MARK 16

Tholehhnak

(Mat 28:1-8; Luk 24:1-12; Joh 20:1-10)

1Sabbath nia a bo hnuaah Mary Magdalene, James nu Mary le Salome in Jesuh luang mat tuhin yihmui lai tlang i. 2Nipui ninghla, khua hma niu nisuak dung fangin hlan ril feh tlang i. 3Lamlak ah vak kongin, “Hlan khamhnak lungtleppui tang aisu in kin thawn sah tuh ini?” tiin pakhat le pakhat ti dun i. 4Ciami lung tu lungpek a tleppui i. Cen anite sik fangin lungtleppui tu a thawn zo in hmu tlang i. 5Hlan songah lut tlang ai tlangval pakhat pon ngo sil in kiahhan lam nak ah a to khiah hmu ai thinlau tlang ngai i.

6Ani in, “Ning thinlau mah ih! Thinglamteh ah amahte rekhnak Nazareth Jesuh si tlang i si, ti ning ling ing. Heta ah um nawn lo i, tho leh zo i. A dahhnak hmun heh sik tu ih. 7Feh tu ilai a hnuahlunte le Peter khiah ‘Ning hmaiah Galilee ah feh tuh i. Ciata ah ning hnenah a relciahnak bangin hmu tlang tuh i si,’ tiin rel tu ih,” tiin ti i.#Mat 26:32; Mar 14:28

8Ciatihin suak ai hlan in thinlau le tihik in dawp tlang i. Anite tu lau ze manin aisu hnen ahkhai zaikhai rel tlang lo i.#16:8 Mark Thuthangpha hmasa ber lam nganhnak kutngan laihnahzual song ahcen 16:8 heh a bohnak i. Hnuata nganhnak songah 16:9-20 tian um i.

MARK THUTHANGPHA A TAWPHNAK SAU

Mary Magdalene Hnenah Jesuh Lar I

(Mat 28:9-10; Joh 20:11-18)

[9Nipui nia ah thihnak in Jesuh a tho hnuaah a hmasaber ah Mary Magdalene hnenah lar i; Mary Magdalene tu a songin khuasia pasarih a hnawtsuakmi nupang nu i. 10Mary Magdalene tu feh ai a rualpuite rel i. Ciamite tu Jesuh thi manin mithi ngai in kap tlang hnelhno i. 11“Jesuh nung leh zo i, hmu ing!” tiin a rel fangin sang tlang lo i.

Hnuahlunte Pahnih Hnenah Jesuh Lar I

(Luk 24:13-35)

12Cia hnuaah Jesuh tu hnuahlunte pahnih khuatenau lamah a feh kawm laiah phundang in anite hnenah lar i. 13Let kawm ai midangte khai rel kawm i, ikhalselai anite inkhai sang tlang lo i.

Hnuahlunte Hlaikhat Hnenah Jesuh Lar I

(Mat 28:16-20; Luk 24:36-49; Joh 20:19-23; Nal 1:6-8)

14Hnuataber ah Jesuh tu hnuahlunte hlaikhat rong ai tlang lakah anite hnenah lar i. Sanghnak nai lo manin le amah a nung in a hmutute sang lo ai thinlung ruh nai tlang manin hau i. 15Cen anite hnenah, “Laivum khuahacang ah feh tu ilai mi zongzong hnenah Thuthangpha rel tu ih.#Nal 1:8 16Aisu khai ituseh sang ai baptisma co lekhaw ohnak ngah tuh i. Ikhalselai sang hlah lekhaw hnawl i tuh i. 17A sangtute tu ngaihsunurkul bawnthilhnak huham pe tuh i; i hming in ramhuai hnawt ben tuh i; pong thar in pong tlang tuh i; 18rul pom inkhai ituseh, thihsi ding inkhai ituseh, zaikhai poi tuh lo i; miur vumah amahte kut suan tuhai miur heh cak tuh i,” tiin ti i.

Vancung Ah Jesuh Kai I

(Luk 24:50-53; Nal 1:9-11)

19 Bawipa Jesuh in amahte hnenah thu a rel ben fangin vancung ah lang ai Pathian kiahhan lamah to i.#Nal 1:9-11 20Cen hnuahlunte tu feh ai khuahacang ah thurel tlang i; Bawipa tu anite hnenah naper ai ngaihtamkul a bawnhnak in a thurelhnak heh a dik i, ti khiah larruai i.]

MARK THUTHANGPHA A TAWPHNAK COM

[9Nupangte tu Peter le a rualpuite hnenah feh tlang ai a linghnak thula heh a comzawng in rel tlang i. 10Cia hnuaah Jesuh amah rori in kumzangza nunohnak thu, thu nung le thu thianghlim heh nisuahhnak in nitlahnak tian a hnuahlunte hmang in than i.]

Currently Selected:

MARK 16: RZB

Highlight

Copy