Malika 11

1Vavwene vwu vahegelye mu-Jelulsalemu vwu vatsisike mu-Betipage namu-Betanija vwu valotsitse pakidugala kya mono, pwu UJesu akasuṅa avakongi va mwene vavili 2akata: Mbihage mbutsenge vulya mulolana navwo. Vwu mutsisike pwu nankatsihave ukulivona ilyana lya ligodovwe-vakungile–ilyu nujyunge umunu nitogili lusiku. Lyu nkavopole mungegele kunu. 3Ngave mbwene ujyunge umunu ikuvavutsa ita muvopola lyiki? Pwu nkatetsage, mańa unkuludeva ikulilonda. Pwu navakatsihave ukuvapa. 4Pwu vakabiha, vakatsikulivona ilyana lya ligodovwe, likungilwe pa ndyango pa nzila–malekano, vakalivopola. 5Vaninye va vanu avimile vakata, muvopola ilyana lya ligodovwe lyiki? 6Vakavavula nduvwu UJesu avalagye, pwu vakavaleka valutage. 7Pwu vakatsikumpa UJesu ilyana lya ligodovwe, vakatandika nisilundwa syavene pa ligodovwe, pwu umwene akitoga. 8Avange avanu avongosu va-katandika isilundwa sya vene munzila. Avange vakadeńa amapagika ga mibiki, nagene vakatandika munzila. 9Pwu navalongwe mbulongolo navakongaga mumbele vakupililanila ukwilanga vakata: Hosyana nsajivwa vuvule uvi ikwitsila mwitavwa lya nkuludeva! 10Lusajivwa vuvule uludeva lwa dada lwa Ndaviti ulukwitsa. Hosyana kukyańa!

11Pwu UJesu akatsisika mu-Jelulsalemu akingila mwa Tempeli. Vwu alolile mwoni, pwu akavona vuhwe. Pwu akahuma akabiha mu-Betanija navakongi va mwene kitsigo navavili. 12Pavusiku vwu vahumile mu-Betanija, pwu umwene akavona jivava inzala. 13Vwu aguvwene unkuju gwa mani amongosu pavutale, pwu akabiha akata ndilole vwu guhupile iseke. Vwu asike pwu akavona gulembile amani gene. Ulwakuva umwaka gwa kuhupa iseke imibiki gukanale. 14Pwu UJesu akatsova kumbiki akata: Pwu sikutsoni nujyunge alalitsaga lusiku iseke pave. Avakongi va mwene vakapulika vwu itsova ili.

15Pwu vakatsisika mu-Jelulsalemu. Umwene UJesu akingila mwa Tempeli, pwu akavahumya voni navagutsaga navagulaga mwa Tempeli akata nisitalati sya vene avananiaga indalama akata nisitamilo sya vagutsangundya akagwisa. 16Akavakilivula avatetsaga tugende ija pa Tempeli vwu vapimbile isinge. 17Akavamańisa akata: Ndita livigilwe mwa kalata ilita: Ińumba jyango jitsovwagwa ukuva ńumba jya kwisajilamwo voni avapanzi, uńe lweli mujipelile ukuta mako jya mińambuda. 18Tsu vakapulika navateketsi avavaha navamańakalata tsitsitsi, pwu vakalonda itsa kumbudila. Vakata: Tugahe ndetinave? Vakadwada ulwakuva vavonaga avanu ikipuga kyoni tsinogye mwitumbu itsu atsovaga umwene. 19Sikutsoni akavona vuhwe pwu akahuma mbutsenge umu, akatsigona mbunge.

20Pavusiku vwu viluta pwu vakavona unkuju gulya gwumile nagi milela. 21Pwu akakumbuhitsa UPetele akata: Vi mańisi, lola unkuju gulya ugukotolage gwumile. 22Pwu UJesu akanda akata: Muvetsaga nulwidiko lwa kumwidikila Unguluve. 23Mańa ndikuvavula ndita: Jilweli-lweli uvi itsova kukidugala iki ita: Vwipimbage vwitage muńanza, aleke nukwinana napadebe vwu itsova, bako alumańage vuvule ukuta tsikwitsaga itsu nditsovile tsikipelaga, vi alavonaga tsitsile jilweli. 24Pwu upwu ndikuvavula ndita: Syoni isyu mudova vwu mukisaja, mulumańage vuvule ukuta tukwupililaga, pwu mulupililaga jilweli. 25Ngave mwimile mukisaja, pwu munsyikilage umunu uvi ndi ninongwa nave, pwu namwene nudadajińo kukyańa ukuta avasyikilage nuńe itsińo inongwa. 26Ngave uńe namukuvasyikila inongwa avajińo, pwu namwene udadajińo kukyańa nalavasyikilaga ulumeno lwińo.

27Pwu vakavuja vakatsisika mu-Jelusalemu. Vwu itsungutila mwa Tempeli, pwu vakahegelela kumwene avateketsi avavaha navamańakalata navańivaha avenekivumbuko. 28Vakambutsa vakata: Itsu vuvomba vuvombela mmaka maki? Veni akupye amaka aga atye uvombage tsitsitsi? 29Umwene UJesu akanda akata: Leka nuńe ndivavutse ilinge ilimeńu. Ngave lyu mumbulile, pwu nuńe ndikuvavulaga amaka ugwu ndivombela tsitsitsi ukwu gahumile. 30Ulwa kwotsa kwa Johani lwahumile ndaku? Nda lwahumile kukyańa pange kuvanu vuvule? Mumbulage. 31Pwu avene vakavulana vwu vikwegile vakata: Lola tungave twita lwahumile kukyańa alata: Pwu namumwidiki kiki? 32Nda tutetsage lwahumile kuvanu vuvule? Bako!–Ulwakuva vavadwadaga avanu, ulwakuva voni vatye UJohani ale namalago jilweli. 33Pwu vakamwanda UJesu vakata: Bako natulumańili, Pwu UJesu akanda akata: Pwu nune nandikuvavulaga ukwu gahumile amaka ugwu ndivombela tsitsitsi.

Currently Selected:

Malika 11: Kinga

Highlight

Copy