Luka 23

Jesuh Pilat Hmaiah

(Mat 27:1-2, 11-14; Mar 15:1-5; Joh 18:28-38)

1Cuhnukah upa thurelkhawm cu a bupi in an pok ih Jesuh cu Pilat hmaiah an hruai. 2Amah sual puh thawh in, “Hi pa hi kan miphun a tahpisual, Khumpi hemih ngunkhuai piak a man kham, cun amah leh mah Messiah, siangphahrang tiah a ti tia ti kan hmuhngah,” tiah an ti. 3Cutikah Pilat ni Jesuh cu, “Nang hi Judah Siangphahrang cu na ii maw?” tiah a dil. Jesuh ni, “Acuti’n hmawh ti rom ci ee,” tiah a sawn. 4Cutikah Pilat ni Tlangbawi upapawl leh mibuur cu, “Hi pa sual puh nakding thuhram itu tal ka hmu lo,” tiah a ti hngai. 5Ihmansela, “Amah ni Galilee in a thawh ih hi hmun tiang, Judea peng hmawh hlawhin, a thuzirhnak thawngin mipi a tokhngerh hngai,” tiah ang reuri in an ti.

Jesuh Herod Hmaiah

6Pilat ni acu cu a zak tikah Galilee mi a ik leh ik lo a dil hngai. 7Culeh Jesuh cu Herod ih uknak ram sungmi a ik a tiahngah tikah, Jerusalem khua sungih Herod amah rori a om lioah Jesuh cu a hemah a thlah. 8Herod ni Jesuh a hmuh tikah a ngetia vuai, icatile Jesuh thu a zata rom ih amah hmuh a dawtnak caan a saupi vel, hmuhsaknak a vuak hmuh thok khaw a ruahsan thah. 9Herod ni hla ngai thu a dil, ihmansela Jesuh ni a let lo. 10Tlangbawi upapawl leh daanzirhtule ni a hrialah diingin tiakpiin sual an puh. 11Herod hman ni a ralkaple rum Jesuh cu nihsairawnnak leh hmuhsitnak in an ti; cuhnukah angkitual mawi ngai khawhsak in Pilat hemah a kuat ṭhan. 12Acu ni ah Herod leh Pilat cu pakhat leh pakhat rualpi ah an cang; acu hlan cu ral an ita.

Jesuh Thah dingih Thuṭhen

(Mat 27:15-26; Mar 15:6-15; Joh 18:38b—19:16a)

13Cutikah Pilat ni tlangbawi upale, hruaitupawl leh mipi ko khat hngai in, 14“Hi pa hi mipi tahpisual tu pakhat in ka hem nan phatpi; nan hmuhhngan a’hin thu ka kherhlai ih amah sual nan puhmipawl pakhat hman hi pa ni a sual ti ka hmu lo. 15Herod ni khaw a hmu lo, icatile kan hemah a thah ṭhan. A ngaingai a’cun ani ni thihnaktlak sualnak ituhman a vua lo. 16Curuangah velsak hngai lang khawh ka thlah thok,” tiah a ti hngai. (17Puai san ah thawngtla pakhat a suah piak hngai bil.) 18Cutikah an zate ni, “Hi pa hi cu thi kau seh! Barabbas tu man thlahpiak!” tiah an ti. (19Barabbas cu khuapi sungih a cang tami ralthawhnak leh mithah ruangah thawng ih thlak taak mi a ita.) 20Pilat ni Jesuh thlah dawt ah thu a sim hngai ṭhan; 21ihmansela, “Thinglamtah ah khengtar, amah cu thinglamtah ah khengtar,” tiah an au reuri. 22Pilat ni, “Ica’h hmen? itu thilṭhalo a vua ah? Thah dingih thuṭhen piak ding ca’h thuhram itu tal ka hmu lo; curuangah velsak hngai lang khawh ka thlah thok,” tiah a ti hngai. 23Ihmansela Jesuh cu thinglamtah ah khengtar ih thah ding a ii tiah hek riangro in an dil; culeh an aw ni a hretngah. 24Curuangah Pilat ni an dilmi cu piak i dingah thu a sat. 25An dilmi pa, ralthawhsak leh mithah ruangih thawngthlak mipa cu a thlah, culeh Jesuh cu an dawtpasang ih ti dingin a ap hngai.

Thinglamtah ah Khentarnak

(Mat 27:32-44; Mar 15:21-32; Joh 19:16b-24)

26An tahpi mianmi thah ah Sairin khuami Simon, khuate lain a pha tu pa cu an ponla, culeh thinglamtah cu a parah an taang ih Jesuh ih dung in an putsak. 27Mi tlungpi ni amah cu an zul, acupawl lakah an ṭaang cuumtiain a ṭap rero tu numile an om. 28Ihmansela Jesuh ni mertia in, “Jerusalem tianule hngai, kei ma ṭah loin nanmah leh nan tiale ca’h ṭap uh. 29Icatile, ‘Micing, naupai thah lo mipawl, cun hnawiti mi tul thah lo tu mipawl cu mithluasuak an ii’ an timi nipawl an pha teuti thok. 30Cutikah tlangpawl hemah, ‘Man tlaknon uh’ ti’n, culeh mualpawl hemah, ‘Man khum uh’ tiah an ti leh thok. 31Thing a hrin lio ih hiti’n an ti a’cun, a rawt tikah itu cang lei hmen?” tiah a ti hngai. 32Thahtlak misualle a imi a pacele pahnih khaw Jesuh rum thah khat dingah an hruai. 33Luruh timi hmun an phat tikah acunangah Jesuh cu thahtlak misualle rum, pakhat a vorhla ah, pakhat a kehla ah, ti in thinglamtah ah an khengtar. [34Cutikah Jesuh ni, “Ka Pa, ngaidam hngai law, icatile itu an vuak khaw an tiahtia lo,” tiah a ti. Culeh a partlai zemtia dingah tlinhngal an dawk.] 35Culeh mipi ni a hrialah diingin an zoh langlang; ihmansela hruaitule ni cu sirsatin, “Mipacepawl hmawh a rung hngai hin; Pathian ih Messiah, a rilmi i na taw ah, amah leh mah rungtia sela hetein!” tiah an ti. 36Ralkaple ni khaw an hmuhsit, a hemah phain sabitti a ṭiomi an tul, 37culeh, “Judah Siangphahrang na ik a’cun namah leh mah rungtia tu hmen!” tiah an ti. 38A lu cungah, “Hihi Judah Siangphahrang a ii,” tiih laitaarmi khaw a om. 39Acunangih thlaimi thahtlak misualle lakih pakhat ni Jesuh cu sirsatin, “Nang hi Messiah na i lo hmen maw? Namah leh namah rungtia la, cun keimi khaw man rung!” tiah a ti. 40Ihmansela misual pace pa ni cu a hriingṭon ih, “Pathian na hrul lo maw? Sualthuṭhennak a sakhatmi tangah na om hi! 41Keimi cu a ngaingai ah hmaantein sualthuṭhen kan ii, icatile kan thiltimi caah kan ngah ding tlak kan ngahkau, a i nain hi pa hi cu thilsual ituhman a vua lo,” tiah a ti. 42Cuhnukah, “Jesuh, na uknak sung na luh tikah ma ciing ringring lei ci maw,” tiah a ti. 43Jesuh ni, “Thungaiin ka tan sim, nihinni ah kei rum Paradise ah na om thok,” tiah a ti.

Jesuh a Thi

(Mat 27:45-56; Mar 15:33-41; Joh 19:25-30)

44Sunbir hrawng a ii; culeh sunhnuk nazi pathum tiang cui ram punpuhluk ah sunkhuamaw a tlung, 45ni a tlan lo lio a ii; cun Biakinn puanzaar cu pahnih ah a tleek. 46Cutikah Jesuh cu tiakpiin a au ih, “Ka Pa, na kut sungah ka thlarau ka tan ap,” tiah a ti. Acu cu a aan uh in a thaw a deng. 47Ralkapzabawi ni thilcangmi a hmuh tikah, Pathian a thangṭhat ih, “Hi pa hi cu sualnak ngeilo a i hrimhrim,” tiah a ti. 48Culeh mipi zohnuam zoh dingah acunangih a vong suak khat tu mibuurpawl an zate ni thilcangmi an hmuh tikah, an ṭaang cuumtiain an ṭiin. 49Ihmansela Galilee peng in amah zultu numile telin, Jesuh ih mitiahthiamle cu lam hla nawn ah diingin hi thilpawl hi an zoh langlang.

Jesuh an Vui

(Mat 27:57-61; Mar 15:42-47; Joh 19:38-42)

50Josef timi miṭha leh miding, tlangsuak sungtel a i nain 51an khuakhang leh tehcah lungkimpi hngai lo tu a om. Amah cu Judah mipawl ih khua Arimathea in a pha, Pathian uknak lakhlahngaiin a hngak berbo tu a ii. 52Ahi pa ni Pilat hemah tatin Jesuh ih ruak cu a dil. 53Cuhnukah ruak cu a ṭhum, sianglaraang puan in a zawl, cun ahuhman vui thah rih lonak lungkermi thlaan sungahcun a vui. 54Tuahtimtiak ni a ii ih, sabbath ni a thawh vel. 55Galilee in Jesuh rum a pha tu numile ni Josef cu an zul, culeh thlaan leh Jesuh ruak khawtiih vui a ik cu an hmu. 56Cuhnukah an kir, cun rimhmui leh thathau an zaal. Sabbath ni ahcun thukhaam mangin an cawl-om.

Currently Selected:

Luka 23: KHBF

Highlight

Copy