe ye, aw la taa, na Mari taa ne, ndɨ ber kuju. 21Mart el Jeju an: Bɨraɓe nĩ i ndɨ la a ne ngonkom a oi al. 22Na m'ger tajigla kaa nya ɗi a i kɔ Luwah a ne Luwah a ad.

23Jeju ela an: Ngonkõi a ɓai lo koit.

24Mart ela an: M'ger a ɓai ndɔ ɓai ngékoit kam ndɔt kɨ dɔboit.

25Jeju ela an: Mĩ ngekad ngékoig ɓain, mĩ kumkajir, de'n ndɨ adɨm kamɨn, ĩla oi kaa ne a tel kumkajir. 26Na dekɨɗen'n ndɨ kɨ dɔn dõ, na ndɨ adɨm kamɨn a ne a oi al mbãkɨnõt. I ta ta 'nten e?

27Mart ela an: Ãã Bɨraɓe m'ger kammt ĩ Krist, Ngon Luwah kɨ ngeɗe dɔningt.

Jeju nõ

28Lon Mart elta 'nten kamla aw kun Mari kɨ ngonkõ gid tilt, ela an: Ngendoodeg ɗa ne na ɗa kuni. 29Lon Mari oo dɔ ta 'nten ye ɓai kanangbe aw ro Jejut. 30Kɨtɔ Jeju and kam ɓet al ɓaitɔ, na ɗa lot'n Mart ndɔdat nõ. 31Kɨtɔ 'nten Juipg ton sia dɔ ndubat, ndɨn sia kam kujt, lon oon Mari ɓai kanangbe, tee kɨtɨga ye, ndulon goa. Oon a anan ndɨ aw dɔɓat kɨ n'nõ. 32Lon Mari tee lot'n Jeju ɗa tit ye oa, so kɨ njat, ela an: Ni i ndɨ la a ne, ngonkom a oi al.

33Lon Jeju ooa to nõ, kɨ Juipg'n ɗen sia nat ɗa non ho ye, ɗa kamkil, ta õ kama tɔ. 34Jeju el an: I lan na ɗaa? Elɨna anan: Bɨraɓe i ɗe oo. 35Jeju mbel nõ ɓitit. 36Kɨtɔ 'nten Juipg anan: Oon tarɨn tara ye. 37Na kɨmadg kudt anan: De'n tee kum mundo ye, asɨ kad ɔg dɔ Lajar kad oi al ale?

Jeju ad Lajar ɓai lo koit

38Kɨtɔ 'nten Jeju ɗa kamkil gog tɔ, aw dɔ ɓadt. Dɔɓad'n non i bulo mbal, na mbal mad ut taa. 39Jeju el an: Unɨn mbal kɔ. Mart ngonkõ ngekoi ela an: Bɨraɓe tajigla, ot gã kɨta ɗa ndɔsɔɔ woi.

40Jeju ela an: M'eli m'an ĩla i taa ta lom a ne, a oo tɔg lo Luwah ale?

41Kɨtɔ 'nten unɨn mbal kɔ. Kamla Jeju un kumɨn kɨ dõ, na el an: Oo Bɔw m'ɗai mersi kɨta koon oo dɔ kɔ lom. 42Mĩ taa maɗi m'ger i ndɨ oo dɔ kog lom kɨndɔgbe na m'elta 'nten kɨta koosɨdeg'n ɗa gugɨn dɔm ɗan, kɨtakad gerɨn ne jeje ĩ la i lam ye. 43Lon elta 'nten ye, kun nya kɨ ndɨn kɨbobe an: Lajar i tee so. 44Ngekoi tee, jiag kɨ njag ĩn kɨdɔ kɨ kɨla kub, na takuma i kɨ dulo kɨtakub. Jeju eld an: I tutɨn na, na i nyana ad aw.

Mbaiɓeg ɔjɨn na ta kad'n hɔn Jeju

(Oo Mat 26:1-5; Mrk 14:1-2; Luk 22:1-2)

45Kɨtɔ 'nten deg ngãibe ku Juipgt'n ɗen ro Marit, na oon nya'n Jeju ɗa ye adɨna kamd. 46Na kɨmadg kudt awɨn ro Parisɨgt elɨnd ta nya'n Jeju ɗa nõ? 47Taa ne, ngéjanyamosɨkadkari kɨbog kɨ Parisɨg kawɨn ngékoogotag kɨ nat anan: De'n non ndɨ ɗa nyakɔjg kɨ yaya ngãibe, ka kɨ ɗa ɗi a? 48Ĩla kɨ nyàa kad ɗa titbe a ne, deg tube a adɨna kamd; Romag tɔ a ɗe tan lo kɨjaɓat loj kɨ girrdeg loj tube. 49Na kɨmad kudt nõ tɔa i Kaip, in hã i bɨra ngejanyamosɨkadkari ɓalt'n non ye eld an: Ĩ gerɨn nya mad kɨɗa al bat; 50maj kɨtakad de kɨɗa oi kɨta deg kad girrdeg kɨtaagbe nujɨn kɔ al. I gaan maj oon. 51Ta 'nten un kɨdɔn hã el al, na kɨta i bɨra ngejanyamosɨkadkari kɨbo ɓalt'n non la ndɔ'n ndil an: Jeju a oi kɨta girrdeg lod ye. 52Na kɨta girrdeg lod hã kɨɗabe al, na kɨtakad kawɨn ngan Luwah kɨ kam dãrot kɨkɨɗa, ngan Luwah, ĩgɨn tĩn na kɔ kɨ log. 53Ndɔt'n non ɔjɨn na ta kad'n tɔlɨn Jeju. 54Kɨtɔ 'nten Jeju ndian ku juipgt kɨ tɨga wakɨsɨ gog al; na ɓai lot'n non kɔ, aw kam dɔningt kɨ nderbe kɨ kad dɨlalot, and kam ɓet mad'n a kunɨna Epraim, nõbe la ndɨ tit kɨ ngéndoog lon ye. 55Pakɨ lo Juipg i nderbe ad deg ngãibe kɨ ngan ɓegt awɨn ɓebo Jerusalemt kete nõ Pakɨt kad kɨ n'arɨn rod. 56Ɗa sahn Jeju, ɗa elɨn na ta kam kuj ndub Luwaht anan: Oon ɗia? A ɗe lo ɗa naht ale? 57Ngéjamosɨkadkari kɨbog kɨ Parisɨg ndan mber kete kad de mad ger lo ndia a ne, kɨ tee njaat kad hɔna.

Currently Selected:

JÃ 11: MlL

Highlight

Copy