MARK 15

Pilat Hnenah Jesuh Fehpui I

(Mat 27:1, 2, 11-14; Luk 23:1-5; Joh 18:28-38)

1Zingniu in Suangbawi upate tu a dang upate, Danthiam mite, thukhantu Council upate thawn rang ngai in taikhawm ai thuruat tlang i. Jesuh tu thir cikcin thawn fehpui ai Pilat kut ah pe tlang i. 2Pilat in, “Judah kumpibawi i aw sim?” tiin zawt i.

Jesuh in, “Nangmah in ti i si!” tiin sawn i.

3Suangbawi upate in Jesuh tu sual a phunphun puh tlang i. 4Ciamanin Pilat in, “Anite thu heh sawn tuh lo isim? Anite sualpuhhnak hmuahhmuah heh ngai tucuk,” tiin ti lala i.

5Jesuh tu pong nuam thotho lo ai Pilat tu a ngaihtam ngai i.

Jesuh Rek Tuhin Relcat Tlang I

(Mat 27:15-26; Luk 23:13-25; Joh 18:39—19:16)

6Kansuak Puai poh ah kum siar in Pilat in thawngto mite lakah mizapui ai ngenhnak khiah hlat de i. 7Cialai ah Barabbas tihnak, raltho laiah mi a rek awngtu pa tu a dang ralthotute thawn thawng ah toh tlang i. 8Mizapui suak ai kum siar a bawn kel de bangin thawngto suah tuh Pilat hnenah zawt tlang i. 9Pilat in, “Judah kumpibawi heh ning hlat sah inglai ning daih awm?” tiin zawt i. 10Pilat in a hnenah amahte pehnak Jesuh tu Suangbawi upate in Jesuh a iksik manin i, ti khiah ling hiar hlen i.

11Ikhalselai Pilat in Barabbas sawn hlatruai tuhin suangbawi upate in mizapui heh forh cia i. 12Pilat in zawt lala ai, “Ciatih ilekhaw Judah kumpibawi ning tihnak pa tu akontih in bawn tuh ning daih i?” tiin ti i.

13Anite in, “Thinglamteh vumah rek tu!” tiin au tlang i.

14“Ziang sualhnak bawn i?” tiin Pilat in zawt lala i.

Anite in, “Thinglamteh vumah rek tu!” tiin roh amam in au tlang i.

15Pilat in mizapui lungkhimhnak bawn a nuam manin anite caah Barabbas hlat i. Cen Jesuh tu vitruai ai thinglamteh vumah rek tuhin amahte kut ah pe i.

Ralkapte In Jesuh Zohsuamhnak

(Mat 27:27-31; Joh 19:2-3)

16Ralkapte in Jesuh tu Mangki bawipa ai tualvan ah lutpui ai mizapui dangte khai ko tlang i. 17Jesuh tu pon san silruai i; hling in lukhuk bawn ai a lu ah khuruai i. 18Cen salam pe tlang ai, “Judah kumpibawi a nun sau tuseh!” tiin au tlang i. 19A lu ah fungkek in vit tlang i, cil thuih i, khuk caicin ai a hmaiah tun le tunin lu ut tlang i. 20Ciatihin zohsuam ben fangin pon san a silruaihnak hawk ai amah ai hnikpon khiah silruai leh i. Cen thinglamteh vumah khen tuhin fehpui tlang i.

Jesuh Rekhnak

(Mat 27:37-44; Luk 23:26-43; Joh 19:17-27)

21Lam lakah Simon tihnak pa tawk i. Ani tu khuatenau in khuapui ah a kawitu i ai ralkapte in Jesuh ai thinglamteh khiah khengkhebel in phurruai i. Simon tu Cyrene#15:21 Cyrene tihnak tu Cyrene tihnak i ai cia laiah Libya khuapui i. khuami i ai Alexander le Rufus ai pa i.#Rom 16:13 22Jesuh tu Golgotha tihnak hmunah hlenpui i, Golgotha tihnak tu “Luruh hmun,” tica i. 23Ciata ah cabitti, mura tihnak si thawn roih ai pe tlang i, ikhalselai Jesuh in ding nuam lo i. 24Cia hnuaah thinglamteh ah khen ai camciafung duk in a hnikpon zem tlang i.#Saam 22:18 25Ciatihin a khen heh zing lam nazi pakua i. 26Amahte sualpuh laitarhnak tu, “Judah Kumpibawi,” ti i. 27Amah thawn hmunkhat ah rukote pahnih, a kiahhan lamah pakhat, a kekeh lamah pakhat rek kawm ve i. 28Lai Thianghlim in ani tu misual lakah telh cih i, tihnak khimhnak tuhin i.#Isa 53:12

29Suk le so a vaktute inkhai cim tuseh tiin imm tlang ai lu nem in zohsuam tlang i. “Nang tu Biakinn bal in ni thum songah a sa leh tumtu pa ilo sim?#Saam 22:7; 109:25; Mar 14:58; Joh 2:19 30Tun thinglamteh vuman tolh tulai nangmah le nangmah o tucuk!” tiin ti tlang i.

31Ciabang thotho in suangbawite le Danthiam mite in Jesuh tu hnihsan tlang ai, “Midang tu o napui amah veve tu o ben lo i. 32Israel kumpibawi, Messiah tu thinglamteh vuman tun rori ah a tolh khiah hmu singlai sang tuh napui ising,” tiin pakhat le pakhat ti dun i.

Cen amah thawn thinglamteh vumah khenmi pahnih te inkhai zohsuam kawm ve i.

Jesuh Thi I

(Mat 27:45-56; Luk 23:44-49; Joh 19:28-30)

33Sun laitak ah cia ram pumpuhluk ah nazi pathum song khuathimpui tlung i. 34Zan lam nazi pathum ah Jesuh tu, “Eloi, Eloi, lema sabachthani!” tiin cawm roh in au ruangro i. A sullam tu, “I Pathian, i Pathian, zaimanin i hlum isi?” tica i.#Saam 22:1

35Ciata ai a umtu hrekkhat in za ai, “Ngai tu ih, Elijah ko ina e!” tiin ti tlang i. 36Mi pakhat dawp vurvo ai ponher khiah cabitti songah ciah ai fung ah pencih hnuaah Jesuh ka ah mat i; “Iang rih tu ih! Thinglamteh vuman hla tuhin Elijah kawi maw kawi lo sik tuh ising,” tiin ti tlang i.#Saam 69:21

37Jesuh tu a rohpui in au ai a nunhnak bo i.

38Cia sawng fangin Biakinn ponzar khiah a vum lamin a hnia lam tian a tumpet in zik i.#Luat 26:31-33 39Thinglamteh hmaicang ai a dingtu ralbawi pa in Jesuh thi a hmu fangin, “Hemi pa tu Pathian Fapa ngaingai i!” tiin ti i.

40Ciata ai nupangte hrekkhat in lam hla thah in cuan tlang i. Anite tu Mary Magdalene, James nauta sawn le Joses ai nu Mary, le Salome i.

41Jesuh tu Galilee ramah a um laiah a hlun awngtute le a bawm awngtute i. Jesuh thawn Jerusalem ah a hlengtu a dang nupangte tampui khai um tlang i.#Luk 8:2-3

Jesuh Vui I

(Mat 27:57-61; Luk 23:50-56; Joh 19:38-42)

42Zan lam i hang, sabbath nia hleng hlan Paicia Nia i. 43Cen Arimathea khuami Joseph hleng i. Ani tu thukhantu Council upate lakah upatmi songtel i ai Pathian Ukhnak hleng tuh khiah a umlamtu i. Joseph tu ralpha ngai in Pilat hnenah lut ai Jesuh luang khiah ngen i. 44Pilat in Jesuh thi zo i, ti a ling fangin a ngaihsunur i. Ralbawipa ko ai, “Jesuh a thihnak rai aw hang im?” tiin zawt i. 45Jesuh thi zo i, ti ralbawipa hnenin a za fangin Pilat in Jesuh luang heh Joseph langruai i. 46Joseph in pon nemniu lai ai Jesuh luang heh thinglamteh vuman hla ai pon in a tuam hnuaah lungraihnak hlan ah phum i. Cen lungtleppui in hlankua heh sin i. 47Mary Magdalene le Joses nu Mary in a hiang in sik kawm ve ai Jesuh luang a dahhnak heh hmu kawm i.

Currently Selected:

MARK 15: RZB

Highlight

Copy