Seemthawhnak 19

Sodom ih Rawhcahnak

1A siimla ah vanmi pahnih Sodom ah an pha, Lot cu Sodom khuasuah kotka ah a to. Lot ni a hmuh hngai tikah anmah tuak hngai dingin a tho, cun khur ah a bok. 2“Ka bawipale hngai, naktiahte’n, a tan rian hngai tu ka inn laah mertia’n zan caam hram u la, cun nan ke ṭawltia uh; cuhnukah tuanpan thoin nan lamtah nan peh lei cu,” tiah a ti hngai. Anmimi ni, “I hlah; zan cu khualak raaka ah kan caam thok,” tiah an ti. 3Ihmansela ngekngeihin a inn ah a caamsak hngai reuri ruangah mertia in a inn ahcun an lut. Culeh colnu phulh lo sang roin pipangaiin a do hngai ih anmimi ni an aw. 4Ihmansela an zau hlanah Sodom khua sungih a ommi pamipawl a no a hraam ti lo, pami an zate ni inn cu an ulkim. 5Culeh Lot cu, “Nihin zan na hemih a tan tlung tu pamile khi khaw’h an he? Hei suah hngai la kan metpi thok,” tiah an ti. 6Lot ni sangka ah tatin a khar taak hnukah, 7“Ka ulenaule hngai, acumang ṭhatlonak cu vua sawh hla’uh tiah ka tan ngeen hngai. 8Zoh hman uh, pami a tiah rih lo tu tianule pahnih ka ngei hngai; ka hei suah hngai lei ih nan dawtpasang in ti tia kau uh; hi pamile zong hi cu ka luangpi tangih an phat rom ruangah ituhman ti hla’uh,” tiah a ti hngai. 9Ihmansela anmimi ni, “Man pial! Hi pa hi misiingpi in ahinang pha hratin thuṭhentu a ṭuan hi tang! Anmah van siasawn in tan ti pang le hu khawh,” tiah an ti. Cuhnukah Lot ralsanin sangka cu tiakpiin an von nam ih bauh khaai in an hnaih. 10Ihmansela pamile ni an kut hei suah in, cun an hem inn sungah an von dawk ih sangka cu an hei khar ta. 11Cun sangka ih a om mipawl a tiin a hnem ti lo an mit cawkau an vua ih sangka an hmu kho ti lo.

Sodom leh Gomorrah Siatsuahnak

12Cutikah pamile ni Lot cu, “Mi pace ahu tal na ngei maw? Tupale, tiapale, tianule, ik lo ah khua sungih ahu tal—hi khua hin suahpi hngai. 13Icatile hi hmun hi kan siatsuah vel thok, an mipawl ih aunak cu Bawipa hmaiah a nasat tuk rom ruangah siatsuah dingin Bawipa ni kanmah hi a man thlah rom,” tiah an ti. 14Curuangah Lot cu suak hratin a tianule a pi thok tu a tupale cu, “Tho uh, hi hmun hin suak uh; icatile Bawipa ni khua hi a siatsuah vel thok,” tiah a ti hngai. Ihmansela a tupale ni cu a puarthau hngai men ah an ruat.

15Mawla khua a ṭheh in vanmile ni Lot cu, “Hang tho, na nupi leh hinang ih a ommi na tianule pahnih thiarta hngai; culocu hi khua dantatnak sungah an tan kancih thok,” tiah an ti. 16Ihmansela a nolnawk; curuangah pamile ni amah leh a nupi leh a tianule pahnih cu an kut in an tlai, Bawipa ni a naktiah hngai ih an hei suahpi hngai, cun khua pawnla ahcun an mata hngai. 17Khua pawnla ih an hei suahpi hngai a’khin, “Nan nunnak ca’h leeu uh; dungla zoh ta hla’uh, iklole Hmunrawn khawnangah maw diingpah hlah uh; tlang lakah leeu uh, culocu an tan kancih thok,” tiah an ti. 18Culeh Lot ni, “I hlah e, ka bawipale hngai; 19nan mithmaiṭha ka co rom ih, ka nunnak nan runnak a’hin nan tungsau hi ṭhatnak a ma hmuh hngai rom; tlang laah ka leeu kho thok lo. Siatsuahnak ni ma man in thih pang lei ka phang. 20Zoh hman uh, zuan nakdingah a naite, khua tiinte khaw a ii. Acuna’h cu luat dingin zuang lang—khuate a i lo hena’m?—ka nunnak khaw a him thok a ii,” tiah a ti hngai. 21Vanmi ni, “Ṭha ngai hmawh ee, na ngenmi cu khaw ka naa a tlakau, na timi khua cu ka siatsuah lei lo. 22Hnawtia, acuna’h luat in zuang, icatile acunang na phat hlansung ii hman ka ti thiam thok lo,” tiah a ti. Curuangah acui khua cu Zoar#19:22 Zoar ti cu Tiinte tican. tiah kawh a ii. 23Zoar ah Lot a phat a’khin vulei parah ni a suak rom.

24Cuhnukah Bawipa ni Sodom leh Gomorrah parah vancung in kaat leh mei a zuksak; 25cun acui khuapawl leh Hmunrawn zate leh khua sungih omhlungle an zate leh khur parih a keeumi cu a siatsuah hngai. 26Lot ih nupi zong cu a dungla a zoh ta ih cite ṭhuam ah a cang.

27Abraham cu Bawipa hmaika ih a diin taak nak hmun ahcun mawpan ah a tat; 28culeh Sodom leh Gomorrah leh Hmunrawn ram hmawhhmawh a zoh ih acui ram ih meikhu mangin a hang kai a hmu.

29Cuticun, Pathian ni Hmunrawn khuapipawl a siatsuah hngai tikahkhin a ii. Pathian ni Abraham cu a mang, cun Lot cu a omhmun khuar taak nak khuapipawl a siatsuah piak tikahkhin siatsuahnak lak cun a suahsak.

Moab leh Ammon ih Thawhkehnak Ningzakṭha

30Lot cu Zoar cun a hang kai ih a tianule pahnih rum tlang ram ahcun omhmun an khuar, Zoar ih om an ṭih ruangah a tianule pahnih rum cu lungkuak sungah an om. 31Culeh upanu ni nautadeuh hemah, “Kan pa hi a hraam vel, cun vuleipi zate ih daan mangin kanmah a man pha tu ding pami pakhat hman vulei parah an om lo. 32Ma pha hnik la, kan pa hi zu tul le hekhawh, amah thawngin ciitlang ngei dingah kan metpi thok,” tiah a ti. 33Curuangah acui zan cu an pa zu an tul; culeh upanu lutin a pa a metpi; a pa ni cu a tianu khawcangih a met leh khawcangih a thawh a tiah lo. 34A zingla ah upanu ni nautanu hemah, “Zoh hman, rangan zan ah ka pa ka metpi. Nihin zan khaw zu tul le hekhawh nang lutin na metpi thok, cuticun kan pa thawngin cithlah a ngei taw he,” tiah a ti. 35Curuangah acu zan khaw an pa cu zu an tul; nautanu cu thoin a lut ih a pa a metpi; culeh a pa ni khawcangih a met leh khawcangih a thawh a tiah lo. 36Cuticun Lot ih tianule an pahnih cu an pa thawngin nau an pai. 37Upanu ni tiapa a hring ih a min ah Moab a vawh; ani cu nihinni tiang Moab mipawl hringsartu a ii. 38Nautanu ni khaw tiapa a ngei ve ih a min ah Ben-ammi a vawh; ani cu nihinni tiang Ammon mipawl hringsartu a ii.

Currently Selected:

Seemthawhnak 19: KHBF

Highlight

Copy