THUKHANTUTE 19
19
Levi Mipa Le A Nuzawl
1Cialai ah Israel mite tu kumpibawi nai lo i. Epharaim tlang vum ram ramri lamah Levi pa pakhat um ai Judah ram Bethlehem khua ai nupang pakhat a nuzawl tuhin lang i. 2Vaikhat tu a pasal vumah a thinraw#19:2a thinraw tihnak tu Hebrew Lai Thianghlim songah mi zuangzam i tiin um i. ai Bethlehem khua ai a pa hnenah tlan teu i. Ciata ah hla li song um i. 3Cen a pasal in a hnenum pakhat le laakte pahnih thawn leem in tlungpui leh tuhin feh kawm i. A nuzawl ai pa in a inn ah phaniu in tlungruai i. A pa inkhai aipuang ngai in hmuak i. 4A pu in umruai lai manin ni thum song cam i. A nuzawl thawn rong ai ti ding in zancam kawm i. 5Cen a ni lihnak nia ah zing fangin tho ai tlung tuhin tum i. Ikhalselai a pu in a makpa hnenah, “Rong ai hmasa rih tu ih. Ril ning kam leh tuh i. Nuamniu in feh tu ih,” tiin ti i.
6Ciamanin a pu thawn to kawm ai rong ai ti ding kawm i. Ciafangin a pu in, “Tun zan tu cam rih tulai nuam ngai in um rih tu,” tiin ti i.
7Levi pa in tlung tum thotho i; ikhalselai a pu in hen ngio manin ṭul ai zankhat cam i. 8A ni ngahnak nia ah zing fangin tho ai tlung tum i. Ikhalselai a pu in, “Rong ai rih tulai um rih tu. Zan lam ninem fang tlung bang leh nga si,” ti manin a pahnih in rong ai kawm lala i.
9Cen Levi pa le a nuzawl le a hnenum pa tu tlung tum i. Ikhalselai a nuzawl ai pa in, “Sik tu, zan lam ihang; tun zan tu cam rih tu lawlaw. A rai hlanah khuathim tuh ihang. Ciamanin tun zan tu cam rih tulai um tu phetpho. Thangha zing fangin tho tulai tlung leh tu,” tiin hen lala i.
10-11Ikhalselai Levi pa in zankhat cam tuh nuam nawn loin a nuzawl thawn a laakte pahnih heh a kung toh ai tlung i. Jebus khua (Jerusalem tihnak) hiang a hleng fangin khuathim dawn hang manin a hnenum pa in a bawipa hnenah, “Zaimanin tun zan tu Jebus khuapui ah cam menma lo ising?” tiin zawt i.
12Ciafangin a bawipa in “Israel miphun um lo hmun khua ah cam tuh lo ising. Feh rih ngasing khaw Gibeah ah feh tuh ising. 13Kawi tu ih, feh rih ngasing khaw Gibeah ihlahle Ramah ah cam tuh ising,” tiin ti i. 14Ciamanin Jebus khua lan in feh tlang i. Nitla fangin Benjamin ram song Gibeah khua ah hleng i. 15Cia khua ah cam tuhin lampui in pial i. Levi pa tu khuasong ah feh ai mual ah to i. Ikhalselai zan riahbuk tlun inn tawk lo i.
16Cia laitak ah patar pa pakhat tu a lo naper hmun an tlung i. Ciami pa sensuah hmun tu Epharaim tlang vum ram inapui Gibeah khua ah thawn i. Gibeah mite tu Benjamin miphun i. 17Mikhualpa mual ah a to khiah patar pa in a hmu fangin, “Akonan kawi i si? Akonah feh tuh i si? tiin zawt i.
18Ciafangin Levi pa in, “Judah ram Bethlehem khua an kawi ai kin umhnak Epharaim tlang vum ram ramri lamah feh tuh i ing. Bethlehem ah tlawng ai tun tu kin khua tlung tuh i ing. Cam hmun tuh tlun inn akonah khai tawk lo i ing. 19Kin laak hrang rong le hampa nai i ing; I nuzawl le kaimah le i hnenum pa ca ahkhai sang le cabitti nai i ing. Kin kulhnak hmuahhmuah nai sio i ing,” tiin sawn i.
20Ciafangin patar pa in, “Thinnuam in um tulai, kaimah inn ah tlung tu ih. Ning samhnak hmuahhmuah kaimah in ning pe tuh ing. Hemi mual ahcen cam mah ih,” tiin ti i. 21Cia hnuaah a inn ah tlungpui ai a laakte rong paih i. Mikhualte tu ke som ai zanfak ai tlang i.
22Ciatihin nunnuam ngai in a um tlang laitak ah khua songai mihuatsuak pawl in a inn kulh ai dawngkham khai seu ai inn naitu patar pa khiah, “Na inn ai a tlungtu pa khiah suah tu; a sualpui kin nuam i,” ti au tlang dekdo i.
23Ikhalselai patar pa tu sumpua ah suak ai, “U le naute, ilo ikhaw. Hebang sualhnak le ningdulkul bawn mah ih. Hemi pa tu i mikhual i. 24I ngai tu ih; heta ah i fenu le ciami pa ai nuzawl um i. Tun suahpui tuhai ning minung ihang. Ning nuam bangin bawn tu ilai sualpui tuhang ih. Ikhalselai he patarpa vumah thil sual zaikhai bawn mah ih,” tiin ninghio ngen i.#Sem 19:5-8 25Ikhalselai a thu ngai nuam hrimhrim lo i. Ciamanin Levi pa in a nuzawl heh sumpua ah suah i. Ciafangin a nuzawl heh pom ai sualpui ai zanvar in zohsuam tlang i.
26Zing lam varciang fangin ciami nu tu patarpa inn ah koih ai a pasal cam hmun inn dawngkham ham a hleng fangin sawn lio i. Ni suak hnua tian ciata ah um lai i. 27A pasal tu zing ah tho ai a inn tlung tuhin dawngkham a hong fangin a nuzawl tu dawngkham hamah a kut dawngkham tlang awh in a bok ngio khiah hmu i. 28Ciafangin a pasal in, “Tho tu, feh hang sing,” tiin ti napui ani in sawn nawn lo i. Ciafangin a pasal in a ruang lang ai a laak vumah dah ai a inn lamah tlung i. 29A inn a hleng fangin innsong lut ai vang pakhat lang i. Cen a nuzawl ruang heh tum hlaihnih in a tan sek hnuaah Israel ram khuahacang ah kuat i.#1Sam 11:7 30Ciami a hmutu hmuahhmuah in, “Hebang thil ngelcel hmu awng kel lo i ing. Israel mite Egypt ram an kin suak nia ai panin hebang thil um awng lo i. Ruat tu ih! Ziang tal bawn tuh lo ising maw,” tiin ti tlang ṭen i.
Currently Selected:
THUKHANTUTE 19: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
