Malika 10

1Pwu akabiha. Akahuma upwu ale, akatsisika nkilunga kya mu-Jutai umwambo gulya gwa Jolitani. Pwu avanu vakitsa vakalundamana upwu ale. Umwene akavavula inongwa nduvwu agahaga sikutsoni. 2Pwu avapalisai vakahegelela kumwene vakata tungele. Vakambutsa vakata: Ndeti uve, nda kunnonu umunu ukungotola undala va mwene? 3Umwene akavavutsa akata: UMose mundagilo itsu alagye atye ndeti? 4Avene vakata: Umwene UMose vi idike atye mumbigilage kalata va kuta ndindekile, pwu mungotolage. 5Pwu UJesu akanda akata: Ulwakuva avavwene uvutalamu inumbula uńe, pwu avavigye ululagilo ulu. 6Apene pavutengulilo upwu apelage syoni Unguluve, pwu atye nungosi mpamato nundala mpamato vuvule ukuvapela. 7Pwu umunu ikundekaga nudadaje nuvańina ikumbadamaga undala va mwene, 8pwu vwu vavili ava pwu vipelage ukuva mmana mpamato gwene. Pwu valekile ukuva vavili, bako vipelile ukuva mmana mpamato gwene vuvule. 9Ukwu angave avabadiṅinye Unguluve, kwu mwiko ukudadalulanya vi munu. 10Kuvutsenge vakatsikumbutsa avakongi va mwene inongwa tsitsitsi. 11Umwene akavavula akata: Uvi ikumumya undala va mwene atole ujyunge, pwu aligwipe nundala va vange. 12Namwene undala angave ihuma pangosi angave ibiha kujyunge pwu aligwipe vuvule.

13Pwu vakagega avana kumwene vakata avabasage mumana. Avene avakongi va mwene vwu vakavatanila navo avavagegile. 14Umwene UJesu vwu avavwene pwu gukavipa akata: Mbaleke, avana vitsage kwane mukuvabetsa viki? Mańa uludeva lwa Nguluve lwa vene avali vuvule-vule. 15Jilweli-lweli ndikuvavula ndita: Uvi uludeva lwa Nguluve nikulwupilila uta mwana vi nalingilemwo lusiku. 16Pwu akavapagata akavavika amavoko akavasaja.

17Avwene vwu ihuma nńumba vwu ita ndigende inzila, pwu ujyunge umunu akańilila mumana akasana kumwene akambutsa akata: vi mańisi vi nnonu, ndivombe kiki ikya kwingilila pavuhale vwa vwumi vwa sikutsoni? 18Umwene UJesu akata: Vukunzova kiki uvunnonu une? Nda kwale ujyunge unnonu? Ndita unnonu ali mpamato vuvule, vi Nguluve mwene. 19Indagilo utsimańile ndita: Nulwita ulabudaga, nulwita ulaligupaga, nulwita ulahitsaga, nulwita ulanwaṅilaga unnino, nulwita ulantekaga nujyunge umunu, nulwita umwimike udadajo nuvańoko. 20Pwu umwene akambula akata: Vi mańisi nditsikongile tsoni tsitsitsi ndihumile natso mbudebe. 21Pwu UJesu akandola akangana akata kwukale akene akasigye. Bihaga ukagutse nikyuma kyako kyoni uvagavanye avagatsu vwu ukavile ikyuma kukyańa, pwu ukitse kwane uṅongage une. 22Pwu umwene akasisiliṅana kumiho vwu apulike ili, akasusuvala akaluta. Ulwakuva ale mosu ikyuma ki kyongosu. 23Pwu akavalola avakongi va mwene akavavula akata: Kutalamu avańakyuma ukwingila ndudeva lwa Nguluve! 24Pwu avene avakongi vakakeńemuka ilimeńu lya mwene ili, Pwu UJesu akavuja akatsova akata: Ńi vajango, ńi vana vango kutalamu ukwingila kuludeva lwa Nguluve avihuvila pavumosu vwa vene. 25Ningamila ukwingila nkiho ka kahonelo numosu ukwingila ndudeva lwa Nguluve–kwebepe ukugenda ingamila nkalyango ka kahonelo. 26Pwu avene avakongi vakongeletsa ukujetuka mwitumbu vakata: Pwu veni ipona lino? 27Pwu UJesu akavavula akata: Avanu vwu viki vwu tsivalemile tsitsitsi, umwene Unguluve lweli vi natsindemili, ulwakuva Unguluve vi nakindemili kinu. 28Pwu UPetele akatsova akata: Lola uvwe tusilekile syoni isitu tukukongile uve. 29Umwene UJesu akanda akata: Voni avita nińumba tsa vene vita navalukololwavo vita navahatsavavo vita navavańinavo vita navadadajavo vita navana vita nisilimila, syoni vikusilekela mumwane namunongwa tsane–, 30vwu vivalilivwagwa imilevulo kitsigo pakapamato-kapamato ukwu vakalekile vikwupililaga namunkilunga kya pasi umwu: Vitetsaga ni-ńumba, vitetsaga navalukololwavo, vitetsaga navahatsavavo, vitetsaga navavańinavo, vitetsaga navana, vitetsaga nisilimila, vitetsaga nakwene nukuswimwa baho vuvule, namunkilunga ikikwitsa valupilila nuvwumi uvutsilakusila lusiku. 31Vongosu avalongotsi ava valava va mumbele, vongosu navamumbele ava valava valongotsi.

32Lola vale munzila vakatoga ukubiha mu-Jelusalemu. Umwene UJesu akalongola mbulongolo, pwu avene vakajetuka mwitumbu. Avene avakongaga mumbele vwu vakadwada. Pwu UJesu akavuja akavatola avakitsigo navavili akavavula itsavetsaga pakumwitsila akata tsu itsi tsu itsi. 33Akavavula akata: Lola, twitoga twibiha mu-Jelusalemu, mwu Uńamunu valavapetsaga avateketsi avavaha navamańakalata. Vwu valahigaga ilyakuta upita aswitsage, vwu valavapetsaga avapanzi. 34Vwu valamelulaga valambehelaga namati valantovaga nisonzo valambudaga. Mańa palitsuva lya datu pwu alatsukaga umwene.

35Pwu vakahegelela kumwene avańa-Sebetai nu-Jakobu nu-Johani vakata: Vi mańisi, tukatye tudove kapamato kwave ukwu vukutupa. 36Umwene akata: Kyu kinu kiki ikyu mudova kwane?

37Avene vakata: Tukatye pange twitse tutamanye nuve vwu vwitsile mbudwadwa vwako, mpamato kukivoko ikyandyo ujyunge kukivoko ikyaṅigi. 38Umwene UJesu akanda akata: Nantsimańili itsu mudova. Mbumańile ukuńwa ikinwelo ikyu ndiva pakuńwa une? Mbumańile ukwoga amagasi ugwu ndiva pakwotsivwa une? 39Vakata: Ena tuvumańile, Umwene UJesu akavavula akata: Ikinwelo kyane kyu kyiki kyu mwińwa, namagasi gango gwu giki gwu giki' gwu mukwotsivwagwa. 40Ukwene ukutama kukyandyo nakukyaṅigi kwane kwu nakavombo kango ukumpa umunu, bako pwu valatama uvwu avagahile jujwa. 41Avene avakitsigo vwu vapulike tsitsitsi, pwu gukavavipila ava-Jakobu nu-Johani. 42Pwu UJesu akavilanga akatsova navo akata: Mbamańile ava avitsovwa ukuva vakuludeva va vapanzi ukuta vikuvalesehetsaga ulwa vutwa avanu va vene, navavaha va vene mbamańile ukuta vavibite amaka avanu. 43Uńe ndavetsaga vuvule-vule, Bako uńe uvi ita ndivetsage mbaha nakuvajango vi upita ipelage vakuvavombela ńi vanine. 44Nuvi ita ndivetsage ndongotsi kuvajango vi upita avetsage nkivaga vińo ńi vanine. 45Mańa namwene Uńamunu nitsili nkulonda avakumbombela jujwa, bako itsye nkuvavombela avanu, itsye nkuvahomba uvwumi vwa mwene ukuta sive sya kuvavangila vavongosu.

46Pwu vakatsisika mu-Jeliko. Vavwene vwu vihuma mu-Jeliko najujwa navakongi va mwene navanu ikipuga ikyongosu, pwu vakavona umbosu UBalitimai-kwu kuta uńa-Timai–atamile panzila pambale idova isya kudova. 47Vwu apulike vi vi Jesu va mu-Nasaleti iluta pwu akilanga akata: Vi Jesu, vi ńa-Ndaviti undililage ikisa! 48Vakantanila avange avanu vakata: Nunala! Umwene pwu akongeletsa sitso ukwilanga akata: Vi ńa-Ndaviti undililage ikisa! 49Pwu UJesu akima akata: Mungege kunu. Pwu vakatsikungega umbosu vakata: Vwidulusage vuvule imaga, mańa atye mungege. 50Pwu umwene akataga ikilundwa kya mwene pasi, akima akabiha kwa Jesu. 51Pwu UJesu akambutsa akata: Ndigahage ndeti nuve? Umwene umbosu akata: Ndingave ndalolaga amiho vi mańisi vango vi mbaha! 52Umwene UJesu akata: Bihaga lukuponitse lwidiko lwako. Pwu umwene akalola ṅani-ṅani. Pwu akankonga munzila umwu agendaga.

Currently Selected:

Malika 10: Kinga

Highlight

Copy