ISAIAH 40
40
Umlamhnak Pongkam
1Kin Pathian in, “I minungte hnem tu ih,
I minungte hnem tu ih;
2Jerusalem khua mite thape tu ih.
A rai ze tuar tlang zo ai
amahte sualhnak tu ngaithiam zo i, tiin rel tu ih.
Amahte sualhnak hmuahhmuah manin
A roh ze in cawh ing,” tiin ti i.
3Aw thang ai, “Bawipa caah
Hampalak ramkhing ah lampui bawn tu ih,
Kin Pathian ca nelrawn ah lampui sel tu ih!#Mat 3:3; Mar 1:3; Joh 1:23
4Horkuam hmuahhmuah silh tusek ilai,
Tlang sang hmuahhmuah cek tusek ih.
Tlangte tu zawllai ah cang tuhin,
Lailung bingbo hmuahhmuah rual ngai in remm tuh sio i.
5Ciafangin Bawipa ai huham lar tuhai,
Mi zongzong in hmu tuh i.
Bawipa amah rori in thukham zo i,” ti i.#Luk 3:4-6
6Aw in, “Au tu,” i ti i. Kai in,
“Ziang au tuh ing?” tiin zawt ing.
“Minung tu hampa bang i;
Hampalak papar tahin rai deuh nung cuang lo i.
7Hampa tu vawi ai papar tu ria i,
Bawipa in a vumah hlivua zuangruai fangin!
Minung tu hampa tahin hat deuh cuang lo i.
8I, hampa khiah vawi ai papar tu ria i;
Ikhalselai Pathian thu tu kho ngio i,” ti i.#Jam 1:10-11; 1Pet 1:24-25
9Aw Jerusalem, tlang vumah kai tulai,
thuthangpha rel tu.
Aw Zion, cawm ngai in au tulai, thuthangpha phuang tu.
Rel tu, zaikhai lau mah.
Judah ram khuapuite hnenah
‘Ning Pathian kawi lai i,’ tiin rel tu!
10 Bawipa tu a hathnak huham thawn
Mi uk tuhin kawi lai i.
A hum zohnak minungte khai fehpui i.#Isa 62:11; Thup 22:12
11A tuute tu tuukhal bangin kilkhawl tuh i;
Tuu faniute khiah hmunkhat ah khawm in,
A kut in cawi tuhai,
A nu hnenah nuamniu in fehpui tuh i.
Santeh Thilh Lo Israel Ai Pathian
12Tifingriat heh a sum in teh bentu um nitur im?
Van khiah a khap in a teh bentu tang um nitur im?
Aisu in laipua vumai laivut heh a bawm songah
thun ben sio nitur?
Aisu in tlang sang le tlang mual heh cuai in teh ben nitur?
13Hetihin bawn tu tiin Bawipa a rel thaitu
aisu um nitur?
A cukthaitu le ruathnak a pe thaitu tang um awm?#Rom 11:34; 1Cor 2:16
14Pathian in aisu thuron awng i?
Aisu hnenah fimhnak le lingthiamhnak si awng i?
Thil bawndan tang aisu tal in rel awng i?
15 Bawipa caah miphunte heh zaikhai ilo i;
Ti farkhat tluk fang i.
Lamhlapui ai tikulhte khai, laivut tluk in zangniu i.
16Lebanon tupui songai ramsa hmuahhmuah heh,
Kin Pathian hnenah hibawl sel tuhin a tam ze ilo i.
Tupui songai thingkung hmuahhmuah khai
Maitai hibawlhnak zanthing hrang tuhin a tlawm ze lai i.
17Laivum miphun hmuahhmuah heh
Amah caah zaikhai ilo i.
18Pathian tu ziang thawn santeh thil tuh ising?
Zaibang i ti khiah akontih in rel thil tuh ising?
19Kut zungthiamte ai bawnhnak milim,
Sui ertute ai sui ai khuthnak,
Ngun hleng songai tohhnak bang ilo i.#Nal 17:29
20Sui le ngun a nai lotu in
A hnawm bai lomi thing ril tlang i.
Kut zungthiam pakhat si tlang ai
A tlu thil tuh lo milim pakhat bawnruai i.
21Hmu lo i sim? Ling awng lo i sim?
A raipui in rel cia ilo im?
Lailung akontih in pan i ti khiah ling cia zo lo i sim?
22Laivum le van pualam ah
A kumpibawi le a tohkham vumah a totu in bawn i.
A hnia ai minungte tu a mithmuh ah sirsing tia fang i.
Van khiah pon bangin pharh ai
Minung umhnak ah ponhlam bangin zar i.
23Amah in a hat ngai uktute heh tlokruai ai
Thulovang in bawn sio i.
24Anite tu thingkung dawnniu,
ham nai lo a suak sawng bang i.
Cialak ah Bawipa in hli zuangruai i,
Ro sio ai fangcang kuangro bangin hmut sio i.
25Pathian Thianghlim tu aisu thawn santeh thil tuh ising?
Amah bangtu aisu tal um awm?
26Van khiah honsik tu ih!
Ning hmuhnak arsi hmuahhmuah heh aisu in bawn i?
Ralkapbur a ho bangin hemi arsite a hotu in
Zaizah i, ti ling ai amahte hming ṭen in ko sio i.
A huham tu a thawmlian ai
Pakhatniu bang khai pai awng lo i.
27Aw Israel, zaimanin phuncam tlang ai
Bawipa in kin harhnak kin ling sah lo i,
Kin caah thil phatak niu in tawlrel lo i, tiin ti i si?
28Hmu lo i sim? Ling awng lo i sim?
Bawipa tu kumzangza in a khomi Pathian i.
Lailung hmuahhmuah a bawntu i.
Ani tu thacawl le thabo in um awng lo i;
A ruathnak tu ling ban tuh pawl ilo i.
29A cawltu le thabotute tu thahatruai leh i.
30Minote rin cawl tuhai
tlangvalte khai a tha bo in sawn tuh i.
31Ikhalselai Bawipa a rinsantu khiah
A tha tlung leh tuh i.
Muvanlai bangin ko pharh in zuang tuh i.
Dawp khalselai cawl tuh lo i;
Vak thliahthlo inkhai thabo in sawn tuh lo i.
Currently Selected:
ISAIAH 40: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
