THUKHANTUTE 20
20
Raltawng Tuhin Israel Ralring I
1Israel miphunte, sakta ber Dan in hlangta ber Beersheba tian, nisuah lamai Gilead ram tianin, amahte veksen in suak tlang ai thinkhat niu in Mizpah ah Bawipa hmaiah taikhawm tu liang i. 2Ciatih ai Pathian minungte a taikhawm tlang laitak ah Israel miphunte ai konghoitute khai khimniu in tel tlang sio i. Ke ralkap lek ting li i. 3Israel miphunte hmuahhmuah Mizpah ah feh sio i ti khiah Benjamin mite in ling i.
Cen Israel mite in, “Na nuzawl rekhnak thula kin rel tucuk,” tiin Levi miphun pa khiah ti i. 4Ciafangin a nuzawl rek sah mi Levi pa in, “I nuzawl le kaimah heh Benjamin ramsong Gibeah khua ah zancam tuhin feh i ing. 5Gibeah mite kawi tlang ai kaimah rek tum in kin riahbuk inn heh zan lai ah kulh sio i. I nuzawl sawn sualpui ai thi lio i. 6Ciafangin a luang phur ai i cem sio hnuaah Israel ram cangcang ah kuat ing. Hemi khua mite in thil sual le ningdulkul i vumah bawn tlang i. 7Heta ah a suaktu heh Israel mite ciang ising. Akontih in ti singlai pha tuhin ruat tlang i si?” tiin ti i.
8Ciafangin amahte veksen hmunkhat ah ding tlang ai, “Aisu khai inn tlung tuh lo ising. Hlam songai a umtu inkhai, inn ngaingai songai a umtu inkhai, tlung tuh lo ising. 9Kin bawn tuhhnak tu hetih tuseh: Gibeah khua tawng tuhin camciafung duk in mi ril tuh ising. 10Israel minung veksen ai seu hra seu khat in kin ralkapte ca rong phur tuh ising. A dang hmuahhmuah in Israel ram songai thil ningdulkul a bawn manin Gibeah mite cawh tuh ising,” tiin ti i. 11Ciatihin Israel mite hmuahhmuah thukhat sat in Gibeah khuapui sim tuhin taikhawm tlang i.
12Israel miphunte in Benjamin miphunte ram song khuahacang ah mi hlat ai, “Zaitluk in thil sual bawn tlang i si? 13Gibeah khua songai mi huatsuak pawl tu kin hnenah koih tu ih; rek tuh sek ai ciatihin Israel ram cianghlimruai tuh i ing,” tiin ti tlang i. Ikhalselai Israel mite ponghnak tu Benjamin mite in zaikhai nam tlang lo i. 14Cen Benjamin ram songai khuapui hmuahhmuah in mi tampui Israel tawng tuhin Gibeah khua ah kawi tlang i. 15Cia nia lek ah amahte khuapuite in ralkap thawng kul hluanruk, ralvang keng fekfek, ko tlang i. Ciahlaiah Gibeah khua mite in a hlaice ai rilhnak ralkapte za sarih khawm i. 16Ralkap hezah songin a rilcemi kehtlak za sarih amahte veksen in, lunghersep thiam lamah, samfang pakhat rin khelh loin sai thiam pawl i. 17Cen Israel mite in Benjamin mite siar loin raltawng thiam ngaingai vang awh ralkap ting li khawm tlang i.
Benjamin Mite Tawng I
18Israel mite tu Bethel khua ai Pathian biahnak hmunah feh tlang ai Pathian hnenah, “Aisu hin in Benjamin tawng hmasa tuh i,” ti thu zawt tlang i.
Bawipa in, “Judah hin in tawng hmasaber tuseh,” ti i.
19Ciamanin Israel mite tu a thangha fangin tho tlang ai Gibeah khua hiangah zancam tlang i. 20Cen Benjamin tawng tuhin feh tlang ai ralkapte tu Gibeah khua hmaicang ah ṭang i. 21Benjamin ralkapte tu khua songin suak tlang ai cia nia ah Israel ralkap thawng kul hluanhnih rek berh i. 22-23Israel mite tu Bethel khua ah feh ai Bawipa hmaiah zan lam tian lungsia thinpem in kap tlang i. Cen a nite in, “Kin unau Benjamin tawng tuhin feh leh nga ing maw?” tiin Bawipa zawt tlang lala i.
Ciafangin Bawipa in, Feh tu ilai tawng leh tu ih,” tiin ti i.
Ciamanin Israel ralkapte tu a tha tho leh ai amahte ralkapte tu a hmasa ai a ṭanghnak hmun thotho in ṭangruai leh i. 24Hemi tu Benjamin tawng tuhin a vel hnihhnak a tumhnak i. 25Cen a hmasa ai bang thotho in Benjamin ralkapte tu Gibeah khua songin suak tlang ai Israel ralkap raltawng thiam ngaingai thawng hlairiat rek berh lala i. 26Ciafangin Israel mite hmuahhmuah Bethel ah feh ai lungsia thinpem in kap tlang dekdo i. Bawipa hmaiah zan lam tian rong ai loin to tlang i. Cen rualrem hibawlhnak le maitai hibawlhnak khiah Bawipa hnenah sel tlang i. 27Cialai ah Pathian ai Thutiam Kuang tu Bethel ah um ai, 28Eleazar ai fapa Phinehas tu suangbawi i. Eleazar tu Aaron ai pa i. Cen Bawipa hnenah thu zawt lala ai, “Kin unau Benjamin mite tawng tuhin feh nga ing maw, ihlahle com tuh i ing?” tiin ti i.
Ciafangin Bawipa in, “Tawng tu ih. Thangha tu amahte vumah nehhnak ning pe tuh ing,” tiin ti i.
29Ciamanin Israel mite in Gibeah khua hiangah ralkap a hrekkhat a thupruk in bawhruai i. 30Cen a nithumhnak nia ah Benjamin tawng tuhin feh tlang ai a hlan bang thotho in ralkapte tu Gibeah khua hmai lamin ṭang tlang i. 31Benjamin ralkapte khai a hlan bang thotho in khua songin suak tlang ai Israel ralkapte hrekkhat Bethel lampui le Gibeah lampui le hampalak ah rek i. Amahte rekhnak tu ralkap sawmthum tluk i. 32Benjamin ralkapte in, “A hlanai bangin neh tuh ising,” ti tlang i.
Ikhalselai Israel mite in, “Hnua lamah let deuhdeuh ngasing khaw Benjamin ralkapte amahte khua an suak tusek selai lampui vuman feh tuseh,” ti i. 33Ciamanin Israel ralkap a tam sawn tu hnua lamah let tlang ai Baal-tamar ah taikhawm tlang i. Cen Gibeah khua hiangai a relhtu ralkapte tu suak tlang i. 34Israel mite songin a rillephnak ralkapte thawng hra in Gibeah khua tawng dekdo ai a roh ngai in tawng dun i. Ikhalselai Benjamin mite in kin vua nau ihang ti khiah ling tlang lo i. 35Benjamin ralkapte vumah nehhnak tu Bawipa in Israel mite hnenah pe zo i. Ciamanin Israel mite in ni khat songah Benjamin ralkapte thawng kul hluannga le zakhat rek i. 36Ciafang ian in Benjamin mite in kin sung i ti ling i.
Israel mite in Gibeah hiangai a relhtu ralkapte hrekkhat a rinsan manin Benjamin ralkapte hmaiah hnua lam let betbo i. 37Hemi a relhtu ralkapte tu vaikhat pahin Gibeah khua songah lut in khan tlang ai khua songmi hmuahhmuah rek tlang sek i. 38Israel mite le a relhtu ralkapte tu tiamdunhnak nai cia i. A tiamdunhnak tu: Gibeah khua songin maikhu tampui van ah a kai hmu le i sikhaw, 39Israel mite ral tawnghnak ah hnua lam let nawn loin hmai lam nor tuh i. Benjamin mite in cia tian ah mi sawmthum rek zo ai amahte lala, “A hlanai bangin neh ising ti dun tlang hnelhno i. 40Ciafangin a tiamdunhnak bangin Gibeah khua songin maikhu suak ngualngo hmu tlang i. Benjamin ralkapte in a hnua lam sik tlang ai amahte khua tu a pumpui in mai in kang thliahthlo hmu tlang fangin a ngaihsunur tlang ngai i. 41Cia sawng fangin Israel ralkapte her leh ai, nor dekdo ai, Benjamin ralkapte tu thinlung am tlang sio i; zaimantifangin kin ci kin hmit tuh ihang ti ling i. 42Ciamanin hnua lamah let ai hampalak lamah tlan tlang i. Ikhalselai tlan suak ben lo i. Israel ralkap burpui le khua songai a kawitu ralkapte karlak ah cep ngah zo ai rek diamdo i. 43Ciatihin a cep ngah hnuaah hnawh tlang ai Gibeah in nisuah lam tianin hnawh ai lampui vumah rek kong betbo i. 44Benjamin ralkap a pha ber pawl thawng hlairiat rek i. 45A dangte tu Rimmon ai lungpui lamah hampalak lamah tlan tlang i. Lamtluanah thawng nga rek i. A tang lai mite tu Israel mite in Gidom tian hnawh ai rek kong betbo i. Ciata ah thawng hnih rek ngah i. 46A veksen kom in Benjamin ralkap ralpha bikbik lek thawng kul hluan nga rek i.
Israel Mite In Neh I
47Ikhalselai minung zaruk tu Rimmon lungpui lam hampalak ah tlan sek ai ciata ah hla li um tlang i. 48Cen Israel mite tu let tlang ai khua songah feh tlang ai pasal ituseh, nupang ituseh, naupang le sumhnamte tianin amahte hmuhnak hmuahhmuah rek berh i. A hiang cingkim ai khua hmuahhmuah khai mai in tai sek i.
Currently Selected:
THUKHANTUTE 20: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
