Seemthawhnak 18

Isaak Suah thok Thutiam

1 Bawipa cu Abraham hemah, sun ni sat lio Mamre ih khukkhih kung hrial a puamthlam sangka ih a to lioah a lang. 2Khua a zoh ih mi pathum a hramah diingin a hmu hngai. A hmuh hngai tikah anmah tuak hngai dingin a puanthlaam sangka cun a zuang ih khur ah a bok. 3“Ka bawipa, na mithmaiṭha a co ka ik a’cun na sal kei hi ma lonpah sawh hlah. 4Ti tlawmte latsak in nan ke ṭawltia u la, cun thingkung tangah cawlhnga uh. 5Nan tha tlungṭhan dingah sang tlawmte tan lat hngai lang, cun acuhnukah nan tat lei cu—nan tungsau ka hem pha rom hluan cu’n,” tiah a ti hngai. Curuangah anmimi ni, “Na sim rom mangin vua kau tu,” tiah an ti. 6Culeh Abraham ni a puanthlaam sungih Sarah hemah a luh caal ih, “Na tangṭha sangvut tah thum in suak la, ning in vua in sang ah ro,” tiah a ti. 7Abraham cu a cawperun hemah a zuang ih cawpesuan thau leh mawi pakhat pon in a sal a pia, ani ni a tuahtim caal. 8Cuhnukah cawhnawi thawphat leh cawhnawi leh a tuahtimmi cawpe sa cu Abraham ni a la, cun an hmalaah a hlun hngai; culeh an awk lioahcun an hrial, thingkung tangah a diing.

9Culeh anmimi ni, “Na nupi Sarah teh khaw’h a he?” tiah an ti. Culeh ani ni, “Puanthlaam sungah cu,” tiah a ti hngai. 10Cutikah pakhat ni, “Atu khuk ah ka tan pha ṭhan teuti thok, culeh na nupi Sarah cu tiapa a ngei thok,” tiah a ti. Sarah ni Abraham dungla, puanthlaam sangka in an aan a ngai hngai. 11Abraham leh Sarah cu an hraam, an kum a ucang ngai vel; Sarah cu a numi daan a deng rom. 12Curuangah Sarah ni amah leh mah nihtia in, “Ka hraam rom hnukpi, cun ka pumah khaw a hraam hnukpi ah ka nuamtia lei maw?” a ti. 13Bawipa ni Abraham cu, “Ituruangah Sarah a nihtia ih, ‘Atu ka hraamla ah maw nau ka ngeih taktak lei?’ tiah a ti. 14Bawipa ca’h a har tukmi itu thil a om hmen? Teekmi caan, atu khuk ah na hemah ka kirṭhan thok, culeh Sarah cu tiapa a ngei thok,” tiah a ti. 15Ihmansela Sarah ni pheh in, “Ka nihtia tal lo ee,” tiah a ti; icatile a thin a phang. Ani ni, “Na nihtiakau hin,” tiah a ti.

Sodom parih Thuṭhennak

16Cutikah mile cu acunang cun Sodom laah an pok ih Abraham ni a thlah hngai. 17Bawipa ni, “Ka thilti khaihmi hi Abraham hemin ka tleem thok a he maw, 18Abraham le miphun pipa leh dik ah a cang thok, cun vulei parih miphun hmawhhmawh cu amah a’hin thluasuah an i thok ti le ka hmu hekhawh? 19Tleem hlah e, icatile a tianaupawl leh a innsang cu amah hnukah dingnak leh dinghmaannak ṭuan in Bawipa ih thu zul dingih cah hngai dingin ka ril rom; cuticun Bawipa ni Abraham hemih a tiam rommi cu a phatsak taw,” tiah a ti. 20Cuhnukah Bawipa ni, “Sodom leh Gomorrah ralsanih aunak cu a pipa ngaingai, an sualnak khaw a rauh ngaingai! 21Zong ṭum hnik lang khawh ka hemih a phami aunak mangin an ti maw ti lo zoh hnik lang; cun a ik lo a’cun ka tiah kau thok,” tiah a ti.

22Curuangah mile cu acunang cun an kir ih Sodom laah an tat, Abraham cu Bawipa hmaikaah a diing ciahco. 23Cutikah Abraham ni hnaih in, “Miding cu miṭhalo rum maw na siatsuah cih taktak lei? 24A thuna ah, khuapi sungah miding sawmnga an om i sela; a sungih ommi minung sawmnga cu ngaidam lo’n a khua cu na siatsuah lei maw? 25Miding cu miṭhalo mangin a tuar taw ti’h, miding khi miṭhalo rum thah khat ding cu, acumang cu na ti ding i hrimhrim hlah seh! Acumang ni tan hlatpi hram seh! Vulei cung pi Thuṭhentu ni a dinghmaanmi cu a ti thok lo hmen maw?” tiah a ti. 26Culeh Bawipa ni, “Sodom khua sungah miding sawmnga ka hmuh a’cun anmah ruangah khua punpuhluk ka ngaidam kau thok,” tiah a ti. 27Abraham ni, “A kei leivut leh vutcaam kaupi ni Bawipa na hemah ang sawh lang. 28A thuna ah, miding sawmnga sung cun panga bau thok u sela teh? Panga bau ruangah khuapi punpuhluk cu na siatsuah kau lei maw?” tiah a ti. Ani ni, “Acunangah mi sawmli panga ka hmuh hngai a’cun ka siatsuah lei lo,” tiah a ti. 29Abraham ni a hemah a ang ṭhan ih, “A thuna ah sawmli hmuh ii u sela teh?” tiah a ti. Ani ni, “Sawmli caah ka siatsuah thok lo,” tia a sawn. 30Cutikah Abraham ni, “Ka aan tikah Bawipa ni ma hehhar hram hlah se law. A thuna ah sawmthum hmuh ii u sela teh?” tiah a ti. Ani ni, “Sawmthum ka hmuh a’cun ka ti thok lo,” tiah a sawn. 31Abraham ni, “Bawipa, namah hemah ang sawh lang. A thuna ah kul hmuh ii u sela teh?” tiah a ti. Ani ni, “Kul ruah ah khua cu ka siatsuah lei lo,” tiah a ti. 32Cutikah Abraham ni “Voi khat la ka aan rih a’cun Bawipa ni ma hehhar hram hlah seh. A thuna ah pahra hmuh ii u sela teh?” tiah a ti. Ani ni, “Mi pahra ruah ah khua cu ka siatsuah lei lo,” tiah a sawn. 33Cutikah Bawipa cu Abraham hemih a aan a uh in amah lam cu a tat; culeh Abraham cu amah omnak ah a kir.

Currently Selected:

Seemthawhnak 18: KHBF

Highlight

Copy