Malika 9

1Akavavula akata: Jilweli-lweli ndikuvavula ndita: Ńi mwimile apa avange nandavuvone uvuswe vwu nanduvweni tango ulu deva lwa Nguluve ukwitsila mmaka. 2Vwu vagonile ntanato pwu UJesu akavatola va-Petele nu Jakobu nu-Johani, akatoga navo pakidugala ikitale, pwu akatsikijekela navo ava vene. Pwu akanduka vwu vilola. 3Pwu imisabwa gya mwene gikaṅala gikava swe vuvule ukuta ṅala. Navańalwutsi avavalatsamisabwa ava nkilunga kyoni umwu kivye–igya vene nagisika uvuvalasu. 4Pwu vakakeńemuka vivoneka nu-Elija nu-Mose vitsova nave UJesu. 5Pwu UPetele akatsova kwa Jesu akata: Vi mańisi pannonu ukuva apa uvwe. Tungatsengaga ihema idatu apa, mamato jive jyako, ijyinge jya Mose, ijyinge jya Elija. 6Mańa alemwagwa ukutsova vuvule ulwakuva lwavavwene uludwado. 7Pwu vakakeńemuka ilivingo likuvilikila, vakavona nilimeńu lihuma mwivingo umu lita: Uju vi vi nswambango ungane kwane, vi mumpulihitsage jujwa. 8Pwu ṅani-ṅani vuvule vwu vita tulolese, pwu vakavona nakuli ujyunge, bako vi Jesu mwene, vi vakavona vali nave.

9Vwu vikwika pakidugala pwu akabetsa UJesu akata: Ndambulaga nujyunge umunu tango itsu mutsivwene. Lungave lusiku ngave mbwene Uńamunu atsukile kuvaswe pwu mutsove. 10Pwu vakava nalyo ilimeńu ili, vakavutsanya vakata: Ukutsuka kuvaswe kyu kinu kiki? 11Vakambutsa jujwa vakata: Kyu kinu kiki ikyu vwitsova avamańakalata upwu vita ilongolaga ju Elija ukwitsa?. 12Umwene akanda akata: Kwu jilweli Elija va kutengula ukwitsa, vi va kunotsehetsa syoni. Ilyene ilikuntsova Uńamunu mwa kalata lyu nda namulivweni, ilita vi ikuvilwagwa, igililwagwa sitso? 13Lola ndikuvavula ndita: Ukwitsa Elija kwuitsile, mańa avene vankinye vuvule nduvwu vanogilwe, vwu itsu antsovye ṅani kalata.

14Pwu akatsisika upwu valepwo avakongi va mwene akavona vavimilye navanu ikipuga vuvule navamańakalata vakakaniṅana navo ulukani. 15Vwu vambwene avanu ikipuga kyoni, pwu vakanoga vuvule mwitumbu vakańilila vakampembetsa. 16Umwene akavavutsa akata: Ulukani ulwu mukaniṅana navo lwa kiki? 17Pwu ujyunge uva nkipuga akambula akata: Vi mańisi ndingegile kwave unswambango uva mepo jya kutsilakutsova. 18Jivona jimusanitse pwu itsilika namahuve givoneka pandomo, igadutsa namino pwu itoka vuvule ummana. Nditsovile navakongi vako nditye mujihumihitsage, lola ndivwene jivalemile. 19Pwu UJesu akanda akata: Hi, kwu kutsilakwidika kuki avanu va lino ava! Ndisike ndaku ukuva nuńe, ndisike ndaku ukuva lya imaga sikutsoni! Mungegage kunu. 20Vakangega. Pwu undume vwu ambwene UJesu, pwu imepo imbivi jikanyongola jikantwangitsa pasi, akibilusa pasi namahuve kundomo. 21Umwene UJesu akambutsa udadaje va ndume akata: Jimbwene ndali? Umwene akata: Jimbwene mbudebe. 22Sikutsoni jikundaha mmwoto nammagasi vwu jita ndimbude. Ungave ulumańile pwu utulililage ikisa ututange. 23Umwene UJesu akata: Ukulumańa kwu kwiki, lwu lwidiko ungave ulumańile ukwidika, vwu pwu ulumańile syoni, vwu nisinge nasikulemili. 24Pwu akilanga nukutsova udadaje va ndume akata: Ndidike nkuludeva, Ungamokaga ulubedo ungave uvwenendibeda. 25Avwene UJesu vikuńilila avanu, pwu akajitanila najyo imepo imbivi akata: Vi mepo vi ntsilakutsova vi utsivye uve, ndikukuvula ndita: Humaga mumunu uju, ulavujaga ukwingila mmwene. 26Pwu jikakuta jikannyongola sitso jikahuma. Umwene undume akava nduvaswe. Avange vakata aswe. 27Umwene UJesu akamwibata ikivoko akamwimya, pwu akima. 28Vwu vatsisike kuvutsenge pwu vakambutsa avakongi va mwene vwu vijekye nave vakata: Uvwe tulemilwe kiki ukumumya? 29Umwene akavavula akata: Avene avanavihuma vuvule, pene ungave utye nukwisaja baho, pwu lweli pwu vihuma.

30Pwu vakahuma baho vakatsungutila kyoni ikya mu-Galilai. Akata nujyunge alambonaga. 31Ulwakuva ali pakuvamańisa avakongi va mwene akata: Uńamunu alapevwa mmavoko gavanu vwu valambuda. Lola vwu vambudile pwu alatsuka ilya datu. 32Avene likavalema ukulivona ilimeńu ili. Vakadwada ukumbutsa.

33Akatsisika mu-Kapelinaumu. Vwu vatamile nńumba pwu akavavutsa akata: Mwakananaga kiki munzila? 34Avene vakava mye vuvule. Ulwakuva vakananaga ilya vuvaha munzila vatetsaga umbaha vi veni? 35Pwu umwene akatama akavilanga avakitsigo navavili akavavula akata: Uvi ita ndive ndongotsi kuvajango vi upita ipelage ukuva va mumbele, vi upita ipelage va kuvavombela voni avanine. 36Pwu akantola umwana akambika pagati akampagata akavavula akata: 37Uvi ikumwupilila ujyunge umwana uvi ali nduju, angave ikumwupilila mwitavwa lyane, vwu ańupilye une. Uvi ikuńupilila une, vwu nańupilili une, bako vwu amwupilye uvi ansuṅile une.

38Pwu UJohani akambula akata: Vi mańisi tumbwene ujyunge uvi imepo imbivi atsihumihitsaga mwitavwa lyako. Pwu uvwe tukambetsa ulwakuva tuvwene nikutukonga. 39Umwene UJesu akanda akata: Kwu mwale nakiki ukundeka. Mańa voni avipelela isinge isipelwa mwitavwa lyane, vwu naviluta pakunzova imbivi. 40Mańa uvi natwiva ngoso, vi twiva nave vuvule. 41Ulwakuva uvi ikuvańwesa ki kinwelo kipamato kyene kya magasi, angave ikuvańwesehetsa ulwu ndi vanu va Kilisiti ilitavwa, jilweli-lweli ndikuvavula ndita, nalalemwagwe isya kumomba.

42Uvi ikumwambutsa ujyunge uva vadebe ava avikunidika une vi ndita tsavetsaga ńebepe sitso itsa kukungivwa ulwala pasingo itsa kundaha muńanza umwene ku itsikumwitsilaga. 43Ungave uvwene ikinge ikivoko kyako kita ndimwambutse uve, pwu ukikegetage. Mańa nukutsikwingila mbwumi vwu vwilematsehitse ṅani, nukuva nago goni amavoko vwu ubye ndulimbo nammwoto ugwu nagwitsima lusiku–kunonu kwu kwilematsa. 44Mańa mwu isomi tsa vene natsiswa lusiku, numwoto gwa vene nagwitsima lusiku. 45Napene ungave uvwene ikinge ikilunde kyako kita ndimwambutse uve, pwu ukikegetage. Mańa nukutsikwingila mbwumi vwu vwilematsehitse ṅani, nukuva nagwu goni amalunde vwu ubye ukulahwa ndulimbo lwa mwoto–kunonu ku kwilematsa. 46Mańa mwu isomi tsa vene natsiswa lusiku, numwoto gwa vene nagwitsima lusiku. 47Napene ungave uvwene ilinge iliho lyako lita ndimwambutse uve, pwu ulińumulage ulitagage. Mańa nukuva ni liho lipamato lyene vwu ubye pakwingila kuludeva lwa Nguluve, nukuva nago gwu gavili amiho vwu ubye pakulahwa ndulimbo lwa mwoto–kunnonu kukuva ni liho lipamato lyene. 48Mańa isomi tsa vene natsiswa lusiku, numwoto gwa vene nagwitsima lusiku. 49Avanu voni mpamato-mpamato upita vahatwagwe numwińo. 50Umwińo gwu nnonu. Apene gungave umwińo guvejangike pwu musivone ndaku isya kugupelela uvukali? Mbetsage numwińo mwitumbu mwańe, nukwalisanya mwalisanyage ndunotsehetso.

Currently Selected:

Malika 9: Kinga

Highlight

Copy