THUKHANTUTE 18
18
Micah Le Dan Miphun
1Cialai ah Israel ramah kumpibawi um lai lo i. Dan miphunte tu ram khur tuhhnak si thliahthlo i, zaimantifangin cialai ah mi lakah ram khur tuhhnak co ve lo i. 2Ciamanin amahte hin songai innsang hmuahhmuah lakin pasal pha ber tihnak panga ril tlang ai Zorah khua le Eshtaol khua karlak ai ram sik tuhin le a cul tuhin hlat i. Feh tlang ai Epharaim tlang vum ram hleng tlang fangin Micah inn ah cam tlang i. 3Ciata ah a um songah cia inn ai a umtu tlangvalpa tu a awsuah in Levi mi i ti ling thiam tlang i. Cen a hnenah nong tlang ai, “Heta ah aisu in na hoi i? Heta ah ziang bawn isi? Zaiman heta ah um isi? tiin zawt i.
4Ani in, “Micah thawn thukhamhnak nai kawm i ing. A suangbawi ing ai i nihlawh amah in i pe i,” tiin ti i.
5Cen anite in, “Kin khualtlawnghnak ah kin hlawhtling tuh maw hlawhtling tuh lo, Pathian hnenah tlah kin san sah tu,” ti ngen tlang i. 6Ciami suangbawipa in, “Thinnuam niu in feh tu ih. Ning fehhnak ah Pathian in ning kilkhawl tuh i,” tiin ti i.
7Ciamanin anite panga tu feh tlang ai Laish#18:7 Laish tihnak tu Hebrew in pawpui ti ca i. khua ah hleng tlang i. Ciata ah a umtu minungte tu a sik fangin thinlauhnak zaikhai nai lo, Sidon mite bangin hlamuang roh in um tlang hmu i. Pakhat le pakhat vumah thunai cuang um loin rualrem ngai le tluangtlam ngai in um tlang ai hlawhsamhnak zaikhai nai loin a nungtute i. Amahte umhnak tu Sidon mite umhnak an a hlapui i ai a dang miphunte thawn pawl dun pehzomhnak zaikhai nai lo i. 8Mite panga let tlang ai Zorah khua le Eshtaol khua a hleng leh fangin a phunpuite in amahte hmuhnak le tawkhnakte zawt tlang i. 9Ciafangin anite in, “Tho tu ih, Laish tawng tuh ising. Kin sikhnak ram heh ram pha ngaingai i. Zaimanin um bial menma i si! Feh tu taito ilai amahte ram khur taito ngasing ih. 10A hmun ning hleng fangin poi tihnak nai lo, ralmuang ngai ai umtu i ti hmu tuh i si. Amahte ram tu a kau ngai i ai Pathian in ning pe zohnak ram i. Minung ai kulhnak thil hmuahhmuah a khimhnak ram i,” tiin ti i.
11Zorah le Eshtaol khua an Dan hinte minung zaruk tu ralthuam a khimliang in keng ai feh tlang i. 12Honso lamah hong tlang ai Judah ram song Kiriath Jearim in nitlak lamah cam tlang i. Ciamanin cia hmun heh tun san tianin Dan riahbuk tiin ko tata i. 13Ciata in feh ai Epharaim tlang vum ramai umhnak Micah inn ah hleng tlang i.
14Ciafangin Laish hiang dungso ram a cultu le a siktu minungte panga in a rualpuite hnenah, “Hemi ning hmuhnak inn pakhat songah heh suangbawi korfual, thing ai bawnhnak milim le burhnak milimte um i, ti ling lo i sim? Akontih in ti tuh ising ti ruat tu ih?” tiin zawt i. 15Ciamanin Levi tlangvalpa umhnak inn ah pial tlang ai, “Ning cak tlang awm? tiin hnuksat i. 16Cialak ah raltawng tuhin a ralring cialep Dan ralkapte zaruk khiah kotka hiangah ding tlang i. 17Ciafangin micultute panga tu cammalak songin Micah inn songah lut tlang ai suangbawi korfual, thing ai bawnhnak milim, le a burhnak milim dangte khai lang i. Cialai ah suangbawi tu ralkapte zaruk thawn kotka ah um tlang i.
18Mite panga in Micah inn songin milimte a lang hmu fangin suangbawipa in, “Ziang bawn i si?” tiin zawt i.
19Ciafangin anite in, “Dapniu in um tu sawn! Kamkhat khai pong mah! kin hnenah kawi tulai kin suangbawi le kin remruattu ah cang tu. Minung pakhat innsang ca suangbawi tahin Israel miphun phunkhat pumpui ai suangbawi tuh na nuam sawn lo im? tiin ti i. 20Ciami a za fangin suangbawipa tu ang ngai ai milimte khiah lang ai amahte hnenah hlun ve i.
21Ciatihin amahte khua lamah let tlang ai a fanau, sumrual, le thilrite tu a hmaiah khor tlang i. 22Micah inn in lamhlapui a hleng fangin Micah in a innhnente tu raltawng tuhin ko i. Dan ralkapte tu hnawh tlang ai, 23au kong betbo i. Dan ralkapte tu khel lam her ai Micah a hmu fangin, “Zaiman kin hnawh isi? Minung he zahzah zaiman hoi isi? tiin zawt tlang i.
24Ciafangin Micah in, “I suangbawi le i bawnhnak milim i pathiante lang ai tlanpui ziar i si. Akontih in bawn tum isi? ‘Zaiman kin hnawh isi? iti ngam cop lai i si!” tiin ti i.
25Dan ralkapte in, “Au cop mah! Um tu menma! Hemi ralkapte a thinrawtiar lesikhaw nangmah le na innsang a veksen in ning thi tuh sek menma i,” tiin ti i. 26Cia hnuaah Dan mite tu feh i. A hat ze manin kin tawng ben tuhhnak ilo i, ti khiah Micah in hmu fangin a inn ah tlung leh menma i.
27Dan mite in Micah bawnhnak thil le a suangbawi khiah tlanpui sek i. Cen fehpui ai midap le ralmuang mi Laish tawng tlang i. Khuasong mi tu rek ai khua khiah mai in tai tlang i. 28Cia khua tu Sidon khua an hla ngai ai pawlkom le pehzomhnak khua nai lo manin otu aisu khai nai lo i. Laish khua tu Beth Rehob khua hiang phairawn ah umhnak i. Dan mite in cia khua ah saleh ai ciata ah um tlang i. 29Jacob fapa amahte pu Dan hming suang in cia khua khiah Dan tiin a hming bawn tlang leh i. Ciahlan ahcen Laish tiin ko awnghnak thliahthlo i. 30Amahte milim heh bia tuhin a umhnak bawn sah i. Cen Moses ai fapa Gershon ai fapa Jonathan tu Dan mite suangbawi ah cang i. A fate khai Dan mite ral in a pom sek hlan tian suangbawi i. 31Pathian biakinn Shiloh ah a um song hmuahhmuah Micah ai milimte khai ciata ah um ngio i.
Currently Selected:
THUKHANTUTE 18: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
