Luka 24

Jesuh Thawhṭhannak

(Mat 28:1-10; Mar 16:1-8; Joh 20:1-10)

1Zarh khat ih ni peitatleng ni, khuaṭhet tuanpan ah numile cu an zalhmi rimhmuipawl kentia in thlaan ah an tat. 2Thlaan khar lung cu thlaan in thautia in an hmu, 3ihmansela a sung an luh tikah ruak cu an hmu lo. 4Acui thu ah an thinhnok in an om lioah partlai tleserso rum mi pahnih an hrialah an diing lohli. 5Numile cu an ṭih ih an hmai vulei hoiin an bok, ihmansela acule ni, “Ica’h minung cu mithi lakah nan hrawl hmen? Ani cu hina’h a om lo, a tho rom. 6Galilee ih a om lioah khawti’n a tan sim ta hngai ti khi mang tu hmen uh, 7Mi Tiapa cu misualpawl kut ah piak i lei khawh, thinglamtah ah khentar a i thok, cun ni thumnak ah a tho ṭhan thok, ti khi,” tiah an ti. 8Cutikah a aankapawl an vonmangṭhan, 9culeh thlaan in an kir ih hi hmawhhmawh hi hleikhatpawl leh a taangpawl hemah an sim. 10Hihi tirhthlahle hemih a sim tu cu Mari Magdalene, Joanna, Jeim ih nu Mari leh anmah rum om tu numi pace an ii. 11Ihmansela hi thupawl cu an caah phenrem thuanthungaai mang a ti hngai ih an zum duh lo. 12Ihmansela Piter cu hang thoin thlaan ah a zuang; kuum in a sung a von zoh ih, sianglaraang puanpawl cu anmahte omin a hmu hngai; cutikah thilcangmi ah a donharin inn ah a ṭiin.

Emmaus Khuala ih Vahnak Lam

(Mar 16:12-13)

13Acui ni siksik ah dungzulle pahnih cu Jerusalem in peng sarih tluk hla Emmaus timi khuate laah an tat, 14culeh a cang tami cui thilpawl zate ih thuhla pakhat leh pakhat an thluktia rero. 15Thluktia in an relkhat lioah, Jesuh amah rori ni a hnaih hngai ih anmah rum an tat, 16ihmansela amah a ik an tiahthiam lo (an mit cu amah tiahthiam lo dingin vuak an ii). 17Culeh, “Nan vahnak thlurah itu nan relkhat thah rero?” tiah a ti hngai. Ngaihsia hmuihmel in an diing ciahco. 18Cuhnukah an pahnih lakih a min Kleopas a i mipa ni, “Jerusalem khua sungih khual ah nang ceu hi maw atulio hrawng acunangih a cangmi thilpawl a tiah lo tu na ik?” tiah a sawn. 19Jesuh ni, “Itu thilpawl maw?” tiah a dil hngai. Anmimi ni, “Nazareth mi Jesuh parih thilcangmi thupawl tang. Amah cu Pathian leh mipi zate hmaiah a thilti leh a aanka cu thiltikhomi profet pakhat a ii, 20culeh kan tlangbawi upapawl leh hruaitule ni thah dingih sualthuṭhen leh thinglamtah ih khentar dingah uktu hemah an ap. 21A i nain amah cu Israel tlangtu thok pa a ii ti kan ruahsan ta. Culeh ahi hmawhhmawh hleiah atu hi hi thilpawl an can in a ni thumnak a ii. 22Cu ceu iloin kan buur sungih numi hrekkhat ni donharkau a man vua. Nihinni mawpan te thlaan ah an hi, 23culeh acunangih a ruak an hmuh lo tikah an kir ih, Jesuh a nung ṭhan tiah a sim hngai tu vanmile an hmuh rori thu a man sim. 24Kanmah rum a ommi mi hrekkhat cu thlaan ah an tat ih, numile ih sim mangcun an hmu; a i nain amah cu an hmu lo,” tiah an ti. 25Cutikah, “Aw, i tluk mi-aa maw nan ik, cun profetpawl ih thantakmi hmawhhmawh zum dingah ii tluk nan harsat? 26Messiah ni hi thilpawl hi in hngai ding leh cuhnukah a sunparnak sungih a luh ding a ṭul a i lo hmen maw?” tiah a ti hngai. 27Cuhnukah, Moses leh profetpawl in thawh in, Lai Thianghlim zate sungih a ommi amah thuhlapawl ih sullam an hemah a phuansuah hngai. 28An tah lio nak khua hrial an phat ah Jesuh cu tat rih thok mangin an hmalaah a vak li. 29Ihmansela ngekngeihin an tlai ih, “Kan hemah caam kau, siimla a i samte ih ni khaw a liam vel thok hi,” tiah an ti. Curuangah anmah hemih caam ding cun a lut. 30An hemah cabuai ih caw a um tikah, sang a la, thlua a suah ih a seu, cun a zem hngai. 31Cutikah an mit a vaang, amah a ik an tiahngah; culeh an mithmuhin a hma. 32Pakhat leh pakhat, “Lam ih thu a man thluk lio leh Lai Thianghlim a man simfiang lio a’khin kan thinlung thoin a alh lo hmen maw?” tiah an ti tia. 33Curuangah, acu lioah hang tho vohvi in Jerusalem ah an kirṭhan; culeh hleikhatpawl leh an hawipile cu hmunkhatah tuaktia in an hmu. 34Anmah cu, “Bawipa cu a tho ngaingai! Simon hemah a lang!” tiah an ang rero. 35Cutikah anmimi ni khaw lampi ih thil a cang tami leh sang a seu tikah amah a ik khawtiin an tiahthiam ti thu an sim hngai.

Kaizulle hemah A Lang

(Joh 20:19-23; Tirh 1:3-5; 1Kor 15:5)

36Hi thu an thluktiak rero lioah Jesuh amah rori an lakah diingin, “Nan hemah nangamnak om kau seh,” tiah a ti hngai. 37An thlakawk in an hrul ih muithla hmu ah an ruat tia. 38Jesuh ni, “Ica’h nan ṭih-aw? Culeh ica’h nan thinlung sungah zumhrotlonak an tho? 39Ka kut leh ka ke hi zoh tu hmen uh; kamah rori ka ii hi. Ma thamin zoh uh; icatile tiksa leh ruh ngei ih a ma hmuh hngai manghin muithla ni cu a ngei le he lo,” tiah a ti hngai. 40Culeh hihi a sim hnukah a kut leh a ke a hmuh hngai. 41An lungawinak ah zum lo leh donhar rih in an om lioah, “Hinangah awkṭha itu tal ngei cu im?” tiah a ti hngai. 42Anmimi ni ngasa cucia a seute pakhat an pia; 43culeh a la ih an hmuhhngan ah a aw. 44Cuhnukah, “Hipawl hi nanmah rum ka om lioah nan hemih Moses ih Daan, Profetpawl ih laibu, cun Saam sungih ka thuhla nganmi izongza cu kim thok an ii – tiah ka ti taakmipawl khi an ii,” tiah a ti hngai. 45Cuhnukah Lai Thianghlim tiahthiam dingin an thinlung a hong hngai; 46cun, “Messiah cu ingtuar lei khawh a ni thumnak ah mithi lakin a tho thok, 47culeh sualrimnak leh sual ngaidamnak cu Jerusalem in thawh in miphun zate hemah amah ih min in sim a i thok. 48Nangmi cu hi thilpawl tiahpitu nan ii. 49Culeh zoh uh, nan hemah ka Pa ih tiammi ka thlah thok; curuangah cungla in huham rum thom nan ik hlansung cu khualipi sungin hngak kau uh,” tiah a ti hngai.

Jesuh Vankainak

(Mar 16:19-20; Tirh 1:9)

50Cuhnukah Bethani tiang a hruaisuak hngai, cun a kut hlir in thlua a suah hngai. 51Thlua a suah hngai lioah a mata hngai ih vancung ah latso a ii. 52Amah cu an bia, culeh Jerusalem ah lungawinak hnempi rum an kirṭhan; 53cun Pathian thangṭhatin biakinn sungah an om ringring.

Currently Selected:

Luka 24: KHBF

Highlight

Copy