Malika 8

1Mmatsuva aga vwu valundamine avanu vongosu ikipuga vuvule vwu nasikuli isinge isya kulya, pwu UJesu akavilanga avakongi va mwene akavavula akata: 2Ikisa kimbwene mwitumbu upwu ndikukivona ikipuga kya vanu iki. Mańa valindile amatsuva gadatu pane apa kitalya isinge. 3Ndingave ndatetsaga ndivatavulage kuvutsenge vwa vene kitavasugila isinu, pwu viswitsaga inzala munzila. Mańa avange vahumile kuvutale. 4Avene avakongi va mwene vakanda vakata: Pwu veni ate asivone ndaku ndukungu umu isinu sya kuvasugila voni ava? 5Umwene akavavutsa akata: Ndi nasyo silingi isivanda? Vakata: Tuli nasyo lekelakupamato. 6Akavavula avanu ikipuga kyoni akata: Mutamage pasi. Pwu akatola isivanda syu lekelakupamato syu akasana akameńulanya akavapa avakongi va mwene akata: Muvagavanihitsage avanu valitsage. Pwu vakavagavanihitsa ikipuga kyoni. 7Natwene utusomba vale natwo utunge. Natwene akasana kwa Nguluve akata: Natwene muvagavanihitsage valitsage. 8Pwu vakalya vakiguta. Pwu vakalundamanya utumeńukila utwu vasigitse isiswiswi lekelakupamato. 9Avene avalitsaga vale pavaelipu vani (4000). Pwu akavatavula akata: Mbihage. 10Pwu umwene akipakila ṅani mwiboti navakongi va mwene akalovoka ukubiha nkilunga kya mu-Ndalimanuta.

11Pwu avapalisai vakabiha upwu ale, vakakaniṅana nave ulukani vakangela vakata: Ungatupelelaga ikinge ikipelwa kya kukyańa ikya kukumańilamwo. 12Umwene akidakula mwitumbu akata: Avanu va lino ava vilonda kyiki ikipelwa kya kumańilamwo une? jilweli-lweli ndikuvavula ndita: Avanu va lino ava navalakivone nikinge ikipelwa. 13Pwu akavaleka baho, akavuja akipaka mwiboti akalovoka ukubiha umwambo gulya.

14Avene avakongi va mwene vakasamwa ukwivopela isinu, vakava nakyo ikivanda kipamato kyene mwiboti. 15Umwene akavavula akata: Ndolage sitso mbandikage nunsabe gwa vapalisai nunsabe gwa Heloti. 16Avene vakisagila vakavutsanya vakata: Ulwakuva natugegili pange isinu? 17Umwene UJesu vwu avavwene pwu akata: Tsu mukisagila tsiki itsu namugegili isinu? Namutsivweni nalino nandi nuluhala? Inumbula tsińo tsikanale, nalino tsumile vuvule? 18Vwu ndi nagwo amiho namwilola? Vwu ndi natsu imbulukutu namupulika? Nukukumbuhitsa namukumbuhitsa? 19Upwu ndavagavanyaga isivanda sihano avanu vaelipu vahano (5000), pwu mukaditsa isiswiswi silingi utumeńukila utwu mwalundamanyaga? Avene vakanda vakata: Kitsigo nasivili 20Nupwu ndavagavanyaga isivanda lekelakupamato avanu vaelipu vani (4000), pwu mukaditsa isiswiswi silingi utumeńukila utwu mwalundamanyaga? Avene vakanda vakata: Lekelakupamato. 21Umwene akata: Kwu pwu namukutsivona inongwa?

22Pwu vakatsisika mu-Betisaita. Pwu vakangega kumwene umbosu vakatekelesa vakata: Ungamwabasaga. 23Pwu umwene akamwibata ikivoko umbosu akankogosa, akahuma nave mbutsenge akabiha kumbale, akambehela amati mmiho akambika amavoko, akambutsa akata: Ndeti lino pwu vwilola kiki? 24Umwene akinamuka akata: Ndilola avanu, upwu vigenda pwu vivoneka ndimibiki. 25Pwu akongeletsa ukumbika amavoko pamiho. Pwu akalola vunnonu, amiho ga mwene gakapona, twoni tukavoneka vunnonu vuvule nakuvutale umwene. 26Pwu UJesu akata: Goloka vuvule ukubiha kuvutsenge vwako, kwu bako nukwingila mbutsenge umu.

27Pwu UJesu akabiha navakongi va mwene mbutsenge vwoni vwa nkilunga kya mu-Kesalija Pilipi. Munzila pwu akavavutsa avakongi va mwene akata: Avanu upwu vikunzova, pwu vita ńa veni? 28Avene vakambula vakata: Avange vita vi Elija, avange vita vińamalago vuvule. 29Pwu umwene akavavutsa akata: Uńe lino mwita ńa veni? Pwu akamwanda UPetele akata: Veve Kilisiti. 30Pwu umwene akantanila sitso akata: Tsu ndambulaga nujyunge umunu. 31Pwu akatengula baho akavavonya akata: Uńamunu iva pakukuvilwa sitso. Navańivaha avenekivumbuko navateketsi avavaha navamańakalata valammelaga valambudaga, mańa alatsukaga palitsuva lya datu. 32Akalitsova vuvule pavuvalasu ilimeńu ili. Pwu UPetele akigava nave akantanila nave. 33Umwene akavakilivukila avakongi va mwene akavalola akantanila nave UPetele akata: Luta kumbele vi Setano, mańa navukisagila itsa kwa Nguluve, vukisagila tsitsa vanu vuvule. 34Pwu akavalundamanya avanu ikipuga kyoni navakongi va mwene akavavula akata: Uvi ita ndinkonge mumbele une, vi upita idulusage vuvule, atetsage nikidamiṅanye kya mwene itwikage pwu aṅongage une. 35Mańa uvi ita ndiponye uvwumi vwango vi ambwitse. Mańa uvi uvwumi vwa mwene ambuhitse mumwane namunongwa tsango ulwakuva ali natso, vi aponehitse vuvule. 36Nupwu angave umunu akikavaga kyoni ikilunga pwu kyambumbulilaga kiki angave vwu ambuhitse vuvule mumwa uvwumi vwa mwene. 37Nisya kuvuvangila asivonage ndaku isya kuvuvangila uvwumi vwa mwene? 38Uvi iva nisoni nakwane nakumameńu gango mbanu va lino ava avaligu avatulanongwa ava, vi namwene nu-Ńamunu alava nisoni vwu agendile mbuvaha uvudwadwa vwa dadaje ukwitsa navasuṅwa avavalatse.

Currently Selected:

Malika 8: Kinga

Highlight

Copy