Seemthawhnak 17

Thukam Khithmuhtu

1Abram sawmkua leh kum kua a kim tikah Bawipa cu Abram hemah a lang ih, “Kei cu El Shaddai#17:1 El Shaddai Hebru ahcun Zongzatikho Pathian tican. ka ii; ka hmaikaah nungcang la, soibei ii. 2Culeh nang leh kei lakkarah thukam ka vua thok, cun hrinsar tam vuai ka tan ngeihsak thok,” tiah a ti. 3Cutikah Abram cu khur tongin a kuum; culeh Pathian ni, 4“Hihi nang rum ka thukam cu a ii: Nang hi miphunpawl tamngaipi hringsartu na i thok. 5Na min hi Abram#17:5 Abram Hebru ahcun Sunloih mi an Pa tican. a i ti thok lo, na min cu Abraham#17:5 Abraham Hebru ahcun Miphun tampi ih Pa tican. a i thok; icatile miphunpawl tamngaipi ih hringsartu ah ka tan vua rom. 6Pungzai vuai in ka tan vua thok; cun na sungin miphun tampi an zong om thok, cun siangphahrangle khaw na hemin an zong om leh thok. 7Nang leh kei kan lakkarih thukam, cun namah hnukih na ciitlangpawl an san sung hmawh ah, namah leh na hnukih na hrinsarle ih Pathian i dingah timi kumkhua hmunmi thukam cu ka dinṭho thok. 8Cun namah leh mah hnukih na ciitlangle hemah, atu ih tluangmi na ik nak ram, Kanaan ram a zate hi kumkhua ngeihtiak dingah ka tan ṭhen hngai thok; culeh kei cu an Pathian ka i thok,” tiah a ti.

9Pathian ni Abraham cu, “Nang cu ka thukam na zul thok, nang leh na hnukih na ciitlang ni an san sung hmawh an zul thok. 10Nang leh na hnukih na ciitlang rum kan lakkarih nan zulh dingmi ka thukam cu hihi a ii: Nan lakih pami hmawhhmawh phawzim ṭhawh nan i thok. 11Nan phawzim nan ṭhottia thok ih acu cu nang leh kei kan lakkarih thukam khithmuhtu a i thok. 12Na san sung hmawh cu na inn ih hringmi sal leh na ciitlang a i lo mi khaw na tangka ih leimi ramdangmi ahupoh telin, nan lakih pami cang ni riat a kim tikah phawzim ṭhawh a i thok. 13Na inn ih hrinmi sal leh na tangka ih lei mi an pahnih in phawzim ṭhawh an i thok. Cuticun ka thukam cu nan tiksa sungah kumkhua thukam a i thok. 14Ahu mang pami khaw a tiksa phawzim ṭhawh a i lo mi cu a miphun lakin phiat a i thok; ka thukam a rawhsak,” tiah a ti.

15Pathian ni Abraham cu, “Na nupi Sarai cu Sarai tiah na ko thok lo, a min cu Sarah#17:15 Sarah ti cu Siangphahrang Tianu tican. a i thok. 16Amah cu ka thluasuah thok, cuhleiah amah thawngin tiapa ka tan pia thok. Amah ka thluasuah thok ih miphunpawl a suahsak hngai thok; amah sungin siangphahrangle khaw an suak thok,” tiah a ti. 17Cutikah Abraham cu a hmai khur tongin a kuum ih a nihtia. Culeh amah leh mah, “Kum 100 a timi mipa ni tia a ngei kho thok hmen maw? Kum sawmkua a timi Sarah ni teh tia a ngei kho thok hmen maw?” tiah a ti. 18Culeh Abraham ni Pathian cu, “Ishmael hi na zokhennak thawngin nungdam hram sela cu maw!” tiah a ti. 19Pathian ni, “I hlah, na nupi Sarah ni tiapa a tan hrin thok, cun a min ah Isaak#17:19 Isaak ti cu A Nihtia tican. na vawh thok. Amah rum ka thukam cu kumkhua hmunmi thukam diinhmun in amah hnukih a ciitlang ca’h ka dinṭho thok. 20Ishmael ca’hcun ka tan za rom; ka thluasuah thok ih tam hleihluanngai pungzai in ka vua thok, uktule hleihnih ih pa a i thok. Cun miphun pipa ah ka vua thok. 21Ka thukam zong cu hmai kum ahi cangkhuk ih Sarah ni a hrin thokmi tiapa Isaak rum ka vua thok,” tiah a ti. 22Culeh Abraham rum an biaktiak uh in Pathian cu Abraham hemin a hang kai.

23Cuhnukah Abraham ni a tiapa Ishmael leh a inn ih hrinmi sal an zate leh a tangka ih leimi, a inn ih pami cang, Pathian ih sim mangin acui ni rori ah an phawzim a ṭhot hngai. 24Abraham cu a phawzim a ṭhawhtiak ah sawmkua leh kum kua a ii. 25Cun a tiapa Ishmael cu phawzim ṭhawh a ik a’khin kum hleithum a kim. 26Abraham leh Ishmael an patia an phawzim ṭhawh tiak ni rori ah 27a inn ih hrinmi salpawl leh ramdangmi hemin tangka ih leimi salpawl pami an zate amah rum phawzim ṭhawh an ii.

Currently Selected:

Seemthawhnak 17: KHBF

Highlight

Copy